Nos Tata su Plan Glorioso

Na kuminsamentu di mi training pa bira dòkter, mi tabatin e privilegio di yuda un mama haña su promé yu. E tabata kalmu, enfoká i kontentu. Ora ku e yu a nase, mi a duna e, e resien nasí presioso. Ku lágrima di felisidat koriendo for di su wowo, El a tuma e baby den su brasa i eksaminá e di kabes te pia. El a tené serka i stim’é manera solamente un mama por. Tabata un privilegio pa tabata den e kamber ei huntu ku ne.

Asina tabata e kuminsamentu di bida pa kada un di nos. Pero tòg, nos nasementu di bèrdat ta e kuminsamentu? Mundu ta mira nasementu i morto komo e kuminsamentu i e kabamentu. Pero dor di Dios su plan sagrado, nos sa ku nasementu i morto enberdat ta solamente un miya den nos biahe pa bida eterno huntu ku nos Tata Selestial.¹ Nan ta partinan esensial di e plan di nos Tata--- momentonan sagrado kaminda mortalidat i shelu ta interkambiá. Awe, reflehando riba loke mi a siña dor di opservá nasementu i morto dor di mi añanan di práktika médiko i servisio den Iglesia, mi ke duna testimonio di e plan glorioso di nos Tata.

“Promé ku nos a nase, nos a biba ku Dios, e Tata di nos spiritu. Nos tur ku ta na tera ta literalmente rumannan” den Su famia,² i nos kada un ta presioso pa E. Nos a biba ku n’E pa hopi tempu promé ku nos nasementu mortal---- siñando, skohiendo, i preparando.

Paso Tata Selestial stima nos, E ke pa nos haña e don di mas grandi ku E por duna, e don di bida eterno.³ E no por simpelmente duna nos e don aki; nos tin ku haña e dor di skohe E i Su kaminda. Esaki ta rekerí pa nos Sali for di Su presensia i kuminsá un maravioso biahe di fe, kresementu i progreso. E biahe ku nos Tata a prepará pa nos ta wòrdu yamá e plan di salbashon of e plan di felisidat.⁴

Den un gran konseho pre mortal nos Tata a konta nos di Su plan. ⁵ Ora nos a komprond’É, nos tabata asina felis, ku nos a sklama di alegria i e streanan di dia a kanta huntu ku otro. ⁶

E plan ei ta trahá riba tres gran pilar: e pilarnan di eternidat. ⁷

E promé pilar ta e Kreashon di tera, e senario di nos biahe mortal.⁸

E segundo pilar ta e Kaida di nos promé mayornan mortal, Adam i Eva. Dor di e Kaida, algun kosnan maravioso a wòrdu duná na nos. Nos tin e posibilidat di nase i risibí un kurpa físiko. ⁹ Mi lo ta eternamente gradisí na mi mama pa trese mi rumannan hòmber i ami den mundu i siña nos tokante di Dios.

Tambe Dios a duna nos albedrio moral---- e abilidat i privilegio di skohe i aktua pa nos mes. ¹⁰ ada dìa, sigun nos ta warda Su mandamentunan, nos ta mustra Dios ku nos ta stima E i e ta bendishoná nos bida.¹¹

Sabiendo ku nos no lo skohe semper korekto ---òf ku otro palabra, pika ---Tata a duna nos e di tres pilar---e Salbador JesuCristu i Su Ekspiashon. Por medio di Su sufrimentu, Cristu a paga e preis di tantu morto físiko i piká.¹² El a instruí: “Paso Dios a stima mundu asina tantu, ku El a duna su Yu Unigénito, asina ku kualke un ku kere den dje lo no bai pèrdí, pero tin bida eterno.”¹³

JesuCristu a biba un bida perfekto, semper wardando Su Tata su mandamentunan. El a kana e kaminda di Palestina, instruyendo e bèrdatnan di eternidat, “kurando esnan malu, laga esun siegu mira, i lanta esun ku a muri for di morto.” ¹⁴ El a “bai hasiendo bon”¹⁵ i “kurashá tur pa sigui Su ehèmpel.”¹⁶

Na final di Su bida mortal, El a rudia den orashon, bisando:

“Tata, si bo ta dispuesto, kita e kòpi aki for di mi, no opstante no mi boluntat, pero dibo, lo pasa …

“I siendo den agonia El a ora mas severo: i su sodó tabata manera gran gota di sanger kayendo riba tera.”¹⁷

Cristu ta yuda nos pa komprondé mas mihó e magnitut di Su sufrimentu ora ku El a konta e Profeta José Smith:

“Ami, Dios, a sufri e kosnan aki pa tur, pa nan no mester di sufri, si nan arepentí;

“Pero si nan no arepentí nan mester sufri hasta manera Ami;

“E sufrimentu ku a kousa ami, hasta Dios, esun mas grandi ku tur, di tembla dor di doló, i sangra for di kada porio, i di sufri tur dos kurpa i alma.”¹⁸

Einan den e Hòfi di Getsemane, El a kuminsá paga e preìs pa nos pikánan i nos malesanan, nos dolónan i nos enfermedatnan.¹⁹ Dor ku El a hasi esaki, nunka nos no lo ta nos so den e enfermedatnan ei si nos skohe pa kana huntu ku n’E. El a wòrdu arestá i kondená ku kargonan falsu, kondená pa satisfasé un banda, i sentensiá pa muri na e krus di Kalvario. Na e krus El a duna su bida pa ekspiá pa e pikánan di henter mundu [den] un gran obra interino na lugá di tur ku hamas lo biba riba tera.²⁰

El a deklará:

“Mira, Ami ta JesuCristu, di kual profetanan a testifiká ku lo bini den mundu.

“I mira, Ami ta e lus i e bida di mundu; i Ami a bebe di e kòpi marga ei ku e Tata a duna Mi, i a glorifiká e Tata dor di tuma riba mi e pikánan di mundu.” ²¹

Despues, riba e promé dia di siman,²² El a lanta for di e graf ku un kurpa resusitá perfekto, hamas pa muri atrobe. Anto pasó El a hasi esaki, nos tambe lo por.

Mi ta duna testimonio ku Cristu en bèrdat a lanta for di e graf. Pero pa por a lanta for di e graf ei, E mester a muri promé. I asina nos tambe lo mester hasi.

Un otro di e gran bendishonnan di mi bida ta di sinti e serkania di shelu durante e momentonan ei ora ku mi ta sintá banda di personanan ku ta bai fayesé. Trempan un mainta, un par di aña pasá, mi a drenta e kamber di hòspital di un biuda Santu di Delaster Dianan fiel ku tabatin kanser. Dos di su yunan muhé tabata sintá huntu ku n’e. Ora ku mi a bai na su kama, mi a diskubrí ku e no tabata sufriendo mas paso El a kaba di fayesé.

Den e momentu di morto ei, e kamber a yena ku pas. Su yunan muhé tabatin un pena dushi, pero nan kurason tabata yen di fe. Nan tabata sa ku nan mama no a bai pero a bai kas. ²³ Hasta den nos momentunan di gran angustia, den e momentunan ku tempu ta para i bida ta sinti manera deshonesto, nos por haña pas den nos Salbador dor ku E tambe a sufri. ²⁴ Tabata un privilegio pa tabata den e kamber ei.

Ora nos muri, nos spiritu ta bai laga nos kurpa i nos ta bai na e siguiente fase di nos biahe, e mundu spiritual. E ta un lugá di siñansa, arepentimentu, pordon, i progreso ²⁵ kaminda nos ta warda riba e Resurekshon. ²⁶

Riba un gran dìa den futuro, tur hende ku hamas a nase lo lanta for di graf. Nos spiritu i nos kurpa físiko lo réuni den su forma perfekto. Tur hende lo wòrdu resusitá, tantu e bieu komo e yòn, ... tantu hòmber komo muhé, tantu e mal hende kome esun bon,” i “tur kos lo wòrdu restourá den su forma perfekto.” ²⁷

Despues di e Resurekshon nos lo tin e bendishon supremo di wòrdu husgá dor di nos Salbadó, kual a bisa:

“Lo mi trese hende serka mi, pa nan lo wòrdu husgá segun nan obranan.

“ I lo bin pasa, ku kualke un kon arepentí i wòrdu boutisá den mi nòmber lo wòrdu yená; i, si e perseverá te na final, mira, é lo mi tene sin falta dilanti di mi Tata riba e dia ei ora ku Mi lo para komo hues pa husga mundu.”²⁸

I e ora ei, dor di Cristu i Su Ekspiashon, tur ku skohe pa sigui E dor di fe, arepentimentu, boutismo, risibí e Spiritu Santu, i perseverá te na final²⁹ lo mira ku nan biahe final ta pa risibí “nan destino divino di bida eterno.” ³⁰ Nan lo bai bèk den nan Tata su presensia pa biba ku E pa semper. Ku nos lo skohe bon.

Tin asina tantu mas den nos eksistensia ku solamente loke ta pasa entre nasementu i morto. Mi ta invitá boso pa bini i sigui Cristu. ³¹

Mi ta invitá tur miembro di E Iglesia di JesuCristu di e Santunan di Delaster Dianan pa, tur dia, “bini serka Cristu, i wòrdu perfekshoná den dje, i ninga bo mes for di tur kos ku no ta sagrado,....[ku] dor di e dramamentu di e sanger di Cristu,.... lo bo [por] bira santifiká, sin mancha.” ³²

Mi ta invitá esnan ku ainda no ta miembro di e Iglesia aki pa bini i lesa e Buki di Mormon i skucha e misioneronan. Bini i tin fe i arepentí di bo pikánan. Bini i wòrdu boutisá i risibí e Spiritu Santu. Bini i biba un bida felis i yená ku Cristu. Manera bo bini serka Dje i warda Su mandamentunan, mi ta primintí ku bo por haña pas i meta den e eksperensia mortal ku ta hopi biaha tumultoso i “bida eterno den e mundu ku ta bini.” ³³

Pa esnan ku a eksperensia e bèrdatnan aki i pa kualke motibu a laga los, mi ta invitá bo pa bini bèk. Bini bèk awe. Nos Tata i e Salbador stima bo. Mi ta testifiká ku Cristu tin e poder pa kontesta bo preguntanan, kura bo doló i angustianan, i pordoná bo pikánan. Mi sa ku esaki ta bèrdat. Mi sa ku tur e kosnan aki ta bèrdat. Cristu ta bibu! Esaki ta Su Iglesia. Den e nòmber di JesuCristu, amèn.