Lanta Para Parti Paden i Ta Kompletamente Dispuesto

Algun aña pasá nos nieta yòn a kore bini serka mi i ku eksitashon a anunsiá, “Tawela, tawela, mi a hinka tur tres gol na wega di futbòl awe!”

Entusiasmá mi a kontestá, “Esei ta great Sarah!”

Su mama e ora ei a wak mi ku un brio den su wowo i a bisa, “E puntuashon tabata dos pa un.”

Mi no a riska di puntra ken a gana!

Konferensia ta un tempu di reflekshon, revelashon, i tin biaha kalkulá nos ruta atrobe.

Tin un kompania pa hür outo ku sistema GPS yamá NeverLost[ NunkaPèrdí]. Si bo kohe un bògt robes una bes ku bo a hinka bo destinashon deseá, e stèm di guia no ta bisa, “Kèns!” Mas bien, den stèm plasentero, e ta bisa, “Kalkulando e ruta atrobe---si ta permití bira bèk.”

Den Ezekiel nos ta lesa e promesa maravioso aki:

“Pero si un hende malbado kombertí di e pikánan ku el a hasi, kumpli ku mi leinan i aktua na un manera honesto i hustu, e ta keda na bida sigur; lo e no muri.

“No ta tene kuenta mas ku su fayonan. E ta keda na bida, pasobra e ta hasi loke ta hustu.” ¹

Esta un promesa fabuloso, pero e ta rekerí dos akshon pa risibí e promesa. Kita for di tur; warda tur; despues tur ta pordoná. Esaki ta rekerí pa nos ta kompletamente dispuesto” !

Nos no mester ta manera e hòmber ken, manera e Wall Street Journal a reportá, a manda un ènvelòp yená ku sèn kèsh huntu ku un karta anónimo pa e Servisio di Impuesto Interno kua tabata bisa, “Kerido SII, “Athunto por fabor haña e sèn ku mi debe pa e impuestonan pasá. P.S. si despues di esaki mi konsenshi ta sigui molestiá mi, lo mi manda e resto pa boso!” ²

Esei no ta e manera pa hasi! Nos no ta wanta pa mira kiko e mínimo ta pa skapa husgamentu. Señor ta rekerí un kurason i mente dispuesto. ³ Henter nos kurason! Ora nos batisá, nos ta bai kompletamente bou di awa komo un símbolo di nos promesa pa sigui e Salbador kompletamente, no na mitar. Ora nos ta komprometí plenamente i “kompletamente, “ Dios ta bendishoná nos. ⁴ Ora nos ta lou òf solamente komprometé parsialmente,nos ta faya pa haña e bendishonnan grandioso. ⁵

Hopi aña pasá, mi a bai ku e Skoutnan na un kampamentu den desierto. E muchanan a drumi banda di un kandela grandi ku nan a sende, i manera tur bon lider di Skout, mi a drumi parti patras den mi trùk. Mainta ora mi a lanta i wak na e kampamentu, mi a mira un Skout, ku lo mi yama Paul, ku tabata parse masha kansá. Mi a puntra kon el a drumi, i el a bisa, “No masha bon.”

Ora mi a puntra di kon, el a bisa, “Mi tabatin friu; e kandela a paga.”

Mi a kontesta,”Wèl, kandela sa paga. Bo saku pa drumi aden no tabata sufisiente kayente?”

Ningun kontesta.

Despues un otro Skout na bos haltu a splika, “E no a usa su saku di drumi.”

Asombrá mi a puntra, “Di kon no, Paul?”

Silensio—por fin e kontesta tímido: “Wèl, mi a pensa ku si mi no habrié, lo mi no mester lor’é sera atrobe.”

E historia berdadero: el a fris pa hopi ora pasobra e ke a spar sinku minüt di trabou. Nos por pensa: Esta un bobedat! Ken lo hasi algu asina? Wèl, nos ta hasié tur ora den maneranan mas peligroso. En efekto, nos ta, ninga di habri nos saku di drumi spiritual ora nos pensa ku nos no ta tuma e tempu pa hasi orashon sinseramente, studia, i biba e evangelio sinseramente tur dia; no solamente e kandela lo paga, pero nos lo ta sin protekshon i nos lo bira spiritualmente friu.

Ora nos ta indiferente ku nos kombenionan, nos ta responsabel pa e konsekuensianan. Señor a konsehá nos pa tene kuidou tokante nos mes, pa nos pone atenshon diligente na e palabranan di bida eterno. ⁶Ademas El a deklará, “Mi sanger lo no limpia nan si nan no ta skucha mi.” ⁷

En realidat, ta muchu mas fásil pa ta “kompletamente dispuesto” ku parsialmente dispuesto. Ora nos ta parsialmente dispuesto òf no kompletamente dispuesto, tin , den e terminologia di Star Wars“un disturbio den e forsa.” “Nos no ta den harmonia ku boluntat di Dios i p’esei kontra di e naturalesa di felisidat. ⁸ Isaías a bisa:

“E malbadonan ta manera e laman brutu, ora e no ta trankilisá, e ta bòltu saka tera i lodo.

“No tin pas, mi Dios ta bisa, na e malbado.” ⁹

Afortunadamente, no ta importá unda nos ta òf unda nos tabata, nos no ta leu for di alkanse di e Salbador, ku a bisa: ken ku arepentí i bini na Dje manera un mucha chikitu, esei E lo risibí, pasobra di nan e reino di Dios ta. Pa esnan ei mi a pone mi bida abou, i a tum’é atrobe. ¹⁰

Ora nos arepentí kontinuamente i konfia den Señor, nos ta haña forsa segun nos bira na poseé e humildat i fe di un mucha chikitu, ¹¹ enrikesé ku e sabiduria nasé for di un bida di eksperensia. Job a proklamá, “E hustu tambe lo sigui su kaminda, i esun ku man limpi lo oumentá den forsa.” ¹² Tabata Tennyson ku a skibi, “Mi forsa ta manera forsa di dies, pasobra mi kurason ta puru.” ¹³ Señor a konsehá pa para den lugánan santu, i no move.” ¹⁴

Nos yu hòmber Justin a fayesé ku 19 aña despues di a lucha un malesa di bida largu. Den un diskurso ku el a duna den un reunion sakramental poko promé ku el a fayesé, el a kompartí un relato ku mester tabata di nifikashon p’e tokante un tata i su yu hòmber yòn ku a bai den un tienda di ko’i hunga kaminda tabatin un saku di bòks ku por yena ku aire den forma di un hòmber. E mucha a gòlpia e hòmber di aire ku a tambaliá i inmediatamente a bòns bèk despues di kada gòlpi. E tata a puntra su yu di kon e hòmber tabata keda bòns bèk despues di kada gòlpi. E mucha a pensa pa un ratu i despues a bisa, “Mi no sa, mi ta kere ta pasobra e ta lanta para parti paden.” Pa por ta “kompletamente dispuesto” nos mester lanta para parti paden,” “bini loke sea.” ¹⁵

Nos ta lanta para parti paden ora nos ta warda ku pasenshi riba Señor pa kita òf duna nos forsa pa soportá nos sumpiñanan den kurpa. ¹⁶ Tal sumpiñanan por ta enfermedat, desabilidat, malesa mental, morto di un ser kerí, i asina tantu otro kuestion.

Nos ta lanta para parti paden ora nos lanta e mannan slap; i tambe ora nos defendé e bèrdat kontra e malbado i mundu sekular ku ta birando kada biaha mas inkonfortabel ku lus, yama malu bon i bon malu ¹⁷ i “kondená e hustu pa motibu di nan rektitut. ¹⁸

Lanta para parti paden apesar di difikultat ta posibel pa motibu di un konsenshi limpi, e siguransa ku ta fortalesé i konsolá di Spiritu Santu i un perspektiva eterno ku ta surpasá komprendementu mortal. ¹⁹ Den nos bida premortal nos a grita ku goso pa e oportunidat pa eksperensiá mortalidat. ²⁰ Nos tabata “kompletamente dispuesto” ora nos ku eksitashon a tuma e desishon pa ta defensornan balente di plan di nos Tata Selestial. Ta tempu pa lanta para i defendé Su plan atrobe!

Resientemente mi tata di 97 aña a muri. Ki ora ku un hende a puntr’é kon kos ta, su kontesta konsistente tabata, “Riba un skal di 1–10 mi ta rònt di 25!” Hasta ora e kerido hòmber aki no por a para òf hasta sinta, i tabatin masha difikultat pa papia, su kontesta ainda tabata meskos. Semper e tabata lanta para parti paden.

Tempu mi tata tabatin 90 aña, nos tabata na un aeropuerto i mi a puntr’é si mi mester a buska un ròl stul pe. El a bisa, “No, Gary---kisas dia mi bira bieu.” I despues el a agregá, “Ademas, ku mi kansa di kana, semper mi por kore.” Si nos no ta kapas pa ta “kompletu” den e manera ku nos ta kana awor aki,kisas e ora ei nos lo tin ku kore, kisas nos tin ku adaptá nos ruta. Nos lo tin ku hasta bira bèk. Tambe studia ku mas intenshon, hasi orashon sinsero, òf djis laga algun kos kai afó p’asina nos por brasa e kosnan ku ta realmente importante. Nos lo por tin ku laga e kosnan di mundu p’asina nos por warda pa eternidat. Mi tata a komprondé esaki.

Imagen

Elder Sabin su tata den marina

Tempu e tabata den marina durante di Guera Mundial II, tabatin esnan den e edifisio grandi i espasioso²¹ ku tabata hasi bofon di su prinsipionan, pero dos di su kompañeronan, Dale Maddox i Don Davidson, a nota esaki i no a hasi bofon. Nan a puntra, “Sabin, di kon bo ta asina diferente for tur otro? Bo tin normanan haltu i bo no ta bebe, huma, òf blasfemá, pero bo ta parse kalmu i felis.”

Nan impreshon positivo di mi tata no tabata kuadra ku lokual nan a siña tokante di e Mormonnan, i tabata posibel pa mi tata siña i batisá tur dos kompañero. . Dale su mayornan tabata malkontentu i a atvertié ku si e djòin Iglesia e lo pèrdè su namorada, Mary Olive, pero el a topa ku e mishoneronan dor di su petishon i tambe a wòrdu boutisá.

Kasi  na fin di guera, Presidente Heber  J. Grant a yama mishoneronan, inkluso algun hòmber kasá. Na 1946, Dale i su esposa, Mary Olive a disidí ku Dale mester sirbi ounke nan tabata sperando nan promé yu. Eventualmente nan a haña nuebe yu; tres yu hòmber i seis yu muhé. Tur nuebe a sirbi mishon, siguí pa Dale i Mary Olive, ku a sirbi tres mishon di nan mes. Desena di nietu tambe a sirbi. Dos di nan yunan hòmber, John i Matthew Maddox, aktualmente ta miembro di e Koro di Tabernakel Mormon, i tambe Matthew su suegro, Ryan. E famia Maddox tin 144 i ta ehèmpel maravioso di ta “kompletu.”

Imagen

Miembronan di famia Maddox den e Koro di Tabernakel

Miéntras nos tabata ordená e papelnan di tata, nos a haña un karta di Jennifer Richards, un di e sinku yunan muher di e otro kompañero, Don Davidson. El a skibi: “Bo rektitut a kambia nos bida. Ta difísil pa komprondé kon nos bida lo ta sin Iglesia. Mi tata a muri stimando e evangelio i purbando na bib’é te na fin.” ²²

Ta difísil pa midi e impakto pa e bon ku kada persona por tin dor di lanta para parti paden. Mi tata i su kompañeronan a ninga di skucha na esnan den e edifisio grandi i espasioso ku tabata mustra ku nan dede di despresio. ²³ Nan tabata sa ku ta muchu mas mihó pa sigui e Kreador i no e multitut.

E Apòstel Pablo por tabata deskribiendo nos tempu ora el a bisa Timoteo ku, “algun a desviá for di e kosnan aki, i a kai den diskushon sin pia sin kabes.” ²⁴ Tin hopi di esaki ta pasando den e mundu awendia. Ta e kombersashon di esnan den e edifisio grandi i espasioso. ²⁵ Hopi biaha e ta aparesé komo un forma di rashonalisashon pa hustifiká maldat òf manifestá su mes ora hende pèrdè nan kaminda i ta kore duru bai. Tin biaha e ta bini for di esnan ku no a paga e preis pa ta “kompletu” i ta preferá pa sigui e hòmber natural i kontrali di e profeta.

Afortunadamente, nos sa kon e ta kaba pa esnan fiel. Ora nos ta “kompletu” nos tin e garantia apsoluto ku “tur kos ta kontribuí na bienestar di esnan ku ta stima Dios.” ²⁶  Elder Neal A. Maxwell a bisa, “No teme, djis biba bon.” ²⁷

Mi suegro a duna lès na BYU i tabata gusta BYU su futbòl pero e no por a konvensé su mes pa wak e weganan pasobra e tabata asina nèrvioso pa e resultado. E ora ei algu maravioso a sosedé; e VCR a wòrdu inventá, ku a hasi posibel pa e graba e weganan. Si BYU a gana, e lo wak e grabashon ku konfiansa perfekto, apsolutamente sigur di e final! Si nan tabata haña penalty inhustamente, leshon, òf serka di pèrdè, e no tabatin stress pasobra e tabata sa ku nan lo gana! Bo por bisa ku e tabatin “un puresa perfekto di speransa!” ²⁸

Asina ta ku nos tambe. Segun nos fieldat, nos por tin mes un seguridat ku kosnan lo kana bon pa nos den final. E promesanan di Señor ta sigur. Esaki no ke men ku e universidat mortal aki lo ta fásil òf sin hopi lágrima, pero manera Pablo a skibi, “Pero, manera Skritura ta bisa:‘Loke niun hende no a yega di mira,ni niun hende no a yega di tende,ni niun hende no por imaginá nan,esei Dios a prepará pa esnan ku ta stim’e.” ²⁹

Rumannan, ningun hende no a hasi piká mañan. Ku nos por hasi kalkulá nos ruta atrobe si ta nesesario  i mira padilanti ku gran speransa i fe. “Ku nos por lanta para parti paden” dor di ta balente i “kompletu.” Ku nos por ta puru i ku kurashi pa defendé e plan di nos Tata Selestial i e mishon di Su Yu, nos Salbador. Mi ta duna boso mi testimonio ku nos Tata ta biba, i ku Jesus ta e Cristu, i di e realidat di e gran plan di felisidat. Ta mi orashon pa Señor su bendishonnan skohé por ta ku boso, i asina mi ta hasi den e nòmber di Jesucristo, amèn.