ໂຈເຊັບ ສະມິດ
ໂດຍ ແອວເດີ ນຽວ ແອວ ແອນເດີເຊັນ
ແຫ່ງສະພາອັກຄະສາວົກສິບສອງ
ພຣະເຢຊູໄດ້ເລືອກຜູ້ຊາຍທີ່ບໍລິສຸດ, ຜູ້ຊາຍທີ່ຊອບທຳ, ໃຫ້ນຳພາການຟື້ນຟູຂອງຄວາມສົມບູນແຫ່ງພຣະກິດຕິຄຸນຂອງພຣະອົງ. ພຣະອົງໄດ້ເລືອກເອົາ ໂຈເຊັບ ສະມິດ.
ໃນການຢ້ຽມຢາມເທື່ອທຳອິດຂອງເພິ່ນຕໍ່ສາດສະດາ ໂຈເຊັບ ສະມິດ ຕອນເພິ່ນມີອາຍຸ 17 ປີ, ທູດສະຫວັນໄດ້ເອີ້ນຊື່ຂອງ ໂຈເຊັບ ແລະ ໄດ້ບອກເພິ່ນວ່າ ເພິ່ນ, ໂມໂຣໄນ, ເປັນທູດສະຫວັນທີ່ຖືກສົ່ງມາຈາກທີ່ປະທັບຂອງພຣະເຈົ້າ ແລະ ວ່າພຣະເຈົ້າໄດ້ມີວຽກງານໃຫ້ເພິ່ນເຮັດ. ຂໍໃຫ້ຄິດເບິ່ງວ່າ ໂຈເຊັບໄດ້ຄິດຫຍັງແດ່ເມື່ອທູດສະຫວັນໄດ້ບອກເພິ່ນວ່າຊື່ຂອງເພິ່ນຈະມີຢູ່ທັງທາງດີ ແລະ ທາງຊົ່ວໃນບັນດາທຸກປະຊາຊາດ, ທຸກຕະກຸນ ແລະ ທຸກພາສາທັງໝົດ.1 ບາງທີຄວາມຕົກໃຈໃນສາຍຕາຂອງ ໂຈເຊັບ ໄດ້ເຮັດໃຫ້ໂມໂຣໄນກ່າວຊ້ຳອີກ, ວ່າທັງຄວາມດີ ແລະ ຄວາມຊົ່ວຈະຖືກກ່າວເຖິງເພິ່ນໃນບັນດາຜູ້ຄົນທັງປວງ.2
ສິ່ງດີທີ່ຖືກກ່າວເຖິງ ໂຈເຊັບ ສະມິດ ນັ້ນໄດ້ມີມາຢ່າງຊ້າໆ; ແຕ່ສິ່ງທີ່ຊົ່ວນັ້ນຖືກເລີ່ມກ່າວເຖິງຢ່າງທັນທີ. ໂຈເຊັບ ໄດ້ຂຽນວ່າ: “ຊ່າງປະຫລາດໃຈແທ້ໆ ທີ່ເດັກນ້ອຍທີ່ບໍ່ມີໃຜຮູ້ຈັກ ... ໄດ້ເປັນຜູ້ມີຄວາມສຳຄັນພໍທີ່ຈະດຶງດູດຄວາມສົນໃຈ ... ຂອງຄວາມຄິດທີ່ຂົມຂື່ນ ແລະ ສົບປະໝາດ.”3
ໃນເມື່ອບາງຄົນໄດ້ຮັກ ໂຈເຊັບ ຫລາຍຂຶ້ນເທົ່າໃດ, ຄົນອື່ນໆກໍມີເຈດຕະນາຮ້າຍຕໍ່ເພິ່ນຫລາຍຂຶ້ນເທົ່ານັ້ນ. ຕອນມີອາຍຸ 38 ປີ, ເພິ່ນຖືກຄາດຕະກຳໂດຍກຸ່ມອັນຕະພານຂອງຜູ້ຊາຍ 150 ຄົນທີ່ໄດ້ທາໜ້າດ່າງດຳ.4 ເຖິງແມ່ນວ່າຊີວິດຂອງສາດສະດາໄດ້ສິ້ນສຸດລົງຢ່າງກະທັນຫັນ, ສິ່ງທີ່ດີ ແລະ ຊົ່ວທີ່ຖືກກ່າວເຖິງ ໂຈເຊັບ ນັ້ນຫາກໍໄດ້ເລີ່ມຕົ້ນ.
ເຮົາຄວນປະຫລາດໃຈບໍກ່ຽວກັບສິ່ງທີ່ດີ ແລະ ຊົ່ວທີ່ຖືກກ່າວກ່ຽວກັບເພິ່ນ? ອັກຄະສາວົກໂປໂລ ຖືກເອີ້ນວ່າເປັນບ້າ ແລະ ເສຍຈິດ.5 ພຣະຜູ້ຊ່ອຍໃຫ້ລອດທີ່ຊົງຮັກຂອງເຮົາ, ພຣະບຸດຂອງພຣະເຈົ້າ, ກໍຖືກເອີ້ນວ່າເປັນຄົນກິນເກີນສ່ວນ ແລະ ມັກເມົາ, ແລະ ວ່າຜີມານຮ້າຍໄດ້ເຂົ້າສິງ.6
ພຣະຜູ້ເປັນເຈົ້າໄດ້ບອກ ໂຈເຊັບ ເຖິງຈຸດໝາຍປາຍທາງຂອງເພິ່ນວ່າ:
ທີ່ສຸດຂອງແຜ່ນດິນໂລກຈະສືບຖາມກ່ຽວກັບນາມຂອງເພິ່ນ, ແລະ ຄົນໂງ່ຈ້າຈະເຫັນວ່າເພິ່ນສົມຄວນທີ່ຈະຖືກເຍາະເຍີ້ຍ, ແລະ ນະລົກຈະລຸກໄໝ້ຕໍ່ຕ້ານເພິ່ນ;
ໃນຂະນະທີ່ຜູ້ທີ່ມີຈິດໃຈບໍລິສຸດ, ... ຄົນສະຫລາດ, ... ແລະ ຜູ້ມີຄຸນນະທຳ, ຈະສະແຫວງຫາ ... ພອນຢູ່ສະເໝີຈາກມືຂອງເພິ່ນ.7
ເປັນຫຍັງພຣະຜູ້ເປັນເຈົ້າຈຶ່ງອະນຸຍາດໃຫ້ມີການກ່າວເຖິງສິ່ງບໍ່ດີເກີດຂຶ້ນພ້ອມກັນກັບການກ່າວເຖິງສິ່ງດີ? ເຫດຜົນຢ່າງໜຶ່ງຄື ການຕໍ່ຕ້ານເລື່ອງຂອງພຣະເຈົ້າ ຊຸກຍູ້ຜູ້ຄົນທີ່ສະແຫວງຫາຄວາມຈິງໃຫ້ອະທິຖານ ເພື່ອຫາຄຳຕອບ.8
ໂຈເຊັບ ສະມິດ ເປັນສາດສະດາແຫ່ງການຟື້ນຟູ. ວຽກງານທາງຝ່າຍວິນຍານຂອງເພິ່ນໄດ້ເລີ່ມຕົ້ນດ້ວຍການປະກົດຂອງພຣະບິດາ ແລະ ພຣະບຸດ, ຕິດຕາມໂດຍການຢ້ຽມຢາມຈາກສະຫວັນຫລາຍໆເທື່ອ. ເພິ່ນໄດ້ເປັນເຄື່ອງມືໃນພຣະຫັດຂອງພຣະເຈົ້າ ໃນການນຳພຣະຄຳພີສັກສິດອອກມາ, ໄດ້ເປີດເຜີຍຄຳສອນທີ່ສູນເສຍໄປ ແລະ ຟື້ນຟູຖານະປະໂລຫິດ. ຄວາມສຳຄັນຂອງວຽກງານຂອງ ໂຈເຊັບ ຮຽກຮ້ອງຫລາຍກວ່າການພິຈາລະນາທາງສະຕິປັນຍາ; ມັນຮຽກຮ້ອງໃຫ້ເຮົາ, ເໝືອນດັ່ງ ໂຈເຊັບ, “ທູນຂໍຈາກພຣະເຈົ້າ.”9 ຄຳຖາມທາງຝ່າຍວິນຍານຄວນໄດ້ຮັບຄຳຕອບທາງຝ່າຍວິນຍານ. ພຣະເຈົ້າຕອບຄຳອະທິຖານຈາກພຣະເຈົ້າ.
ຫລາຍຄົນທີ່ບໍ່ເຊື່ອໃນວຽກງານແຫ່ງການຟື້ນຟູກໍບໍ່ເຊື່ອວ່າທູດສະຫວັນກ່າວກັບມະນຸດຢູ່ເທິງໂລກ. ເຂົາເຈົ້າຈະເວົ້າວ່າມັນເປັນໄປບໍ່ໄດ້, ວ່າທູດສະຫວັນໄດ້ນຳແຜ່ນຈາລຶກທອງຄຳມາໃຫ້ ແລະ ຖືກແປໂດຍອຳນາດຂອງພຣະເຈົ້າ. ເພາະຄວາມບໍ່ເຊື່ອນັ້ນ, ເຂົາເຈົ້າປະຕິເສດປະຈັກພະຍານຂອງ ໂຈເຊັບ ຢ່າງໄວ, ແລະ ຫລາຍຄົນກໍໄດ້ເຮັດຄວາມຊົ່ວ ເຮັດໃຫ້ຊີວິດຂອງ ໂຈເຊັບ ເສື່ອມເສຍ ແລະ ກ່າວຄວາມຕົວະກ່ຽວກັບຄຸນລັກສະນະຂອງເພິ່ນ.
ເຮົາກໍເສົ້າສະຫລົດໃຈເປັນພິເສດ ເມື່ອຄົນທີ່ເຄີຍນັບຖື ໂຈເຊັບ ໃນຄັ້ງໜຶ່ງ ບັດນີ້ຖອຍຕົວໄປຈາກຄວາມເຊື່ອໝັ້ນຂອງເຂົາ ແລະ ແລ້ວຕຳນິວິຈານສາດສະດາ.10
ຄັ້ງໜຶ່ງ ແອວເດີ ນຽວ ເອ ແມ໊ກສະແວວ ໄດ້ກ່າວວ່າ, “ການພະຍາຍາມຈະສຶກສາກ່ຽວກັບສາດສະໜາຈັກຈາກຜູ້ທີ່ໄດ້ໜີໄປຈາກສາດສະໜາຈັກແລ້ວ ກໍເໝືອນດັ່ງການສຳພາດ ຢູດາ ເພື່ອຈະເຂົ້າໃຈພຣະເຢຊູ. ຜູ້ທີ່ໄດ້ໜີໄປຈາກ ຈະບອກເຖິງເລື່ອງຂອງເຂົາເຈົ້າຫລາຍກວ່າກ່ຽວກັບອົງການທີ່ເຂົາເຈົ້າໄດ້ໜີໄປຈາກ.”11
ພຣະເຢຊູໄດ້ກ່າວວ່າ, “ຈົ່ງຮັກສັດຕູຂອງເຈົ້າ, ... ແລະ ອະທິຖານເພື່ອຜູ້ທີ່ຂົ່ມເຫັງເຈົ້າ.”12 ຂໍໃຫ້ເຮົາຈົ່ງມອບຄວາມເມດຕາໃຫ້ແກ່ຜູ້ທີ່ຕຳນິວິຈານ ໂຈເຊັບ ສະມິດ, ໂດຍທີ່ຮູ້ຢູ່ໃນຫົວໃຈຂອງເຮົາວ່າ ເພິ່ນເປັນສາດສະດາຂອງພຣະເຈົ້າ ແລະ ຄິດເສຍວ່າ ໂມໂຣໄນກໍໄດ້ບອກໄວ້ລ່ວງໜ້າເປັນເວລາດົນນານແລ້ວ ກ່ຽວກັບເລື່ອງນີ້.
ເຮົາຄວນໂຕ້ຕອບແນວໃດຕໍ່ຜູ້ທີ່ສືບຖາມທີ່ຈິງໃຈ ທີ່ກັງວົນກ່ຽວກັບຄຳຄິດເຫັນທີ່ບໍ່ດີ ທີ່ເຂົາໄດ້ຍິນກ່ຽວກັບສາດສະດາ ໂຈເຊັບ ສະມິດ? ແນ່ນອນ, ເຮົາຈະຕ້ອນຮັບຄຳຖາມທີ່ຊື່ສັດ ແລະ ຈິງໃຈສະເໝີ.
ເພື່ອຈະສົງໄສກ່ຽວກັບຄຸນລັກສະນະຂອງ ໂຈເຊັບ, ເຮົາອາດແບ່ງປັນຖ້ອຍຄຳຂອງຄົນຫລາຍໆພັນຄົນທີ່ໄດ້ຮູ້ຈັກເພິ່ນຢ່າງໃກ້ຊິດ ແລະ ຜູ້ທີ່ໄດ້ສະລະຊີວິດຂອງເຂົາເຈົ້າເພື່ອວຽກງານທີ່ເພິ່ນໄດ້ຊ່ອຍສະຖາປະນາຂຶ້ນມາ. ຈອນ ເທເລີ, ຜູ້ທີ່ຖືກຍິງສີ່ເທື່ອໂດຍກຸ່ມອັນຕະພານທີ່ໄດ້ຂ້າ ໂຈເຊັບ, ຕໍ່ມາປະກາດວ່າ: “ຂ້າພະເຈົ້າເປັນພະຍານຢູ່ຕໍ່ໜ້າພຣະເຈົ້າ, ທູດສະຫວັນ, ແລະ ມະນຸດ, ວ່າ [ໂຈເຊັບ] ໄດ້ເປັນຄົນດີ, ມີກຽດຕິຍົດ, [ແລະ] ມີຄຸນນະທຳ ... [ແລະ] ວ່າວິທີທີ່ເພິ່ນໄດ້ປະພຶດຕົນທັງທາງຊີວິດສ່ວນຕົວ ແລະ ຢ່າງເປີດເຜີຍ ແມ່ນເຊື່ອຖືໄດ້ ແລະ ວ່າເພິ່ນໄດ້ມີຊີວິດ ແລະ ໄດ້ຕາຍໃນຖານະຄົນຂອງພຣະເຈົ້າ.13
ເຮົາອາດເຕືອນໃຈຜູ້ຄົນທີ່ຢາກຮູ້ກ່ຽວກັບສາດສະໜາຈັກແທ້ໆ ວ່າຂໍ້ມູນໃນອິນເຕີແນັດນັ້ນ ບໍ່ມີເຄື່ອງຕອງຂໍ້ມູນທີ່ບໍ່ເປັນຄວາມຈິງອອກໄປ. ຂໍ້ມູນບາງຢ່າງ, ບໍ່ວ່າຈະເປັນຕາເຊື່ອຫລາຍປານໃດກໍບໍ່ແມ່ນຄວາມຈິງແນ່ນອນ.
ເມື່ອຫລາຍປີກ່ອນຂ້າພະເຈົ້າໄດ້ອ່ານບົດຄວາມໃນວາລະສານ Time ທີ່ໄດ້ລາຍງານເຖິງຈົດໝາຍທີ່ຖືກຄົ້ນພົບ, ອ້າງວ່າ ມາຕິນ ແຮຣິສ ໄດ້ຂຽນ, ທີ່ຂັດກັນກັບເລື່ອງລາວຂອງ ໂຈເຊັບ ສະມິດ ທີ່ກ່ຽວກັບການພົບເຫັນແຜ່ນຈາລຶກຂອງພຣະຄຳພີມໍມອນ.14
ສະມາຊິກຫລາຍຄົນໄດ້ໜີອອກໄປຈາກສາດສະໜາຈັກເພາະເອກະສານນັ້ນ.15
ໜ້າເສົ້າໃຈ ທີ່ເຂົາເຈົ້າໄດ້ໜີອອກໄປໄວໂພດ. ຫລາຍເດືອນຕໍ່ມາ ຜູ້ຊ່ຽວຊານໄດ້ຄົ້ນພົບຈົດໝາຍທີ່ເປັນການຫລອກລວງທັງໝົດ (ແລະ ຜູ້ທີ່ໄດ້ປອມແປງຈົດໝາຍນັ້ນກໍໄດ້ສາລະພາບ).16 ທ່ານອາດສົງໃສສິ່ງທີ່ທ່ານໄດ້ຍິນໃນຂ່າວ, ແຕ່ທ່ານບໍ່ຈຳເປັນຕ້ອງສົງໃສປະຈັກພະຍານຂອງສາດສະດາຂອງພຣະເຈົ້າ.
ເຮົາອາດເຕືອນໃຈຜູ້ທີ່ສືບຖາມວ່າ ຂໍ້ມູນບາງຢ່າງກ່ຽວກັບ ໂຈເຊັບ, ເຖິງວ່າຈິງ, ຍັງອາດຖືກສະເໜີແບບບໍ່ເຂົ້າກັບສະພາບຂອງເວລາ ແລະ ສະຖານະການຂອງເພິ່ນ.
ແອວເດີ ຣະໂຊ ເອັມ ແນວສັນ ໄດ້ສະແດງໃຫ້ເຫັນເຖິງຈຸດນີ້. ເພິ່ນໄດ້ກ່າວວ່າ: “ຂ້າພະເຈົ້າໄດ້ຮັບຕຳແໜ່ງເປັນຜູ້ປຶກສາໃຫ້ແກ່ລັດຖະບານຂອງສະຫະລັດ ໃນສູນຄວບຄຸມເຊື້ອໂລກແຫ່ງຊາດໃນເມືອງ ແອແລນຕາ, ລັດຈໍເຈຍ. ຄັ້ງໜຶ່ງຕອນທີ່ລໍຖ້າລົດຕັກຊີ ທີ່ຈະພາຂ້າພະເຈົ້າໄປສົ່ງທີ່ສະໜາມບິນ ຫລັງຈາກກອງປະຊຸມຈົບລົງແລ້ວ, ຂ້າພະເຈົ້າໄດ້ນອນຢຽດຢູ່ທີ່ເດີ່ນຫຍ້າຝີງແດດຢ່າງສະບາຍ ກ່ອນຈະກັບມາຫາ ... ອາກາດທີ່ໜາວເຢັນຂອງລັດຢູທາ. ... ຕໍ່ມາຂ້າພະເຈົ້າໄດ້ຮັບຮູບໃນໄປສະນີທີ່ນັກຖ່າຍພາບໄດ້ຖ່າຍເອົາໄວ້ດ້ວຍກ້ອງທີ່ຖ່າຍທາງໄກ, ທີ່ເກັບເອົາເວລາທີ່ພັກຜ່ອນໃນເດີ່ນຫຍ້າ. ໃຕ້ຮູບນັ້ນມີຂໍ້ຄວາມວ່າ, ‘ທີ່ປຶກສາຂອງລັດຖະບານຢູ່ທີ່ສູນແຫ່ງຊາດ.’ ຮູບພາບນັ້ນຈິງ, ຂໍ້ຄວາມນັ້ນກໍຈິງ, ແຕ່ຄວາມຈິງນັ້ນຖືກນຳໃຊ້ເພື່ອສົ່ງເສີມຄວາມນຶກຄິດທີ່ບໍ່ຈິງ.”17 ພວກເຮົາຈະບໍ່ປະຖິ້ມສິ່ງທີ່ພວກເຮົາຮູ້ວ່າເປັນຄວາມຈິງ ເພາະການທີ່ພວກເຮົາບໍ່ເຂົ້າໃຈກ່ຽວກັບບາງສິ່ງ.
ເຮົາອາດເຕືອນໃຈຜູ້ທີ່ສືບຖາມວ່າ ໂຈເຊັບ ບໍ່ໄດ້ເປັນຄົນດຽວທີ່ທູດສະຫວັນໄດ້ມາຢ້ຽມຢາມ.
ສັກຂີພະຍານຂອງພຣະຄຳພີມໍມອນໄດ້ຂຽນວ່າ: “ພວກເຮົາປະກາດດ້ວຍຖ້ອຍຄຳທີ່ມີສະຕິສຳປະຊັນຍະວ່າ, ທູດອົງໜຶ່ງຂອງພຣະເຈົ້າໄດ້ລົງມາຈາກສະຫວັນ, ແລະ ພວກເຮົາເຫັນ ແລະ ເບິ່ງແຜ່ນຈາລຶກ.”18 ເຮົາສາມາດອ້າງເຖິງສັກຂີພະຍານຄົນອື່ນອີກດ້ວຍ.19
ຜູ້ສືບຖາມທີ່ຈິງໃຈຄວນເຫັນການເຜີຍແຜ່ພຣະກິດຕິຄຸນທີ່ໄດ້ຮັບການຟື້ນຟູ ວ່າເປັນຜົນງານຂອງວຽກງານຂອງພຣະຜູ້ເປັນເຈົ້າຜ່ານສາດສະດາ.
ໃນເວລານີ້ກໍມີສະຖານທີ່ຮ່ວມນະມັດສະການ 29,000 ແຫ່ງ ແລະ ຜູ້ສອນສາດສະໜາ 88,000 ຄົນທີ່ກຳລັງສອນພຣະກິດຕິຄຸນຕະຫລອດທົ່ວໂລກ. ໄພ່ພົນຍຸກສຸດທ້າຍຫລາຍລ້ານຄົນກຳລັງສະແຫວງຫາທີ່ຈະຕິດຕາມພຣະເຢຊູຄຣິດ, ດຳລົງຊີວິດຢູ່ຢ່າງມີກຽດ, ດູແລຄົນຍາກຈົນ, ແລະ ສະລະເວລາ ແລະ ພອນສະຫວັນເພື່ອຊ່ອຍເຫລືອຄົນອື່ນ.
ພຣະເຢຊູໄດ້ກ່າວວ່າ:
“ຕົ້ນໄມ້ດີເກີດຜົນບໍ່ດີກໍບໍ່ຫ່ອນເປັນ, ແລະ ຕົ້ນໄມ້ບໍ່ດີເກີດຜົນດີກໍບໍ່ຫ່ອນໄດ້. ...
“... ດ້ວຍເຫດນັ້ນ ພວກເຈົ້າຈະຮູ້ຈັກຜູ້ທຳນາຍປອມດ້ວຍການກະທຳຂອງພວກເຂົາ.”20
ຄຳອະທິບາຍກໍເປັນທີ່ໜ້າເຊື່ອຖື, ແຕ່ຜູ້ສືບຖາມທີ່ຈິງໃຈບໍ່ຄວນເພິ່ງອາໄສສິ່ງນີ້ເທົ່ານັ້ນ ເພື່ອກຳນົດການຄົ້ນຄວ້າຫາຄວາມຈິງຂອງເຂົາ.
ຄົນທີ່ມີຄວາມເຊື່ອຖືແຕ່ລະຄົນຕ້ອງການ ການຢືນຢັນທາງວິນຍານ ເຖິງພາລະກິດແຫ່ງສະຫວັນ ແລະ ຄຸນລັກສະນະຂອງສາດສະດາ ໂຈເຊັບ ສະມິດ. ສິ່ງນີ້ເປັນຄວາມຈິງສຳລັບທຸກຍຸກທຸກສະໄໝ. ຄຳຖາມທາງວິນຍານສົມຄວນຈະໄດ້ຮັບຄຳຕອບທາງວິນຍານຈາກພຣະເຈົ້າ.
ເມື່ອບໍ່ດົນມານີ້ຕອນຂ້າພະເຈົ້າຢູ່ທີ່ພາກຕາເວັນອອກຂອງສະຫະລັດອາເມຣິກາ, ອາດີດຜູ້ສອນສາດສະໜາໄດ້ເວົ້າລົມກັບຂ້າພະເຈົ້າກ່ຽວກັບເພື່ອນຂອງລາວຄົນໜຶ່ງ ຜູ້ທີ່ສັບສົນຫລາຍກັບຂໍ້ມູນທີ່ລາວໄດ້ຮັບກ່ຽວກັບສາດສະດາ ໂຈເຊັບ ສະມິດ. ເຂົາເຈົ້າໄດ້ສົນທະນາກັນຫລາຍເທື່ອ, ແລະ ອາດີດຜູ້ສອນສາດສະໜາກໍເບິ່ງຄືວ່າມີຄວາມສົງໃສບາງຢ່າງ ທີ່ເປັນຜົນສະທ້ອນຈາກການສົນທະນານັ້ນ.
ເຖິງແມ່ນວ່າຂ້າພະເຈົ້າໄດ້ຫວັງວ່າລາວຈະສາມາດເສີມຄວາມເຂັ້ມແຂງໃຫ້ແກ່ເພື່ອນຂອງລາວ, ແຕ່ຂ້າພະເຈົ້າຮູ້ສຶກເປັນຫ່ວງນຳປະຈັກພະຍານຂອງລາວ. ອ້າຍເອື້ອຍນ້ອງທັງຫລາຍ, ຂ້າພະເຈົ້າຂໍໃຫ້ຄຳຕັກເຕືອນແກ່ທ່ານວ່າ: ທ່ານຈະຊ່ອຍຄົນອື່ນບໍ່ໄດ້ ຖ້າຫາກສັດທາຂອງທ່ານເອງນັ້ນບໍ່ໝັ້ນຄົງ.
ສອງສາມອາທິດກ່ອນ ຂ້າພະເຈົ້າໄດ້ຂຶ້ນເຄື່ອງບິນໄປອາເມຣິກາໃຕ້. ຜູ້ບໍລິການໄດ້ແນະນຳຄວາມສົນໃຈຂອງເຮົາໄປຫາວິດີໂອເລື່ອງຄວາມປອດໄພ. ພວກເຮົາໄດ້ຮັບຄຳຕັກເຕືອນວ່າ, “ມັນອາດບໍ່ເກີດຂຶ້ນ, ແຕ່ຖ້າຫາກອາກາດໃນເຄື່ອງບິນປ່ຽນແປງ, ຝາຕູ້ເທິງບ່ອນນັ່ງຂອງທ່ານຈະເປີດອອກ ແລະ ຈະມີໜ້າກາກອາຍອອກຊີເຍັນຕົກລົງມາ. ຖ້າສິ່ງນີ້ເກີດຂຶ້ນ, ຈົ່ງຢື້ມືຂຶ້ນ ແລະ ດຶງເອົາໜ້າກາກນັ້ນມາຫາທ່ານ. ເອົາໜ້າກາກນັ້ນໃສ່ດັງ ແລະ ປາກຂອງທ່ານ. ດຶງເອົາຢາງຮັດນັ້ນອ້ອມຫົວຂອງທ່ານ ແລະ ປັບມັນຕາມທີ່ຈຳເປັນ.” ແລ້ວ, ກໍມີຄຳເຕືອນນີ້ວ່າ: “ຂໍໃຫ້ປັບໜ້າກາກຂອງທ່ານເອງກ່ອນ, ກ່ອນຈະຊ່ອຍຄົນອື່ນ.”
ສິ່ງບໍ່ດີທີ່ໄດ້ກ່າວອອກໄປກ່ຽວກັບ ສາດສະດາ ໂຈເຊັບ ສະມິດ ຈະມີຫລາຍຂຶ້ນຂະນະທີ່ເຮົາກ້າວໄປສູ່ການສະເດັດມາຄັ້ງທີສອງຂອງພຣະຜູ້ຊ່ອຍໃຫ້ລອດ. ຂໍ້ຄວາມທີ່ບໍ່ຈິງທັງໝົດ ແລະ ການຫລອກລວງທີ່ສັງເກດເຫັນຍາກ ຈະບໍ່ຫລຸດຜ່ອນລົງ. ຈະມີສະມາຊິກໃນຄອບຄົວ ແລະ ໝູ່ເພື່ອນທີ່ຈະຕ້ອງການຄວາມຊ່ອຍເຫລືອຈາກທ່ານ. ບັດນີ້ເຖິງເວລາແລ້ວ ທີ່ຈະປັບໜ້າກາກອອກຊີເຍັນທາງວິນຍານຂອງທ່ານເອງ ເພື່ອວ່າທ່ານຈະຕຽມພ້ອມທີ່ຈະຊ່ອຍຄົນອື່ນ ຜູ້ທີ່ກຳລັງສະແຫວງຫາຄວາມຈິງ.21
ປະຈັກພະຍານເຖິງ ສາດສະດາ ໂຈເຊັບ ສະມິດ ສາມາດມີມາຢ່າງແຕກຕ່າງກັນຕໍ່ເຮົາແຕ່ລະຄົນ. ມັນອາດຈະມາເມື່ອທ່ານຄຸເຂົ່າລົງໃນການອະທິຖານ, ທູນຂໍໃຫ້ພຣະເຈົ້າຢືນຢັນວ່າເພິ່ນເປັນສາດສະດາທີ່ແທ້ຈິງ. ມັນອາດມີມາເມື່ອທ່ານອ່ານເລື່ອງລາວຂອງສາດສະດາກ່ຽວກັບພາບທີ່ມາໃຫ້ເຫັນຄັ້ງທຳອິດ. ປະຈັກພະຍານອາດຈະກັ່ນລົງມາເທິງຈິດວິນຍານຂອງທ່ານ ຂະນະທີ່ທ່ານອ່ານພຣະຄຳພີມໍມອນເທື່ອແລ້ວເທື່ອເລົ່າ. ມັນອາດມີມາເມື່ອທ່ານກ່າວປະຈັກພະຍານຂອງທ່ານເອງເຖິງສາດສະດາ ຫລື ເມື່ອທ່ານຢືນຢູ່ໃນພຣະວິຫານ ແລະ ຮັບຮູ້ວ່າ ຜ່ານ ໂຈເຊັບ ສະມິດ ອຳນາດຂອງການຜະນຶກທີ່ສັກສິດ ຖືກຟື້ນຟູຄືນມາໃໝ່ຢູ່ເທິງໂລກແລ້ວ.22 ດ້ວຍສັດທາ ແລະ ເຈດຕະນາທີ່ແທ້ຈິງ, ປະຈັກພະຍານຂອງທ່ານ ເຖິງສາດສະດາ ໂຈເຊັບ ສະມິດ ຈະເຂັ້ມແຂງຂຶ້ນ. ຄຳເຍາະເຍີ້ຍຂອງຜູ້ທີ່ຕໍ່ຕ້ານຄວາມຈິງອາດເຮັດໃຫ້ທ່ານຄິດ, ແຕ່ຢ່າປ່ອຍໃຫ້ມັນທຳລາຍສັດທາຂອງທ່ານ.
ເຖິງຊາວໜຸ່ມທີ່ຮັບຟັງຢູ່ໃນມື້ນີ້ ຫລື ຈະອ່ານຂໍ້ຄວາມເຫລົ່ານີ້ທີຫລັງ ຂ້າພະເຈົ້າຂໍສະເໜີການທ້າທາຍຢ່າງໜຶ່ງ: ຂໍໃຫ້ມີປະຈັກພະຍານສ່ວນຕົວເຖິງສາດສະດາ ໂຈເຊັບ ສະມິດ. ຕໍ່ໄປນີ້ຄືຄຳແນະນຳສອງຢ່າງ: ທີໜຶ່ງ, ຂໍໃຫ້ຄົ້ນຫາຂໍ້ພຣະຄຳພີໃນພຣະຄຳພີມໍມອນທີ່ພວກເຈົ້າຮູ້ສຶກ ແລະ ຮູ້ວ່າເປັນຄວາມຈິງແທ້ໆ. ແລ້ວ ໃຫ້ແບ່ງປັນຂໍ້ນັ້ນກັບຄອບຄົວ ແລະ ໝູ່ເພື່ອນໃນການສັງສັນໃນຄອບຄົວ, ໂຮງຮຽນສາດສະໜາ, ແລະ ຫ້ອງຮຽນຊາຍໜຸ່ມຍິງໜຸ່ມຂອງພວກເຈົ້າ, ຍອມຮັບວ່າ ໂຈເຊັບ ໄດ້ເປັນເຄື່ອງມືໃນພຣະຫັດຂອງພຣະເຈົ້າ. ຕໍ່ຈາກນັ້ນ, ຂໍໃຫ້ອ່ານປະຈັກພະຍານຂອງສາດສະດາ ໂຈເຊັບ ສະມິດ ໃນພຣະຄຳພີ Pearl of Great Price ຫລື ໃນປຶ້ມນ້ອຍນີ້, ທີ່ມີໃຫ້ເປັນ 158 ພາສາຕ່າງໆ. ພວກເຈົ້າຈະພົບເຫັນມັນຢູ່ທາງອິນເຕີແນັດ ທີ່ LDS.org ຫລື ຈາກຜູ້ສອນສາດສະໜາ. ນີ້ແມ່ນປະຈັກພະຍານຂອງ ໂຈເຊັບ ເອງເຖິງສິ່ງທີ່ໄດ້ເກີດຂຶ້ນແທ້ໆ. ຂໍໃຫ້ອ່ານມັນເລື້ອຍໆ. ບາງທີພວກເຈົ້າຢາກຈະອັດປະຈັກພະຍານຂອງ ໂຈເຊັບ ໄວ້ເປັນສຽງຂອງພວກເຈົ້າເອງ, ຟັງມັນເລື້ອຍໆ, ແລະ ແບ່ງປັນມັນກັບໝູ່ເພື່ອນຂອງພວກເຈົ້າ. ການຟັງປະຈັກພະຍານຂອງສາດສະດາໃນສຽງຂອງພວກເຈົ້າເອງຈະຊ່ອຍນຳປະຈັກພະຍານທີ່ພວກເຈົ້າສະແຫວງຫາມາໃຫ້.
ຍັງມີວັນເວລາທີ່ດີຫລາຍ ແລະ ປະເສີດໃນອະນາຄົດ. ປະທານທອມມັສ ແອັສ ມອນສັນ ໄດ້ກ່າວວ່າ: “ອຸດົມການທີ່ຍິ່ງໃຫຍ່ນີ້ ... ຈະຂະຫຍາຍອອກໄປເລື້ອຍໆ, ປ່ຽນແປງ ແລະ ໃຫ້ພອນແກ່ຊີວິດ. ... ບໍ່ມີພະລັງອື່ນໃດຢູ່ໃນໂລກນີ້ຈະສາມາດຢຸດຢັ້ງວຽກງານຂອງພຣະເຈົ້າໄດ້. ເຖິງແມ່ນຈະມີຫຍັງເກີດຂຶ້ນ, ວຽກງານນີ້ຈະດຳເນີນໄປໜ້າ.”23
ຂ້າພະເຈົ້າຝາກພະຍານຂອງຂ້າພະເຈົ້າໄວ້ນຳພວກທ່ານວ່າ ພຣະເຢຊູຄືພຣະຄຣິດ, ພຣະຜູ້ຊ່ອຍໃຫ້ລອດ ແລະ ພຣະຜູ້ໄຖ່ຂອງເຮົາ. ພຣະອົງໄດ້ເລືອກຜູ້ຊາຍທີ່ບໍລິສຸດ, ຜູ້ຊາຍທີ່ຊອບທຳ, ໃຫ້ນຳພາການຟື້ນຟູຂອງຄວາມສົມບູນແຫ່ງພຣະກິດຕິຄຸນຂອງພຣະອົງ. ພຣະອົງໄດ້ເລືອກເອົາ ໂຈເຊັບ ສະມິດ.
ຂ້າພະເຈົ້າເປັນພະຍານວ່າ ໂຈເຊັບ ສະມິດ ໄດ້ເປັນຄົນທີ່ຊື່ສັດ ແລະ ມີຄຸນນະທຳ, ເປັນສານຸສິດຂອງອົງພຣະຜູ້ເປັນເຈົ້າພຣະເຢຊູຄຣິດ. ພຣະເຈົ້າພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ ໄດ້ມາປະກົດຕໍ່ເພິ່ນແທ້ໆ. ເພິ່ນໄດ້ແປພຣະຄຳພີມໍມອນ ໂດຍຂອງປະທານ ແລະ ອຳນາດຂອງພຣະເຈົ້າ.
ຫລັງຈາກເຮົາເສຍຊີວິດໄປແລ້ວ, ເຮົາຈະເຂົ້າໃຈຢ່າງແຈ່ມແຈ້ງເຖິງການເອີ້ນທີ່ສັກສິດ ແລະ ພາລະກິດແຫ່ງສະຫວັນຂອງສາດສະດາ ໂຈເຊັບ ສະມິດ. ໃນວັນເວລາທີ່ບໍ່ຫ່າງໄກຈາກນີ້, ທ່ານ ແລະ ຂ້າພະເຈົ້າ ແລະ [ອີກຫລາຍໆ] ລ້ານຄົນຈະຮູ້ຈັກອ້າຍໂຈເຊັບອີກຄັ້ງ.24 ໃນພຣະນາມຂອງພຣະເຢຊູຄຣິດ, ອາແມນ.