Japta 13
Senif
Senif mo sam narafala grup blong Ol Man blong Nifae oli lego ol hom blong olgeta long Sarahemla mo travel i go long graon blong Nifae, long ples ia we Ol narafala Man blong Nifae oli bin laef long hem bifo.
Oli faenem Ol Man blong Leman we oli stap laef long ples ia. Senif mo fo narafala man blong hem oli go insaed long taon ia blong toktok long king. Oli askem King Leman sapos oli save laef long graon blong hem.
King Leman i talem se oli save karem tu long ol taon blong hem. King ia i wantem blong mekem se oli stap long graon blong hem blong mekem se bae oli kam ol slef blong hem.
Ol pipol blong Senif oli bildim ol hom mo oli mekem ol strong wol raonem ol taon blong olgeta. Oli planem plante kaen sid mo frut. Oli gat tu plante animol.
King Leman i talem long ol pipol blong hem se Ol Man blong Nifae oli stap kam strong tumas. I no longtaem Ol Man blong Leman oli bin go mo atakem Ol Man blong Nifae mo stilim ol animol mo ol kaekae blong olgeta we oli planem.
Ol Man blong Nifae oli ron i go long taon blong Nifae. Long ples ia nao Senif i givim ol pipol blong hem ol bonara mo ol aro, ol longfala naef, ol klab mo ol sling. Oli bin go mo faet wetem olgeta Ol Man blong Leman.
Bifo oli faet, Ol Man blong Nifae oli prea, oli askem God blong helpem olgeta. God i bin blesem Ol Man blong Nifae wetem plante moa paoa, mo oli bin winim Ol Man blong Leman.
Afta long faet ia Senif i bin putum ol gad raonem ol taon blong Ol Man blong Nifae. Hem i wantem blong protektem ol pipol blong hem mo ol animol blong olgeta long Ol Man blong Leman.
Ol Man blong Nifae oli laef long pis blong plante yia. Ol man oli bin wok long graon, mo ol woman oli wivim ol tred mo oli bin mekem ol klos.
King Leman i ded mo boe blong hem i kam king. Niufala king ia i sendem ol ami blong hem blong faetem Ol Man blong Nifae.
Ol Man blong Nifae oli bin kasem paoa bakegen long Lod. Oli bin kilimded plante Man blong Leman, mo plante oli bin ronwe.