Su Man di Guia Diario

Un di Tata Selestial su hèrmèntnan di mas stimá den guia Su yunan ta tawela i welanan rekto. Mi tata su mama tabata un muher asina. Na un okashon ku a tuma lugá ora mi tabata muchu yòn pa kòrda, mi tata tabata disipliná mi. Opservando e korekshon aki, mi wela a bisa, “Monte, mi ta kere ku bo ta korigiendo e muchu duru.”

Mi tata a respondé, “Mama, lo mi koregí mi yunan manera mi ke.”

I mi wela sabio a bisa suavemente, “Asina mi tambe lo hasi.”

Mi ta kasi sigur ku mi tata a skucha e guia sabio di su mama e dia ei.

Ora ta pensa di guia, nos por pensa di e kantika ku nos tur konosé i stima---“Mi ta un yu di Dios.” Den e refrein nos ta haña e palabranan “Dirigí mi, guia mi, kana banda di mi, yuda mi haña e kaminda.” ¹

Ta te resientemente, mi a komprondé ku e refrein ei ta un instrukshon dibino pa mayornan. Miéntras mi tabata meditá riba e palabranan aki, mi a realisá ku si nan tin e instrukshon aki, tin un nifikashon muchu mas grandi. Individualmente, nos kada un ta pidi tur dia ku Tata Selestial lo guia nos, dirigí nos, i kana banda di nos.

Presidente Dieter F. Uchtdorf a splika: “Nos Tata na Shelu konosé nesesidatnan di Su yunan mihó ku kualke otro hende. Ta Su obra i gloria pa yuda nos kontinuamente, dunando nos rekursonan maravioso temporal i spiritual pa yuda nos riba nos kaminda di regreso na Dje.” ²

Skucha na e palabranan aki: Tata Selestial sa kiko boso i ami tin mester mihó ku kualke otro. Komo resultado, El a desaroyá un pakete di kuido personalisá pa kada un di nos. E tin hopi komponente. E ta inkluí Su Yu i e Ekspiashon, e Spiritu Santu, mandamentunan, skrituranan, orashon, profetanan, apòstelnan,tawela i welanan, lidernan lokal di Iglesia, i hopi otro---tur pa yuda nos regresá pa biba ku n’e un dia.

Permití mi por kompartí awe djis algun di e komponentenan di e pakete di kuido ku a one mi rekonosé ku un Tata Selestial amoroso ta dirigí, guia, kana banda di mi i mi famia? Mi orashon ta pa kada un di boso lo rekonosé den boso eksperensianan ku Tata Selestial ta dirigí, guia , i kana banda di boso i, ku e konosementu ei, boso lo sigui ku konfiansa, sabiendo ku boso nunka ta realmente so.

Tata Selestial su mandamentunan ta komponentenan klave di e pakete di kuido. Alma a deklará “Maldat nunka tabata felisidat.” ³ Aseptá komportashon no apropiá sin korekshon amoroso ta kompashon falsu i ta reforsá e idea komun ku maldat en realidat por ta felisidat. Samuel e lamanita a refutá e idea aki: “Boso a buska felisidat den hasi inikidat, kua kos ta kontrario na e naturalesa di e hustisia ei ku tin den nos Kabes grandi i Eterno.” ⁴

Mediante Su profetanan, Tata Selestial ta rekordá nos konstantemente ku rektitut ta felisidat. Rei Benjamin, por ehèmpel, a siña ku Tata Selestial “ta rekerí pa boso hasi manera el a manda boso; pa loke, si boso hasié, e ta bendishoná boso inmediatamente.” ⁵ Di un otro kantika ta bini e rekordatorio similar:

Rònt di mi di 14 kumpleaño, mi a siña tokante algun di e bendishonnan aki. Mi a nota komportashon diferente for di mi mayornan. Konsiderando lokual mi a opservá, mi a puntra, “Nos ta bayendo un mishon?” E shòk riba mi mama su kara a konfirmá mi sospecho.” Despues, den un konseho familiar, mi rumannan i ami a haña sa ku nos mayornan a wòrdu yamá pa presedí riba un mishon.

Nos a biba na un rancho bunita na Wyoming. For di mi perspektiva, bida tabata perfekto. Mi por a yega for di skol, kumpli ku mi tareanan, i sali bai yag, piska, òf eksplorá ku mi kachó.

Poko despues di sa di e yamamentu, mi a realisá ku lo mi mester laga mi kachó, Blue. Mi a konfrontá mi tata, puntrando kiko mi mester a hasi ku Blue. Mi ke a enfatisá e inhustisia ku Dios tabata rekerí. Nunka lo mi no lubidá su kontesta. El a bisa, “Mi no tin sigur. Probablemente e lo no por bai ku nos, asina ku mihó bo puntra Tata Selestial.” Esei no tabata e kontesta ku mi a antisipá.

Mi a kuminsá lesa e Buki di Mormon. Mi a hasi orashon honesto pa sa si mi mester a duna un hende mi kachó. Mi kontesta no a yega den un momentu; mas bien, un pensamentu spesifiko a keda penetrá mi mente: “No sea un karga pa bo mayornan. No sea un karga. Ami a yama bo mayornan.”

Mi tabata sa kiko Tata Selestial tabata rekerí. E konosementu ei no a redusí e dolor di entregá mi kachó. Sinembargo, dor di e sakrifisio chikitu aki, mi kurason a suavisá i mi a haña pas den buska boluntat di Tata Selestial.

Mi ta gradesí mi Tata Selestial pa e bendishonnan i felisidat ku mi a haña den e skrituranan, orashon, e Spiritu Santu, i un tata terenal digno ku a brasa su ròl komo e maestro di evangelio prinsipal di su yunan. Nan tabata dirigí mi, guia mi, i hasta kana banda di mi pa yuda mi haña e kaminda---spesialmente ora mi mester a hasi algu difísil.

Banda di tin pakete di komponentenan di kuido ku mi a menshoná, nos kada un ta bendishoná ku un lider di saserdosio pa dirigí i guia siña nos.

Presidente Boyd  K. Packer a bisa: “Obispunan ta inspirá! Kada un di nos tin e albedrio pa aseptá òf rechasá konseho di nos lidernan, pero nunka no deskuidá e konseho di boso obispu, sea duná riba podio òf individualmente.” ⁷

E hòmbernan aki ta hasi esfuerso pa representá Señor. Sea nos ta bieu òf yòn, ora Satanas ke pa nos pensa ku tur kos ta pèrdí, obispunan ta ei pa guia nos. Papiando ku obispunan, mi a haña un tema komun tokante konfeshonnan di desobedensia òf e sufrimentu inosente for di fayonan teribel. Obispunan mesora ke ekspresá Tata Selestial su amor pa e persona i un deseo pa kana banda di dje segun e ta haña su kaminda bèk pa kas.

Kisas Tata Selestial su komponente pakete di kuido di mas grandi ta deskribí den e palabranan aki: “Pasobra Dios a stima e mundu asina tantu, ku El a duna su úniko Yu.” ⁸

Pa siña nos kiko nos tin ku hasi, Jesucristo a mustra e kaminda dor di duna e ehèmpel perfekto ku no mester purba na imitá. E ta pidi nos ku mannan estrechá pa bini, i siguié. ⁹ I ora nos faya, kual nos tur ta hasi, e ta ta kòrda nos, ku El a sufri e kosnan aki pa tur hende, pa nos no tin ku sufri si nos arepentí. ¹⁰

Esta un regalo maravioso! Arepentimentu no ta un kastigu; e ta un privilegio. Ta un privilegio ku ta dirigí i guia nos. No ta straño ku e skrituranan ta deklará ku nos no mester siña nada ku no ta arepentimentu. ¹¹

Tata Selestial tin hopi rekurso, pero hopi biaha e ta usa otro persona pa yud’é. Tur dia E ta duna nos oportunidatnan pa guia, siña, i kana banda di un persona den nesesidat. No mester sigui e ehèmpel di e Salbador. Nos tambe mester ta tokante Tata Selestial su obra.

Komo e Presidensia General di Hombres Jóvenes, nos sa ku e hóbennan ta bendishoná ora nan tin mayornan i lidernan ku ta aktua pa Tata Selestial den dirigí, guia, i kana banda di nan. Tres prinsipio¹² ku lo yuda nos bira parti di Tata Selestial su pakete di kuido pa otronan ta:

Promé, sea ku e hóbennan. Presidente Henry  B. Eyring a enfatisá e punto aki: “Tin algun kos ku nos por hasi ku por ta mas importante. Hasta mas poderoso ku usa palabranan den nos enseñansa di e doktrina ta pa nos ta ehèmpel di biba e doktrina.” ¹³ Pa dirigí hóbennan ta rekerí pa ta huntu ku nan. Tempu dediká ta un ekspreshon di amor ku ta permití nos pa siña ku palabra i ehèmpel.

Di dos, pa siña e hóbennan, nos ,mester konektá ku shelu. E tempu semper ta bini ora kada un di nos mester para nos so. Solamente Tata Selestial por ta aya pa guia na tur tempu i na tur lugá. Nos hóbennan mester sa kon pa buska guia di Tata Selestial.

Di tres, nos tin ku laga e hóbennan dirigí. Meskos ku e mayor amoroso ku ta tene man di e yu ku ta siña kana, nos mester laga lòs pa e hóbennan por progresá. Laga nan dirigí ta rekerí pasenshi i amor. Ta mas difísil i ta tuma mas tempu ku nos mes hasié. Nan lo por trompeká riba kaminda, pero nos ta kana banda di nan.

Rumannan, lo bai tin tempu den nos bida ku e bendishonnan di guia ta parse leu òf ta falta. Pa momentunan aki di angustia, Elder D. T odd Christofferson a primintí: “Laga boso kombenionan ta primordial i boso obedensia eksakto. E ora ei boso por pidi ku fe, sin duda, segun boso nesesidat, i Dios lo kontestá. E lo sostené boso ora boso ta obra i vigilá. Den Su mes tempu i manera E lo duna su man na boso bisando, ‘Ata mi aki.’’’ ¹⁴

Na un momentu asina, mi a buska konseho di Tata Selestial dor di orashon konstante i sinsero pa mas di un aña pa haña e solushon pa un situashon difísil. Lógikamente mi tabata sa ku Tata Selestial ta kontestá tur orashon sinsero. Tòg mi a alkansá tal desesperashon un dia ku mi a bai tèmpel ku un pregunta: “Tata Selestial, Bo ta preokupá realmente?”

Mi tabata sinta serka di e parti patras di e sala di espera di e Tèmpel di Logan Utah ora, ku pa mi sorpresa, drentando e kamber e dia ei tabata e presidente di tèmpel Vaughn  J. Featherstone, un amigu serkano di famia. E tabata para dilanti di e kongregashon i a yama nos tur bon bini. Ora el a nota mi entre e obreronan di tèmpel, el a stòp di papia, a mira mi den mi kara, i despues a bisa, “Hermano Brough, ta bon pa mira bo den tèmpel awe.”

Nunka lo mi no lubidá e sentimentu di e momentu simpel aki. Tabata komo si fuera---den e saludo ei----Tata Selestial tabata estrechá Su man bisando, “Ata mi aki.”

Tata Selestial realmente ta preokupá i ta skucha i kontestá orashon di tur mucha. ¹⁵ Komo un di Su yunan, mi sa ku e kontesta na mi orashonnan a yega den Señor su tempu. I dor di e eksperensia aki, mi a komprondé mas ku nunka ku nos ta yunan di Dios i ku E a manda nos aki p’asina nos por sinti Su presensia awor i regresá pa biba serka Dje un dia.

Mi ta testifiká ku Tata Selestial ta dirigí , guia nos i kana banda di nos. Ora nos sigui Su Yu i hasi kaso na Su sirbidónan, e apòstelnan i profetanan, nos lo haña e kaminda pa bida eterno. Den e nòmber di Jesucristo, amèn.