E mas Grandinan entre Boso
Dios su rekompensa mas grandi ta bai pa esnan ku ta sirbi sin spera ningun premio.
Mi kerido rumannan, amigunan, kon gradesí mi ta di por ta ku bo den e reunion mundial di saserdosio inspirá aki. Presidente Monson, danki pa bo mensahe i bendishon. Semper nos lo tuma na serio bo palabranan di guia, konseho, i sabiduria. Nos stima bo i ta apoyá bo, i semper nos ta hasi orashon p’abo. Berdaderamente bo ta e Profeta di Señor. Bo ta nos kerido Presidente. Nos ta sostené bo, nos ta stima bo.
Kasi dos dékada pasa, e Tèmpel di Madrid Spaña a wòrdu dediká i a kuminda su servisionan komo un kas sagrado di Señor. Harriet i ami ta kòrd’é bon pasobra mi tabata sirbi den e Presidensia di Área di Europa e tempu ei. Huntu ku hopi otro, nos a pasa oranan atendiendo na e detayenan di planifiká i organisá e eventonan promé ku e dedikashon.
Ora e dedikashon tabata aserkando, mi a ripara ku mi no a risibí un invitashon pa asistí. Esaki tabata un poko inesperá. Al fin al kabo, den mi responsabilidat komo Presidente di Área, mi tabata hopi envolví den e proyekto di tèmpel aki i mi a sinti un tiki ku e ta parti di mi.
Mi a puntra Harriet si e la mira un invitashon. E la bisa mi ku no.
Dianan ta pasa mi mi ansiedat a krese. Mi a puntra si nos invitashon a pèrdè – kisas e tabata dera entre e kusinchinan di nos sofa. Kisas e la wòrdu meskla den tur e kartanan i a wòrdu tira afó. E bisiñanan tabata tin un pushi masha kurioso, i ma kuminsá wak e sospechoso.
Finalmente mi a forsa mi mes pa akseptá e echo: Mi no a wòrdu invitá.
Pero kon esei por ta posibel? M’a hasi algu pa ofendé? Algun hende a asumí ku e tabata muchu leu pa nos biaha? A lubidá riba mi?
Eventualmente, mi a realisá ku e liña di pensamentu aki ta bai na un lugá ku ami lo no ke ta.
Harriet i ami a rekordá nos mes ku e dedikashon di e tèmpel no tabata tokante nos. E no tabata tokante ken ta meresé pa wòrdu invitá òf ken no. I e no tabata tokante nos sentimentunan òf nos sentido di pertenesé.
E tabata tokante dediká un edifisio sagrado, un tèmpel na e Altisimo Dios. Tabata un dia re alegria pa e miembronan di e Iglesia na Spaña.
Si mi a wòrdu invitá pa asistí, lo ma hasi esei ku hopi amor. Pero si mi no a wòrdu invitá, mi alegria lo no tabata ménos profundo. Harriet i ami lo a regosiha ku nos amigunan, nos kerido rumannan, djaleu. Nos lo a alabá Dios a e bendishon maravioso mesun kos for di nos kas na Frankfurt komo nos lo a hasi na Madrid.
Yunan di Trueno
Bou di e Diesdos ku Hesus a yama i ordená tabata tin dos ruman, Santiago i Juan. Bo ta kòrda e apodo ku E a duna nan?
Yunan di Trueno (Boanerges). 1
Bo no ta haña un apodo asina ei sin un antesedente intrigando. Afortunadamente e eskrituranan no ta proveé hopi splikashon tokante di e orígen di e apodo. Sin embargo, nos ta haña bista chikí den e karakter di Santiago i Juan. Esakinan ta mesun dos rumannan ku a sugerí pa yama kandela bin abou for di shelu riba un pueblo na Samaria pasobra nan no tabata wòrdu invitá pa drenta.2
Santiago i Juan tabata piskadó – probablemente un tiki gròf akabá – pero mi ta kere ku nan tabata konosé hopi di e elementonan di naturalesa. Sigur, nan tabata hòmbernan di akshon.
Na un okashon, ora e Salbador tabata prepará pa hasi Su último biaha pa Yerusalèm, Santiago i Juan a aserk’é ku un petishon spesial – unu ku kisas ta bal nan apodo.
“Nos ke pa bo hasi pa nos loke sea ku nos pidi,” nan a bisa.
Mi por imaginá Hesus ku un sonrisa ora E la respondé, “Kiko boso ke?”
“Permití nos ku nos por sinta, unu na bo man drechi, i e otro na bo man robes, den bo gloria.”
E Salbador a desafiá nan pa pensa un tiki mas profundo riba loke nan tabata pidié i a bisa nan, “Pa sinta na mi man drechi i na mi man robes no ta di mi pa duna; pero e lo wòrdu duna na esun pa kua e la wòrdu prepará.”3
Den otro palabra, bo no por haña honor den e reino di shelu dor di hasí kampaña p’e. Tampoko bo no por tin un kombersashon pa konvensé pa haña bo gloria eterno.
Ora e otro dies Apòstelnan a skucha tokante di e petishon di e Yunan di Trueno aki, nan no tabata spesialmente kontentu. Hesus tabata sa ku Su tempu tabata kòrtiku, i mirando e kontenshon entre esnan ku mester sigui ku Su obra e lo mester a sintié preokupá.
E la papia ku e Diesdos tokante e naturalesa di poder i kon e ta afektá esnan ku ta busk’é i wanta na dje. “E hendenan di influensia den mundu,” E la bisa, “ta usa nan posishon di outoridat pa ehersé poder riba otronan.”
Mi por kasi mira e Salbador, mirando ku amor infinito den e karanan di e disípulonan fiel i kreyente. Mi por kasi skucha Su bos rogando: “Esaki no ta e manera ku e lo ta entre bosnan. Na su lugá, esun ku lo ta grandi entre bosnan, lo ta boso siervo: I esun ku lo ta e mas hefe di boso, lo ta e siervo di tur.”4
Den Dios su reino, grandesa i liderazgo ta nifiká mira otro manera nan ta berdaderamente – manera Dios ta mira nan – i despues saka man i ministrá na nan. E ta nifiká regosiha ku esnan ku ta kontentu, yora ku esnan ku tin doló, halsa esnan ku ta den angustia, i stima bo próhimo manera Kristu ta stima nos. E Salbador stima tur e yunan di Dios sin importá di nan sirkunstansia sosio ekonómiko, rasa, idioma, orientashon polítiko, òf nashonalidat. I nos tambe mester hasié!
Dios su rekompensa mas grandi ta bai pa esnan ku ta sirbi sin spera nada bek. E ta bai pa esnan ku ta sirbi sin fanfara; esnan ku na un manera ketu ta bai buskando maneranan pa yuda otro; esnan ku ta ministra na otronan simplemente pasobra nan stima Dios i Dios su yunan.5
No Inhalá
Korto despues di mi yamada komo un Outoridat General nobo, mi ta tin e privilegio di kompaña Presidente James E. Faust pa reorganisashon di un estaka. Miéntras mi tabata manehá e outo bayendo nos asignashon den Sur di Utah, Presidente Faust tabata amabel sufisiente pa usa e tempu pa instruí i siña mi. Un lès ku nunka lo mi lubidá. E la bisa, “E miembronan di Iglesia ta kortes ku e Outoridatnan General. Nan lo trata bo ku amabilidat i bisa kosnan bunita di bo.” I despues a tuma un pousa kòrtiku i bisa, “Dieter, semper ta agradesido pa esaki, pero wak pa nunka bo inhalá.”
Esaki ta un lès importante tokante servisio di Iglesia ku ta apliká pa kada posedo di saserdosio den kada quorum di Iglesia. E ta apliká pa nos tur den e Iglesia aki.
Ora Presidente J. Reuben Clark a konsehá esnan yama na posishonnan di outoridat den Iglesia, e ta bisa nan pa nos lubidá e regla number seis.
Inevitablemente, e persona ta puntra, “Kiko ta number seis?”
“No tuma bo mes asina na serio,” e tabata bisa.
Di mes, esaki ta kousa pa e siguiente pregunta: “Kua ta e otro sinku reglanan?”
Ku un brio den su wowonan, Presidente Clark ta bisa, “No tin ningun.”6
Pa ta un lider di Iglesia efektivo, nos mester siña e lès kritiko aki: liderazgo den Iglesia no asina tantu ofer di dirigí otronan pero e ta tokante nos disponibilidat pa wòrdu dirigí dor di Dios.
Yamamentu komo Oportunidat pa Sirbi
Komo Santunan di e Mas Altisimo Dios, nos mester “kòrda den tur kos e pobernan i esnan ku tin mester, e enfermonan i esnan afligí, paso esun ku no hasi e kosnan aki, esei mes no ta mi disípulo.”7 Oportunidatnan pa hasi bon i sirbi otronan ta sin límite. Nos por haña nan den nos komunidatnan, den nos bario òf ramanan, i sigur den nos hogarnan.
Ademas, kada miembro di Iglesia a risibí oportunidatnan formal spesífiko pa sirbi. Nos ta referí na e oportunidatnan aki komo “yamamentunan” – un término ku mester rekordá nos di esun ku a yama nos pa sirbi. Si nos atendé nos yamamentu komo oportunidat pa sirbi Dios i ministrá na otronan ku fe i humildat, kada akto di servisio lo ta un paso den e kaminda pa disípulado. Di e manera aki, Dios no ta solamente konstruí Su Iglesia pero e ta krea tambe Su siervonan. Iglesia ta diseñá pa yuda nos bira disípulonan berdadero i fiel di Kristu, yunan di Dios bon i noble. Esaki ta pasa no solamente ora nos ta bai reunionnan i skucha e diskursonan pero ora nos ta bai pafó di nos mes i sirbi. Esaki ta kon nos ta bira “grandi” den e reino di Dios.
Nos ta akseptá yamamentunan ku grasia, humildat, i ku gratitut. Ora nos wòrdu relevá for di e yamamentunan aki, nos ta akseptá e kambio ku e mesun grasia, humildat, i gratitut.
Den e bista di Dios no tin ningun yamamentu den e reino ku ta mas importante ku un otro. Nos servisio – sea grandi òf chikí – ta rafina nos espíritu, habri e bentananan di shelu, i los Dios su bendishonnan no solamente riba esnan ku nos ta sirbi pero riba nos tambe. Ora nos saka man na otro, nos por sa ku un konfiansa humilde ku Dios ta rekonosé nos servisio ku aprobashon. E lo ta sonriendo ora nos ta ofresé un akto di kurason i kompashon, espesialmente aktonan ku no ta wòrdu mira òf nota dor di otronan.8
Kada bia ku nos duna di nos mes na otronan, nos ta tuma e paso pa ta mas serka di bira disípulonan bon i berdadero di e Esun ku a duna tur di Su mes pa nos.
For di Presidí te na e Marcha
Durante e di 150 aniversario di e yegada di e pioneronan den e Vaye di Lago Salado, Hermano Myron Richins tabata sirbi komo presidente di estaka na Henefer, Utah. E selebrashon tabata inkluí un rekreashon di e pasahe di e pioneronan dor di e pueblo aki.
Presidente Richins tabata hopi envolví ku e plannan pa e selebrashon, i e la asistí hopi reunion ku e Outoridatnan General i otronan pa papia tokante di e eventonan. E tabata kompletamente komprometé.
Djis promé ku e selebrashon mes, Presidente Richins su estaka a wòrdu reorganisá, i e a wòrdu relevá komo presidente. Riba e djadumingu siguiente, e la asistí e reunion di saserdosio di su bario ora e lidernan a puntra pa voluntario pa yuda ku e selebrashon. Presidente Richins, huntu ku otronan, a hisa nan man i a risibí instrukshon pa bisti paña di trabou i trese su trùk i un skòp.
Finalmente, e mainta di e evento grandi a yega, i Presidente Richins a reportá pa su obra di voluntario.
Djis algun siman promé, e tabata un kontribuyendo importante den e planifikashon i supervishon di e gran evento. Riba e dia ei, sin embargo, su trabou tabata di sigui e kabainan den e parada i limpia nan tras.
Presidente Richins a hasié ku muchu gusto i ku alegria.
E la komprondé ku un tipo di servisio no ta riba di un otro tipo.
E tabata sa esei i a pone den práktika e palabranan di e Salbador: “E ku ta e mas grandi entre boso lo ta boso siervo.”9
Hasiendo e Disipulado na e manera korekto
Tin biaha, manera e Yunan di Trueno, nos ta deseá posishonnan di prominensia. Nos ta anhelá pa rekonosementu. Nos ta buska pa ta lider i pa hasi kontribushonnan memorabel.
No tin nada malu pa deseá di sirbi Señor, pero ora nos ta buska pa gana influensia den e Iglesia pa nos propio benefisio – pa nos por risibí e elogio i atmirashon di hende – nos lo tin nos rekompensa. Ora nos “inhalá” e elogio di otronan, e elogio ei lo bai ta nos kompensashon.
Kua ta e yamamentu mas importante den Iglesia? E ta esun ku bo tin aworakí. No ta importá kon humilde òf prominente e por ta paresé, e yamamentu ku bo tin aworakí ta esun ku lo permití bo no solamente alsa otronan pero tambe pa bo bira e hòmber ku Dios a krea bo pa bo ta.
Mi kerido amigunan i rumannan den e saserdosio, halsa kaminda bo ta para!
Pablo a siña e Filipensenan, “En bes di ta motivá pa ambishonnan egoista òf vanidat, kada un di boso mester, den tur humildat, wòrdu move pa trata otro manera mas importante ku bo mes.”10
Sirbiendo ku Honor
Buskando honor i selebridat den Iglesia a konsekuensia di servisio berdadero i humilde pa ku otronan ta e marka di Esau.12 Nos por risibí nos rekompensa terenal, pero e ta bin na gran kosto – e pèrdida di nos aprobashon selestial.
Laga nos sigui e ehèmpel di nos Salbador, ku tabata mansu i humilde, ku no a buska e elogio di hende pero pa hasi e boluntat di Su Tata.12
Laga no sirbi otro humildemente – ku energia, gratitut, i honor. Ounke nos aktonan di servisio por paresé humilde, modesto, òf di poko balor, esnan ku saka nan man ku bondat i kompashon pa otronan lo sa un dia e balor di nan servisio pa medio di e grasia eterno i bendishoná di e Dios Omnipotente.13
Mi kerido rumannan, kerido amigunan, ku nos por meditá, komprondé i biba e lès tan importante di liderazgo i e gobièrnu di saserdosio: “Esun ku ta e mas grandi entre boso lo ta boso siervo.” Esaki ta mi orashon i bendishon, den e nòmber sagrado i nos Maestro, nos Redentor, den nòmber di JesuCristo, amèn.