Mas briante kada biaha te e dia Perfekto
Hasta den e momentunan mas difísil i skur, lus i bondat ta rondoná nos.
Pablo a kompartí un mensahe maravioso di speransa ku e Korintionan:
“Nos tin problema tur kaminda, pero nos no ta tin angustia; Nos ta bou di stress, pero nos no ta desesperá.
“Persiguí, pero no bandoná, benta abou, pero no destruí.” 1
Kiko tabata e fuente di Pablo su speransa? Skucha su kontesta: “Pasobra Dios, ku a manda e lus iluminá e skuridat, a resplandesé den nos kurasonnan, pa duna e lus di konosementu di e gloria di Dios den e kara di JesuCristu.” 2
Hasta den e tempunan mas difísil i mas skur, tin lus i bondat rònt di nos. Òktober pasá, Presidente Dieter F. Uchtdorf a rekordá nos, “Nos ta rondoná di … un rikesa asombroso di lus i bèrdat ku mi ta puntra mi mes si di bèrdat nos ta apresiá loke nos tin.” 3
Sin embargo, e atversario lo preferá pa nos enfoká riba “neblina i skuridat … ku ta hasi e wowonan siegu, enduresé … kurasonnan … , i … desviá … nos.” 4
Asina mes, ku entendimentu perfekto di e desafionan di nos dia, Señor ta primintí: “Loke ta di Dios ta lus; i esun ku risibí lus, i sigui den Dios, lo risibí mas lus; i e lus ei lo krese i bria mas te e dia perfekto.” 5
Nos ta yunan di Dios. Risibí lus, sigui den Dios, i risibí mas lus ta loke nos a wòrdu krea pa hasi. For di komienso, nos a sigui e lus; nos a sigui nos Tata Selestial i Su plan. Buskando e lus ta den nos DNA spiritual.
Mi a skucha e bèrdat aki wòrdu siña na un manera masha bunita den un lugá inesperá. Miéntras mi tabata traha pa un banko grandi, mi a wòrdu invitá pa asistí na un programa ehekutivo na e Universidat di Michigan. Durante di e programa, Profesor Kim Cameron a siña e konsepto di liderazgo positivo den e efekto heliotrópiko. E la splika: “Esaki ta referí na e tendensia den tur sistema ku tin bida pa bai kaminda tin energia positivo [lus] i leu for di energia negativo [skuridat]. For di organismo monoselular te ku sistemanan humano kompliká, tur kos ku tin bida tin un inklinashon heredá pa bai kaminda e positivo ta leu for di e negativo.” 6
Apoyá pa un rikesa di estudio, e la enfoká tambe riba tres komponente kritiko di un kultura di trabou eksitoso: kompashon, pordon, i gratitut. 7 E tin sentido perfekto ku ora un hende bai den direkshon positivo (lus), e atributonan ta wòrdu perfektamente resaltá dor di e Lus di e Mundu, JesuCristu, ta presente!
Rumannan, por fabor tuma konsuelo ku tin lus disponibel pa nos. Mi por sugirí tres área kaminda semper nos por haña lus:
1. E lus di e Iglesia
E Iglesia ta un pila di lus den un mundu ku ta birando skur. Esaki ta un tempu maravioso pa ta miembro di E Iglesia di JesuCristu di e Santunan di Delaster dia! E Iglesia ta mas fuerte ku nunka8 i literalmente kresiendo mas fuerte kada dia ora ku mas miembro ta uni ku nos, kongregashonnan nobo ta wòrdu forma, mishoneronan nobo ta wòrdu yama, i teritorionan nobo ta wòrdu habri pa e evangelio. Nos ta mira esnan ku a kai fo’i aktividat di Iglesia pa un tempu regresá ora ku e reskate mira dor di Presidente Monson den un vishon ta trese milagernan diario.
Resientemente mi a bishita e hóbennan na Paraguay, Uruguay, Chile, i Argentina durante nan konferensia di Fortalesa di Hubentut. Míles di hóbennan a bin pasa un siman fortalesiendo nan amor pa e Salbador, despues regresá nan hogar serka nan famia i amigunan radiando e lus di e amor di Kristu.
Wak, e Iglesia semper lo tin su krítikonan. Semper tabata asina for di komienso i e lo ta asina ten a final. Nos no por permití e krítikanan asina ei paga nos sensibilidat pa ku e lus ku ta disponibel pa nos. Rekonosé e lus i busk’e ta kalifiká nos pa ainda mas lus.
Den un mundu ku ta birando skur, e lus di e Iglesia lo bria ainda mas briante te e dia perfekto.
2. E lus di e Evangelio
E lus di e evangelio ta e kaminda ku ta “bria mas i mas te e dia perfekto,” 9 i e ta bria mas briante den nos famianan i e tèmpelnan rònt mundu.
Prediká Mi Evangelio ta bisa: “Pa medio di e lus di e evangelio, famianan por resolvé mal entendimentu, kontenshon, i desafionan. Famianan kibra dor di diskordia por wòrdu sana pa medio di arepentimentu, pordon, i fe den e poder di e Ekspiashon di JesuCristu.” 10 Awor mas ku nunka, nos famianan mester ta e fuente di gran lus pa tur esnan rònt di nos. Famianan ta krese den lus ora nan ta krese den amor i bondat. Ora nos ta establesé famianan di “fe, …arepentimentu, pordon, rèspèt, amor, [i] kompashon,” 11 nos lo sinti un kresementu den amor pa ku e Salbador i tambe pa ku un i otro. E famianan lo bira mas fuerte, i e lus den kasa un di nos lo bria mas briante.
Nos ta lesa den e dikshonario di Beibel, “Solamente e hogar por wòrdu kompará ku e tèmpel pa loke ta trata sagrado.” 12 Awó nos tin 155 tèmpel den operashon i mas na kaminda. Mas i mas famia ta wòrdu seya pa tempu i eternidat. Miembronan ta entrega mas nòmber di antepasadonan na e tèmpel pa hasi ordenansanan di salbashon. Nos ta eksperensia felisidat grandi i selebrashon na ámbos banda di e velo!
Den un mundu ku ta birando skur, e lus di e evangelio lo bria mas briante te e dia perfekto.
3. E Lus di Kristu
Bo no por papia di e lus den e mundu sin papia di e Lus di e Mundu, JesuCristu. Un manifestashon di un Tata Selestial amoroso ta ku kada ken ku bin den e bida aki ta bendishoná ku e Lus di Kristu pa yud’e regresá bek kas. Presidente Boyd K. Packer a siña: “E Espíritu di Kristu semper tei. …E Lus di Kristu ta mesun universal ku lus di solo mes. Tur kaminda ku tin bida humano, tin e Espíritu di Kristu.” 13 E Lus di Kristu ta “invitá i atraé pa hasi bon kontinuamente” 14 i prepará tur esnan ku ta buska bondat i bèrdat pa risibí e Espíritu Santu.
E Salbador ta siña ku E ta e lus ku ta “iluminá bo wowonan,” “aselerá bo entendimentu,” i “duna bida na tur kos.” 15 E Lus di Kristu lo yuda nos wak otronan dor di e wowonan di e Salbador. Nos lo ta mas amoroso i tin mas komprenshon pa e desafio di otronan. E lo yuda nos di tin mas pasenshi ku esnan ku no por alabá òf sirbi manera nos por. E lo yuda nos komprondé e gran plan di felisidat mas kompletu i wak kon nos tur ta pas den e gran plan amoroso. E ta duna bida, rason, i propósito den kada kos ku nos ta hasi. Ku tur e felisidat ku ta bin na nos ora nos ta komprondé kompletamente e Lus di Kristu, e lo no yega na e alegria ku nos ta sinti ora nos mira e Lus di Kristu traha den otronan – famia, amigunan, i hasta hendenan straño.
Mi a sinti e alegria aki ora ma tende tokante di e esfuersonan di un grupo di brantwer balente ku a bringa pa salba un sentro di estaka na Sur di California na yüli 2015. Miéntras e kandela tabata kima, e komandante di e batayon a yama un amigu miembro di iglesia pa puntra una e relikianan sagrado i e kùpnan di sakramento ta warda pa nan por salba nan. Su amigu a sigur’é ku no tin ningun relikia i ku e kùpnan di sakramentu por wòrdu remplasá. Pero e komandante a sinti ku e ta tin ku hasi mas, kermen e la manda mas brantwer den e edifisio na kandela pa kita e kuadro di Kristu for di muraya pa nan por wòrdu preservá. Nan a hasta pone unu den e trùknan ku e speransa ku e bomberonan por wòrdu kuida. Mi a wòrdu toka dor di e amabilidat, bondat, i sensibilidat di e komandante pa ku e Lus, espesialmente durante un tempu peligroso i difísil.
Den un mundu ku ta birando skur, e Lus di Kristu lo bria mas briante te e dia perfekto
Atrobe mi ta ripití e palabranan di Pablo: “Laga nos pone e armadura di lus.” 16 Mi ta testifiká di Kristu. E ta e Lus di Mundu. Ku nos por wòrdu fortalesé dor di e lus ku ta disponibel pa nos pa medio di mas partisipashon na iglesia i apliká e prinsipionan di evangelio mas den nos famianan. Ku nos por wak e Lus di Kristu den otronan konstantemente i yuda nan wak e pa nan mes. Ora nos ta risibí e lus, nos lo wòrdu bendishoná ku mas lus, hasta te e dia perfekto ora nos mira atrobe “e Tata di lus,” 17 nos Tata Selestial. Esei mi ta testifiká den nòmber sagrado di e Lus di Mundu, esta JesuCristu, amèn.