I Esaki Ta Bida Eterno

Mi amigunan yòn, nos por kuminsá konosé Dios dor di orashon.

Riba   7 di Aprel 1829, Oliverio Cowdery di 22 aña di edat a kuminsá traha komo eskritor pa José Smith di 23 aña di edat. Nan tabata yòn—mes un kos ku boso. Oliverio a pidi konfirmashon di Dios tokante e Restourashon i su partisipashon den dje. Komo kontesta, el a risibí e siguiente revelashon:

“Mira, bo sa ku bo a buska aklarashon di mi i mi a iluminá bo mente. .....

“Si, mi ta bisa bo, ku bo tin màg di sa ku no tin niun otro ku no ta Dios ku sa bo pensamentunan i e intenshon di bo kurason. …

“… Si bo ta deseá un testimonio mas, pensa riba e anochi ku bo a sklama na mi den bo kurason.  …

“Mi no a duna pas den bo mente … ? Ki testimonio mas grandi bo por tin ku [esun] di Dios?”³

Ora bo hasi orashon ku fe, lo bo sinti Dios Su amor ora ku Su Spiritu ta papia ku bo alma. No ta importá kon so òf insigur bo por ta sinti tin bo biaha, bo no ta bo so den e mundu aki. Dios konosé bo, personalmente. Sigun bo ta hasi orashon, bo ta bin konosé E.

Sigun bo ta studia e skrituranan, lo bo no solamente siña tokante di e Salbador, pero lo bo berdaderamente bin konosé e Salbador.

Den Aprel 1985, Elder Bruce  R. McConkie a diskursá den konferensia general--- solamente 13 dia promé ku El a fayesé. El a konkluí ku su testimonio:

“Ami ta un di su testigunan, i riba un dia benidero lo mi sinti e marka di e klabunan den su man i den su pia i lo bin muha su pianan ku mi awa di wowo.

“Pero lo mi no sa mas mihó e ora ei, ku mi sa awor aki ku E ta Dios Su Yu Todopoderoso, ku E ta nos Salbador i Redentor, i ku salbashon ta bini den i pa medio di Su sanger ekspiatorio i di ningun otro manera.”⁴

Esnan di nos ku a tende Elder McConkie papia e dia ei nunka no a lubidá kon nos a sinti nos mes. Ora el a kuminsá su diskurso, el a revelá dikon su testimonio ta asina poderoso. El a bisa:

“Dor di papia tokante e kosnan maravioso aki, lo mi usa mi mes palabranan, ounke lo bo por pensa ku nan ta palabranan di Skritura.  …

“Ta bèrdat ku promé nan a wòrdu proklamá dor di otro hende, pero nan ta di mi awor, pasó e Spiritu Santu di Dios a duna testimonio na mi ku nan ta bèrdat, i awor ta parse manera Señor a revelá nan na mi den promé instante. Dor di esaki mi atende su stèm i konosé su palabra.”⁵

Sigun bo ta studia i meditá e skrituranan, bo tambe lo tende Dios Su stèm, i konosé Su palabranan, i konosé E. Dios lo revelá Su bèrdatnan eterno na bo personalmente. E doktrinanan i prinsipionan lo bira parti di ken bo ta i lo originá for di bo mes alma.

Huntu ku estudio individual, studia e skrituranan komo famia ta importante.

Den nos kas nos tabata ke pa nos yunan siña rekonosé e stèm di e Spiritu. Nos ta kere ku esei ta pasa sigun nos ta studia e Buki di Mormon tur dia komo un famia. Nos testimonio a wòrdu fortifiká sigun nos tabata papia tokante bèrdatnan sagrado.

Estudio di Skrituranan ta bira e kanal pa e Spiritu pa duna kada un di nos tutorial personal. Sigun bo ta studia e skrituranan tur dia, bo so i huntu ku bo famia, lo bo siña pa rekonosé e stèm di e Spiritu i lo bin konosé Dios.

Huntu ku nos orashon i studio di e skrituranan, nos mester hasi Dios Su boluntat.

E Salbador ta nos ehèmpel perfekto. El a bisa, “ Mi a bini for di shelu, no pa hasi mi mes su boluntat, pero e boluntat di dje ku a manda mi.” ⁶

Ora ku e Salbador resusitá a paresé na e Nefitanan, El a bisa, “Mira, ami ta e lus i e bida di mundu; i ami a bebe di kòpi marga ei ku e Tata a duna mi, i a glorifiká e Tata dor di tuma riba mi e pikánan di mundu, den kual mi a sufri e boluntat di e Tata den tur kos for di kuminsamentu.”⁷

Abo i ami ta hasi e boluntat di e Tata dor di honrá nos kombenionan, warda e mandamentunan, i sirbi Dios i esnan rònt di nos.

Mi kasá, Rhonda, i ami tin mayornan ku ta simplemente hendenan règular--- probabelmente hopi manera bo mayornan. Pero un kos mi ta stima di nos mayornan ta ku nan a dediká nan bida na sirbi Dios, i nan a siña nos pa hasi mes un kos.

Ora ku Rhonda su mayornan tabata kasá pa solamente un par di aña, su tata di 23 aña di edat a wòrdu yamá pa sirbi un mishon. El a laga atras su kasá i nan yu muhé di dos aña. Despues su kasá a wòrdu yamá pa sirbi huntu ku ne durante e lastu shete luna di su mishon--- lagando nan yu muhé atras den kuido di famia.

Un par di aña despues, awor ku kuater yu, nan a muda bai Missoula, [na] Montana, asina ku su tata por a bai universidat. No opstante, nan tabata solamente un par di luna einan ora ku Presidente Spencer  W. Kimball i Elder Mark  E. Petersen en ekstendé un yamamentu na mi suegro pa ta e promé presidente di e Staka di Missoula nobo kreá. E tabata solamente 34 aña. Pensamentunan di universidat a wòrdu lagá atras sigun El a buska pa hasi Señor su boluntat---no di su mes.

Mi mayornan a sirbi den tèmpel pa mas ku 30 aña. Mi tata komo un seyadó, mi mama komo un trahadó di ordenansa. Tambe nan a sirbi sinku mishon di regla huntu--- na Riverside, California; Ulaanbaatar, Mongolia; Nairobi, Kenía; Navoo Illinois Tèmpel; i Monterey México Tèmpel. Na México nan a traha duru pa siña un lenga nobo, loke no tabata fásil na edat di 80 aña. Pero nan a buska pa hasi e boluntat di Señor mas ku persiguí nan mes deseonan den bida.

Na tur Santunan di dEl aster Dia den henter mundu dediká asina, mi ta èko e palabranan ku a wòrdu papiá dor di Señor na e profeta Nefi, e yu di Helaman: “Bendishoná bo ta, .... pasó e kosnan ei ku bo a hasi ....inkansabel  … , [pasó bo] no a buska bo mes su bida, pero a buska mi boluntat, i pa warda mi mandamentunan.”⁸

Sigun nos ta buska pa hasi Dios Su boluntat dor di fielmente sirbi E i e hendenan rònt di nos, nos ta sinti Su aprobashon i en bèrdat bin konosé E.

E Salbador ta konta nos ku e mas mihó manera pa konosé Dios ta dor di bira manera Dje. El a instruí: “ P’esei, ki sorto di hòmber bo lo mester ta? En bèrdat mi ta mi bisa bo, hasta manera Ami ta.”⁹

Dignidat ta esensial den bira manera Dje. El a manda, “Santifiká bo mes; si, purifiká bo kurason, i limpia bo man ... ku Mi por hasí bo limpi.”¹⁰ Kuminsando riba e kaminda pa bira manera Dje, nos ta arepentí, risibí Su pordon, i E ta limpia nos almanan.

Pa yuda sigun nos ta progresá pa bai serka e Tata, Señor a duna nos un promesa: “ Kada alma ku laga su pikánan atras i bin serka mi, i yama mi nòmber, i obedesé mi stèm, i warda mi mandamentunan, lo mira mi kara i sa ku mi ta.” ¹¹

Dor di nos fe den Su sakrifisio ekspiatorio, e Salbador ta limpia nos, kura nos, i laga nos konosé E dor di yuda nos bira manera Dje. Mormon a siña, “ Ora na e Tata ku tur energia di kurason.... ku lo bo mag di bira e yunan di Dios; ku ora e lo paresé nos lo ta manera dje.”¹² Sigun nos ta esforsá pa bira manera Dios, E por saka for di nos hopi mas di loke nos mes hamas por saka for di nos mes.

Pa yuda nos den nos esfuerso, Dios a duna nos ròl modèlnan i mentornan. Mi ker a kompartí mi sentimentunan tokante unu di ami, Elder Neal  A. Maxwell. Konstantemente e tabata buska pa someté su boluntat na e boluntat di e Tata den su enfoke pa bira manera Dios.

Mas di 20 aña pasá, El a kompartí su sentimentunan ku mi djis despues di a wòrdu diagnostiká ku kanser. El a konta mi, “Mi ke ta den e tim, na e banda aki [di e velo] òf e banda ei. Mi no ke sinta na banda. Mi ke partisipá den e wega.”¹³

Durante e siguiente simannan, e tabata nenga pa pidi Dios pa kur’é; e tabata ke solamente pa hasi Dios Su boluntat. Su kasá, Colleen, a mustra ku Jesus su promé sklamashon den e Hòfi di Getsemane tabata “Si e ta posibel, laga e kòpi aki pasa for di mi.” Solamente despues di esaki e Salbador a bisa, “No opstante, no Mi boluntat, pero sigun Bo boluntat. ”¹⁴ El a kurashá Elder Maxwel pa sigui e Salbador Su ehèmpel, pa puntra pa alivio i despues someté su boluntat na Dios Su boluntat, loke ku el a hasi.¹⁵

Despues di a sufri dor di tratamentunan ekstensivo ku ta debilitá pa kàsi un aña, e tabata totalmente i kompletamente bèk “den e wega.” El a sirbi pa shete aña mas.

Mi tabatin diferente otorgamentu huntu ku ne durante di e añanan ku a sigui. Mi a sinti su ternura, kompashon, i amor. Mi a mira su oumento di refinamentu spiritual dor di su sufrimentu i su servisio kontinuo sigun e tabata esforsá pa bira manera e Salbador.

E ròl modèl i mentor di mas grandi, disponibel pa nos tur, ta nos Señor i Salbador, JesuCristu, ku a bisa: “Ami ta e kaminda, e bèrdat, i e bida: niun hòmber no ta yega serka e Tata, si no ta dor di Mi.”¹⁶ “Bini i sigui mi.” ¹⁷

Mi rumannan hòmber i muhé yòn, konosé Dios ta e hornada di un bida. “I esaki ta bida eterno, ku [nos] por konosé ... e úniko Dios berdadero, i JesuCristu, kende [e Tata] a manda.” ¹⁸

“Lo nos no sigui den un kousa grandi asina aki? ... Kurashi, [mi amigunan yòn]; i sigui, sigui pa te viktoria!”¹⁹

Dios konosé bo i ta invitá bo pa konosé E. Resa na e Tata, studia e skrituranan, buska pa hasi Dios Su boluntat, esforsá pa bira manera e Salbador, i sigui mentornan hustu. Sigun bo ta hasi esaki, lo bo bin konosé Dios i JesuCristu, i lo bo heredá bida eterno. Esaki ta mi invitashon na bo komo un testigu ordená di Nan. Nan ta bibu. Nan stimá bo. Mi ta testifiká esaki den e nòmber di JesuCristu, amèn.