Talateu ki he ʻUluaki Tohi ʻa Paula kia Tīmoté

ʻOku tau lau ʻi he 1 Tīmoté naʻe faleʻi ʻe Paula ʻa Tīmote, ko ha taki ʻo e Siasí ʻi ʻEfesō, ke fakapapauʻi naʻe akoʻi ʻa e tokāteline totonú pea ʻoua ʻe fakangofua ha meʻa hala ʻoku manakoa ke taki halaʻi mei he ngaahi akonaki ʻo e ongoongoleleí. Naʻá ne akoʻi ʻa Tīmote ʻo kau ki he lakanga ʻo e pīsopé mo e tīkoní pea aleaʻi e ngaahi fie maʻu kiate kinautolu ʻoku ngāue ʻi he ngaahi tuʻunga ko ʻení. Naʻe toe fakamatalaʻi foki ʻe Paula ʻene houngaʻia moʻoni ʻi he ʻaloʻofa naʻá ne maʻu meia Sīsū Kalaisi ʻi he taimi naʻá ne ului aí. ʻE lava ke tokoni hono ako e 1 Tīmoté ke fakalahi e ʻilo ʻa e kau akó ki he mahuʻinga ʻo hono akoʻi e tokāteline totonú ʻi he Siasí. ʻE lava foki ke fakalahi e houngaʻia ʻa e kau akó ʻi he ʻaloʻofa ʻa e Fakamoʻuí pea mo e fatongia mahuʻinga ʻo e kau pīsopé mo e kau taki kehe ʻo e Siasí.

Naʻe tohi ʻe Paula e 1 Tīmote (vakai, 1 Tīmote 1:1).

Ne ngalingali ne fai e ʻUluaki Tohi ʻa Paula kia Tīmoté ʻi ha taimi ʻi he vahaʻa ʻo e A.D. 64 mo e 65, lolotonga e ʻi Masitōnia ʻa Paulá (vakai, Fakahinohino ki he Ngaahi Folofolá, “Ngaahi Tohi ʻa Paulá,” scriptures.lds.org; 1 Tīmote 1:3). Kimuʻa hono fai e tohi ko ʻení, naʻe tukuange ʻa Paula mei hono tuku pōpula (tuku pōpula ʻi hono nofoʻangá) ʻi ha taʻu ʻe ua ʻi Loma pea ngalingali naʻá ne fefonongaʻaki lahi, ʻo ʻaʻahi ki he ngaahi feituʻu naʻá ne fokotuʻu ai ha ngaahi kolo ʻo e Siasí kimuʻa (vakai, Bible Dictionary, “Pauline Epistles”).

Naʻe fai ʻe Paula e tohi ko ʻení kia Tīmote, ʻa ia naʻe ngāue mo Paula lolotonga ʻene fononga fakafaifekau hono uá (vakai, Ngāue 16:3). Hili ʻena ngāue fakafaifekaú, naʻe hokohoko atu ʻa Tīmote ke hoko ko ha faifekau faivelenga mo e taki ʻo e Siasí (vakai, Ngāue 19:22; Filipai 2:19) mo e taha ʻo e kaungā-ngāue falalaʻanga taha ʻo Paulá (vakai, 1 Kolinitō 4:17). Naʻe ui ʻe Paula ʻa Tīmote ko hono “foha moʻoni ʻi he tuí” (1 Tīmote 1:2). Ko e tamai ʻa Tīmoté ko ha Senitaile mei Kalisi, ka naʻá ne maʻu ha faʻē mo ha kuifefine Siu angatonu naʻá na akoʻi mo tokoniʻi ia ke ako e folofolá (vakai, Ngāue 16:1; 2 Tīmote 1:5; 3:15).

ʻI he taimi naʻe fai ai ʻa e tohí ni, naʻe hoko ʻa Tīmote ko ha taki ʻo e Siasí ʻi ʻEfesō (vakai, 1 Tīmote 1:3). Naʻe fokotuʻu mai ʻe Paula naʻe fakafehuʻia ʻe ha niʻihi ʻo e kāingalotú ʻa e tuʻunga fakatakimuʻa ʻa Tīmoté koeʻuhí naʻá ne kei siʻi (vakai, 1 Tīmote 4:12). Naʻe fakataumuʻa ʻa Paula ke ʻaʻahi kia Tīmote, ka naʻe ʻikai ke ne fakapapauʻi pe te ne lava ʻo fai ia (vakai, 1 Tīmote 3:14; 4:13). Naʻe fai ʻe Paula ʻene tohi kia Tīmoté ke tokoni ke mahino lelei ange ki he taki kei siʻi ʻo e Siasí hono ngaahi fatongiá.

ʻOku faʻa ui e ngaahi tohi ʻa Paula ʻoku ʻiloa ko e 1 Tīmote, 2 Tīmote mo Taitusí ko e ngaahi Tohi fakatakimuʻa koeʻuhí he ʻoku ʻi ai e faleʻi ʻa Paula ki he kau tauhi pe kau taki ʻi he Siasí (vakai, Bible Dictionary ʻi he tatau faka-Pilitānia ʻo e Tohi Tapu ʻa e Siasí, “Pauline Epistles”). ʻOku maʻu ʻa e foʻi lea tauhí mei he lea faka-Latina ki he “tauhi-sipí.”

Naʻe fokotuʻu mai ʻe Paula ha ngaahi fakahinohino ke tokoni ke ʻiloʻi ʻe Tīmote ha niʻihi moʻui taau ke hoko ko e kau pīsope pe kau tīkoni (vakai, 1 Tīmote 3). Naʻe tokoni e ngaahi fakahinohino ʻa Paulá ke fakaʻilongaʻi ʻa e fatongia ʻo e kau taki ʻo e Siasí ke tokonaki e ngaahi fie maʻu fakatuʻasino mo fakalaumālie ʻo e kāingalotú (vakai, 1 Tīmote 5). Naʻe fakamatala foki ʻa Paula ki ha fakakaukau hala angamaheni ʻo e moʻui līʻoá—ʻa e tui ʻe lava ke aʻusia ha tuʻunga fakalaumālie lahi ange ʻi hono taʻofi fakamālohiʻi kitá. Hangē ko ʻení, naʻe fakatokanga ʻa Paula ʻe hē mei he moʻoní ha niʻihi ʻo e kāingalotu ʻo e Siasí mo poupouʻi ʻa e tui ko ia ʻoku totonu ke taʻofi ʻa e malí (vakai, 1 Tīmote 4:1–3). Naʻe ʻoange ʻe Paula ha ngaahi fakahinohino kia Tīmote ke akoʻi e tokāteline totonú, ke fakafepakiʻi e meʻá ni mo ha ngaahi ivi tākiekina kehe (vakai, 1 Tīmote 1:3–4, 10; 4:1–6, 13, 16).

1 Tīmote 1 Ko e fakatokanga ʻa Paula telia e ngaahi akonaki halá. ʻOkú ne vikiviki ʻi he ʻEiki ko Sīsū Kalaisí, ʻa ia naʻe ʻomi e ʻaloʻofa lahi ke fakamoʻui ia. ʻOku ui ʻe Paula ia ko e “fungani” (1 Tīmote 1:15), pe kovi taha ʻo e kau faiangahalá, ʻi he ʻuhinga ki heʻene fakafepakiʻi ʻa e kau Kalisitiané kimuʻa ʻi heʻene uluí. ʻOku toe fakapapauʻi ʻe Paula ki he niʻihi kehé ʻe tokoniʻi foki kinautolu ʻe he ʻaloʻofa ʻa Kalaisí.

1 Tīmote 2–3 ʻOku akoʻi ʻe Paula fekauʻaki mo e fie maʻu ki he lotú mo e moihū totonú. ʻOkú ne akoʻi ko Sīsū Kalaisi ʻa e totongi huhuʻi maʻatautolu kotoa pē pea ko hotau Fakalaloa ia ki he Tamaí. ʻOkú ne fakahinohinoʻi e kakai tangata mo fafine ʻi he founga ke nau fakafeangai ai lolotonga e lotú. ʻOkú ne fokotuʻutuʻu mai e ngaahi fie maʻu ki he kau pīsopé mo e kau tīkoní. ʻOkú ne fakamatalaʻi ko e lilo ʻo e anga faka-ʻOtuá ʻa e afeitaulalo ʻa Sīsū Kalaisí, ko ʻEne moʻui haohaoa ʻi he māmaní, pea mo ʻEne Hāʻele Hake ki he nāunaú.

1 Tīmote 4 Ko e fakatokanga ʻa Paula kia Tīmote ʻe kākaaʻi ha kakai ʻe niʻihi ʻe he ngaahi akonaki hala fekauʻaki mo e ngaahi founga ʻo e nofo-malí mo e kaí. ʻOkú ne lea kau ki he mahuʻinga ʻo e nofo-malí mo hono maʻu e ngaahi fakatupu ʻa e ʻOtuá ʻi he loto fakafetaʻí. ʻOku akoʻi ʻe Paula kia Tīmote ʻa e founga ke fehangahangai ai mo e ngaahi akonaki hala ʻi hono kuongá pea mo kinautolu ʻe vave ʻene hoko maí.

1 Tīmote 5–6 Ko e ʻoange ʻe Paula kia Tīmote ha ngaahi fakahinohino ke tokoni ʻi heʻene tokangaʻi e ngaahi fie maʻu ʻa e toulekeleká, kakai kei talavoú, kau uitoú, kaumātuʻá, mo e kau pōpulá. ʻOku fakamatalaʻi ʻe Paula kia Tīmote ʻo kau ki he kau akonaki loí. ʻOkú ne fakatokanga “ko e ʻofa ki he koloá, ko e tefito ia ʻo e kovi kotoa pē” (1 Tīmote 6:10) pea fakahinohinoʻi ʻa Tīmote ʻi he founga ʻe lava ke maʻu ai ʻe he Kāingalotú ʻa e moʻui taʻengatá.