E Beyesa di Santidat
Nos Tata na Shelu a proveé pa nos tur ku ta rekerí pa nos por bira santu manera E ta santu.
Miéntras mi tabata preparando pa e reunion aki, mi kurason a bira na e hopi ruman fiel kende mi a konosé tur kaminda. Pa mi, nan ta wòrdu mihó deskribí den un salmo di gratitut di Rei David: “Duná Señor su Nòmber e gloria debí, presentá su dilanti ku regalo. Adorá Señor den e beyesa di santidat.”1
Mi ta mira e beyesa di santidat den e rumannan kua nan kurason ta enfoká riba tur kos bon, kende kier bira mas manera e Salbador. Nan ta ofresé henter nan alma, kurason, poder, mente, i forsa na Señor den e manera ku nan ta biba kada dia.2 Santidat ta den e lucha pa warda e mandamentunan i pa honrá e kombenionan nos a hasi ku Dios. Santidat ta hasiendo e eskohonan ku lo mantené e Spiritu Santu komo nos guia.3 Santidat ta poniendo na banda nos tendensia natural i “birando un santu dor di e ekspiashon di Cristo e Señor.” 4 “Kada momentu di [nos bida] mester ta santidat na Señor.”5
E Dios di shelu a manda e yunan di Israel, “Pasobra ami ta Señor, boso Dios: p’esei santifiká boso mes i lo sea santu; pasobra Ami ta santu. Asina ku no lo hasi boso mes impuro.”6
Elder D. Todd Christofferson a siña: “Nos Tata Selestial ta un Dios di speransa haltu. … E ta proponé pa hasi nos santu pa asina nos por biba den gloria selestial (D&C 88:22) i den su presensia (Moises 6:57).7Lectures on Faith (Lekturanan riba Fe) ta splika ku niun hende por disfrutá di Su gloria sin tin Su perfekshon i santidat.8 Nos Tata na Shelu ta konosé nos. E ta stima nos, i E la proveé pa nos tur ku ta rekerí pa nos por bira santu manera E ta santu.
Nos ta yu muhé di Tata Selestial, i kada un di nos tin un dibino herensia di santidat. Nos Tata na Shelu a deklará ku E ta Dios, i Su nòmber ta Hòmber di Santidat.9 Den e mundu premortal, nos a stima nos Tata i a ador’É. Nos a deseá pa ta manera E. For di amor paternal, E la duna Su Yu Stimá, JesuCristu, pa ta nos Salbador i Redentor. E ta e Yu di Hòmber di Santidat.10 Su nòmber ta Santu,11 Esun Santu di Israel.12
Nos speransa pa santidat ta sentrá den Cristo, den Su miserikòrdia i Su grasia. Ku fe den JesuCristu i su Ekspiashon, nos por bira limpi, sin mancha, ora nos ta nenga nos mes di inikidat13 i arepentí sinseramente. Nos ta wòrdu boutisá pa awa pa e remishon di piká. Nos alma ta wòrdu santifiká ora nos ta risibí e Spiritu Santu ku kurason habri. Kada siman, nos ta partisipá di e ordenansa di e santa sena. Ku un spiritu di arepentimentu ku deseo sinsero pa rektitut, nos ta hasi kombenio ku nos ta dispuesto pa tuma riba nos e nòmber di Cristo, kòrda riba djE, i warda Su mandamentu pa asina semper nos por tin Su Spiritu huntu ku nos. Ku tempu, Miéntras nos ta kontinuamente trata di bira uni ku e Tata, e Yu, i e Spiritu Santu, nos ta bira partisipante di Nan dibino naturalesa.14
Santidat Ta Warda Nos Kombenionan
Nos ta rekonosé e kantidat di prueba, tentashon, i tribulashon kua por hala nos for di tur kos ku ta virtuoso i digno di alabansa dilanti Dios. Pero nos eksperensia mortal ta ofresé nos e oportunidat pa skohé santidat. Mas tantu e ta e sakrifisio ku nos ta hasi pa warda nos kombenionan ku ta santifiká nos i hasi nos santu.
Mi a mira santidat den e kara di Evangeline, un mucha muhé di diestres aña na Ghana. Un di e maneranan ku e ta warda su kombenionan ta pa magnifiká su yamamentu komo e presidente di klas di Abejita. E la splika humildemente ku e ta bai na e kas di su amiganan, e mujeres Jovenes ménos aktivo, pa puntra nan mayornan pa laga nan bini iglesia. E mayornan ta bis’e ku e ta difísil pasobra riba Djadumingu e muchanan mester hasi nan tareanan di kas. Asina ku Evangeline ta bai yuda nan ku nan tareanan di kas, i dor di su esfuerso hopi biaha su amiganan mag di bin iglesia.
Si nos lo warda e kombenionan asosiá, e ordenansanan sagrado di saserdosio lo kambiá nos, santifiká nos, i prepará nos pa drenta den e presensia di nos Señor.15 Asina ku nos ta kargá e peso di otro; nos ta fortalesé otro. Nos ta risibí un remishon di nos piká ora nos ta duna alivio spiritual i temporal na e pober, esnan ku hamber, esnan sunú, i e enfermo.16 Nos ta mantené nos limpi di e mundu ora nos ta warda e Dia di Reposo i dignamente risibí e santa sena riba e dia santu di Señor.7
Nos ta bendishoná nos famia i hasi nos hogar un lugá santu. Nos ta kalma nos pashon pa asina nos por wòrdu yená ku amor puru i eterno.18 Nos ta ekstendé nos man na otro den bondat, ku kompashon, i para komo testigu di Dios. Nos ta bira un pueblo di Sion, di un kurason i un mente, un pueblo puru ku ta biba huntu den unidat i rektitut.19 Pasobra Sion mester oumento den beyesa, i den santidat.20
Rumannan, bini na e tèmpel. Si nos ta pa ta un pueblo santu prepará pa risibí e Salbador na Su binida, nos mester lanta para i bisti nos paña bunita.21 Ku forsa i honor, nos ta laga e manera di mundu atras i warda nos kombenio, ku nos por ta bistí ku puresa, si, asta ku e paña di rektitut.22
Santidat Ta Akseptá e Santu Spiritu komo Nos Guia
Santidat ta un don di e Spiritu. Nos ta akseptá e regalo aki ora nos ta skohé pa hasi e kosnan ku lo oumentá e poder ku ta santifiká di e Spiritu Santu den nos bida.
Ora Marta a risibí JesuCristu den su hogar, e la sinti un deseo tremendo pa sirbi Señor mas mihó ku e tabata por. Su ruman muhé, Maria, a skohe pa sinta na pia di Jesus i pa skucha Su palabra. Ora Marta a sinti kargá di sirbi sin yudansa, e la keha, “Señor, no ta importá Bo ku mi ruman ta laga mi so hasi trabou?”
Mi ta stima e palabra di e represhon mas kariñoso ku mi por imaginá. Ku amor perfekto i kompashon infinito, e Salbador a reprend’é:
“Marta, Marta, bo ta preokupá i den tenshon pa hopi kos,
“Ma ta un kos so ta nesesario. Maria a skohe e mihó parti i lo no kita esei for di dje.”23
Rumannan, si nos ta pa ta santu, nos mester siña pa sinta na e pia di Esun Santu di Israel i duna tempu na santidat. Nos sa pone na banda nos telefòn, e lista di tareanan ku nunka ta kaba, i e preokupashon di mundu? Orashon, studio, i duna atenshon na e palabra di Dios ta invitá Su amor purifikadó i ku ta kura paden di nos alma. Laga nos tuma tempu pa ta santu, ku nos por wòrdu yená ku Su sagrada Spiritu santifikando. Ku e Spiritu Santu komo nos guia, nos lo wòrdu prepará pa risibí e Salbador den e beyesa di santidat.24
Santidat Ta Bira un Santu dor di e Ekspiashon di JesuCristu
Segun e palabra inspirá di Rei Benjamín, esnan ku a bira santu dor di e Ekspiashon di JesuCristu ta esnan ku ta sumiso, mansu, humilde, ku pasenshi, yen di amor, manera e Salbadó ta.25 E la profetisá ku JesuCristu, “Señor Omnipotente ku ta Reina, kua tabata, i ta di tur eternidat na tur eternidat, lo baha for di shelu entre e yunan di hende, i lo biba den un Tabernakulo di klei.” E la bini pa bendishoná e enfermo, e koho, e surdu, i e siegu i pa lanta morto. I tòg E la sufri “asta mas ku hende por sufri, eksepto te na morto.”26 I aunke E ta e úniko dor di kua salbashon ta bini, Nan a hasí bofon do dje, gòlpiá, i krusifik’É. Pero e Yu di Dios a lanta for di e tumba pa asina nos tur por vense morto. E ta e úniko ku lo para husga e mundu den rektitut. E ta e úniko ku lo redimí nos tur. E ta Esun Santu di Israel. JesuCristu ta e beyesa di santidat.
Ora Rei Benjamín su pueblo a skucha su palabra, nan a kai na tera, asina grandi tabata nan humildat i reverensia pa e grasia i e gloria di nos Dios. Nan a rekonosé nan estado karnal. Nos ta konsiente di nos dependensia riba e grasia i miserikòrdia di Cristo, nos Señor? Nos ta rekonosé ku kada bon don, temporal òf spiritual, ta bini na nos dor di Cristo? Nos ta kòrda ku segun e plan eterno di e Tata, pas den e bida aki i e gloria di eternidat ta di nos solamente den i dor di Su santu Yu?
Laga nos uni ku e pueblo di Rei Benjamín ora nan a yora ku un stèm, “O tin miserikòrdia, i apliká e sanger ekspiatorio di Cristo pa nos risibí pordon di nos pikánan, i nos kurasonnan por wòrdu purifiká; pasobra nos ta kere den JesuCristu, e Yu di Dios, ken a krea shelu i tera, i tur kos.”27
Mi ta testifiká ku ora nos ta bini na Esun Santu di Israel, Su Spiritu lo bini riba nos ku nos lo wòrdu yená ku goso i risibí un remishon di piká i pas di konsiensia.
Tata Selestial a duna kada un di nos e kapasidat pa bira santu. Laga nos hasi nos mihó pa warda nos kombenionan i akseptá e Spiritu Santu komo nos guia. Ku fe den JesuCristu, nos ta trata di bira santu dor di Su Ekspiashon, ku asina nos lo risibí inmortalidat i bida eterno i duna Dios nos Tata e gloria debí na Su nòmber. Laga nos bida semper ta un sagrada regalo, ku nos por para dilanti Señor den e beyesa di santidat. Den e nòmber sagrada di JesuCristu, amèn.