Fundeshinan di Fe

Esaki tabata un konferensia general magnífiko. Nos a wòrdu edifiká berdaderamente. Si tin un ophetivo pre eminente di e konferensia general, ta pa konstruí fe den Dios e Tata i nos Salbador, Señor Jesucristo.

Mi remarkenan ta atendé e fundeshi di nos fe.

Fundeshinan personal, manera hopi ku ta bale la pena sigui, usualmente ta wòrdu krea poko poko – un la, un eksperensia, un desafio, un desapunto, i un éksito kada bia. Un eksperensia físiko masha presioso ta e promé paso di un beibi. E ta magnífiko pa mira. E bista presioso riba nan kara – un kombinashon di determinashon, goso, sorpresa, i logro – berdaderamente ta un evento bunita.

Den nos famia; tin un evento di un naturalesa similar ku ta resaltá. Ora nos yu hòmber mas yòn tabatin kuater aña, e la bin den kas i anunsiá hopi kontentu na e famia ku hopi orguyo: “Mi por hasi tur kos. Mi por mara i mi por kore, i mi por sera mi zip.” Nos a komprondé ku e tabata bisa nos ku e por mara su feternan di sapatu, e por kore su baiskel ku tayer grandi, i e por sera e zip di su yas. Nos tur a hari pero realisá ku pa e tabata logronan monumental. E la kere ku e la logra berdaderamente i ku e tabata un hende grandi.

Desaroyonan físiko, mental, i spiritual tin hopi en komun. Desaroyo físiko ta basta fásil pa mira. Nos ta kuminsá ku pasonan di beibi i progresá kada dia, kada aña, kresiendo i desaroyando pa risibí nos estatura físiko. Desaroyo ta diferente pa kada persona.

Ora nos wak un gran atleta òf un aktuashon musikal, hopi bia nos ta bisa ku e persona ei ta hopi talentoso, kual mayoria di bia ta bèrdat. Pero e aktuashon ei ta basa riba añanan di preparashon i práktika. On eskritor masha konosé, Malcolm Gladwell, a yama esaki e regla di dies mil ora. Investigadónan a determiná ku e kantidat di práktika aki ta nesesario den atletismo, aktuashonnan musikal, grado akadémiko, habilidat di trabou spesialisá, ekspertisio médiko òf legal, etc. Un di e ekspertonan di investigashon a asertá “ku dies mil ora di práktika ta rekerí pa logra e nivel di dominio asosiá ku ta un eksperto di klase haltu – den kualke kos.”¹

Mayoria di hende ta rekonosé ku pa logra un aktuashon físiko òf mental haltu, e tipo di preparashon òf práktika ei ta esensial.

Afortunadamente, den un mundu sekular kresiente, ménos énfasis ta wòrdu pone den e kantidat di kresementu spiritual nesesario pa bira manera Kristu i establesé e fundeshinan ku ta guia pa yega na fe duradero. Nos tin e tendensia di pone énfasis riba momentunan di entendimentu spiritual sublime. Tin momentunan presioso ora ku nos sa ku e Espíritu Santu ta testifiká ideanan spiritual spesial na nos kurason i mente. Nos ta regosihá den e eventonan aki; nan no mester wòrdu disminuí niun momento so. Pero pa fe duradero i pa tin e kompaño konstante di e Espíritu, no tin supstituto pa e opservá e religioso individual ku ta komparabel ku e desaroyo físiko i mental. Nos mester konstruí riba e eksperensianan aki, kual tin biaha ta representá e pasonan inisial di un beibi. Nos ta hasi esaki dor di kompromiso konsagrá na e reunionnan sakramental sagrado, studio di eskritura, orashon, i sirbi ora nos wòrdu yama. Den un obituario kresiente pa un tata di 13 yu, a wòrdu reportá ku su “loyalidat na orashon diario i estudio di eskritura a influensia profundamente su yunan, dunando nan un fundeshi inmovibel di fe den Señor Jesucristo.”²

Un eksperensia ku mi ta tin tempu mi ta tin 15 aña tabata fundamental p’ami. Mi mama fiel a trata balentemente na yuda mi establesé e fundeshinan di fe den mi bida. Mi a partisipá na reunion sakramental, Primaria, despues Hombres Jovenes i seminario. Mi a lesa e Buki di Mormon i semper hasi orashon individualmente. E tempu ei un evento dramátiko a sosodé den nos famia ora mi ruman mayó stima tabata konsiderando un yamada misional. Mi tata maravioso, un miembro di Iglesia ménos aktivo, tabata ke pa e kontinuá su edukashon i no sirbi un mishon. Esaki a pura un punto di kontenshon.

Den un kombersashon remarkabel ku mi ruman, ku tabata sinku aña mas grandi i tabata guiando e kombersashon, nos a konkluí ku su desishon si akaso e ta bai sirbi un mishon ta dependé di tres asuntu: (1)  Jesucristo tabata divino? (2) E Buki di Mormon tabata bèrdat? (3)   Jose Smith tabata e profeta di e Restourashon?

Miéntras mi tabata hasi orashon e anochi ei, e Espíritu a konfirmá na mi e bèrdat di tur e tres preguntanan ei. Tambe ami a bin komprondé ku kasi tur desishon ku lo mi tuma pa restu di mi bida ta basa riba e kontesta riba e tres preguntanan ei. Partikularmente mi a realisá ku fe den Señor Jesucristo ta esensial. Mirando atras, mi ta rekonosé ku, primordialmente dor di mi mama, e fundeshi tabata na su lugá pa mi por a risibí e konfirmashon spiritual e anochi ei. Mi ruman, ku ya tabata tin un testimonio, a tuma e desishon di sirbi un mishon i finalmente a gana e apoyo di nos tata.

Ta risibí guia spiritual ora esaki ta mester, den Señor su tempu i di akuerdo ku Su boluntat.³ E Buki di Mormon: Un Otro Testimonio di Jesucristo ta un ehèmpel ekselente. Resientemente mi a wak un promé edishon di e Buki di Mormon. Jose Smith a terminá e tradukshon tempu e ta tin 23 aña. Nos sa algu di e proseso i instrumènt ku e la usa den e tradukshon aki. Den e promé edishon di 1830, Jose Smith a inkluí un prekario kòrtiku i simpel i klaramente deklará ku e tabata tradusí “pa medio di e don i poder di Dios.”⁴ Ki ta para di di e yudansanan pa tradukshon – e Urim i Thummin, e piedranan vidente? Dikon nan tabata esensial, òf nan tabata manera e tayernan di entrenamentu di un baiskel te ora Jose por a ehersé su fe nesesario pa risibí mas revelashon direkto?⁵

Djis un ripitishon e esfuerso konsistente ta rekerí pa gana kapasidat físiko i mental, esei ta bèrdat tambe pa asuntunan spiritual. Kòrda ku e Profeta Jose a risibí e mesun bishitante, Moroni, ku e mesun mensahe kuater biaha den preparashon pa risibí e planchanan. Mi ta kere ku partisipashon semanal na e reunionnan sakramental sagrado tin implikashonnan spiritual ku nos no ta komprondé kompletamente. Skudriñá e eskrituranan regularmente – en bes di lesa nan tin biaha – por supstituí e entendimentu superfisial pa unu sublime, un engrandesimentu enorme di nos fe ku ta kambia nos bida.

Fe ta un poder prinsipal. Laga mi ilustrá. Komo un misionero hòmber, un gran presidente di mishon⁶ a introdusí mi na un manera profundo e akontesimentu den eskritura ku por wòrdu haña den Lukas 8 di e hende muhé ku ta tin e asuntu di sanger for di su 12 aña i a gasta tur loke e ta tin den dòkter ku nos por a san’e. E la keda te ku awendia un di mi eskrituranan faborito.

Lo bo kòrda ku e ta tin fe ku si e mishi ku e rant di e Salbador su paña, e lo wòrdu sana. Ora e la hasi esei, e la wòrdu sana mesora. E Salbador, ku tabata kanando ku Su disípulonan, a bisa, “Ken a mishi ku mi?”

Pedro su kontesta tabata ku ta tur di nan, kanando huntu, a mishi na djE.

“I Jesus a bisa, Un hende a mishi ku mi: paso mi a sinti virtut sali for di mi.”

E fuente di virtut por wòrdu interpretá fásilmente komo “poder.” Na Spañó i Portugues, e ta tradusí komo “poder.” Pero apesar di tur kos, e Salbador no a mir’e; E no a enfoká riba su nesesidat. Pero su fe tabata di tal modo ku solamente mishi ku e rant di su paña a rekurí na e podernan di sanashon di e Yu di Dios.

Manera e Salbador a bis’e, “Yu, ta di bon konsuelo, bo fe a salba bo, bai den pas.”⁷

Mi a kontemplá e akontesimentu ei hinter mi bida komo adulto. Mi a realisá ku nos orashonnan personal i súplikanan na un Tata amoroso den Shelu den nòmber di Jesucristo por trese bendishonnan den nos bida mas aya di nos abilidat pa komprondé. E fundeshi di fe, e tipo di fe ku e muhé aki a demonstrá, mester ta e gran deseo di nos kurasonnan.

Sin embargo, fundeshinan di fe inisial, hasta ku konfirmashon spiritual, no ta nifiká ku nos no ta haña desafio. Konvershon na e evangelio no ta nifiká ku tur nos problemanan ta wòrdu resolvé.

Den e komienso di e historia di Iglesia tin revelashonnan registrá den e Doktrina i Konvenio ku ta kontené ehèmpelnan ekselente di establesé fundeshi di fe i atendé ku e kambionan I desafionan ku kada persona ta kontra.

Pa kompletá e Tèmpel di Kirtland tabata fundamental pa hinter e Iglesia. E tabata kompaña pa bendishonnan spiritual, revelashonnan di doktrina, i restourashon di yabinan esensial pa kontinuá e establesimentu di e Iglesia. Manera hopi Apòstel di antaño riba e dia di Pentekòste, hopi miembro a eksperensia eksperensianan spiritual maravioso en konekshon ku e dedikashon di e Tèmpel di Kirtland.⁸ Pero, manera den nos propio bidanan, esaki no a nifiká ku nan no a kontra desafionan i difikultatnan bayendo dilanti. E miembronan di e tempu ei no tabata tin ni idea ku nan lo kontra ku un krísis finansiero na Merka – e pániko di 1837 – ku lo prueba hasta nan propio alma.⁹

Un di e ehèmpelnan di desafio relatá na e krísis finansiero aki a wòrdu eksperensia dor di Elder Parley P. Pratt, un di e gran lidernan di e Restourashon. E tabata un di e miembronan di e Quorum di Diesdos Apòstel original. Den e komienso di 1837, su kerido kasa, Thankful, a muri despues di a duna lus na nan promé yu. Parley i Thankful tabata kasa pa kasi 10 aña, i su morto tabata devastador p’e.

Algun luna despues, Elder Pratt a haña su mes den un di e tempunan mas difísil ku e Iglesia a eksperensia. Mei mei di un krísis nashonal, asuntunan di ekonomia lokal – inkluyendo spekulashon di propiedat i e konfliktonan den un institushon finansiero lanta dor di Jose Smith i otro miembronan di Iglesia – a krea diskordia i kontenshon den Kirtland. Lidernan di Iglesia no semper a tuma desishonnan temporal sabio den nan propio bida. Parley a sufri pèrdidanan finansiero kuantioso i pa un tempu a alehá for di Profeta Jose.¹⁰ E la skibi un kritiká fuerte na Jose i a papia den oposishon for di e pulpito. Na e mesun momentu, Parley a bisa ku e lo sigui kere den e Buki di Mormon i e Doktrina i Konvenio.¹¹

Elder Pratt a pèrdè su kasa, su tereno, i su kas. Parley, sin bisa Jose, a bai pa Missouri. Riba e kaminda einan, inesperá e la topa ku su koleganan Apòstel Thomas B. March i David Patten regresando Kirtland. Nan a sinti e gran nesesidat pa restourá harmonia den e Quorum i a persuadí Parley pa regresá ku nan. E la realisá ku niun hende no a pèrdè mas ku Jose Smith i su famia.

Parley a buska e Profeta, e la yora, i konfesá ku loke e la hasi tabata malu. Den e lunanan despues ku su kasa, Thankful, a muri, Parley tabata “bou di un nubia skur” i a wòrdu superá dor di temor i frustrashon.¹² Jose, sabiendo kiko ta lucha kontra oposishon i tentashon, a “sinseramente pordoná” Parley, hasiendo orashon p’e i bendishon’é.¹³ Parley i e otronan ku a keda fiel a benefisiá di e desafionan di Kirtland. Nan a krese den sabiduria i a bira mas noble i virtuoso. E eksperensia la bira parti di nan fundeshi di fe.

Atversidat no mester wòrdu mira ni komo un falta di fabor di Señor or ku e la kita su bendishonnan for di nos. Oposishon den tur kos ta para di e kandela ku ta refiná pa prepará nos pa nos destino selestial eterno. ¹⁴ Ora e Profeta Jose Smith tabata den e Prisòn di Liberty, e palabranan di Señor na dje a deskribí tur tipo di desafio – inkluyendo tribulashonnan, akusashonnan falsu – i ta konkluí:

“Si e mesun boka di fièrnu habri hanchu bo tras, sa, mi yu, ku tur e kosnan aki ta sirbi bo komo eksperensia, i lo ta pa bo mes bon.

“E Yu di Hòmber a desendé bou di tur di nan. Abo ta mas grandi ku n’e?”¹⁵

Señor, den su instrukshon na Jose Smith, tambe a pone bon kla ku dianan ta konta i lo no ta ménos. Señor a konkluí, “No teme loke hende por hasi, paso Dios lo ta ku bo pa semper.”¹⁶

Kiko ta e bendishonnan di fe? Kiko fe por logra? E lista ta kasi infinito:

Nos pikanan por wòrdu pordoná pa motibu di fe den Kristu.¹⁷

Na tur esnan ku tin fe tin komunion ku e Espíritu Santu.¹⁸

Salbashon ta bin pa medio di fe den e nòmber di Kristu.¹⁹

Nos ta risibí fortalesa di akuerdo ku nos fe den Kristu.²⁰

Ningun no ta drenta den e deskanso di Señor ku no a laba su garment den e sanger di Kristu pa medio di su fe.²¹

Orashonnan ta wòrdu kontesta pa medio di fe.²²

Sin fe bou di hende, Dios no por hasi milager bou di nan.²³

Na final, nos fe den Jesucristo ta e fundeshi esensial pa nos salbashon eterno i eksaltashon. Manera Helaman a siña su yunan, “Kòrda ku ta riba e baranka di nos Redentor, ken ta Kristu, e Yu di Dios, ku bo mester konstruí bo fundeshi  …  , ku ta un fundeshi sigur, un fundeshi riba kua si hende konstruí nan lo no por kai.”²⁴

Mi ta agradesido pa e fortifikashon di e fundeshi di fe ku ta bin for di e konferensia aki. Mi ruego ta pa nos hasi e sakrifisionan i tin e humildat nesesario pa fortalesé e fundeshi di nos fe den Señor Jesucristo. Di dje mi ta duna testimonio sigur, den nòmber di Jesucristo, amèn.