“Kana ku Mi”

Mi rumannan stimá di e saserdosio, mi propósito awe ta tur dos pa resigurá boso i pa invigorá boso den boso sirbishi di saserdosio. Den sierto manera, e ta similar na e propósito mi ta imaginá e Salbador tabatin ora E la topa un hòmber hóben ku a puntra, “Ki bondat mi mester hasi pa mi haña bida eterno?” (Mateo 19:16). Por ta bo a bini na e konferensia aki, manera e hòmber hóben aki a bai serka e Salbador, puntrando si bo sirbishi tabata akseptabel. I na mesun tempu, por ta bo ta sinti ku tin mas pa hasi—por ta hopi mas!Mi ta resa ku mi lo por transmití e Señor su aprobashon amoroso pa loke bo a hasi kaba, miéntras tambe ofresiendo un mirada chikitu ku lo enkurashá di loke bo por, ku Su yudansa, ainda kumpli komo un poseedor di Su saserdosio santu.

E hòmber hóben riku a wòrdu puntrá pa bende tur kos e tabatin i pa dun’é na e pober i pa sigui e Salbador; bo progreso futuro por ta no ta rekerí esei, pero e lo rekerí un midí di sakrifisio. Kon ku e ta, mi ta sperá ku mi mensahe no ta kousa bo pa “kita bai ku tristesa,” manera e hòmber hóben a hasi. (Wak Mateo 19:20–22.) Mas bien, mi ta konfiá ku bo lo “kita bai riba bo kaminda regosihándo” (D&C 84:105) pasobra bo kier mehorá i bo ta pensa ku bo por.

Asta asina, e ta natural pa sinti algun inadekuá ora nos ta konsiderá kiko Señor a yamá nos pa hasi. Den realidat, si bo ta konta mi ku bo ta sinti perfektamente kapas pa kumpli bo deber di saserdosio, mi lo wòri ku bo no ta komprendé nan. Na otro banda, si bo lo konta mi ku bo ta sinti manera pèrdè speransa pasobra e tarea ta hopi mas ku bo abilidatnan, e ora mi lo kier yuda bo komprendé kon Señor ta magnifiká i fortalesé e poseedornan di Su saserdosio pa hasi kos nan nunka por a hasi nan so.

Esaki ta mes bèrdat pa mi den mi yamamentu ku pa bo den esun di bo. Niun di nos por hasi e trabou di e saserdosio, i hasié bon, pa solamente dependé riba nos mes sabiduria i talento. Esei ta pasobra esaki no ta nos obra—e ta esun di Señor. Asina ku e úniko kaminda pa tin éksito ta pa dependé riba dj’E, si bo ta un diákono resien yamá konfiá ku e tarea di trese un midí di poder spiritual na e ordenansa di e santa sena; òf un maestro orientador yòn asigná pa Señor pa stimá i ministrá na un famia ku bo no konosé i ku no ta parse di kier bo amor i bo ministerio; òf un tata ku sa bo ta pa presidí riba bo kas den rektitut, pero por ta bo no ta sigur kon pa hasié, i tempu ta parse ta den kaba, pasobra e yunan ei ta kresiendo lihé i e mundu ta parse asina duru i hostil.

Asina ku si bo sinti un tiki tumbá, tuma esei komo un bon señal. E ta indiká ku bo por sinti e magnitut di e konfiansa Dios a pone den bo. E ta nifiká ku bo tin algun komprenshon chikitu di kiko e saserdosio ta realmente.

Tin hopi tiki hende den e mundu ku tin e komprenshon ei. Asta esnan ku por resitá un definishon rasonabel por ta no ta komprend’é di bèrdat. Tin algun skritura ku, dor di e poder di e Spiritu nan ta kargá, por profundisá nos sentido di maravia tokante e saserdosio santu. Aki tin algun di e skrituranan ei:

“E poder i outoridat di e … Saserdosio Melchizedek, ta pa tene e yabinan di tur e bendishonnan spiritual di e iglesia—

“Pa tin e privilegio pa risibí e misterionan di e reino di shelu, pa tin e shelunan habrí pa nan, pa komuniká ku e asamblea general i iglesia di e Primogénito, i pa gosá e komunion i presensia di Dios e Tata, i JesuCristu e mediadó di e kombenio nobo.

“E poder i outoridat di e … Saserdosio Aaróniko, ta pa tene e yabinan di e ministerio di angelnan” (D&C 107:18–20).

“Den e ordenansa [di e saserdosio], e poder di divinidat ta wòrdu manifestá. …

“Pasobra sin esaki niun hòmber por mira e kara di Dios, asta e Tata, i biba” (D&C 84:20, 22).

“E saserdosio haltu aki ta segun e òrdu di [Dios Su] Yu, kua òrdu tabata for di e fundashon di e mundu; òf den otro palabra, siendo sin kuminsamentu di dia òf fin di aña, siendo prepará for di eternidat pa tur eternidat, segun su konosementu adelantá di tur kos” (Alma 13:7).

“Kada un siendo ordená segun e òrdu i yamamentu lo mester tin poder, pa fe, pa kibra serunan, pa dividí laman, pa seká awa, i pa bira nan for di nan kurso;

“Pa poné na rebeldia e ehérsito di nashonnan, pa dividí e tera, pa kibrá kada banda, pa para den e presensia di Dios; pa hasi tur kos segun su boluntat, segun su mandamentu, konkistá prinsipal i poder; i esaki pa e boluntat di e Yu di Dios loke tabata for di promé e fundashon di e mundu” (Joseph Smith Translation, Génesis 14:30–31 [den e Bible apèndiks]).

Un manera pa reakshoná na deskripshonnan ku ta inspirá reverensia asina di e poder di e saserdosio ta pa asumí ku nan no ta apliká na nos. Un otro manera pa reakshoná ta ku preguntanan ku ta buska nos alma, puntrá den nos mes kurason, manera esakinan: Mi a yega di sinti ku e shelu a wòrdu habrí na mi? Kualke hende lo usa e frase “ministro di angel” pa deskribí mi sirbishi di saserdosio? Mi ta tresé e “poder di divinidat” den e bida di esnan ku mi ta sirbi? Mi a yega di kibrá un seru, rebeldiá un ehérsito, kibrá algun hende su banda, òf konkistá podernan mundano—asta si solamente figurativamente—pa asina kumpli ku Dios Su boluntat?

Introspekshon asina semper ta trese un sintimentu ku nos por ta hasiendo mas den e sirbishi di Señor. Mi ta sperá e tambe ta trese un sintimentu ku bo kier hasi mas—un deseo pa partisipá mas yen den e obra milagroso di Señor. Sintimentunan asina ta e promé paso na birando e tipo di hòmber ku sirbishi di saserdosio tabata kier men pa produsí.

E siguiente paso ta deskribí den un interakshon entre Yehova i Enoch. Nos konosé Enoch manera un profeta poderoso ku a establesé Sion meimei di maldat grandi. Pero promé e tabata un profeta poderoso, Enoch a mira su mes manera un mucha chikitu, slo di papiamentu, i odiá pa tur hende (Moises 6:31). Tende e palabranan Señor a usá pa enkurashá Enoch. Nan tambe ta Su palabranan na bo ku ta yamá pa ministrá na otronan komo un poseedor di saserdosio:

“I Señor a bisa na Enoch: Bai padilanti i hasi manera mi a manda bo, i niun hòmber lo hasi bo daño. Habri bo boka, i e lo wòrdu yená, i mi lo duna bo ekspreshon, pasobra tur e karni ta den mi man, i mi lo hasi manera mi ta pensa ta bon. …

“Mira mi Spiritu ta riba bo, p’esei tur bo palabra mi lo hustifiká; i e serunan lo huí for di dilanti bo, i e riunan lo bira di nan kurso; i abo lo keda den mi, i ami den bo; p’esei kana ku mi” (Moises 6:32, 34).

Rumannan, nos ordenashon na e saserdosio ta un invitashon for di Señor pa kana ku n’E. I kiko e kier men pa kana ku Señor? E kier men pa hasi loke E ta hasi, pa sirbi den e manera E ta sirbi. E la sakrifiká Su mes komodidat pa bendishoná esnan ku nesesidat, asina ku esaki ta loke nos ta trata di hasi. E la parse di tuma nota partikularmente di hende ku no a wòrdu hasi kaso di nan i asta evitá di sosiedat, asina nos mester trata di hasi esei tambe. E la testifiká ku kurashi i tòg amorosamente di e doktrina berdadero E la risibí for di Su Tata, asta si e no tabata populario, i asina nos tambe mester. E la bisa na tur, “Bini serka Mi” (Mateo 11:28), i nos ta bisa na tur, “Bini serka E.” Komo poseedornan di saserdosio, nos ta Su representantenan. Nos no ta aktuá pa nos mes pero p’E. Nos no ta papia nos palabra pero esun di djE. E hende ku nos ta sirbi ta yega di konos’É mihó pa motibu di nos sirbishi.

Asina ku nos ta akseptá Señor Su invitashon “Kana ku Mi,” E naturalesa di nos sirbishi di saserdosio ta kambiá. E ta bira di biaha mas haltu i nobel pero tambe mas aksesibel, pasobra nos sa ku nos no ta so. Mi a sintí esaki mas poderoso ora Presidente Thomas S. Monson a poné su man riba mi kabes nuebe aña pasa i a bendishoná mi ora mi a kuminsá mi sirbishi den mi yamamentu aktual. Den e bendishon ei, e la resitá e palabranan aki di Señor: “I kin ku ta risibí bo, einan mi tambe lo ta, pasobra mi lo bai dilanti bo kara. Mi lo ta na bo man drechi i na bo man robes, i mi Spiritu lo ta den bo kurason, i mi angelnan rondoná bo, pa sostené bo” (D&C 84:88).

Mi a dependé riba e promesa aki hopi biaha, i mi a mir’é kumplí den hopi manera durante mi 72 (setentidos) aña di sirbishi di saserdosio. E la pasa ora mi tabata un poseedor di Saserdosio Aaróniko nobo ku un asignashon pa pasa e santa sena. Spantá mi lo hasi un fayo, mi a bai den e kapia promé e reunion a kuminsá i a resa den desesperashon ku Dios lo yuda mi. Un kontesta a bini. Mi a sinti ku Señor tabata ku mi. Mi a sinti Su konfiansa den mi, i asina mi a sinti konfiansa den mi parti den Su obra.

E la pasá atrobe miéntras mi tabata sirbiendo komo un obispu. Mi a risibí un yamada di telefon for di un muhé ku a hasi un fayo serio i awor tabata enfrentá ku un desishon difísil ku ta kambia bida. Miéntras mi tabata bishitando ku n’e, mi a sinti mi tabata sa e kontesta na su problema, pero mi tambe a sinti fuertemente ku ami no lo mester a dun’é e kontesta ei—e mester á hañ’é pa su mes. Mi palabra na dje tabata “Mi ta kere Dios lo kontá bo kiko pa hasi si bo lo puntr’é.” Mas lat e la kontá mi ku e la puntr’é i Dios a kont’é.

Na un otro okashon un yamada di telefon a bini ora mi tabata un obispu—e biaha aki for di e polis. Mi a wòrdu bisá ku un shofùr fuma a krèsh su outo dor di e glas paden di e entrada di un banko. Ora e shofùr konfundí a wak e personal di seguridat zuai su arma, e la gritá, “No tirá mi! Mi ta un Mormon!”

E shofùr fuma a wòrdu deskubrí pa ta un miembro di mi bario ku a wòrdu boutisá resientemente. Miéntras mi tabata warda pa papia ku n’e den e ofisina di obispu, mi a planeá kiko mi lo bisa pa hasié sintí kontrito pa e manera ku e la kibra su kombenio i brongosá e Iglesia. Pero ora mi a sinta mirando e, mi a skucha un bos den mi mente bisa, mesun kla si un persona tabata papiando na mi, “Mi ta bai laga bo wak e manera ami ta wak e.” I e ora, pa un ratu chikitu, su aparensia kompletu a kambiá pa mi. Mi no a wak un hòmber hóben konfundí pero un yu di Dios briante nobel. Direpente mi a sinti Señor Su amor p’e. E vishon ei a kambiá nos kombersashon. E tambe a kambiá ami.

Mi a siñá lèsnan importante for di e eksperensianan aki kanando ku Señor hasiendo Su obra. Mi kier kompartí tres di nan ku boso. E promé ta ku Dios ta tuma nota di i lo sostené asta e diákono mas nobo i yòn. Bo nunka mester sinti ku bo ta chikitu di mas òf sin nifikashon p’E pa tuma nota di bo i e sirbishi bo ta dunando den Su nòmber.

E di dos lès ta ku e obra di Señor no ta solamente pa resolvé problema; e ta pa edifiká hende. Asina ku ora bo ta kana ku n’E den sirbishi di saserdosio, bo lo por hañá ku tin biaha loke ta parse di ta e solushon mas efisiente no ta e Señor Su solushon preferí pasobra e no ta permití hende pa krese. Si bo skucha, E lo siñá bo Su manera. Kòrdá ku Dios Su obra i gloria no ta simplemente pa manehá un organisashon efektivo; e ta “pa trese padilanti e inmortalidat i bida eterno di hòmber” (Moises 1:39). Esaki ta, en realidat, dikon E la duna Su outoridat di saserdosio na ser humano imperfekto manera abo i ami i invitá nos pa partisipá den Su obra. Nos progreso ta Su obra!

Awor e di tres lès: Kanando ku e Salbador den sirbishi di saserdosio lo kambiá e manera ku bo ta mira otronan. E lo siñá bo pa wak nan dor di Su wowo, lokual kier men pa mira tras di un aparensia di pafó i den nan kurason (wak 1 Samuel 16:7). Esaki ta kon e Salbador por a mira Simon no manera un piskadó impulsivo pero manera Pedro, e lider futuro sólido manera un piedra di Su Iglesia (wak Lukas 5:1–11). Esaki ta kon E por á wak Zacchaeus no manera un kobradó di impuesto korupto otronan a mir’é, pero manera un yu di Abraham honesto i rekto (wak Lukas 19:1–9). Si bo ta kana ku e Salbador sufisientemente largu, bo lo siñá pa mira tur hende komo un yu di Dios ku potensial sin límite, no importá kiko su pasado tabata. I si bo ta kontinuá kanando ku e Salbador, bo lo desaroyá un otro don E tin—e abilidat pa yuda hende wak e potensial ei den nan mes i p’esei arepentí.

Mi rumannan stimá di e saserdosio, den hopi manera, nos ta manera e dos disipel ku a kana e kaminda pa Emmaus riba e promé Djadumingu di Pasku Grandi. E tabata e mainta di Resurekshon, pero nan no tabata sigur ainda ku tabatin un resurekshon òf asta kiko resurekshon tabata kier men. Nan a konfiá ku Jesus di Nazaret mester á redimí Israel, pero nan tabata pokopoko pa kere tur kos e skrituranan a siñá tokante resurekshon. Miéntras nan tabata kanando i a trata di rasoná tur kos huntu, Jesus a bini serka nan i a kana ku nan. Pero nan wowo tabata será pa asina nan no por á rekonos’É. (Wak Lukas 24:13–32).

Mi ta testifiká ku ora nos ta kana e kaminda di sirbishi di saserdosio, e Salbador JesuCristu ta bai ku nos, pasobra e ta Su kaminda. Su lus ta bai dilanti nos, i Su angelnan ta rondoná nos. Nos por falta un komprenshon kompletu di kiko e saserdosio ta òf kon pa praktik’é manera E ta hasi. Pero si nos ta paga tinu bon na e momentunan ora nos kurason ta kima paden di nos (Lukas 24:32), nos wowo por ta habrí, i nos lo wak Su man den nos bida i den nos sirbishi. Mi ta testifiká ku nos ta yega di konos’É mihó dor di traha ku n’E i sirbiÉ den e obra grandi di trese salbashon na Dios Su yunan. “Pasobra kon un hòmber por konosé e Señor kende e no ta sirbi, i ku ta un hende straño p’e, i ta leu for di e pensamentu i intenshonnan di su kurason?” (Mosíah 5:13). JesuCristu ta nos Maestro. Esaki ta Su Iglesia. E ta Su saserdosio ku nos ta tené. Laga nos kada un skohé pa kana ku n’E i pa rekonosé kon E ta kana ku nos.

Mi ta duna mi testimonio solemne ku Jesus ta e Cristo, nos Señor resusitá. Mi ta duna mi testimonio ku e saserdosio E la konfiá riba nos ta e poder pa papia i pa aktuá den Su nòmber. Nos ta yunan di un Tata Selestial amoroso ku ta kontestá nos orashon i ta manda e Spiritu Santu pa fortalesé nos den kada responsabilidat di saserdosio nos ta bendishoná pa risibí. José Smith a wak e Tata i e Yu. E la risibí e yabinan di e saserdosio, kua a wòrdu pasá na Presidente Thomas S. Monson, kende ta ehekutá nan awe. Asina mi ta testifiká den e nòmber di HesuCristo, amèn.