Na e amigunan i investigadornan di e Iglesia

Dikon un persona sin desafionan, nesesidatnan preguntanan irestitibel, lo ta interesá den topa ku e misioneronan i skucha nan lèsnan. Awèl, den mi kaso e tabata amor---amor pa un mucha, un mucha ku yama Renee, mi a namorá di dje, i mi ker a kasa ku n’e. E tabata diferente i tabatin normanan diferente di mayoria mujeres jovenes ku mi tabata konosé. Mi a kai p’e i puntr’e pa kasa ku mi---i e di no!

Imagen

Elder i Hermana Costa

Mi tabata konfundí. M’a pensa ku mi tabata hopi apuesto! Mi tabatin bon un aparensia, 24 aña di edat, m’a graduá di College i tabatin un bon trabou. El a papia di su metanan---di solamente ke kasa ku un hende ku por hib’e tèmpel, di [ku e] tin un famia eterno--- i el a nenga mi oferta. Mi ker a kontinuá e relashon, i asina ta ku mi a aseptá pa skucha e misioneronan. Si esaki ta un bon motibu pa topa ku e misioneronan? En todo kaso, e tabata [un motibu] pa mi.

Ora mi a topa e misioneronan pa promé biaha, mi no a komprondé hopi di loke nan a bisa, i pa ta honesto, mi no tabata pone hopi atenshon na nan. Mi kurason tabata será pa un religion nobo. Mi ker a solamente proba ku nan tabata robes i gana tempu pa kombensé Renee pa tòg kasa ku mi.

Awendia mi yunan a sirbi i ta sirbiendo un mishon, i mi ta komprondé e sakrifisio ku e hòmber i muhénan hóben aki ta hasi pa siña e evangelio di JesuCristu. Awor mi ta deseá di a pone mas atenshon na Elder Richardson, elder Farrell i Elder Hyland, e misioneronan maravioso, ku a siña mi.

Ker men di mi promé lès: Mi ta bisa boso mi amigunan i investigadornan di e Iglesia, asina bo topa ku e misioneronan, por fabor tuma nan na serio, nan ta entregá añanan importante di nan bida spesialmente pa bo.

E promé biaha ku mi a asistí na un reunion Iglesia, mi a tende hopi palabra sin sentido pa mi. Ken tabata e Abejitas? Kiko tabata e Saserdosio Aaróniko? E Sosiedat di Sokoro?

Si esaki ta e promé biaha ku bo a asistí na un reunion di Iglesia i bo ta sinti bo konfundí dor di algu ku bo no ta komprondé, no preokupá! Mi tambe tabata desorientá. Pero te ainda mi ta kòrda e impreshon, e sentimentunan nobo di pas i goso ku mi a eksperensiá. Mi no tabata sa e tempu ei, pero e Spiritu Santu tabata susurando den mi orea, “Esaki ta korekto.”

Asina ta ku laga mi pone e lès aki den un frase: Si bo ta konfundí, no wòri---kòrda e sentimentunan ku bo a eksperensiá; nan ta bin di Dios.

Despues di hopi reunion ku e misioneronan, mi no tabata progresando hopi. Mi a sinti ku mi no a risibí un konfirmashon di e berasidat di e evangelio.

Un dia, Renee a puntra mi, “Bo ta lesando e Buki di Mormon?”

Mi a kontestá, “No.” Mi tabata skuchando e misioneronan---esei no tabata sufisiente?

Ku awa na wowo, Renee, a sigurá mi ku e sa ku e Buki di Mormon ta bèrdat i [el] a splika ku si mi ker a sa si e ta bèrdat, e úniko manera ta—rei ta kiko—pa lesa esaki! I despues puntra!

Lesa, reflekshoná den bo kurason, i puntra Dios, e Tata Eterno, den e nòmber di Cristu.... ku un kurason sinsero, ku berdadero intenshon, ku fe den Cristu” (Moroni 10:4) si e Buki di Mormon ta bèrdat, si esaki ta e berdadero Iglesia.

Asina ta ku e di tres lès, den un frase. Ora bo risibí e kosnan aki----e Buki di Mormon---i bo ta eksortá pa les’é i puntra Dios ku nan ta bèrdat, por fabor djis hasié!

E eksperensia final ku mi ke kompartí ta tokante arepentimentu. Despues ku mi a kaba di haña tur e lèsnan di e misioneronan, te ainda mi no tabata konvensí ku mi mester a kaba algu den mi bida. Tabata Elder Cutler, un misionero hóben sigur di su mes, ku su Spañó limitá, un dia a bisa, “ Joaquin, laga nos lesa huntu [den] Alma 42, i nos inkluí bo nòmber ora nos les’é.”

Mi a pensa ku ta ko’i kèns, pero mi a hasi loke Elder Cutler a puntra i a lesa den versíkulo  1: “I awor, mi yu [Joaquin], mi ta persibí ku tin algu mas ku ta preokupá bo mente, loke bo no ta komprondé.” Hepa! E Buki tabata papiando ku mi.

I nos a lesa den versíkulo  2: “Awor ata ki, mi yu [Joaquin], lo mi splika e kos aki na bo,” i despues e Kaida di Adam a keda deskribí.

I despues den versíkulo  4: “I esaki nos ta mira, ku tabata tin un tempu duná na [Joaquin] pa arepentí.”

Nos a sigui lesa trankil, versíkulo pa versíkulo, te ora nos a yega na e delaster tres versíkulonan. E ora ei mi a wòrdu sorpresá pa un forsa poderoso. E buki a papia direktamente ku mi, i mi a kuminsá yora ora ma lesa, “I awor, [Joaquin], mi yu mi ta deseá ku bo no ta laga e kosnan aki preokupá bo mas, i solamente laga bo pikánan preokupá bo, ku e preokupashon ku lo trese bo ...... na arepentimentu” (versíkulo  29)

Mi a realisá awor ku mi a spera di risibí revelashon sin paga e preis. Te e ora ei nunka mi no a papia di bèrdat ku Dios, i e idea di papia ku un hende ku no tabata presente tabata parse lokura. Mi mester a humiá mi mes i hasi loke mi a wòrdu pidi asta, den mi mente mundano, ta zona manera ko’i kèns

E dia ei mi a habri mi kurason pa e Spiritu, ku deseo di arepentí, i ker a boutisá! Promé ku e momento ei, mi a pensa di arepentimentu komo algu negativo, asosiá solamente ku pikái kosnan robés, pero direpente mi a mira esaki den un lus diferente---- komo algu positivo ku ta klarifiká e kaminda pa kresementu i felisidat.

Elder Cutler tei aki awe, i mi ke gradisié pa habri mi wowonan. Tur desishon ku mi a tuma for di e momento ei den mi bida a wòrdu influenshá pa e momento ei ora mi a humiá mi mes i a resa pa pordon, i e Ekspiashon di JesuCristu pa mi, a bira parti di mi bida.

Asina ta ku e delaster lès, den un frase: eksperensiá arepentimentu; nada no ta trese mas serka di e Señor JesuCristu ku e deseo pa kambia.

Mi kerido investigador, amigu di e Iglesia, si bo ta skuchando awe, bo ta hopi serka pa yega na e goso di mas grandi. Bo ta serka!

Laga mi invitá bo, ku tur e energia di mi kurason i for di mas profundo di mi alma, bai i wòrdu boutisá! E ta e mihó kos ku lo bo hasi hamas. E lo kambia no solamente bo bida, pero tambe e bida di bo yunan i ñetunan.

Imagen

Elder I hermanas Costa nan dia di kasamentu

E Señor a bendishoná mi ku un famia, mi a kasa ku Renee, i nos tin kuater yu bunita. I dor di mi boutismo, mi por, meskos ku e profeta Lehi di ántes, invitá nan pa partisipá di e fruta di e palu di bida, ku ta e amor di Dios (wak 1  Nefi 8:15;11:25. Mi por yuda nan yega na Cristu.

Asina ta ku por fabor konsiderá mi eksperensianan i (1)  tuma e misioneronan na serio, (2)  bai iglesia i kòrda e sentimentunan spiritual, (3)  lesa e Buki di Mormon i puntra e Señor si e no ta bèrdat i (4)  eksperensiá arepentimentu i wòrdu boutisá.

Mi ta testifiká na boso ku si boso paga e preis di revelashon, humiá, lesa, resa, i arepentí e shelunan lo habri i lo bo sa, manera ami sa, ku Jesus ta e Cristu. E ta mi salbador i E ta di bosnan. Den e nòmber di JesuCristu, amèn