Konfia den Señor i No Lèn

Miéntras mi tabata biaha na Asia, un kerida hermana a aserká mi, el a pone su brasanan rònt di mi i a puntra, “Di bèrdat bo ta kere ku e evangelio aki ta berdadero?” Estimada ruman, mi sa ku e ta berdadero. Mi ta konfia den Señor.

Den Proverbionan 3:5–6,nos ta lesa e konseho aki:

“Konfia den Señor ku henter bo kurason; i no lèn riba bo mes komprendementu.

“Rekonosé den tur loke bo ta hasi, i e lo dirigí bo kaminda.”

E skritura aki ta bini ku dos atvertensia, un aviso i un promesa glorioso. E dos atvertensianan: “Konfia den Señor ku henter bo kurason” i “ rekonosé den tur bo kaminda.” E aviso: “No lèn riba bo mes komprendementu.” I e promesa glorioso: “E lo dirigí bo kaminda”.

Ban atendé e aviso promé. E imágen visual ta duna nos hopi pa meditá ariba. E aviso ta bini den e palabranan “no lèn”---no lèn riba bo mes komprondementu.” Na ingles e palabra lean tin un nifikashon sekundario di lèn físikamente òf move na un banda. Ora nos ta lèn físikamente un òf otro banda, nos ta kita for di e sentro, nos ta for di balansa, i nos ta tambaliá. Ora nos ta lèn spiritualmente riba nos mes komprondementu, nos ta lèn leu for di Señor. Si nos lèn, nos no ta sentrá; nos no ta balansá; òf nos no ta enfoká riba Cristu.

Hermananan, den nos bida premortal, nos a para huntu ku e Salbador. Nos a konfi’é. Nos a ekspresá nos sosten, entusiasmo, i goso pa e plan di felisidat presentá pa nos Tata Selestial. Nos no a lèn. Nos a lucha ku nos testimonio i “a uni nos mes ku e forsanan di Dios, i e forsanan ei tabata viktorioso.”¹ E bataya entre bon i malu aki a sigui na mundu. Un biaha mas nos tin e responsabilidat sagrado pa para komo testigunan i pone nos konfiansa den Señor.

Nos kada un tin ku puntra: Kon mi por keda sentrá i no lèn riba mi mes komprendementu? Kon mi por rekonosé i sigui e Salbador su mensahe ora stèmnan di e mundu ta asina iresistibel? Kon mi por kultivá konfiansa den e Salbador?

Permití mi sugirí tres manera pa oumentá nos konosementu i konfiansa di i den e Salbador. Boso lo haña ku e prinsipionan aki no ta nobo, pero nan ta fundamental. Nan ta wòrdu kantá den tur Primaria, ekspresá den e lèsnan di Mujeres Jóvenes, i ta kontestanan na hopi pregunta di Sosiedat di Sokoro. Nan ta sentrá ---i ta prinsipionan---ku no ta lèn.

Promé, nos por yega na konosé Señor i konfi’é ora nos “alimentá riba e palabranan di Cristu; pasobra mira, e palabranan di Cristu lo bisa boso tur loke boso tin ku hasi.”²

Algun luna pasá, nos tabatin estudio di skritura ku familiar. Mi nietu di dos aña tabata sinta riba mi skochi miéntras nos tabata lesa. Mi tabata den mi gran ròl di wela, gosando di mi yu hòmber su famia.

Kla ku estudio di skritura, mi a sera mi buki. Mi nietu tabata sa ku pronto lo ta ora pa bai drumi. El a wak ariba ku su wowonan blou ansioso i a bisa un bèrdat eterno: “Mas skritura Nana.”

Mi yu hòmber,un mayor bon i konsistente, a avisá mi, “Mama, no dun’é su kièr. E ta djis purba pa no bai drumi.”

Pero ora mi nietu a pidi pa mas skritura, nos a lesa mas skritura! Mas skritura a iluminá nos mente, nutri nos spiritu, kontestá nos preguntanan, oumentá nos konfiansa den Señor, i a yuda nos sentralisá nos bida riba Dje. Kòrda pa studia e skrituranan ku diligensia, pa boso por tin benefisio di nan.³

Di dos, nos por yega na konosé Señor i konfi’é dor di orashon. Esta un bendishon di por ta kapas pa hasi orashon na nos Dios! “Pidi na e Tata ku henter e energia di kurason.”⁴

Mi tin un rekuerdo plasentero di un orashon ku mi ta tesorá. Pa un fakansi di verano di universidat, mi a aseptá un djòp na Texas. Mi mester a kore sentenar di kilometer for di Idaho pa Texas den mi outo bieu, kual ku afekshon mi a yama Vern. E tabata paketá te den dak, i mi tabata kla pa un aventura nobo.

Na kaminda pa porta, mi a duna mi mama dushi un brasa i el a bisa, “Laga nos hasi orashon promé ku bo bai.”

Nos a hinka rudia i mi mama a kuminsá hasi orashon. El a roga na Tata Selestial pa mi seguridat. El a pidi pa mi outo sin èrko, i pa e outo funshoná manera mi tin mester. Tambe pa angelnan por ta huntu ku mi durante verano. El a keda hasi orashon kada biaha.

E pas ku a bini for di e orashon ei a duna mi e kurashi pa konfia den Señor i no lèn riba mi mes komprendementu. Señor a dirigí mi kaminda den e hopi desishonnan ku mi a tuma e verano aya.

Si nos hasi un kustumber pa aserká Tata Selestial den orashon, nos lo yega na konosé i konfia e Salbador. Nos deseonan lo bira mas manera di Dje. Nos lo ta apto pa sigurá pa nos mes i pa otronan bendishonnan ku Tata Selestial ta kla pa duna si nos solamente pidi ku fe.⁵

Di tres, nos por yega na konosé Señor i konfi’é ora nos ta sirbi otronan. Mi ta kompartí e siguiente historia ku pèrmit di Amy Wright, ku a yega na komprondé e prinsipio di sirbishi hasta den un malesa spantoso i peligroso pa bida. Amy a skibi:

“Riba  29di òktober 2015mi a haña sa ku mi tabatin kanser. Mi kanser tin un chèns di superbibensia di 17porshento. E posibilidatnan no tabata bon. Mi tabata sa ku lo mi mester a batayá pa mi bida. Mi tabatin determinashon pa hasi tur kos posibel no solamente pa mi mes pero, mas importante, pa mi famia. Na desèmber, mi a kuminsá ku kimo. Mi tabata familiarisá ku hopi di e efektonan sekundario di e medisinanan kontra kanser, pero mi no tabata sa ku tabata posibel pa un hende por ta asina malu i ainda ta na bida.

“Na un momento, mi a deklará mi kimoterapia un violashon di derechonan humano. Mi a bisa mi kasá ku mi ta kla. Mi ta stòp! Lo mi no bai hòspital bèk. Den su sabiduria, mi dushi ku pasenshi a skucha i despues a respondé, ‘Wèl, e ora ei nos tin ku haña un hende pa sirbi.’’’

Kiko? El a lubidá ku su kasá tabatin kanser i no por a soportá ni un kombate mas di náusea òf un momento mas di doló insoportabel?

Amy ta sigui splika: “Mi síntomanan a bira gradualmente pió te ku generalmente mi tabatin un òf dos dia oké pa luna[ora] mi por a funshoná un poko manera un ser humano ku ta biba i hala rosea. Tabata e dianan aki ora ku nos famia por a haña maneranan pa sirbi.”

Un di e dianan ei, Amy su famia a distribuí paketenan di kimo d kosuelo na otro pashèntnan, paketenan yená ku kosnan pa yuda animá i aliviá síntomanan. Ora Amy no tabata por a drumi, e tabata pensa maneranan pa iluminá un otro persona su dia. Algun manera tabata grandi, pero mayoria tabata djis un nota chikitu òf mensahenan di ánimo i amor. Den e anochinan aki ora su doló tabata demasiado fuerte pa drumi, e por a drumi riba kama ku su iPad i tabata buska ordenansanan ku mester a wòrdu kompletá na bienestar di su antepasadonan ku a muri. Milagrosamente e dolor lo a baha, i e tabata kapas pa perseverá.

“Sirbishi,” Amy ta testifiká, “a salba mi bida. Kaminda finalmente mi a haña mi forsa pa sigui bai dilanti tabata e felisidat ku mi a deskubrí den purba pa aliviá e sufrimentu di esnan rònt di mi. Mi a mira padilanti pa nos proyektonan di sirbishi ku gran goso i antisipashon. Te ku e dia di awe e ta parse un paradòks straño. Bo por pensa ku un persona ku tabata kabes limpi, venená, i luchando pa [su] bida tabata hustifiká den pensa ku ‘awor aki mi so ta konta.’ Sinembargo, ora mi tabata pensa riba mi mes, mi situashon, sufrimentu i dolor, e mundu a bira masha skur i depresivo. Ora mi enfoke a bira na otronan, tabatin lus, speransa, forsa, kurashi, i alegria. Mi sa ku esaki ta posibel dor di e poder pa sostené, sana, i kapasitá di e Ekspiashon di Jesucristu.”

Amy a yega na konfia den Señor segun el a yega na konosé. Si el a lèn maske ta un tiki na su mes komprendementu, lo e por a rechasá e idea pa e sirbi. Sirbishi a kapasit’é pa soportá su dolor i aflikshonnan i pa biba e skritura aki: “Ora bo ta den sirbishi di bo próhimo bo ta únikamente den sirbishi di bo Dios.”⁶

Jesucristu a vense e mundu. I pa motibu di Dje, i di su Ekspiashon infinito, nos tur lo tin gran motibu pa konfia, sabiendo ku na fin tur kos lo ta bon.

Hermananan, kada un di nos por konfia den Señor i no lèn. Nos por sentralisá nos bida riba e Salbador dor di yega na konosé, i E lo dirigí nos kaminda.

Nos ta na mundu pa demostrá e mesun konfiansa den E ku a permití nos pa para ku Jesucristu ora El a deklará, “Ata mi aki, manda ami.”⁷

Mi hermananan stimá, Presidente Thomas  S. Monson a testifiká ku “e promesanan primintí na nos ta demasiado grandi pa midi. Ounke e nubianan di tormenta ta akumulá, i e áwaseru ta kai riba nos, nos konosementu di e evangelio i nos amor pa nos Tata Selestial i nos Salbador lo konsolá i mantené nos ... si nos kana rektamente. ... Lo no tin nada den e mundu aki ku por vense nos.”⁸

Mi ta agregá mi testimonio na esun di nos kerido profeta. Si nos konfia den nos Tata Selestial i nos Salbador i no lèn riba nos mes komprondementu, Nan lo dirigí nos kaminda i lo ekstendé e brasa di miserikòrdia na nos. Den e nòmber di Jesucristu, amèn.

Nota: Riba 1 di aprel 2017, Hermana Cordon a wòrdu relevá komo di Dos Konsehero den e Presidensia General di Primaria i a wòrdu yamá komo Promé Konsehero.