Laka Atu Ki Muʻa
ʻOku kei ngaʻunu atu pē ki muʻa ʻa e ngāue ʻa e ʻEikí.
Siʻoku kāinga ʻofeina, ʻoku fakafiefia ke tau toe fakataha mai ke kamata ʻa e Konifelenisi Lahi Fakavaeuataʻu hono 190 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ou fiefia ke kau fakataha atu mo kimoutolu ʻi homou ngaahi ʻapí pe ko e fē pē ʻa e feituʻu ʻoku mou ʻi aí, ke fanongo fakataha ki he ngaahi pōpoaki ʻa e kau palōfitá, kau tangata kikite mo e kau tangata maʻu fakahā pea mo e kau taki kehe ʻo e Siasí.
ʻOku tau houngaʻia ʻi he ngaahi tekinolosia ʻoku tau malava ai ke fehokotaki ko ha kau ākonga kuo fakatahataha fakamāmani lahi ʻo Sīsū Kalaisi ʻi he funga māmaní. Naʻe mamataʻi ʻa e konifelenisi lahi ʻo ʻEpeleli kuo ʻosí, ʻe ha kakai tokolahi ange ʻi ha toe taimi kimuʻa, pea ʻoku mau ʻamanaki ʻe toe hoko pē ia.
Lolotonga ʻa e ngaahi māhina siʻi kuo ʻosí, kuo hanga ʻe ha mahaki fakaʻauha fakamāmani lahi, vela lahi ʻa e ngaahi feituʻu ʻe niʻihi, mo ha ngaahi fakatamaki fakanatula kehe ʻo liliu lahi ʻa hotau māmaní. ʻOku ou kaungā mamahi fakataha mo kimoutolu kuo mole hamou ʻofaʻanga lolotonga ʻa e taimi ko ʻení. Pea ʻoku ou lotua kotoa ʻakinautolu ʻoku nau lolotonga faingataʻaʻiá.
Ka, ʻoku kei ngaʻunu atu pē ki muʻa ʻa e ngāue ʻa e ʻEikí. Lolotonga ko ia ʻa e vāmamaʻo fakasōsialé, ʻai ʻo e meʻa maluʻi ki he fofongá, pea mo e ngaahi fakataha ʻi he ʻInitanetí, kuo tau ako ai ke fakahoko ha ngaahi meʻa ʻo kehe pea toe lelei ange ʻa e niʻihi. ʻE lava ke ʻomi ʻe he ngaahi taimi makehe ko ʻení ha ngaahi tāpuaki makehe.
Kuo mohu founga ʻa ʻetau kau faifekaú mo e kau taki fakamisioná, fakaakeake ngofua, pea fakaofo moʻoni. Neongo naʻe pau ke fekumi ʻa e kau faifekaú ki ha ngaahi founga foʻou pea mohu founga ke fakahoko ʻaki ʻenau ngāué, ka kuo lipooti mai ʻe he ngaahi misiona lahi ʻoku nau fakahoko lahi ange ʻa e akoʻí ʻi ha toe taimi kimuʻa ange.
Naʻe pau ke mau tāpuni fakataimi ha ngaahi temipale, pea fakatoloi taimi nounou ha ngaahi ngāue langa, ka ko ʻeni ʻoku nau ngaʻunu kotoa pē ki muʻa. ʻI he taʻu 2020, ʻe fakahoko ha tanupou ʻo ha ngaahi temipale foʻou ʻe 20!
Kuo tupulekina lahi ʻa e ngāue hisitōlia fakafāmilí. Kuo fokotuʻu ha ngaahi uooti mo ha ngaahi siteiki foʻou. Pea ʻoku mau fiefia ke lipooti atu kuo ʻoatu ʻe he Siasí ha tokoni ʻofa fakaetangata ki he mahaki fakaʻauhá ki ha ngaahi ngāue ʻe 895 ʻi ha ngaahi fonua ʻe 150.
ʻOku lahi ange ʻa hono ako ʻo e ongoongoleleí ʻi ha ngaahi ʻapi lahi ʻo toe mālohi ange ai ʻa e ngaahi fakamoʻoní pea mo e ngaahi vā fetuʻutaki fakafāmilí. Naʻe tohi mai ha faʻē: “ʻOkú ma ongoʻi ofi ange ki heʻema fānaú pea mo e makapuná ʻi heʻemau fakataha ʻi he Sāpate kotoa ʻi he ʻInitanetí. ʻOku nau takitaha fakahoko mai ʻenau fakakaukau ki he Haʻu, ʻo Muimui ʻIate Aú. Kuo liliu ʻa ʻemau founga lotua homau fāmilí koeʻuhí ʻoku mahino lelei ange kiate kimautolu ʻa e meʻa ʻoku nau fie maʻú.”
ʻOku ou lotua ke tau fakaʻaongaʻi ʻi heʻetau hoko ko ha kakaí ʻa e faingamālie makehé ni ke tau tupulaki fakalaumālie. ʻOku tau ʻi he māmaní ke siviʻi kitautolu, ke vakai pe te tau fili ke muimui kia Sīsū Kalaisi, ke fakatomala maʻu pē, ke ako pea fakalakalaka. ʻOku fakaʻamu hotau laumālié ke fakalakalaka. Pea ʻoku tau fakahoko lelei taha ia ʻi heʻetau nofo maʻu ʻi he hala ʻo e fuakavá.
Lolotonga ʻa e ngaahi meʻá ni kotoa, ʻoku ʻofa mai ʻa ʻetau Tamai Hēvaní mo Hono ʻAlo ko Sīsū Kalaisí kiate kitautolu! ʻOkú Na tokanga mai kiate kitautolu! ʻOkú Na tokangaʻi mo ʻEna kau ʻāngelo māʻoniʻoní ʻa kitautolu. 1 ʻOku ou ʻiloʻi ʻoku moʻoni ia.
ʻI heʻetau fakataha ke fanongo ki he ngaahi lea kuo ueʻi ʻe he ʻEikí ʻa ʻEne kau tamaioʻeikí ke fakahoko maí, ʻoku ou fakaafeʻi kimoutolu ke fakalaulauloto ki ha talaʻofa kuo fakahoko mai ʻe he ʻEikí. Naʻá Ne folofola ko ia ,“ia ʻe loto ki aí te ne puke ʻa e folofola ʻa e ʻOtuá, ʻa ia ʻoku moʻui mo mālohí, ʻa ia ʻe taʻofi ʻa e kākā olopoto kotoá mo e ngaahi tauhelé mo e fakakaukau kākā … ʻa e tēvoló, ʻo tataki atu ʻa e [ākonga] ʻa Kalaisí ʻi he hala ʻoku fāsiʻi mo lausiʻí.” 2
ʻOku ou lotua te mou fili ke puke ʻa e folofola ʻa e ʻOtuá ʻo hangē ko ia kuo malangaʻi lolotonga ʻa e konifelenisi lahi ko ʻení. ʻOku ou lotua, ke ke lava ʻo ongoʻi ʻa e ʻofa haohaoa ʻa e ʻEikí kiate koé, 3 ʻi he huafa ʻo Sīsū Kalaisí, ʻēmeni.