ຂໍຕ້ອນຮັບສູ່ກອງປະຊຸມໃຫຍ່
ໂດຍ ປະທານທອມມັສ ແອັສ ມອນສັນ
ເມື່ອເຮົາຮັບຊົມຮັບຟັງ, ຂໍໃຫ້ໃຈຂອງເຮົາຖືກສຳພັດ ແລະ ສັດທາຂອງເຮົາເພີ່ມທະວີຂຶ້ນ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຂໍຕ້ອນຮັບທ່ານດ້ວຍຄວາມຊື່ນຊົມຍິນດີ ສູ່ກອງປະຊຸມໃຫຍ່ທົ່ວໂລກນີ້. ພວກເຮົາໄດ້ມາເຕົ້າໂຮມກັນຢູ່ໃນສະຖານທີ່ຕ່າງໆຕະຫລອດທົ່ວໂລກ ເພື່ອຮັບຟັງ ແລະ ຮຽນຮູ້ຈາກບັນດາອ້າຍເອື້ອຍນ້ອງ ຜູ້ໄດ້ຖືກແຕ່ງຕັ້ງເປັນເຈົ້າໜ້າທີ່ຊັ້ນຜູ້ໃຫຍ່ ຂອງສາດສະໜາຈັກ. ພວກເພິ່ນໄດ້ສະແຫວງຫາຄວາມຊ່ອຍເຫລືອຈາກສະຫວັນກ່ຽວກັບຂ່າວສານທີ່ພວກເພິ່ນຈະມານຳສະເໜີ, ແລະ ພວກເພິ່ນກໍໄດ້ຮັບການດົນໃຈກ່ຽວກັບສິ່ງທີ່ຈະກ່າວ.
ກອງປະຊຸມເທື່ອນີ້ ເປັນວັນຄົບຮອບ 90 ປີ ຂອງການຖ່າຍກອງປະຊຸມໃຫຍ່ສາມັນທາງວິທະຍຸ. ໃນລະຫວ່າງກອງປະຊຸມໃຫຍ່ຂອງເດືອນຕຸລາ ປີ 1924, ກອງປະຊຸມໄດ້ຖືກຖ່າຍທອດທາງວິທະຍຸ ເປັນເທື່ອທຳອິດ ໂດຍສະຖານີວິທະຍຸ KSL ທີ່ສາດສະໜາຈັກເປັນເຈົ້າຂອງ. ກອງປະຊຸມເທື່ອນີ້ ເປັນວັນຄົບຮອບ 65 ປີ ຂອງການຖ່າຍທອດກອງປະຊຸມໃຫຍ່ທາງໂທລະພາບ. ໃນລະຫວ່າງກອງປະຊຸມໃຫຍ່ສາມັນຂອງເດືອນຕຸລາ ປີ 1949, ກອງປະຊຸມໄດ້ຖືກຖ່າຍທອດທາງໂທລະພາບສຳລັບເຂດເຊົາເລັກ ເປັນເທື່ອທຳອິດ ໂດຍສະຖານີໂທລະພາບ KSL.
ພວກເຮົາຮັບຮູ້ພອນຂອງການສື່ສານໃນປະຈຸບັນ ໃນການຊ່ອຍໃຫ້ສະມາຊິກຫລາຍລ້ານຄົນຂອງສາດສະໜາຈັກ ໄດ້ຮັບຊົມ ແລະ ຮັບຟັງ ກອງປະຊຸມໃຫຍ່ສາມັນ. ກອງປະຊຸມໃນສອງມື້ນີ້ ຈະຖືກຖ່າຍທອດທາງໂທລະພາບ, ວິທະຍຸ, ດາວທຽມ, ແລະ ອິນເຕີແນັດ, ຕະຫລອດທັງ ເຄື່ອງມືຖື ນຳອີກ.
ໃນລະຫວ່າງຫົກເດືອນຜ່ານມາ ນັບແຕ່ກອງປະຊຸມເທື່ອແລ້ວນີ້, ພຣະວິຫານໃໝ່ແຫ່ງໜຶ່ງໄດ້ຖືກອຸທິດ ແລະ ແຫ່ງໜຶ່ງໄດ້ຖືກອຸທິດຄືນໃໝ່. ໃນເດືອນພຶດສະພາ ປະທານດີເດີ ແອັຟ ອຸກດອບ ໄດ້ອຸທິດພຣະວິຫານຝອດ ລາເດີແດວ ຟະລໍຣິດາ. ການສະແດງວັນນະຄະດີທີ່ງົດງາມຂອງຊາວໜຸ່ມໄດ້ຖືກຈັດຂຶ້ນ ມື້ໜຶ່ງກ່ອນວັນອຸທິດ. ມື້ຕໍ່ມາ ໃນວັນອາທິດ ວັນທີ 4, ເດືອນພຶດສະພາ, ພຣະວິຫານໄດ້ຖືກອຸທິດ ໃນສາມພາກ.
ພຽງແຕ່ສອງອາທິດຜ່ານມານີ້ ຂ້າພະເຈົ້າໄດ້ມີໂອກາດໄປອຸທິດພຣະວິຫານອອກເດັນ ຢູທາ ຄືນໃໝ່, ຊຶ່ງເທື່ອທຳອິດໄດ້ຖືກອຸທິດ ໃນປີ 1972 ໂດຍປະທານໂຈເຊັບ ຟຽວດິງ ສະມິດ. ການສະແດງວັນນະຄະດີອັນໃຫຍ່ໂຕມະໂຫລານກໍໄດ້ຖືກຈັດຂຶ້ນ ມື້ໜຶ່ງກ່ອນວັນອຸທິດ, ໂດຍທີ່ມີຊາວໜຸ່ມເປັນຈຳນວນຢ່າງຫລວງຫລາຍ ຈົນໄດ້ແບ່ງງານເປັນສອງພາກ, ແຕ່ລະພາກກໍມີນັກສະແດງທີ່ແຕກຕ່າງກັນ. ລວມທັງໝົດ ມີຜູ້ຮ່ວມສະແດງຢູ່ດ້ວຍກັນ 16,000 ຄົນ. ການອຸທິດໄດ້ຖືກຈັດຂຶ້ນໃນມື້ຕໍ່ມາ, ໂດຍມີບັນດາເຈົ້າໜ້າທີ່ຊັ້ນຜູ້ໃຫຍ່ຫລາຍຄົນໄປຮ່ວມ, ພ້ອມດ້ວຍຜູ້ນຳຈາກອົງການຊ່ອຍເຫລືອຕ່າງໆອີກ, ຕະຫລອດທັງປະທານພຣະວິຫານ, ທີ່ປຶກສາ, ແລະ ພັນລະຍາຂອງພວກເພິ່ນ.
ການສ້າງພຣະວິຫານຂອງພວກເຮົາ ຈະດຳເນີນຕໍ່ໄປຢ່າງບໍ່ຢຸດພັກ. ເດືອນໜ້ານີ້ ພຣະວິຫານຟີນິກ ອາຣິໂຊນາ ຈະຖືກອຸທິດ, ແລະ ປີໜ້າ, ໃນປີ 2015, ພວກເຮົາຈະອຸທິດພຣະວິຫານ ຫລື ອຸທິດຄືນໃໝ່ ຢ່າງໜ້ອຍຫ້າແຫ່ງ, ຫລື ຫລາຍກວ່ານັ້ນກໍເປັນໄດ້, ອີງຕາມຄວາມໄວຂອງການສ້າງ.
ດັ່ງທີ່ຂ້າພະເຈົ້າໄດ້ກ່າວໃນເດືອນເມສາ, ເມື່ອພຣະວິຫານທຸກແຫ່ງທີ່ໄດ້ຖືກປະກາດໃຫ້ຮູ້ ແລະ ກຳລັງສ້າງຢູ່ ໄດ້ຮັບການອຸທິດ, ລວມທັງໝົດ ພວກເຮົາຈະມີພຣະວິຫານຢູ່ 170 ແຫ່ງ ຕະຫລອດທົ່ວໂລກ. ເພາະວ່າພວກເຮົາກຳລັງເອົາໃຈໃສ່ກັບການສ້າງພຣະວິຫານທີ່ໄດ້ປະກາດໄປນັ້ນ, ສະນັ້ນ ເວລານີ້ ພວກເຮົາຈຶ່ງຈະບໍ່ປະກາດການສ້າງພຣະວິຫານແຫ່ງອື່ນໆ. ເຖິງຢ່າງໃດກໍຕາມ, ໃນອະນາຄົດ, ເມື່ອພວກເຮົາເຫັນຄວາມຕ້ອງການຕື່ມອີກ ແລະ ພົບເຫັນສະຖານທີ່ ທີ່ເໝາະສົມ, ແລ້ວພວກເຮົາຈະປະກາດໃຫ້ຮູ້.
ສາດສະໜາຈັກນັບມື້ນັບເຕີບໃຫຍ່ຂະຫຍາຍຕົວ. ຕອນນີ້ ພວກເຮົາມີສະມາຊິກທີ່ເຂັ້ມແຂງ ເປັນຈຳນວນ 15 ລ້ານຄົນ ແລະ ກໍເພີ່ມຂຶ້ນເລື້ອຍໆ. ຜູ້ສອນສາດສະໜາຂອງພວກເຮົາ ກໍດຳເນີນງານຢ່າງບໍ່ຢຸດຢັ້ງ. ພວກເຮົາມີຜູ້ສອນສາດສະໜາຫລາຍກວ່າ 88,000 ຄົນ, ແບ່ງປັນຂ່າວສານພຣະກິດຕິຄຸນ ໃນທົ່ວໂລກ. ພວກເຮົາຂໍຢືນຢັນຕື່ມວ່າ ວຽກງານເຜີຍແຜ່ ເປັນໜ້າທີ່ຂອງຖານະປະໂລຫິດ, ແລະ ພວກເຮົາຂໍຊຸກຍູ້ຊາຍໜຸ່ມທີ່ມີຄ່າຄວນ ແລະ ມີຄວາມສາມາດທັງຫລາຍ ໃຫ້ຮັບໃຊ້. ພວກເຮົາມີຄວາມກະຕັນຍູສຳລັບຍິງໜຸ່ມທີ່ຮັບໃຊ້ຄືກັນ. ເຂົາເຈົ້າຊ່ອຍເຫລືອໄດ້ຫລາຍ, ເຖິງແມ່ນວ່າ ເຂົາເຈົ້າບໍ່ໄດ້ຢູ່ພາຍໃຕ້ຄຳສັ່ງໃຫ້ຮັບໃຊ້ ຄືກັນກັບພວກຊາຍໜຸ່ມ.
ບັດນີ້ ຂ້າພະເຈົ້າຂໍເຊື້ອເຊີນທ່ານ ໃຫ້ຕັ້ງໃຈຮັບຟັງບັນດາອ້າຍເອື້ອຍນ້ອງ ທີ່ໄດ້ຕຽມມາກ່າວປາໄສ ໃນມື້ນີ້ ແລະ ມື້ອື່ນ ໃນພາກຕ່າງໆຂອງກອງປະຊຸມ. ທຸກຄົນທີ່ໄດ້ຖືກຂໍໃຫ້ມາກ່າວປາໄສ ກໍຮູ້ສຶກເຖິງໜ້າທີ່ຮັບຜິດຊອບອັນຍິ່ງໃຫຍ່ ໃນການເຮັດສິ່ງນີ້. ເມື່ອເຮົາຮັບຊົມຮັບຟັງ, ຂໍໃຫ້ໃຈຂອງເຮົາຖືກສຳພັດ ແລະ ສັດທາຂອງເຮົາເພີ່ມທະວີຂຶ້ນ, ຂ້າພະເຈົ້າອະທິຖານດ້ວຍຄວາມຖ່ອມຕົນ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.