Ku Nos Lus Por Ta un Standart pa e Nashonnan

Hopi aña pasá, ora mi tabata sirbi komo maestro di seminario. M’a tende un di mi koleganan puntra su studiantenan pa reflekshoná riba e siguiente pregunta: Si bo tabata biba den e tempu di Salbador, dikon bo ta kere ku abo lo a sigui’É komo un di Su disípulonan?? Nan a yega na e konklushon ku esnan ku ta sigui e Salbador den presente i ta lucha pa ta Su Disípulo probablemente tambe lo a hasi esaki e tempu aya.

For di e tempu ei, mi a reflekshoná riba e pregunta ei i despues riba nan konklushon. Hopi biaha mi ta puntra mi mes kon ami lo a sinti tendiendo e Salbador Mes ora El a bisa lo siguiente den e Sermon riba e seru:

“Boso ta lus pa e mundu. No ta posibel pa skonde un siudat situá riba un seru.

“Niun hende no ta sende un lampi pa despues pon’é bou di un hèmber, ma ta pon’é riba un standart pa lusa tur hende den ka. 

“Meskos asina, boso mester laga boso lampi bria pa otro hende, pa nan mira boso bon obranan i alabá boso Tata ku ta den shelu” (Mateo 5:14–16).

Boso por imaginá boso kon boso a lo sinti skuchando e Salbador su stèm? En realidat, nos no tin ku imaginá. A bira un eksperensia konstante pa nos pa skucha e stèm di Señor pasobra ora nos ta skucha e stèm di Su sirbidónan, ta meskos.

Na 1838, similar na e mensahe duná den e Predikashi riba Seru, Señor a deklará lo siguiente na e Profeta José Smith:

Ku den e delaster dianan Su iglesia lo wòrdu yamá, E Iglesia di Jesucristu di e Santunan di e Delaster dianan.

Señor a bisa na tur pa nan lanta i bria pa asina nan lus por ta un standart pa e nashonnan(D&C 115:4–5).

Nos dianan t’asina ekstraordinario ku nan a hasta wòrdu mustrá den un vishon na e profeta Isaías; e tambe a mira i a profetisá di e dia di e Restourashon di e Iglesia di Jesucristu i di su propósito, bisando, “L’E lanta un master pa pueblonan mira ku E ta bai reuní esnan ekskluí di Israel, i trese e hendenan plamá di Huda huntu for di e kuater skinanan di mundu” (Isaías 11:12).

Den konteksto di skritura, un master òf un standart, ta un bandera rònt di kua hende lo reuní den unidat di propósito. Den tempunan antiguo, un standart tabata sirbi komo un punto di reunion pa sòldánan den bataya. Papiando simbólikamente, e Buki di Mormon i e Iglesia restourá di Jesucristu ta standartnan pa tur nashon. (Wak Guide to the Scriptures, “Ensign,” scriptures.lds.org.)

Sin ningun duda, un dje gran standartnan di e delaster dianan aki ta e konferensia general magnífiko , unda e gran obra i plan di nos Tata Selestial “pa realisá e inmortalidat i bida eterno di hende” (Moises 1:39) ta wòrdu proklamá kontinuamente.

E tenementu kontinuo di konferensia general ta un di e testimonionan mas grandi na e echo ku nos komo Santunan di Delaster dia “ ta kere tur loke Dios a revelá, tur loke E ta revelá aktualmente, i nos ta kere ku ainda E lo revelá hopi kosnan grandi i importante, ku ta pertenesé na e reino di Dios.” (Artíkulonan di Fe 1:9).

Kiko, anto, Señor a revelá pa medio di Presidente Thomas  S. Monson ku nos tin ku sigui hasi p‘asina nos lus ta un standart pa e nashonnan? Kiko ta algun kos importante pa hasi den e momentu briante aki di edifiká Sion i di reuní Israel?

Señor semper a revelá Su boluntat na nos “liña riba liña, presepto riba presepto, aki un poko i un poko aya;” (2  Nefi 28:30). P’esei nos no mester ta sorpresá pa loke por parse kosnan chikitu pa motibu di nan naturalesa simpel i ku ta ripití. Pasobra Señor a konsehá nos kaba, bisando nos ku “bendishoná ta esnan ku ta skucha Su preseptonan i paga tinu na su konseho pasobra nan lo haña sabiduria; pasobra esun ku risibí , Señor lo dun’é mas.” (2  Nefi 28:30).

Mi ta testifiká ku liña riba liña, presepto riba presepto, aki un poko i un poko aya i dor di hasi kaso na konseho di nos lidernan, nos lo tin zeta pa nos lampinan ku lo abilitá nos pa duna lus na otronan manera Señor a manda nos.

Miéntras ku tin hopi kos ku nos por hasi pa ta un lus i un master pa  otronan, lo mi ke enfoká riba e siguiente tres: opservá e dia di Reposo; aselerá e obra di salbashon na tur dos banda di e velo; i siña na manera di e Salbador.

di Reposo, na Iglesia i tambe na kas; ta e lus ku ta krese ora nos mantené nos mes sin mancha di e mundu; ta e lus ku ta bini for di ofresé nos sakramentunan riba Su dia santu i duna nos deboshon na e Altisimo, kua tur ta abilitá nos pa tin Su Spiritu semper ku nos. Ta e lus ku ta krese i ta bira visibel ora nos regresá kas ku e sentimentu di pordon ku Presidente Henry  B. Eyring a papia di dje den konferensia general di òktober pasá ora el a bisa: “Di tur e bendishonnan ku nos por konta, un di esnan mas grandi ta esun di pordon ku ta bini ora nos partisipá di e sakramento. Nos lo sinti gran amor i apresio pa e Salbador, di kua su sakrifisio infinito a hasi posibel pa nos por wòrdu limpia di nos pikanan.” (“Gratitut riba e Dia di Reposo” Liahona, Nov. 2016, 100).

Ora nos tene e dia di Reposo santu i partisipá di e santa sena, nos no ta wòrdu solamente limpiá, pero tambe nos lus lo bria mas.

Nos lus ta krese tambe ora nos dediká i konsagrá tempu pa haña e nòmbernan di nos antepasadonan, hiba nan nòmber tèmpel, i siña nos famia i otronan pa hasi meskos.

E obra sagrado di tèmpel i historia familiar ku nos ta kompartí ku e Santunan na tur dos banda di e velo ta moviendo padilanti mas ku nunka segun ku Señor su tèmpelnan ta wòrdu konstruí. Awor ku e tèmpelnan tin orarionan spesial pa gruponan familiar ku ta bini ku nan mes karchinan ku nòmber di fia, mi kasá i ami tabatin eksperensianan enkantador ora nos a sirbi huntu den tèmpel ku nos yunan i nos nietunan.

Ora nos haña i hiba nòmbernan tèmpel i siña otronan kon pa hasié, nos ta bria huntu manera un standart.

Siña kon pa duna lès na e manera e Salbador a siña ta un otro manera ku nos por lanta i bria. Mi ta alegrá huntu ku tur hende ku ta siñando kon pa duna lès na e manera di e Salbador. Permití mi pa lesa for di e kaft di e manual nobo pa siña: “E meta di kada maestro di evangelio---kada mayor, kada maestro yamá formalmente, maestro orientador, maestra bishitante, i kada siguidó di Cristu---ta pa siña e doktrina puru di e evangelio, pa medio di e Spiritu, ... pa yuda e yunan di Dios edifiká nan fe den e Salbador i bira mas manera Dje.” (Teaching in the Savior’s Way [2016]).

Awor aki mes, míles di nos maestronan fiel ta tene e lus na haltu ora nan ta siña kon pa duna lès den e manera di e Salbador. Den e konteksto aki, e reunion di konseho pa maestronan ta e manera pa lanta i bria ora e studiantenan ta reuní rònt dje standart di e doktrina di Cristu, pa” e yabi pa duna lès i biba manera e Salbador a biba” (Teaching in the Savior’s Way, 4).

Segun nos tur duna lès i siña na manera di Señor  i bira mas meskos ku E, nos lus lo bria mas i no por wòrdu skondí i ta bira un standart na esnan ku ta buskando pa e lus di e Salbador.

Mi kerido rumannan, nos no tin ku i no mester di skonde nos lus. Nos Salbador a manda nos pa laga nos lus bria manera un siudat riba un seru òf manera un lus di un bela. Ora nos hasi asina, nos lo glorifiká nos Tata den Shelu. E Salbador su evangelio i Su Iglesia restourá ta duna nos hopi oportunidat pa nos lus por ta un parti di e gran standart pa e nashonnan.

Mi ta testifiká ku Jesucristu ta e lus ku nos mester reflehá, den e nòmber di Jesucristu, amèn.