Vense e Mundu

Esnan ku vense e mundu ta desaroyá un kompashon apsoluto pa nos Señor i Salbador, Jesucristu.

Su nasementu dibino, Su bida perfekto, Su Ekspiashon infinito na Getsémani i Golgóta, a sigurá e Resurekshon di kada un di nos. I ku nos arepentimentu sinsero, E so ta kapas pa limpia nos for di nos pikánan, permitiendo nos pa regresá den e presensia di Dios. “Nos ta stim’é, pasobra el a stima nos promé.” ⁶

Jesus a bisa, “Tuma kurashi; Ami vense e mundu.” ⁷

Despues El a agregá ku E ke pa nos vense e mundu. ⁸

Vense e mundu no ta un momentu definí den henter un bida, pero henter un bida di momentunan ku ta definí un eternidat.

E por kuminsá ora un mucha siña hasi orashon i kanta ku reverensia, “Mi ta purba di ta manera Jesus.” ⁹ E ta sigui ora un persona studia e bida di e Salbador den e Tèstamènt Nobo i ta meditá riba e poder di e Salbador su Ekspiashon den e Buki di Mormon.

Hasi orashon, arepentí, sigui e Salbador, i risibí Su grasia ta guia nos pa komprondé mihó di kon nos ta aki i ken nos tin ku bira.

Alma a deskribí esaki asina e manera aki: “Un kambio poderoso a wòrdu efektuá den nan kurason tambe, i nan a humiliá nan mes i pone nan konfiansa den e Dios berdadero i bibu ... [kedando] fiel te na fin.” ¹⁰

Esnan ku ta vensiendo e mundu sa ku nan lo ta responsabel na nan Tata Selestial. Kambio i arepentimentu sinsero di pikánan no ta un restrikshon mas pero libertadó, meskos ku “pikánan kòrá manera[di] sanger... [ta bira] blanku manera sneu.” ¹¹

Esnan di e mundu tin difikultat ku responsabilidat na Dios ---meskos ku un mucha ku ta fiesta den kas di su mayornan miéntras nan ta for di kas, gosando e momentu, sin pensa tokante e konsekuensianan ora e mayornan regresá 24 ora despues. 

E mundu, al kontrario, ta mas interesá den satisfasé e hòmber natural ku pa domin’é.

Vense e mundu no ta un invashon global pero unu lucha privá i personal, ku mester di kombate man na man ku nos enemigunan interno.

Vense e mundu ke men tesorá e mandamentu di mas grandi: Stima Señor, bo Dios, ku henter bo kurason, ku henter bo alma, ku henter bo mente, i ku tur bo forsa.”¹²

E eskritor kristian C.  S. Lewis a deskribié asina aki: “Cristu ta bisa ‘Duna mi Tur. Mi no ke asina tantu di bo tempu ,plaka, i asina tantu di bo trabou: Mi ke Abo.’’’ ¹³

Vense e mundu ta pa mantené nos promesanan na Dios--- nos kombenionan di boutismo i di tèmpel, i nos huramentu di fieldat na nos kompañero eterno. Vense e mundu ta hiba nos humildemente na e mesa di santa sena kada siman, pidi pa pordon i primintí pa kòrd’é i warda su mandamentunan p’asina nos por tin Su Spiritu semper huntu ku [nos]. ¹⁴

Nos amor pa e dia di Reposo no ta kaba ora portanan di kapia sera nos tras, pero al kontrario ta habri e portanan na un dia bunita pa sosegá for di tareanan diario, studia,hasi orashon, yega serka famia i otronan ku mester atenshon.Na lugá di duna un suspiro di alivio ora reunionnan kaba, i ferosmente kore buska un televishon promé ku wega di futbòl kuminsá, laga nos enfoke keda na e Salbador i riba Su dia sagrado.

E mundu ta wòrdu di trèk sin para dor di un fluho di stèmnan seduktor. ¹⁵

Vense e mundu ta pa konfia den esun stèm ku ta atvertí, konsolá, inspirá, i trese pas “no manera e mundu ta duna.” ¹⁶

Vense e mundu kier men pone mas atenshon na otronan en bes di na nos mes, rekordá e di dos mandamentu¹⁷: “Esun di mas importante meimei di boso, lo ta boso sirbidó.” ¹⁸ E felisidat di nos kasá ta mas importante ku nos mes plaser. Yuda nos yunan pa stima Dios i warda Su mandamentunan ta un prioridat prinsipal. Ku plaser nos ta kompartí nos bendishonnan material pa medio di diesmo, ofrenda di ayuno, i duna na esnan den nesesidat. I ora nos antena spiritual ta mustra na shelu, Señor ta guia nos na esnan ku nos por yuda.

E mundu ta edifiká su universo rònt di e mes, proklamando ku orguyo: Wak na ami kompará ku mi bisiña! Wak kiko ta di mi! Mira kon importante mi ta!”

E mundu ta iritá fásilmente, sin interes, i demandante, gusta elogio di e multitut, miéntras vense e mundu ta trese humildat, empatia, pasenshi, i kompashon pa esnan ku ta diferente for di boso mes.

Vense e mundu semper lo nifiká ku nos lo tin algun kerensia ku ta wòrdu ridikulisá pa e mundu. E Salbador a bisa:

“Si mundu odia boso, sa ku el a odia Ami promé ku el a odia boso.

“Si boso tabata pertenesé na e mundu akí, mundu lo a stima loke ku ta di dje.” ¹⁹

Presidente Russell M. Nelson a bisa awe mainta,”Berdadero disípulonan di Jesucristu ta dispuesto pa destaká, papia kla, i ta diferente for di e hende di e mundu.” ²⁰

Un disípulo di Cristu no ta alarmá si un anunsio tokante di su kerensia no ta risibí 1,000 like òf hasta djis un par di emojis amistoso.

Vense e mundu, ta birando ménos preokupá ku nos kontaktonan online i mas preokupá ku nos konekshon selestial na Dios.

Señor ta duna nos seguridat ora nos hasi kaso na e guia di Su profetanan i apòstelnan bibiente.

Imagen

Presidente Monson ta papiando

Presidente Thomas  S. Monson a bisa: “E mundu por ta … desafiante. ... [Ora nos bai tèmpel], ... nos lo ta mas kapas pa soportá tur prueba i vense kada tentashon. ... Nos lo wòrdu renobá i fortalesé.” ²¹

Ku oumento di tentashonnan, distraishonnan, i trosementu di bèrdat, e mundu ta purba di gaña esnan fiel den deshasí di e eksperensianan spiritual riku di pasado, komo imaginashon ineksplikabel òf desepshonnan bobo.

Vense e mundu ta pa rekordá, hasta ora nos ta deskurashá, e momentunan ku nos a sinti e amor i lus di e Salbador. Elder Neal  A. Maxwell a splika un dje eksperensianan aki di e manera aki: “Mi a wòrdu bendishoná, i mi tabata sa ku Dios tabata sa ku mi tabata sa ku mi a wòrdu bendishoná.” ²² Ounke nos por sinti temporalmente di a wòrdu lubidá, nos no ta lubidá.

Vense e mundu no ta nifiká ku nos ta biba un bida isolá, protehá for di e inhustisia i difikultatnan di mortalidat. Mas bien, e ta habri e bista mas ekstenso di fe, aserká nos na e Salbador i Su promesanan.

Miéntras perfekshon no ta lográ den e bida aki, vense e mundu ta tene nos speransa aktivo ku un dia nos “lo para dilanti [nos Redentor]; [i] wak su kara ku goso,” ²³ i skucha Su stèm: “Bini, boso ku mi Tata a bendishoná, heredá e reino prepará pa boso.” ²⁴

Riba 28 di dezèmber  di aña pasá, nos kerido amigu i Outoridat General, Elder Bruce  D. Porter a kompletá su bida mortal. E tabatin 64 aña.

Mi a konosé Bruce tempu nos tabata studiante na Brigham Young University. E tabata un di esnan di mas mihó i sabi. Despues ku el a risibí su dòktorado for di Universidat di Harvard, enfatisando asuntunan ruso, Bruce su manera di pensa i skibi a trese un fama ku por a desvi’é, pero e rikesa i alabansa di mundu nunka a skuresé su bista. ²⁵ Su lealtat tabata na su Salbador, Jesucristu; na su kompañera eterno, Susan; su yunan i nietunan.

Imagen

Elder Porter ku su famia yòn

Bruce a nase ku un nir defekto. El a haña operashon, pero durante tempu su nirnan a bira pió.

Poko despues di Bruce su yamamentu komo un Outoridat General na 1995, nos a sirbi na Frankfurt, Alemania, huntu ku nos famia, na unda su obra a konsentrá den Rusia i Ost Europa.

Bida a kambia drástikamente pa Elder Porter na 1997 ora su funshonamentu di nir i salú a kuminsá faya. Famia Porter a regresá na Salt Lake City.

Durante di su 22 aña di sirbishi den e Setenta, Bruce a wòrdu hospitalisá hopi biaha inkluyendo pa 10 pa operashon. Dòkternan a bisa Susan na dos okashon ku Bruce lo no biba durante den anochi, pero el a biba.

Pa mas di 12 aña di su sirbishi komo un Outoridat General, Bruce tabata riba diálisis pa limpia su sanger . Pa hopi di e tempu ei, e diálisis a tuma sinku anochi pa siman i kuater ora pa kada tratamentu p’asina e por a sirbi den su yamamentu durante dia i aseptá asignashonnan di konferensia den wikènt. Ora su salú no a mehorá despues di diferente bendishon di saserdosio, Bruce tabata konfuso, pero e tabata sa den ken konfia. ²⁶

Na 2010, Bruce a risibí un nir di su yu David. E biaha aki su kurpa no a rechasá e transplantashon. Tabata un milager, pa trese un salú renobá i eventualmente permití e i Susan pa regresá na nan Rusia stimá, ku e sirbiendo den e Presidensia di Área.

Imagen

Elder i Hermana Porter na Rusia

Riba 26 di dezèmber aña pasá, despues di lucha kontra infekshonnan kontinuo den un hòspital na Salt Lake City, el a pidi e dòkternan pa sali for di e kamber. Bruce a bisa Susan “ku e tabata sa pa medio di e Spiritu ku no tin nada mas ku e dòkternan por a hasi pa salba su bida. E tabata sa ... ku Tata Selestial lo hib’é kas. E tabata na di pas.” ²⁷

Riba 28 di dezèmber , Bruce a bai kas. Algun ora despues, rondoná pa su famia, el a regresá na pas na su kas selestial.

Imagen

Potrèt di Elder Bruce D. Porter

Algun aña pasá, Bruce Porter a skibi na su yunan:

E testimonio ku mi tin di e realidat i amor di Jesucristo tabata un kompas pa mi bida. ... E[ta] un testimonio puru, kaluroso di e Spiritu ku e ta biba, ku e ta mi Redentor i Amigu den tur momentu di nesesidat.”²⁸

Nos desafio ... ta pa yega na konosé [e Salbador], i dor di fe den Dje pa vense e pruebanan i tentashonnan di e mundu aki. ²⁹

Laga nos ta fiel i berdadero, i konfiá den Dje. ³⁰

Bruce Douglas Porter a vense e mundu.

Ku nos kada un por purba un tiki mas duru den nos esfuersonan pa vense e mundu, sin esküs ofensanan serio i sinembargo tene pasenshi ku kaida i fayonan chikitu, aselerá ku rapides i yuda otronan ku generosidat. Ora boso konfia mas kompletamente den e Salbador, mi ta primintí boso bendishonnan di mas pas den e bida aki i siguransa mas grandi di boso destino eterno, den e nòmber di Jesucristo. Amèn.