Prepará e Kaminda

Ora ku mi tabatin 30 aña, mi a kuminsá traha pa un grupo di komersio por detal na Fransia. Un dia e presidente di e kompania, un bon hòmber di un otro fe, a yama mi den su ofisina. Su pregunta a kue mi di sorpresa: “Mi a kaba di tende ku po ta un saserdote den bo iglesia. Ta bèrdat?”

Mi a respondé, “Si, esei ta bèrdat. Mi tin e saserdosio.”

Asombrá dor di mi kontesta, El a sigui puntra, “ Pero bo a studia na un seminario di teologia?”

“Naturalmente,” mi a respondé, entre e edat di 14 te ku 18 aña, i mi a studia e lèsnan di seminario kasi tur dia!” El a kasi kai for di su stul.

Na mi gran sorpresa, un par di siman despues El a yama mi bèk den su ofisína pa ofresé mi un posishon komo direktor ehekutivo den un di e kompanianan di e grupo. Mi tabata asombrá i a ekspresá mi preokupashon ku mi tabata muchu yòn i sin eksperensia pa tene un responsabilidat asina importante. Ku un sonrisa benévolo El a bisa, “Esei por ta bèrdat, pero no ta importá. Mi sa kiko bo prinsipionan ta i mi sa kiko bo a siña den bo iglesia. Mi mester di bo.”

E tabatin rason tokante loke mi a siña den Iglesia. E añanan ku a sigui tabata un reto, anto mi no sa si lo mi tabatin ningun éksito sin e eksperensianan ku mi a atkirí dor di e servisio den Iglesia for di e tempu ku mi tabata mucha.

Mi tabatin e bendishon ku mi a krese den un rama chikitu. Dor ku nos tabatin tiki hende, e hóbennan tabata rekerí pa partisipá aktivamente den tur aspekto di e rama. Mi tabata hopi drùk i mi tabata gusta di sinti mi nesesario. Djadumingu mi tabata ofisiá na e mesa di santa sena, sirbi den mi quorum di saserdosio, i tabata funshoná den diferente otro yamamentunan. Durante di siman, hopi biaha mi tabata kompañá mi tata i otro poseedor di saserdosio manera nos tabata hasi orientashon familiar, konsolá esnan malu i den aflikshon i yuda esnan den nesesidat. Nìun hende no tabata parse di pensa ku mi tabata demasiado yòn pa sirbi òf asta pa guia. Pa mi, tur esaki tabata parse normal i natural.

E servisio ku mi tabata duna durante di e añanan di mi hubentut a yuda mi krese mi testimonio i ankra mi bida den e evangelio. Mi tabata rondoná dor di hòmbernan bon i yen di kompashon ku tabata dediká pa usa nan saserdosio pa bendishoná e bida di otro. Mi ta ke ta manera nan. Den sirbi huntu ku nan, mas di loke mi a realisá na e momentu ei, mi a siña pa ta un lider den Iglesia i tambe den mundu.

Nos tin hopi hóben ku ta atendé i sintonisá den e reunion awe nochi ku ta poseé e Saserdosio Aaróniko. Ora ku mi ta wak den e públiko aki, mi ta mira diferente di bo sintando banda di hòmbernan madurá, porta bo tata, bo wEl a, bo rumannan hòmber mas grandi, òf bo lidernan di saserdosio--- tur poseedornan di e Saserdosio di Melchizedek. Nan stima bo, i pa gran parti, nan a bini aki awe nochi pa ta huntu ku bo.

E reunion di generashonnan aki ta ofresé un vishon maravioso di e unidat i fraternidat ku ta eksistí entre e dos saserdosionan di Dios. Ounke nan ta establesé ku diferente mishon i outoridat, e Saserdosio Aaróniko i e Saserdosio di Melchizedek ta partnernan inseparabel den e obra di salbashon. Esun no por sin e otro i nan ta den gran nesesidat di otro.

E forma perfekto di e relashon será ku ta eksistí entre e dos saserdosionan aki ta wòrdu hañá den e interakshon entre Jesus i Juan Batista. Bo por imaginá Juan Batista sin Jesus? Kon e mishon di e Salbador lo tabata ta sin e obra preparatorio ehekutá dor di HJan?

Juan Batista a wòrdu duná e mishon di mas presioso ku hamas a eksistí: “pa prepará e kaminda di Señor” ¹ pa boutis’É ku awa i pa hasi e hendenan kla pa risibiÉ. E “hòmber hustu.....i......santu aki,”² ku a wòrdu ordená den e saserdosio menor, tabata sa perfektamente di tantu e importansia i limitashon di su mishon i su outoridat.

Hende a basha bai serka Juan pa tendele i wòrdu boutisá dor di dje. E tabata honrá i admirá riba su mes komo un hòmber di Dios. Pero ora Jesus a paresé, Juan humildemente a para tras di Unu mas grandi ku su mes i a deklará, “Mi ta boutisá ku awa: pero einan ta pará un entre boso,.... ku biniendo despues di mi, ta bai dilanti mi, di kende su feter mi no ta digno di lòs.”³

Di Su parti, Jesus e Cristu, e Úniko Unigénito di e Tata, ku a tene e saserdosio mas haltu, humildemente a rekonosé e outoridat di Juan. Di dje, e Salbador a bisa, “Entre esnan ku a wòrdu nasé di muhénan no a wòrdu nasé un mas grandi ku Juan Batista,”⁴

Solamente pensa di loke lo tuma lugá den nos quorumnan di saserdosio si e relashon entre e poseedornan di e dos saserdosionan tabata inspirá dor di e patronchi establesé dor di Jesus i Juan Boutista. Mi rumannan hòmber yòn di e Saserdosio Aaróniko, manera Juan, bo ròl ta pa “prepará e kaminda”⁵ pa e gran obra di e Saserdosio di Melchizedek. Boso ta hasiendo esaki den hopi diferente manera. Boso ta atministrá e ordenansanan di boutismo i di e santa sena. Boso ta yuda prepará hende pa Señor dor di prediká e evangelio, dor di “[ bishita] kas di kada miembro,”⁶ i dor di “[tene vigilia] riba e iglesia.”⁷ Boso ta proveé asistensia pa esnan pober i den nesesidat dor di kolektá ofrendanan di ayuno, i boso ta partisipá den kuida e kasnan di reunios di Iglesia i otro medionan mundano. Boso ròl ta importante, nesesario i sagrado.

Mi rumannan hòmber adulto, si bo ta tata, obispu, konseheronan di Hombres Jovenes, òf gewon poseedor di e Saserdosio di Melchizedek, boso por sigui e ehèmpel di e Salbador dor di aserka bo rumannan ku ta tene e saserdosio menor i invitá nan pa traha huntu ku boso. En realidat, e invitashon aki ta bini di Señor su mes. El a bisa, “Ta p’esei, trese huntu ku bo esnan ku ta ordená den e saserdosio menor, i manda nan dilanti di bo pa hasi nombramentunan i pa prepará e kaminda, i bai sitanan ku bo no ta mira posibel di bai hasi bo mes.”⁸

Na manera ku bo ta invitá bo rumannan menor pa “prepará e kaminda”   bo ta yuda nan pa rekonosé i honra e outoridat sagrado ku nan ta poseé. Dor di hasi esaki, bo ta yuda nan pa prepará nan mes kaminda na momentu ku nan ta prepará pa e dia ku nan lo risibí i ehersé e saserdosio mayor.

Laga mi kompartí e historia real di Alex, un saserdote yòn ku ta ketu, kouteloso i inteligente. Un djadumingu Alex su obispu a haña e su so den un klas den un estado di gran miseria. E hóben aki a splika kon difísil tabata pa e bini misa sin su tata, ku no tabata un miembro. Ku awa na wowo El a kontinuá bisando ku probablemente ta mihó pa e sali for di Iglesia.

Ku preokupashon real pa e Hóben aki, e obispu mesora a mobilisá e konseho di bario pa yuda Alex. Su plan tabata simpel: pa tene Alex aktivo i yud’e desaroyá un testimonio di e evangelio den su kurashon, nan tabatin ku “rondoná e ku bon hende i duné kosnan importante pa hasi.”

Mesora e rumannan hòmber di saserdosio i tur e miembronan di bario a rondoná Alex i ekspresá nan afekshon i sosten. E lider di sumo saserdotenan, un hòmber ku gran fe i amor, a wòrdu skohé pa bira su kompañero komo maestro orientador. Miembronan di e obispado a tumele bou di nan ala i hasi e nan partisipante di mas yegá.

E obispu a bisa: “Nos a tene Alex drùk. E tabata portero na kasamentunan, portero na entieronan, e tabata asistí mi na dedikashon di graf, El a boutisá diferente miembronan nobo, ordená Hóbennan den diferente ofisionan di Saserdosio Aaróniko, a duna lès na Hóbennan, a duna lès huntu ku e misioneronan, habri e edifisio promé ku konferensianan i sera e edifisio anochi lat despues di konferensia. El a hasi proyektonan pa servisio, kompañá mi pa bishitá miembronan mayor den kasnan di hende bieu, a duna diskursonan den reunion sakramental, a atministrá e santa sena pa esnan malu den hòspital òf na nan kas, i a bira un di e úniko den un grupo chikitu di hende ku mi por konfia totalmente komo obispu.

Imagen

Alex i su obispu

Pòkopòko, Alex a kambia. Su fe den Señor a krese. El a haña konfiansa den su mes i den e poder di e saserdosio ku e ta poseé. E obispu a konkluí: “Alex tabata i lo ta semper un di mi bendishonnan di mas grandi den mi tempu komo obispu. Kon un privilegio tabata pa mi por a asosiá mi mes ku n’e. En bèrdat mi ta kere ku niun otro Hóben no a drenta e kampo misional mas prepará dor di su servisio di saserdosio.” ⁹

Mi obispunan stimá, inkluí den boso ordenashon i wòrdu apartá komo obispo di boso bario, boso tin e yamamentu sagrado di sirbi komo presidente di e Saserdosio Aaróniko i di e quorum di presbitero. Mi ta konsiente di e karga pisá ku boso ta karga, pero boso mester hasi boso deber pa ku e Hóbennan aki, un di boso prioridatnan mas haltu. Boso no por neglishá of delegá boso ròl den e responsabilidat aki na otronan.

Mi ta invitá bo pa reflehá riba kada un di e poseedornan di Saserdosio Aaróniko yòn den bo bario. Niun di nan lo nunka mag di sinti su mes ekskluí òf inútil. Tin un Hóben ku abo òf un otro ruman den saserdosio por yuda? Invitá e pa sirbi banda di bo. Demasiado biaha nos ta purba di entretené nos Hóbennan i eksiliá nan den un ròl di miron, ora ku nan fe i amor pa e evangelio por mas mihó wòrdu desaroyá dor di magnifiká nan saserdosio. Dor di partisipá aktivamente den e obra di salbashon, nan lo wòrdu konektá ku shelu i nan lo haña tinu di nan potensia divino.

E Saserdosio Aaróniko ta mas ku solamente un grupo di sierto edat, un programa di siñansa òf aktividat, òf hasta un ekspreshon pa indiká e Hóbennan di Iglesia. Ta poder i outoridat pa partisipá den e gran obra di salbashon di alma---tantu e almanan di e Hóbennan ei ku ta poseé e saserdosio komo di e almanan ku nan ta sirbi. Laga nos pone e Saserdosio Aaróniko den su lugá korekto, un lugá eskoho i un lugá di servisio, preparashon i kapasidat pa tur e Hóbennan hòmber di Iglesia.

Mi rumannan hòmber di e Saserdosio di Melchizedek stimá, mi ta invitá boso pa fortifiká e laso esensial ku ta uni e dos saserdosionan di Dios. Empoderá bo Hóbennan ku Saserdosio Aaroniko pa prepará e kaminda dilanti di bo. Konta nan sin miedu, “Mi mester di boso.” Pa boso e poseedornan di e Saserdosio Aaróniko yòn, mi ta hasi orashon ku manera boso ta sirbi ku boso rumannan mas grandi, lo bo tende e stèm di Señor bisa bo: “Bo ta bendishoná, pasó bo lo hasi kosnan grandi. Mira, bo a wòrdu mandá dilanti, hasta manera Juan, pa prepará e kaminda dilanti di mi”¹⁰ Den e nòmber di JesuCristu, amèn.