ການຮັບເອົາປະຈັກພະຍານເຖິງຄວາມສະຫວ່າງ ແລະ ຄວາມຈິງ
ໂດຍປະທານ ດີເດີ ແອັຟ ອຸກດອບ
ທີ່ປຶກສາທີສອງໃນຝ່າຍປະທານສູງສຸດ
ປະຈັກພະຍານສ່ວນຕົວຂອງທ່ານເຖິງຄວາມສະຫວ່າງ ແລະ ຄວາມຈິງບໍ່ພຽງແຕ່ຈະເປັນພອນໃຫ້ແກ່ທ່ານ ແລະ ລູກຫລານຂອງທ່ານໃນຊີວິດມະຕະນີ້ເທົ່ານັ້ນ, ແຕ່ມັນຈະຢູ່ກັບທ່ານຕະຫລອດຊົ່ວນິລັນດອນນຳອີກ.
ໂດຍທີ່ເຄີຍເປັນນັກຂັບຍົນ, ຂ້າພະເຈົ້າໄດ້ບິນເປັນເວລາຫລາຍໆຊົ່ວໂມງຂ້າມທະວີບ ແລະ ມະຫາສະໝຸດໃນຄວາມມືດຂອງກາງຄືນ. ການທີ່ໄດ້ເຫັນທ້ອງຟ້າຕອນກາງຄືນຈາກປ່ອງຢ້ຽມຂອງບ່ອນຂັບຍົນ, ໂດຍສະເພາະທາງຊ້າງເຜືອກ, ມັນມັກຈະເຮັດໃຫ້ຂ້າພະເຈົ້າປະຫລາດໃຈຕໍ່ຄວາມກວ້າງໃຫຍ່ໄພສານຂອງການສ້າງຂອງພຣະເຈົ້າ—ຊຶ່ງພຣະຄຳພີບັນຍາຍວ່າ “ໂລກຕ່າງໆຈົນນັບບໍ່ຖ້ວນ.”1
ບໍ່ດົນກວ່າໜຶ່ງສັດຕະວັດທີ່ຜ່ານມາ ທີ່ນັກດາລາສາດທັງຫລາຍໄດ້ລົງຄວາມຄິດເຫັນວ່າ ທາງຊ້າງເຜືອກຂອງເຮົາເປັນພຽງກຸ່ມດາວຂະໜາດໃຫຍ່ກຸ່ມດຽວໃນຈັກກະວານ.2 ເຂົາເຈົ້າໄດ້ຄິດວ່າທັງໝົດທີ່ຢູ່ນອກໂລກຂອງເຮົາເປັນພຽງແຕ່ຄວາມຫວ່າງເປົ່າ, ບໍ່ມີຫຍັງ—ຫວ່າງເປົ່າ, ເຍືອກເຢັນ, ບໍ່ມີດວງດາວ, ແສງສະຫວ່າງ ແລະ ຊີວິດໃດເລີຍ.
ເມື່ອກ້ອງຊ່ອງດາວຖືກພັດທະນາດີຂຶ້ນຫລາຍ—ຮ່ວມທັງກ້ອງຊ່ອງດາວທີ່ສາມາດສົ່ງອອກໄປໃນອາວະກາດ—ນັກດາລາສາດກໍໄດ້ເລີ່ມເຂົ້າໃຈເຖິງຄວາມຈິງທີ່ໜ້າປະຫລາດໃຈ ແລະ ເກືອບເກີນຄວາມເຂົ້າໃຈ: ຈັກກະວານນັ້ນແມ່ນກວ້າງໃຫຍ່ໄພສານເກີນກວ່າທີ່ໄດ້ເຄີຍເຊື່ອມາກ່ອນ, ແລະ ທ້ອງຟ້ານັ້ນເຕັມໄປດ້ວຍກຸ່ມດາວຂະໜາດໃຫຍ່ທີ່ນັບບໍ່ຖ້ວນ, ຢູ່ໄກຈາກພວກເຮົາຢ່າງຄາດບໍ່ເຖິງ, ແຕ່ລະກຸ່ມມີດວງດາວເປັນຫລາຍໆພັນລ້ານດວງ.3
ໃນຊ່ວງເວລາສັ້ນໆ, ຄວາມເຂົ້າໃຈຂອງເຮົາກ່ຽວກັບຈັກກະວານກໍໄດ້ປ່ຽນໄປໝົດ.
ໃນວັນເວລານີ້ເຮົາສາມາດເຫັນກຸ່ມດາວບາງກຸ່ມທີ່ຢູ່ຫ່າງໄກເຫລົ່ານີ້.4
ເຮົາຮູ້ວ່າມັນຢູ່ທີ່ນັ້ນ.
ມັນໄດ້ຢູ່ທີ່ນັ້ນດົນນານມາແລ້ວ.
ແຕ່ກ່ອນມະນຸດໄດ້ມີເຄື່ອງມືທີ່ມີພະລັງພໍທີ່ຈະຮວບຮວມແສງສະຫວ່າງຂອງທ້ອງຟ້າ ແລະ ນຳກຸ່ມດາວເຫລົ່ານີ້ເຂົ້າມາໃຫ້ເຮົາຫລຽວເຫັນໄດ້, ເຮົາບໍ່ເຊື່ອວ່າສິ່ງດັ່ງນີ້ເປັນໄປໄດ້.
ຄວາມກວ້າງໃຫຍ່ໄພສານຂອງຈັກກະວານບໍ່ໄດ້ປ່ຽນແປງຢ່າງທັນທີ, ແຕ່ຄວາມສາມາດຂອງເຮົາທີ່ຈະເຫັນ ແລະ ເຂົ້າໃຈຄວາມຈິງນີ້ໄດ້ປ່ຽນໄປຢ່າງກະທັນຫັນ. ແລະ ດ້ວຍຄວາມຮູ້ທີ່ມີຫລາຍຂຶ້ນນັ້ນ, ມະນຸດຖືກແນະນຳໃຫ້ໄດ້ເຫັນທິວທັດທີ່ເຮົາບໍ່ເຄີຍນຶກຄິດມາກ່ອນເລີຍ.
ມັນຍາກສຳລັບເຮົາທີ່ຈະເຊື່ອສິ່ງທີ່ເຮົາບໍ່ສາມາດເຫັນໄດ້
ໃຫ້ສົມມຸດວ່າທ່ານສາມາດກັບຄືນໄປຕາມເວລາ ແລະ ໄດ້ສົນທະນາກັບຜູ້ຄົນທີ່ໄດ້ມີຊີວິດຢູ່ເມື່ອພັນປີກ່ອນ ຫລື ແມ່ນແຕ່ໜຶ່ງຮ້ອຍປີທີ່ຜ່ານມາ. ຂໍໃຫ້ລອງວາດພາບເບິ່ງ ເພື່ອຈະພະຍາຍາມບັນຍາຍໃຫ້ເຂົາເຈົ້າຮູ້ເຖິງເທັກໂນໂລຈີໃນສະໄໝໃໝ່ທີ່ທ່ານ ແລະ ຂ້າພະເຈົ້າຄິດວ່າເປັນເລື່ອງປົກກະຕິໃນເວລານີ້. ຍົກຕົວຢ່າງ, ຜູ້ຄົນເຫລົ່ານັ້ນອາດຄິດແນວໃດຕໍ່ພວກເຮົາ ຖ້າຫາກເຮົາໄດ້ບອກເຂົາເຈົ້າເຖິງເລື່ອງຍົນອາຍພົ່ນໃຫຍ່, ໄມໂກເວບ, ເຄື່ອງມືຖືທີ່ມີຂໍ້ມູນຢ່າງຫລວງຫລາຍ, ແລະ ວິດີໂອຂອງຫລານໆຂອງເຮົາທີ່ເຮົາສາມາດສົ່ງໃຫ້ຄົນເປັນລ້ານໆເບິ່ງທັນທີຕະຫລອດທົ່ວໂລກ?
ບາງຄົນອາດເຊື່ອພວກເຮົາ. ຄົນສ່ວນຫລາຍຈະເຍາະເຍີ້ຍ, ຕໍ່ຕ້ານ, ຫລື ບາງທີແມ່ນແຕ່ຈະເຮັດໃຫ້ເຮົາຢຸດເວົ້າເຖິງເລື່ອງນີ້ ຫລື ທຳຮ້າຍເຮົາ. ບາງຄົນອາດພະຍາຍາມທີ່ຈະໃຊ້ຄວາມຄິດ, ເຫດຜົນ, ແລະ ຂໍ້ເທັດຈິງດັ່ງທີ່ເຂົາເຈົ້າຮູ້ຈັກ ເພື່ອສະແດງໃຫ້ເຮົາເຫັນວ່າພວກເຮົາຖືກຊີ້ນຳໄປຜິດທາງ, ໂງ່ຈ້າ, ຫລື ແມ່ນແຕ່ເປັນອັນຕະລາຍ. ເຂົາເຈົ້າອາດປະນາມເຮົາເພາະເຮົາກຳລັງພະຍາຍາມນຳພາຄົນອື່ນໃຫ້ໄປຜິດທາງ.
ແຕ່ແນ່ນອນວ່າ ຜູ້ຄົນເຫລົ່ານີ້ຈະຜິດພາດທັງໝົດ. ເຂົາເຈົ້າອາດມີເຈດຕະນາດີ ແລະ ຈິງໃຈ. ເຂົາເຈົ້າອາດຮູ້ສຶກໝັ້ນໃຈວ່າຄວາມຄິດເຫັນຂອງເຂົາເຈົ້ານັ້ນຖືກຕ້ອງ. ແຕ່ເຂົາເຈົ້າຈະບໍ່ສາມາດເຫັນໄດ້ຢ່າງແຈ້ງຊັດ ເພາະວ່າເຂົາເຈົ້າຍັງບໍ່ທັນໄດ້ຮັບຄວາມສະຫວ່າງແຫ່ງຄວາມຈິງທີ່ສົມບູນກວ່າ.
ຄຳສັນຍາແຫ່ງຄວາມສະຫວ່າງ
ເບິ່ງຄືວ່າເປັນລັກສະນະຂອງມະນຸດທີ່ຈະຖືວ່າເຮົາຖືກແມ່ນແຕ່ເມື່ອເຮົາຜິດ. ແລະ ຖ້າຫາກນີ້ເປັນຈິງ, ເຮົາຈະມີຄວາມຫວັງໄດ້ແນວໃດ? ເຮົາຈະດຳລົງຊີວິດຂອງເຮົາປາດສະຈາກຄວາມຈິງບໍ ເພາະວ່າມີຄວາມຄິດເຫັນທີ່ຂັດກັນຫລາຍ ແລະ ເຮົາຈະເພິ່ງອາໄສພຽງແຕ່ຄວາມເຂົ້າໃຈ ແລະ ຄວາມເຊື່ອຂອງເຮົາເອງນັ້ນບໍ?
ມັນເປັນໄປໄດ້ບໍທີ່ຈະພົບຄວາມຈິງ?
ຈຸດປະສົງຂອງຄຳປາໄສຂອງຂ້າພະເຈົ້າແມ່ນຈະປະກາດຂ່າວສານທີ່ໃຫ້ຄວາມສຸກວ່າອົງພຣະເຈົ້າເອງ— ອົງຊົງລິດອຳນາດຍິ່ງໃຫຍ່ ອົງທີ່ຮູ້ຄວາມຈິງທັງໝົດ—ໄດ້ປະທານຄຳສັນຍາໃຫ້ແກ່ລູກໆຂອງພຣະອົງວ່າເຂົາເຈົ້າສາມາດຮູ້ຄວາມຈິງນັ້ນໄດ້ດ້ວຍຕົນເອງ.
ຂໍ້ໃຫ້ພິຈາລະນາເຖິງຄວາມສຳຄັນຂອງຄຳສັນຍານີ້ວ່າ:
ພຣະເຈົ້າອົງທີ່ເປັນນິດ ແລະ ຊົງລິດອຳນາດຍິ່ງໃຫຍ່, ພຣະຜູ້ສ້າງຂອງຈັກກະວານທີ່ກວ້າງໃຫຍ່ນີ້, ຈະກ່າວຕໍ່ຜູ້ທີ່ເຂົ້າເຝົ້າພຣະອົງດ້ວຍໃຈຈິງ ແລະ ເຈດຕະນາອັນແທ້ຈິງ.
ພຣະອົງຈະກ່າວຕໍ່ເຂົາເຈົ້າໃນຄວາມຝັນ, ພາບທີ່ມາໃຫ້ເຫັນ, ຄວາມຄິດ, ແລະ ຄວາມຮູ້ສຶກ.
ພຣະອົງຈະກ່າວໃນວິທີທາງທີ່ແຈ່ມແຈ້ງ ແລະ ຍິ່ງໃຫຍ່ໄປກວ່າປະສົບການຂອງມະນຸດ. ພຣະອົງຈະປະທານການຊີ້ນຳ ແລະ ຄຳຕອບຈາກສະຫວັນສຳລັບຊີວິດສ່ວນຕົວຂອງເຂົາເຈົ້າ.
ແນ່ນອນວ່າ, ຈະມີຜູ້ຄົນທີ່ຈະເຍາະເຍີ້ຍ ແລະ ກ່າວວ່າສິ່ງດັ່ງກ່າວເປັນໄປບໍ່ໄດ້, ວ່າຖ້າຫາກມີພຣະເຈົ້າ, ພຣະອົງກໍມີສິ່ງອື່ນທີ່ສຳຄັນກວ່າທີ່ຕ້ອງເຮັດ ແທນທີ່ຈະໄດ້ຍິນ ແລະ ໃຫ້ຄຳຕອບຕໍ່ຄຳອະທິຖານຂອງຄົນຄົນດຽວ.
ແຕ່ຂ້າພະເຈົ້າຈະບອກທ່ານວ່າ: ພຣະເຈົ້າເປັນຫ່ວງທ່ານ. ພຣະອົງຈະຮັບຟັງ ແລະ ພຣະອົງຈະຕອບຄຳຖາມສ່ວນຕົວຂອງທ່ານ. ຄຳຕອບຕໍ່ຄຳຖາມຂອງທ່ານຈະມາສູ່ທ່ານໃນວິທີທາງຂອງພຣະອົງເອງ ແລະ ໃນເວລາຂອງພຣະອົງເອງ, ແລະ ສະນັ້ນ, ທ່ານຕ້ອງຮຽນຮູ້ທີ່ຈະຮັບຟັງສຸລະສຽງຂອງພຣະອົງ.5 ພຣະເຈົ້າປະສົງໃຫ້ທ່ານຮຽນຮູ້ເຖິງພຣະບຸດຂອງພຣະອົງ, ພຣະເຢຊູຄຣິດ, ແລະ ມີຄວາມສະຫງົບ ແລະ ຄວາມສຸກທີ່ມາຈາກການຕິດຕາມເສັ້ນທາງອັງສູງສົ່ງຂອງການເປັນສານຸສິດ.
ເພື່ອນທີ່ຮັກທັງຫລາຍຂອງຂ້າພະເຈົ້າ, ມີການທົດລອງທີ່ກົງໄປກົງມາແທ້, ພ້ອມດ້ວຍການຮັບຮອງຈາກພຣະເຈົ້າ, ທີ່ພົບເຫັນຢູ່ໃນພຣະທຳຂອງພຣະຄຳພີໂບຮານທີ່ມີໃຫ້ຊາຍ, ຍິງ, ແລະ ເດັກນ້ອຍທຸກໆຄົນທີ່ເຕັມໃຈທີ່ຈະທົດລອງເບິ່ງວ່າມັນຈິງຫລືບໍ່.
ທີໜຶ່ງ, ທ່ານຕ້ອງຄົ້ນຄວ້າພຣະຄຳຂອງພຣະເຈົ້າ. ນັ້ນກໍໝາຍຄວາມວ່າການອ່ານພຣະຄຳພີ ແລະ ການສຶກສາຖ້ອຍຄຳຂອງສາດສະດາທັງໃນສະໄໝໂບຮານ ແລະ ສະໄໝໃໝ່ ກ່ຽວກັບພຣະກິດຕິຄຸນທີ່ໄດ້ຮັບການຟື້ນຟູຂອງພຣະເຢຊູຄຣິດ—ບໍ່ແມ່ນດ້ວຍເຈດຕະນາທີ່ຈະສົງໄສ ຫລື ວິຈານ ແຕ່ດ້ວຍຄວາມປາດຖະໜາທີ່ຈິງໃຈເພື່ອຈະພົບເຫັນຄວາມຈິງນັ້ນ. ຈົ່ງໄຕ່ຕອງເຖິງຄວາມຈິງທີ່ທ່ານຈະຮູ້ສຶກ, ແລະ ຕຽມຈິດໃຈທີ່ຈະຮັບເອົາຄວາມຈິງ.6 “ເຖິງແມ່ນພວກທ່ານເຮັດບໍ່ໄດ້ຫລາຍໄປກວ່າຄວາມປາດຖະໜາທີ່ຈະເຊື່ອ, ກໍຂໍໃຫ້ຄວາມປາດຖະໜານີ້ເກີດຜົນໃນພວກທ່ານ … ຈົນກວ່າພວກທ່ານຈະໃຫ້ບ່ອນສຳລັບຄຳສອນ [ຂອງພຣະເຈົ້າ] ໄດ້.”7
ທີສອງ, ທ່ານຕ້ອງພິຈາລະນາ, ໄຕ່ຕອງ, ພະຍາຍາມທີ່ຈະເຊື່ອຢ່າງບໍ່ຢ້ານກົວ,8 ແລະ ມີຄວາມກະຕັນຍູສຳລັບຄວາມເມດຕາທີ່ພຣະຜູ້ເປັນເຈົ້າໄດ້ມີຕໍ່ລູກໆຂອງພຣະອົງ ຈາກວັນເວລາຂອງອາດາມຈົນເຖິງວັນເວລາຂອງເຮົາ ໂດຍການຈັດຫາໃຫ້ມີສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ເພື່ອນຳພາສາດສະໜາຈັກຂອງພຣະອົງ ແລະ ຊ່ອຍເຮົາໃຫ້ພົບເຫັນເສັ້ນທາງທີ່ຈະນຳກັບຄືນໄປຫາພຣະອົງ.
ທີສາມ, ທ່ານຕ້ອງທູນຂໍພຣະບິດາເທິງສະຫວັນ, ໃນພຣະນາມຂອງພຣະບຸດຂອງພຣະອົງ, ພຣະເຢຊູຄຣິດ, ເພື່ອສະແດງຄວາມຈິງຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໃຫ້ປະກົດແກ່ທ່ານ. ຂໍໃຫ້ທູນຖາມດ້ວຍໃຈຈິງ ແລະ ດ້ວຍເຈດຕະນາອັນແທ້ຈິງ, ໂດຍມີສັດທາໃນພຣະຄຣິດ.9
ຍັງມີຂັ້ນຕອນ ທີສີ່ ອີກດ້ວຍ, ທີ່ພຣະຜູ້ຊ່ອຍໃຫ້ລອດໄດ້ໃຫ້ໄວ້ວ່າ: “ຜູ້ໃດກໍຕາມທີ່ເຕັມໃຈປະຕິບັດຕາມຄວາມປະສົງ [ຂອງພຣະເຈົ້າ], ກໍຈະຮູ້ວ່າສິ່ງທີ່ເຮົາສັ່ງສອນນັ້ນມາຈາກພຣະເຈົ້າ ຫລື ວ່າເຮົາກ່າວຕາມໃຈຂອງເຮົາເອງ.”10 ໃນອີກຄຳໜຶ່ງກໍຄື, ເມື່ອທ່ານພະຍາຍາມຈະພິສູດຄວາມຈິງຂອງຫລັກທຳພຣະກິດຕິຄຸນ, ທຳອິດທ່ານຕ້ອງດຳລົງຊີວິດຕາມຫລັກທຳນັ້ນກ່ອນ. ຂໍໃຫ້ທົດລອງຄຳສອນພຣະກິດຕິຄຸນ ແລະ ຄຳສອນຂອງສາດສະໜາຈັກໃນຊີວິດຂອງທ່ານ. ຈົ່ງປະຕິບັດຕາມດ້ວຍເຈດຕະນາອັນແທ້ຈິງ ແລະ ສັດທາທີ່ທົນທານໃນພຣະເຈົ້າ.
ຖ້າຫາກທ່ານຈະປະຕິບັດຕາມສິ່ງເຫລົ່ານີ້, ທ່ານກໍມີຄຳສັນຍາຈາກພຣະເຈົ້າ—ອົງທີ່ຖືກຜູກມັດໂດຍພຣະຄຳຂອງພຣະອົງ11—ວ່າພຣະອົງຈະສະແດງຄວາມຈິງໃຫ້ປະກົດແກ່ທ່ານ ໂດຍອຳນາດຂອງພຣະວິນຍານບໍລິສຸດ. ພຣະອົງຈະປະທານຄວາມສະຫວ່າງໃຫ້ທ່ານຫລາຍຂຶ້ນທີ່ຈະອະນຸຍາດໃຫ້ທ່ານຫລຽວເຫັນຜ່ານຄວາມມືດມົວ ແລະ ໄດ້ເຫັນທິວທັດທີ່ຮຸ່ງໂລດເກີນຄວາມຄາດຄິດ ທີ່ບໍ່ສາມາດເຫັນໄດ້ດ້ວຍສາຍຕາທາງຝ່າຍໂລກ.
ບາງຄົນອາດກ່າວວ່າ ຂັ້ນຕອນເຫລົ່ານີ້ຍາກໂພດ ຫລື ວ່າມັນບໍ່ກຸ້ມຄ່າກັບຄວາມພະຍາຍາມ. ແຕ່ຂ້າພະເຈົ້າຂໍແນະນຳວ່າປະຈັກພະຍານສ່ວນຕົວເຖິງພຣະກິດຕິຄຸນ ແລະ ສາດສະໜາຈັກນີ້ເປັນສິ່ງທີ່ສຳຄັນທີ່ສຸດທີ່ທ່ານສາມາດຫາມາໄດ້ໃນຊີວິດມະຕະນີ້. ມັນບໍ່ພຽງແຕ່ຈະໃຫ້ພອນ ແລະ ນຳພາທ່ານໃນຊີວິດນີ້, ແຕ່ມັນຈະມີຜົນສະທ້ອນໂດຍກົງໃນຊີວິດຂອງທ່ານຕະຫລອດຊົ່ວນິລັນດອນນຳອີກ.
ເລື່ອງທາງຝ່າຍວິນຍານຈະເຂົ້າໃຈໄດ້ພຽງແຕ່ໂດຍພຣະວິນຍານເທົ່ານັ້ນ
ນັກວິທະຍາສາດໄດ້ພະຍາຍາມເຂົ້າໃຈຄວາມກວ້າງຂອງຈັກກະວານ, ຈົນກວ່າໄດ້ມີການປະດິດສ້າງເຄື່ອງມືທີ່ທັນສະໄໝທີ່ສຸດ ເພື່ອຮວບຮວມຂໍ້ມູນ ເຂົາເຈົ້າຈຶ່ງເຂົ້າໃຈຄວາມຈິງທັງໝົດຫລາຍຕື່ມຂຶ້ນ.
ອັກຄະສາວົກໂປໂລ ໄດ້ສອນຫລັກທຳທີ່ຄ້າຍຄືກັນນີ້ກ່ຽວກັບຄວາມຮູ້ທາງວິນຍານ. ເພິ່ນໄດ້ຂຽນເຖິງຊາວໂກຣິນໂທວ່າ, “ມະນຸດທີ່ມີຈິດໃຈທຳມະດາຈະຮັບສິ່ງເຫລົ່ານັ້ນ ຊຶ່ງເປັນຂອງພຣະວິນຍານຂອງພຣະເຈົ້າກໍບໍ່ໄດ້ ເພາະພວກເຂົາເຫັນວ່າ ສິ່ງເຫລົ່ານີ້ເປັນເລື່ອງໂງ່ສຳລັບຕົນ ແລະ ບໍ່ສາມາດເຂົ້າໃຈເພາະວ່າ ທີ່ຈະເຂົ້າໃຈສິ່ງເຫລົ່ານັ້ນໄດ້ ກໍຕ້ອງອາໄສພຣະວິນຍານ.”12
ອີກຄຳໜຶ່ງ, ຖ້າທ່ານຢາກຮູ້ເຖິງຄວາມຈິງທາງວິນຍານ, ທ່ານຕ້ອງໃຊ້ເຄື່ອງມືທີ່ຖືກຕ້ອງ. ທ່ານຈະບໍ່ສາມາດເຂົ້າໃຈຄວາມຈິງທາງວິນຍານໄດ້ດ້ວຍເຄື່ອງມືທີ່ບໍ່ກ່ຽວພັນກັບທາງວິນຍານ.
ພຣະຜູ້ຊ່ອຍໃຫ້ລອດໄດ້ບອກເຮົາໃນວັນເວລາຂອງເຮົາວ່າ, “ສິ່ງທີ່ມາຈາກພຣະເຈົ້າເປັນຄວາມສະຫວ່າງ; ແລະ ຄົນທີ່ໄດ້ຮັບຄວມສະຫວ່າງ, ແລະ ດຳເນີນຢູ່ກັບພຣະເຈົ້າ, ຈະໄດ້ຮັບຄວາມສະຫວ່າງຫລາຍຂຶ້ນ, ແລະ ຄວາມສະຫວ່າງນັ້ນຈະຮຸ່ງແຈ້ງຫລາຍຂຶ້ນໄປເລື້ອຍໆຈົນເຖິງວັນທີ່ສົມບູນ.”13
ເມື່ອເຮົາຕັ້ງໃຈ ແລະ ຫັນຈິດໃຈຂອງເຮົາໄປຫາພຣະເຈົ້າ, ຄວາມສະຫວ່າງແຫ່ງສະຫວັນຈະຖືກມອບໃຫ້ເຮົາຫລາຍຂຶ້ນ. ແລະ ແຕ່ລະເທື່ອທີ່ເຮົາຕັ້ງໃຈ ແລະ ເຕັມໃຈສະແຫວງຫາຄວາມສະຫວ່າງນັ້ນ, ເຮົາບອກໃຫ້ພຣະເຈົ້າຮູ້ເຖິງຄວາມຕຽມພ້ອມຂອງເຮົາທີ່ຈະຮັບເອົາຄວາມສະຫວ່າງນັ້ນຫລາຍຂຶ້ນ. ເທື່ອລະເລັກເທື່ອລະໜ້ອຍ, ສິ່ງທີ່ເບິ່ງຄືວ່າມົວໆ, ມືດມົນ, ແລະ ຫ່າງໄກ ຈະແຈ້ງຊັດ, ສະຫວ່າງ, ແລະ ເປັນທີ່ຄຸ້ນເຄີຍຕໍ່ເຮົາຫລາຍຂຶ້ນ.
ໃນທຳນອງດຽວກັນນັ້ນ, ຖ້າຫາກເຮົາຍ້າຍຕົວເອງອອກໄປຈາກຄວາມສະຫວ່າງຂອງພຣະກິດຕິຄຸນ, ຄວາມສະຫວ່າງຂອງເຮົາກໍຈະເລີ່ມມືດມົວລົງ—ບໍ່ແມ່ນໃນມື້ດຽວ ຫລື ໜຶ່ງອາທິດ ແຕ່ຕາມການເວລາມັນຈະມືດມົວລົງເທື່ອລະເລັກລະໜ້ອຍ—ຈົນກວ່າເຮົາຈະຫລຽວຄືນຫລັງ ແລະ ບໍ່ເຂົ້າໃຈເລີຍວ່າເຮົາເຄີຍໄດ້ເຊື່ອວ່າພຣະກິດຕິຄຸນນັ້ນຈິງ. ຄວາມຮູ້ຂອງເຮົາທີ່ຜ່ານມາອາດແມ່ນແຕ່ເບິ່ງຄວາມວ່າເປັນເລື່ອງທີ່ໂງ່ຈ້າຕໍ່ເຮົາ ເພາະວ່າສິ່ງທີ່ເຄີຍແຈ່ມແຈ້ງໃນຄັ້ງໜຶ່ງ ກໍໄດ້ກາຍມາມືດມົວ ແລະ ຫ່າງໄກໄປອີກແລ້ວ.
ເພາະເຫດນີ້ ໂປໂລຈຶ່ງໄດ້ແນ່ວແນ່ໃນຄວາມເຊື່ອຂອງເພິ່ນວ່າ ຂ່າວສານຂອງພຣະກິດຕິຄຸນເປັນເລື່ອງໂງ່ສຳລັບພວກທີ່ກຳລັງຈິບຫາຍໄປ, “ແຕ່ສຳລັບ [ພວກເຂົາ] ທີ່ກຳລັງຮັບຄວາມພົ້ນນັ້ນ ຖືວ່າເປັນລິດອຳນາດຂອງພຣະເຈົ້າ.”14
ບໍ່ມີການທົດລອງພຽງຢ່າງດຽວທີ່ຕ້ອງໃຊ້ເພື່ອຕັດສິນຄົນອື່ນ
ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນສະຖານທີ່ສຳລັບຜູ້ຄົນທີ່ມີປະຈັກພະຍານໃນຫລາຍໆຮູບແບບ. ສະມາຊິກຂອງສາດສະໜາຈັກບາງຄົນກໍມີປະຈັກພະຍານທີ່ເຂັ້ມແຂງ. ບາງຄົນກໍພະຍາຍາມທີ່ຈະຮູ້ດ້ວຍຕົວເອງ. ສາດສະໜາຈັກເປັນບ້ານເພື່ອໃຫ້ທຸກຄົນມາເຕົ້າໂຮມກັນ, ບໍ່ວ່າເຮົາຈະມີປະຈັກພະຍານທີ່ເຂັ້ມແຂງ ຫລື ວ່າອ່ອນແອປານໃດກໍຕາມ. ຂ້າພະເຈົ້າບໍ່ເຫັນປ້າຍໃດແຂວນຢູ່ທີ່ປະຕູຂອງຕຶກໂບດຂອງເຮົາທີ່ກ່າວວ່າ, “ທ່ານຕ້ອງມີປະຈັກພະຍານເຂັ້ມແຂງເທົ່ານີ້ກ່ອນຈະເຂົ້າມາໄດ້.”
ສາດສະໜາຈັກບໍ່ແມ່ນສຳລັບຄົນທີ່ດີພ້ອມ ແຕ່ສຳລັບທຸກຄົນທີ່ຈະ “ມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ.”15 ສາດສະໜາຈັກແມ່ນສຳລັບຜູ້ຄົນດັ່ງທ່ານ ແລະ ຂ້າພະເຈົ້າ. ສາດສະໜາຈັກເປັນສະຖານທີ່ ທີ່ຕ້ອນຮັບ ແລະ ບຳລຸງລ້ຽງ, ບໍ່ແມ່ນສະຖານທີ່ ທີ່ແບ່ງແຍກ ຫລື ຕຳນິວິຈານ. ມັນເປັນສະຖານທີ່ ທີ່ເຮົາເອື້ອມອອກໄປໃຫ້ກຳລັງໃຈ, ເຊີດຊູ, ແລະ ສະໜັບສະໜູນກັນແລະກັນ ຂະນະທີ່ເຮົາໄຕ່ຕາມຄົ້ນຄວ້າຫາຄວາມຈິງແຫ່ງສະຫວັນສຳລັບຕົວເອງ.
ໃນທີ່ສຸດ, ເຮົາທຸກຄົນກໍເປັນຄົນເດີນທາງ ສະແຫວງຫາຄວາມສະຫວ່າງຂອງພຣະເຈົ້າ ຂະນະທີ່ເຮົາເດີນທາງໄປໃນເສັ້ນທາງຂອງການເປັນສານຸສິດ. ເຮົາບໍ່ປະນາມຄົນອື່ນສຳລັບຄວາມສະຫວ່າງທີ່ພວກເຂົາອາດມີ ຫລື ບໍ່ມີ; ແຕ່, ເຮົາບຳລຸງລ້ຽງ ແລະ ສົ່ງເສີມຄວາມສະຫວ່າງທັງໝົດ ຈົນກວ່າມັນຈະແຈ້ງຊັດຂື້ນ, ຮຸ່ງເຫລື້ອມ, ແລະ ເປັນຄວາມຈິງ.
ຄຳສັນຍາຕໍ່ທຸກຄົນ
ຂໍໃຫ້ເຮົາຈົ່ງຮັບຮູ້ວ່າ ສ່ວນຫລາຍແລ້ວ ການຈະມີປະຈັກພະຍານບໍ່ໄດ້ເປັນວຽກງານທີ່ໃຊ້ເວລາໜຶ່ງນາທີ, ໜຶ່ງຊົ່ວໂມງ, ຫລື ໜຶ່ງມື້ທີ່ຕ້ອງສຳເລັດ. ມັນບໍ່ແມ່ນສິ່ງທີ່ເຮົາຈະເຮັດໄດ້ແຕ່ເທື່ອດຽວ ແລະ ແລ້ວໄປ. ຂັ້ນຕອນຂອງການຮວບຮວມຄວາມສະຫວ່າງທາງວິນຍານນັ້ນເປັນການສະແຫວງຫາຕະຫລອດຊີວິດມະຕະ.
ປະຈັກພະຍານຂອງທ່ານເຖິງພຣະບຸດທີ່ຊົງພຣະຊົນຢູ່ຂອງພຣະເຈົ້າ ແລະ ສາດສະໜາຈັກຂອງພຣະອົງທີ່ໄດ້ຮັບການຟຶ້ນຟູ, ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ອາດບໍ່ເກີດຂຶ້ນໄວເທົ່າກັບຄວາມປາດຖະໜາ, ແຕ່ຂ້າພະເຈົ້າໃຫ້ສັນຍາທ່ານໄດ້ເຖິງເລື່ອງນີ້ວ່າ: ຖ້າຫາກທ່ານເຮັດພາກສ່ວນຂອງທ່ານ, ພອນນັ້ນຈະມີມາແນ່ນອນ.
ແລະ ມັນຈະຮຸ່ງເຫລື້ອມ.
ຂ້າພະເຈົ້າຂໍສະແດງປະຈັກພະຍານສ່ວນຕົວຂອງຂ້າພະເຈົ້າວ່າ ຄວາມຈິງທາງວິນຍານຈະເຮັດໃຫ້ຫົວໃຈຂອງທ່ານອົບອຸ່ນ ແລະ ນຳເອົາຄວາມສະຫວ່າງມາສູ່ວິນຍານຂອງທ່ານ. ມັນຈະເປີດເຜີຍສະຕິປັນຍາທີ່ບໍລິສຸດໃຫ້ແກ່ທ່ານ ດ້ວຍຄວາມສຸກທີ່ປະເສີດ ແລະ ຄວາມສະຫງົບສຸກແຫ່ງສະຫວັນ. ຂ້າພະເຈົ້າໄດ້ປະສົບເລື່ອງນີ້ສຳລັບຕົວຂ້າພະເຈົ້າເອງໂດຍອຳນາດຂອງພຣະວິນຍານບໍລິສຸດ.
ເໝືອນດັ່ງຄຳສັນຍາໃນພຣະຄຳພີໃນສະໄໝໂບຮານ, ການສະຖິດຢູ່ຂອງພຣະວິນຍານຂອງພຣະເຈົ້າທີ່ເກີນຈະອະທິບາຍໄດ້ ຈະເຮັດໃຫ້ທ່ານຢາກຮ້ອງເພງສັນລະເສີນຄວາມຮັກທີ່ໄຖ່,16 ເງີຍໜ້າຂຶ້ນສູ່ສະຫວັນ, ແລະ ເປັ່ງສຽງຂອງທ່ານ ສັນລະເສີນພຣະເຈົ້າສູງສຸດ, ທີ່ຫລົບໄພ, ຄວາມຫວັງ, ຜູ້ປົກປ້ອງ, ພຣະບິດາຂອງທ່ານ. ພຣະຜູ້ຊ່ອຍໃຫ້ລອດໄດ້ສັນຍາວ່າ ຖ້າຫາກທ່ານສະແຫວງຫາ, ທ່ານຈະໄດ້ພົບ.17
ຂ້າພະເຈົ້າເປັນພະຍານວ່ານີ້ເປັນຄວາມຈິງ. ຖ້າຫາກທ່ານສະແຫວງຫາຄວາມຈິງຂອງພຣະເຈົ້າ, ສິ່ງທີ່ໃນເວລານີ້ປະກົດຄືວ່າມືດມົວ, ບໍ່ແຈ້ງຊັດ, ແລະ ຫ່າງໄກຈະຖືກເປີດເຜີຍ ແລະ ເຮັດໃຫ້ແຈ່ມແຈ້ງຂຶ້ນເທື່ອລະເລັກເທື່ອລະໜ້ອຍ, ແລະ ມາຢູ່ໃກ້ໆຫົວໃຈຂອງທ່ານ ໂດຍຄວາມສະຫວ່າງແຫ່ງພຣະຄຸນຂອງພຣະອົງ. ທິວທັດທີ່ຮຸ່ງເຫລື້ອມທາງວິນຍານ, ທີ່ເຂົ້າໃຈຍາກຕໍ່ສາຍຕາຂອງມະນຸດ, ຈະຖືກເປີດເຜີຍຕໍ່ທ່ານ.
ຂ້າພະເຈົ້າມີປະຈັກພະຍານວ່າຄວາມສະຫວ່າງທາງວິນຍານກໍມີໄວ້ໃຫ້ລູກໆຂອງພຣະເຈົ້າທຸກຄົນ. ມັນຈະໃຫ້ຄວາມຮູ້ແກ່ຈິດໃຈຂອງທ່ານ, ແລະ ນຳການປິ່ນປົວມາສູ່ຫົວໃຈຂອງທ່ານ ແລະ ຄວາມສຸກມາສູ່ວັນເວລາຂອງທ່ານ. ເພື່ອນໆທີ່ຮັກຂອງຂ້າພະເຈົ້າທັງຫລາຍ, ຂໍຈົ່ງຢ່າລັງເລເວລາທີ່ຈະສະແຫວງຫາ ແລະ ເພີ່ມຄວາມເຂັ້ມແຂງໃຫ້ແກ່ປະຈັກພະຍານສ່ວນຕົວຂອງທ່ານເຖິງວຽກງານທີ່ສູງສົ່ງຂອງພຣະເຈົ້າ, ແມ່ນແຕ່ວຽກງານແຫ່ງຄວາມສະຫວ່າງ ແລະ ຄວາມຈິງ.
ປະຈັກພະຍານສ່ວນຕົວຂອງທ່ານເຖິງຄວາມສະຫວ່າງ ແລະ ຄວາມຈິງຈະບໍ່ພຽງແຕ່ຈະເປັນພອນໃຫ້ແກ່ທ່ານ ແລະ ລູກຫລານຂອງທ່ານເທົ່ານັ້ນໃນໂລກນີ້, ແຕ່ມັນຈະຢູ່ກັບທ່ານຕະຫລອດຊົ່ວນິລັນດອນນຳອີກ, ໃນບັນດາໂລກທີ່ປາດສະຈາກທີ່ສິ້ນສຸດ. ຂ້າພະເຈົ້າເປັນພະຍານເຖິງສິ່ງນີ້ ແລະ ຂໍຝາກພອນຂອງຂ້າພະເຈົ້າໄວ້ກັບທ່ານ ໃນພຣະນາມຂອງພຣະເຢຊູຄຣິດ, ອາແມນ.