E Deidat i e Plan di Salbashon
Pasobra nos tin e bèrdat tokante di e Deidat i nos relashon ku Nan, nos tin e mapa fundamental di kaminda pa nos biahe durante mortalidat.
I.
Nos promé artíkulo di fe ta deklará: “Nos ta kere den Dios, e Tata Eterno; i den su Yu Jesucristu; i den e Spiritu Santu.” Nos ta djòin otro kristiannan den e kreensia aki di un Tata i un yu i un Spiritu Santu, pero lokual nos ta kere tokante Nan ta diferente for e kreensia di otronan. Nos no ta kere den lokual e mundu Kristian ta yama e doktrina di e Santa Trinidat. Den su Promé Vishon, José Smith a mira dos personahe distinto, dos ser, pues pa klarifiká ku e kreensianan ku tabata prevalesé di e tempu ei konserniente Dios i di e Deidat no tabata bèrdat.
Kontrario na kreensia ku Dios ta un misterio inkomprensibel i imposibel pa konosé, ta e bèrdat ku e naturalesa di Dios i nos relashon na Dje ta konosí i e yabi na tur otro kos den nos doktrina. E Beibel ta registrá Jesus su gran Orashon, unda El a deklará ku “esaki ta bida eterno, pa nan por konosé abo e úniko Dios berdadero, i Jesucristu, esun ku abo a manda” (Huan 17:3).
E esfuerso pa konosé Dios i Su obra a kuminsá promé ku mortalidat i lo no kaba aki. E Profeta José Smith a siña, “lo dura hopi tempu despues ku boso a pasa dor di e velo promé ku boso a siña ... tur e prinsipionan di eksaltashon. 1 Nos ta edifiká riba e konosementu ku nos a atkirí den e bida premortal den mundu di spiritu. Pues, den purba pa siña e israelitanan e naturalesa di Dios i Su relashon na Su yunan, e profeta Isaías a deklará, manera registrá den e Beibel:
“Ku ken boso ke kompará Dios antó? Òf ku kua imágen boso ke kompar’é? …
“Ta sa boso no sa?Tende boso no a tende, fo’i tempu bieu no a konta boso?Boso no tin ni e mínimo idea ta ken a funda mundu?” (Isaías 40:18, 21).
Nos sa ku e tres miembronan di e Deidat ta sernan separá i distinto. Nos sa esaki for di instrukshonnan duná pa e Profeta José Smith: E Tata tin un kurpa di karni i wesu mes un palpabel ku di hende; e Yu tambe; pero e Spiritu Santu no tin un kurpa di karni i wesu, pero ta un personahe di Spiritu. Ku no tabata asina, e Spiritu Santu lo no por a biba den nos (D&C 130:22).
Tokante di e posishon supremo di Dios e Tata den e Deidat, tambe komo e respektivo ròlnan ku kada personahe ta ehekutá, e Profeta José a splika:
“Kualke persona ku a mira e shelunan habri sa ku tin tres personahe den shelu ku tin e yabinan di poder, i un ta presedí riba tur. …
“... E personahenan aki ... ta wòrdu yamá Dios e di promé, e Kreador, Dios e di dos, E Redentor, i Dios e di tres, E Testigu òf Testador ?
“Ta e derecho di e Tata pa presedí komo Hefe òf Presidente, Jesus komo Mediador, i e Spiritu Santu komo e Testador òf Testigu.” 2
II. E Plan
Nos ta komprondé nos relashon ku e miembronan di e Deidat for di lokual ta revelá tokante e plan di salbashon.
Preguntanan manera “Di unda nos ta bini?” “Di kon nos ta aki?” I “Unda nos ta bai? ” Ta wòrdu kontestá den loke e skrituranan ta yama e “plan di salbashon,” e “gran plan di felisidat,” òf e “plan di redenshon” (Alma 42:5, 8, 11). E evangelio di Jesucristu ta sentral den e plan aki.
Pasobra nos ta yunan spiritual di Dios, den un eksistensia promé ku mortalidat, nos a deseá un destino di bida eterno pero a progresá mes leu ku nos tabata por sin e eksperensianan mortal den un kurpa físiko. Pa duna e oportunidat aki, nos Tata Selestial a presedí riba e Kreashon di e mundu aki, unda, sin nos memoria di lokual a presedé nos nasementu mortal, nos por a proba nos disposishon pa warda Su mandamentunan i eksperensiá i krese dor di e otro desafionan di bida mortal. Pero den kurso dje eksperensia mortal aki, i komo resultado di e Kaida di nos promé mayornan, nos lo sufri morto spiritual dor di wòrdu kitá for di e presensia di Dios, sushá pa piká, i bira suheto na morto físiko. E Tata su plan pa antisipá i duna maneranan pa vense tur e bareranan aki.
III. E Deidat
Konosé e propósito di Dios su gran plan, nos ta konsiderá awor e respektivo ròlnan di e tres miembronan di e Deidat den e plan aki.
Nos ta kuminsá ku un enseñansa for di Beibel. Na konklushon di su di dos karta na e Korintionan, e Apòstel Pablo ta hasi e e referensia kasual aki di e Deidat di Tata, Yu, i Spiritu Santu: “ E grasia di Señor Jesucristu, i e amor di Dios i e komunion[ òf kompañerismo3] di e Spiritu Santu sea ku boso tur” (2 Korintionan 13:14 ).
E skritura bíbliko aki ta representá e Deidat i ta hasi referensia na e amor ku ta definí i motivá di Dios e Tata, e mishon miserikòrdioso i salbadó di Jesucristu, i e kompañerismo di e Spiritu Santu.
Dios e Tata
Tur kos ta kuminsá ku Dios e Tata. Miéntras nos sa relativamente poko di Dje, loke nos sa ta desisivo den komprondé Su posishon supremo, nos relashon na Dje, i Su ròl di supervisor den e plan di salbashon, e Kreashon, i tur sobrá ku a sigui.
Manera Elder Bruce R. McConkie djis promé ku su morto: “Den e sentido último i final di e palabra, tin solamente un Dios berdadero i bibiente. E ta e Tata, e Elohim Todopoderoso, e Ser Supremo, e Kreador i Soberano di e universo.” 4 E ta e Dios i Tata di Jesucristu, i tambe di nos tur, Presidente David O. McKay a siña ku “e promé bèrdat fundamental defendé pa Jesucristu tabata esaki, ku patras, ariba, i riba tur kos tin Dios e Tata, Señor di shelu i tera. 5
Lokual nos sa di e naturalesa di Dios e Tata ta mas tantu loke nos por siña di e ministerio i siñansanan di Su Yu Unigénito, Jesucristu. Manera Elder Jeffrey R . Holland a siña, un dje propósitonan di mas importante di e ministerio di Jesucristu tabata pa revelá na mortalnan “kon Dios nos Tata Eterno ta, ... pa revelá i hasi personal pa nos e naturalesa berdadero di Su Tata, nos Tata na Shelu.” 6 Den e Beibel tin un testigu apostóliko ku Jesus tabata “e semehansa “ di Su Tata su persona (Hebreonan 1:3),kual meramente ta elaborá e enseñansa di Jesus mes ku “esun ku a mira mi a mira mi Tata” (Huan 14:9).
Dios e Tata ta e Tata di nos spiritu. Nos ta Su yunan. E ta stima nos, i tur kos ku E ta hasi ta pa nos benefisio eterno. E ta e outor di e plan di salbashon, i ta pa medio di Su poder ku Su plan ta logra e propósitonan pa e gloria eterno di Su yunan.
E Yu
Pa hende, e miembro mas visibel di e Deidat ta Jesucristu. Un deklarashon di doktrina importante duná pa e Promé Presidensia na 1909 ta deklará ku E ta “ e Primogénito den tur e yunan di Dios, e primogénito den e spiritu, i e yu Unigénito den e karni.” 7 E Yu, esun mayor di tur, a wòrdu skohé pa e Tata pa ehekutá e plan di e Tata---pa ehersé e poder kreador di e Tata pa krea mundunan ku no por wòrdu kontá (wak Moises 1:33) i pa salba e yunan di Dios for di morto dor di Su Resurekshon i for di piká dor di Su Ekspiashon. E sakrifisio dibino aki ta di bèrdat yamá e akto sentral di henter historia humano.8
Na e okashonnan úniko i sagrado ora Dios e Tata a introdusí Su Yu personalmente, El a bisa, “Ata ’ki mi Yu Stimá: tende di dje” (Marko 9:7; Lukas 9:35; wak tambe 3 Nefi 11:7 ; José Smith—History 1:17). Pues, ta Jesucristu, komo Yehova, e Señor di Israel, ku ta papia na i pa medio di e profetanan. 9 P’esei tempu Jesus a aparesé na e Nefitanan despues di Su Resurekshon, el a introdusí Su mes komo “e Dios di henter mundu” (3 3 Nefi 11:14). Asina ta ku Jesus hopi biaha ta papia na e profetanan di e Buki di Mormon i na e Santunan di e Delaster dianan komo “e Tata i e Yu,” un título spliká den e Promé Presidensia i Quorum di e Diesdos Apòstelnan su eksposishon inspirá di doktrina solamente 100 aña pasá. 10
E Spiritu Santu
E di tres miembro di e Deidat ta e Spiritu Santu, tambe yamá e Santu Spiritu, e Spiritu di Señor, i e Konsolador. E ta e miembro di e Deidat ku ta e agente pa revelashon personal . Komo un personahe di spiritu (wak D&C 130:22), E por biba den nos i realisá e ròl esensial di komunikadó entre e Tata i e Yu i e yunan di Dios na mundu. Hopi skritura ta siña ku Su mishon ta pa tèstifiká di e Tata i e Yu(wak Juan 15:26; 3 Nefi 28:11; D&C 42:17). E Salbador a primintí ku e Konsolador lo siña tur kos, trese tur kos na nos rekuerdo, i guia nos den tur bèrdat (wak Juan 14:26 ; 16:13). Pues e Spiritu Santu ta yuda nos distinguí entre bon i malu, guia nos den nos desishonnan importante, i ta yuda nos den e desafionan di mortalidat. 11 E ta tambe e medio pa kua nos ta santifiká, esei ta, limpiá i purifiká for di piká (wak 2 Nefi 31:17; 3 Nefi 27:20; Moroni 6:4).
IV.
Asina ku, kon komprondé e doktrina selestial revelá aki tokante di e Deidat i e plan di salbashon ta yuda nos ku nos desafionan di awendia?
Pasobra nos tin e bèrdat tokante di e Deidat i nos relashon na Nan, e propósito di bida, i e naturalesa di nos destino eterno, nos tin e mihó mapa di kaminda i siguransa pa nos biahe dor di mortalidat. Nos sa ken nos ta adorá i di pa kiko nos ta adorá. Nos sa ken nos ta i kiko nos por bira (wak D&C 93:19). Nos sa kenta hasi tur kos posibel, i tambe kiko nos tin ku hasi pa gosa di e gran bendishonnan ku ta bini pa medio di Dios su plan di salbashon. Kon nos por sa tur esaki? Nos sa dor di e revelashonnan di Dios na Su profetanan i na kada un di nos individualmente.
Logra lokual e Apòstel Pablo a deskribí komo “na midi de e estatura di e perfekshon di Cristu” (Efesionan 4:13) ta rekirí muchu mas ku atkirí konosementu. No ta hasta ni sufisiente pa nos wòrdu kombensí di e evangelio; nos mester aktua i pensa p’asina nos ta kombertí p’e. Kontrario na e institushonnan di mundu, kua ta siña nos pasa algu, e pan di salbashon i e evangelio di Jesucristu ta desafiá nos pabira algu.
Manera Presidente Thomas S. Monson a siña nos den nos último konferensia general:
“Esensial den e plan ta nos Salbador, Jesucristu. Sin Su sakrifisio ekspiatorio, tur lo a bai pèrdí. No ta sufisiente, sinembargo, pa meramente kere den Dje i den Su mishon. Nos mester obra i siña, buska i resa, arepentí i mehorá. Nos mester konosé Dios Su leinan i biba nan. Nos mester risibí Su ordenansanan ku ta salba. Solamente hasiendo esaki nos por optené felisidat berdadero i eterno. ….
“For di profundidat di mi alma i den tur humildat,” Presidente Monson a deklará, “ Mi ta testifiká di e gran don kual ta nos Tata su plan pa nos. E ta e kaminda perfekto na pas i felisidat tantu aki i den e mundu benidero.” 12
Mi ta agregá mi testimonio na esun di nos estimado profeta-presidente. Mi ta testifiká ku nos tin un Tata Selestial, ku ta stima nos. Mi ta testifiká ku nos tin un Spiritu Santu, ku ta guia nos. I mi ta testifiká di Jesucristu, nos Salbador, ku ta hasi tur kos posibel, den e nòmber di Jesucristu,amèn.