ຈົນກວ່າເຮົາຈະພົບກັນອີກ
ໂດຍ ປະທານທອມມັສ ແອັສ ມອນສັນ
ຂໍໃຫ້ເຮົາທຸກຄົນຈົ່ງໄຕ່ຕອງຄວາມຈິງທີ່ເຮົາໄດ້ຍິນ, ແລະ ຂໍໃຫ້ມັນຊ່ອຍເຫລືອເຮົາໃຫ້ກາຍເປັນສານຸສິດທີ່ກ້າຫານ.
ອ້າຍເອື້ອຍນ້ອງຂອງຂ້າພະເຈົ້າ, ເຮົາໄດ້ຮັບປະສົບການທີ່ໜ້າປະທັບໃຈຫລາຍໃນສອງມື້ນີ້ ດ້ວຍຂ່າວສານທີ່ດົນໃຈ. ໃຈຂອງເຮົາໄດ້ຖືກສຳພັດ ແລະ ສັດທາຂອງເຮົາໄດ້ຖືກເຮັດໃຫ້ເຂັ້ມແຂງຂຶ້ນ ເມື່ອເຮົາຮັບເອົາພຣະວິນຍານ ຊຶ່ງໄດ້ສະຖິດຢູ່ໃນກອງປະຊຸມແຕ່ລະພາກ. ໃນທ້າຍກອງປະຊຸມນີ້, ເຮົາຂໍຂອບພຣະໄທພຣະບິດາເທິງສະຫວັນ ສຳລັບພອນຢ່າງຫລວງຫລາຍ ທີ່ພຣະອົງໄດ້ປະທານໃຫ້ເຮົາ.
ເຮົາໄດ້ຖືກເສີມສ້າງ ແລະ ໄດ້ຮັບການດົນໃຈ ດ້ວຍສຽງເພງທີ່ມ່ວນອອນຊອນ ໃນແຕ່ລະພາກ. ຄຳອະທິຖານທີ່ໄດ້ກ່າວໄປ ກໍໄດ້ເຮັດໃຫ້ເຮົາເຂົ້າໃກ້ສະຫວັນຫລາຍຂຶ້ນ.
ຂ້າພະເຈົ້າຂໍເປັນຕົວແທນໃຫ້ແກ່ທັງສາດສະໜາຈັກ ເພື່ອສະແດງຄວາມຂອບໃຈບັນດາອ້າຍນ້ອງ ຜູ້ຫາກໍໄດ້ຖືກປົດຈາກຕຳແໜ່ງ ຢູ່ໃນກອງປະຊຸມນີ້. ພວກເຮົາຈະຄິດຮອດພວກເພິ່ນ. ພວກເພິ່ນໄດ້ຊ່ອຍເຫລືອຫລາຍແທ້ໆໃນວຽກງານຂອງພຣະຜູ້ເປັນເຈົ້າ ແລະ ຈະຖືກຮັບຮູ້ໃນຫລາຍລຸ້ນຄົນ ທີ່ຈະມາເຖິງ.
ຂໍໃຫ້ເຮົາຈົ່ງກັບໄປບ້ານດ້ວຍຄວາມຕັ້ງໃຈ ທີ່ຈະເປັນຄົນດີກວ່າເກົ່າ ຫລາຍກວ່າທີ່ເຄີຍເປັນມາ. ຂໍໃຫ້ເຮົາຈົ່ງມີເມດຕາ ແລະ ເຫັນອົກເຫັນໃຈ ຫລາຍກວ່າເກົ່າ. ຂໍໃຫ້ເຮົາຈົ່ງເອື້ອມອອກໄປຊ່ອຍເຫລືອ, ບໍ່ແມ່ນຊ່ອຍເຫລືອແຕ່ເພື່ອນສະມາຊິກເທົ່ານັ້ນ, ແຕ່ໃຫ້ຊ່ອຍເຫລືອຄົນທີ່ບໍ່ໄດ້ເປັນສະມາຊິກນຳອີກ. ເມື່ອເຮົາຜູກມິດນຳເຂົາເຈົ້າ, ຂໍໃຫ້ເຮົາຈົ່ງສະແດງຄວາມນັບຖືຕໍ່ເຂົາເຈົ້າ.
ຍັງມີຫລາຍຄົນທີ່ດີ້ນລົນທຸກວັນ ນຳການທ້າທາຍ. ຂໍໃຫ້ເຮົາຈົ່ງບອກໃຫ້ເຂົາເຈົ້າຮູ້ວ່າ ເຮົາເປັນຫ່ວງເປັນໄຍ, ແລະ ສະເໜີໃຫ້ຄວາມຊ່ອຍເຫລືອ. ເມື່ອເຮົາດູແລຊຶ່ງກັນແລະກັນ, ແລ້ວເຮົາຈະໄດ້ຮັບພອນ.
ຂໍໃຫ້ເຮົາຈົ່ງຈື່ຈຳຜູ້ອາວຸໂສ ແລະ ຜູ້ທີ່ໄປມາບໍ່ໄດ້. ເມື່ອເຮົາຫາເວລາໄປຢ້ຽມຢາມເຂົາເຈົ້າ, ເຂົາເຈົ້າຈະຮູ້ວ່າ ມີຄົນຮັກເຂົາເຈົ້າ ແລະ ເຂົາເຈົ້າສຳຄັນ. ຂໍໃຫ້ເຮົາຈົ່ງເຮັດຕາມຄຳຂໍຮ້ອງ ທີ່ວ່າ ຈົ່ງຊ່ອຍເຫລືອຄົນທີ່ອ່ອນແອ, ຍົກມືທີ່ເມື່ອຍລ້າ, ແລະ ໃຫ້ກຳລັງຫົວເຂົ່າທີ່ອ່ອນເພຍ.1
ຂໍໃຫ້ເຮົາຈົ່ງເປັນຄົນທີ່ຊື່ສັດ ແລະ ມີຄຸນນະທຳ, ພະຍາຍາມເຮັດສິ່ງທີ່ຖືກຕ້ອງຢູ່ຕະຫລອດເວລາ ແລະ ໃນທຸກສະຖານະການ. ຂໍໃຫ້ເຮົາຈົ່ງເປັນຜູ້ຕິດຕາມທີ່ຊື່ສັດຂອງພຣະຄຣິດ, ເປັນຕົວຢ່າງທີ່ຊອບທຳ, ແລະ ກາຍເປັນ “ຄວາມສະຫວ່າງຂອງໂລກ.”2
ອ້າຍເອື້ອຍນ້ອງທັງຫລາຍ, ຂ້າພະເຈົ້າຂໍຂອບໃຈທ່ານ ສຳລັບການອະທິຖານຂອງທ່ານເພື່ອຂ້າພະເຈົ້າ. ມັນໄດ້ເພີ່ມຄວາມເຂັ້ມແຂງໃຫ້ຂ້າພະເຈົ້າ ແລະ ຄ້ຳຊູຂ້າພະເຈົ້າ ເມື່ອຂ້າພະເຈົ້າພະຍາຍາມດ້ວຍສຸດໃຈ ທີ່ຈະເຮັດຕາມພຣະປະສົງຂອງພຣະເຈົ້າ ເພື່ອຮັບໃຊ້ພຣະອົງ ແລະ ຮັບໃຊ້ທ່ານ.
ເມື່ອເຮົາອອກຈາກກອງປະຊຸມນີ້ໄປ, ຂ້າພະເຈົ້າຂໍໃຫ້ພອນຈາກສະຫວັນຈົ່ງມາສູ່ທ່ານທັງຫລາຍ. ຂໍໃຫ້ຜູ້ທີ່ບໍ່ໄດ້ຢູ່ບ້ານ, ຈົ່ງກັບໄປບ້ານ ແລະ ເຫັນວ່າທຸກສິ່ງທຸກຢ່າງຮຽບຮ້ອຍດີ. ຂໍໃຫ້ເຮົາທຸກຄົນຈົ່ງໄຕ່ຕອງຄວາມຈິງທີ່ເຮົາໄດ້ຍິນ, ແລະ ຂໍໃຫ້ມັນຊ່ອຍເຫລືອເຮົາໃຫ້ກາຍເປັນສານຸສິດທີ່ກ້າຫານຫລາຍກວ່າ ສອງມື້ທີ່ຜ່ານມາ.
ຈົນກວ່າເຮົາຈະພົບກັນອີກ ໃນຫົກເດືອນຂ້າງໜ້າ, ຂ້າພະເຈົ້າຂໍໃຫ້ພຣະເຈົ້າຈົ່ງປະທານພອນໃຫ້ທ່ານ, ໃຫ້ເຮົາທຸກຄົນ, ແລະ ຂ້າພະເຈົ້າກ່າວມາໃນພຣະນາມອັນສັກສິດຂອງພຣະອົງ—ນັ້ນຄື ພຣະເຢຊູຄຣິດ, ພຣະຜູ້ເປັນເຈົ້າ ແລະ ພຣະຜູ້ຊ່ອຍໃຫ້ລອດຂອງເຮົາ—ອາແມນ.