Tuku ke Lāngilangiʻia ʻa e ʻOtuá

Siʻoku kāinga ʻofeina, ʻoku ou houngaʻia ʻi he ngaahi pōpoaki fakaʻofoʻofa ʻo e konifelenisí ni pea mo e faingamālie ke lea kiate kimoutolú.

Kuo laka hake ʻi he taʻu ʻe 36 ʻa ʻeku hoko ko ha ʻAposetoló, pea kuo puke ʻe he tokāteline ʻo e tānaki ʻo ʻIsilelí ʻa ʻeku tokangá.¹ Ko e meʻa kotoa pē fekauʻaki mo iá, ʻoku ou mālieʻia ai, kau ai ʻa e ngaahi ngāue fakalotú mo e hingoa² ʻo ʻĒpalahame, ʻAisake, mo Sēkopé; ʻa ʻenau moʻuí mo honau ngaahi uaifí; ʻa e fuakava naʻe fai ʻe he ʻOtuá mo kinautolú pea tukuʻau mai ʻi honau hakó;³ ʻa e fakamoveteveteʻi ʻo e faʻahinga ʻe hongofulu mā uá; pea mo e ngaahi kikite lahi fekauʻaki mo e tānakí ʻi hotau kuongá.

Kuó u ako ʻa e tānakí, lotua ia, keinanga ʻi he potufolofola kotoa fekauʻaki mo iá, mo kole ki he ʻEikí ke Ne fakalahi ʻa e mahino ʻoku ou maʻú.

Fakakaukau loto ki heʻeku fiefia kimuí ni ʻi hono tataki au ki ha ʻilo foʻou. Naʻá ku ʻilo ʻi ha tokoni ʻa ha ongo tangata Hepelū poto, ko e taha ʻo e ngaahi ʻuhinga faka-Hepelū ki he foʻi lea ʻIsilelí ko e “tuku ke lāngilangiʻia ʻa e ʻOtuá.”⁴ ʻI heʻene peheé, ʻoku ʻuhinga leva ʻa e hingoa ʻIsilelí ko ha taha ʻoku loto-fiemālie ke tuku ke lāngilangiʻia ʻa e ʻOtuá ʻi heʻene moʻuí. ʻOku ueʻi ʻe he foʻi fakakaukau ko iá hoku laumālié!

ʻOku mahuʻinga fau ʻa e foʻi lea loto-fiemālié ki he fakaʻuhingaʻi ko ʻeni ʻo e ʻIsilelí.⁵ ʻOku tau takitaha maʻu ʻetau tauʻatāina ke filí. Te tau lava ke fili pe te tau kau ki ʻIsileli pe ʻikai. Te tau lava ʻo fili ke tuku ke lāngilangiʻia ʻa e ʻOtuá ʻi heʻetau moʻuí pe ʻikai. Te tau lava ʻo fili ke tuku ke hoko ʻa e ʻOtuá ko e ivi tākiekina mālohi taha ʻi heʻetau moʻuí pe ʻikai.

Ka tau fakamanamanatu, ʻi ha kiʻi momeniti, ha liliu mahuʻinga ʻi he moʻui ʻa Sēkopé, ko e mokopuna ʻo ʻĒpalahamé. ʻI he potu ko ia naʻe fakahingoa ʻe Sēkope ko Penielí (ʻa ia ko hono ʻuhingá “ko e fofonga ʻo e ʻOtuá”),⁶ naʻe fefaʻuhi ai ʻa Sēkope mo ha pole faingataʻa. Naʻe siviʻi ai ʻene tauʻatāina ke filí. ʻI he fefaʻuhi ko ʻení, naʻe fakamoʻoniʻi ai ʻe Sēkope ʻa e meʻa naʻe mahuʻinga taha kiate iá. Naʻá ne fakamoʻoniʻi naʻá ne loto-fiemālie ke tuku ke lāngilangiʻia ʻa e ʻOtuá ʻi heʻene moʻuí. Ko hono fetongí, naʻe liliu ʻe he ʻOtuá ʻa e hingoa ʻo Sēkopé ko ʻIsileli,⁷ ko hono ʻuhingá, ko e “tuku ke lāngilangiʻia ʻa e ʻOtuá.” Naʻe talaʻofa leva ʻa e ʻOtuá kia ʻIsileli ko e kotoa ʻo e ngaahi tāpuaki naʻe foaki ki he ʻulu ʻo ʻĒpalahamé te ne maʻu mo ia foki.⁸

Ko e meʻa fakamamahí, he naʻe maumauʻi ʻe he hako ʻo ʻIsilelí ʻenau fuakava mo e ʻOtuá. Naʻa nau tolomakaʻi ʻa e kau palōfitá pea ʻikai loto-fiemālie ke tuku ke lāngilangiʻia ʻa e ʻOtuá ʻi heʻenau moʻuí. Naʻe fāifai pea fakamoveteveteʻi kinautolu ʻe he ʻOtuá ki he tuliki ʻe fā ʻo e māmaní.⁹ Naʻe talaʻofa kimui ai, ʻi Heʻene ʻaloʻofá, ke tānaki kinautolu, hangē ko hono fakamatalaʻi ʻe ʻĪsaiá: “ʻI he kihiʻi fuoloa siʻi kuó u liʻaki koe [ʻe ʻIsileli]; ka ʻi he ngaahi ʻaloʻofa lahi te u tānaki koe.”¹⁰

ʻI heʻetau manatu ki he ʻuhinga faka-Hepelū ʻo e ʻIsilelí, ʻoku tau ʻiloʻi ai ʻoku ʻi ai ha ʻuhinga kehe ʻo hono tānaki ʻo ʻIsilelí. ʻOku tānaki ʻe he ʻEikí ʻa kinautolu ʻoku loto-fiemālie ke tuku ke lāngilangiʻia ʻa e ʻOtuá ʻi heʻenau moʻuí. ʻOku tānaki ʻe he ʻEikí ʻa kinautolu te nau fili ke tuku ke hoko ʻa e ʻOtuá ko e ivi tākiekina mahuʻinga taha ʻi heʻenau moʻuí.

Kuo lauisenituli hono kikiteʻi ʻe he kau palōfitá ʻa e tānaki ko ʻení,¹¹ pea ʻoku lolotonga hoko ia ʻi he taimí ni! Ko ha talateu mahuʻinga ki he Hāʻele ʻAnga Ua Mai ʻa e ʻEikí, he ko e ngāue mahuʻinga taha ia ʻi he māmaní!

Ko e tānaki kimuʻa ko ʻeni ʻi he nofotuʻí ko ha talanoa fakafoʻituitui ia ki he fakalahi ʻo e tuí mo e loto-toʻa fakalaumālié ki ha kakai ʻe lauimiliona. Pea ʻi heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pe ko “ʻIsileli fuakava ʻo e ngaahi ʻaho kimui ní,”¹² kuo fakatukupaaʻi ai kitautolu ke tau tokoni ki he ʻEikí ʻi he ngāue mahuʻinga ko ʻení.¹³

Ko e taimi ʻoku tau lea ai kau ki he tānaki ʻo ʻIsileli ʻi he ongo tafaʻaki fakatouʻosi ʻo e veilí, ko ʻetau ʻuhingá ki he ngāue fakafaifekaú, ngāue fakatemipalé, mo e hisitōlia fakafāmilí. ʻOku tau toe ʻuhinga foki ai ki he langaki ʻo e tuí mo e fakamoʻoní ʻi he loto ʻo kinautolu ʻoku tau nofo, ngāue, pea mo tokoniʻí. Ko ha taimi pē ʻoku tau fai ai ha faʻahinga meʻa ʻoku tokoni ki ha taha—ʻi ha tafaʻaki pē ʻo e veilí—ke ne fakahoko mo tauhi ʻene ngaahi fuakava mo e ʻOtuá, ʻoku tau tokoni ai ke tānaki ʻa ʻIsileli.

Naʻe ʻikai fuʻu fuoloa, ha fekuki fakalaumālie ha uaifi ʻo ha taha heʻema makapuna tangatá. Te u ui pē ia ko “Sila.” Neongo ʻa e ʻaukaí, lotú, mo e faingāué, ka naʻe tei mate siʻi tangataʻeiki ʻa Silá. Naʻe haʻi ia ʻe he manavasiʻí ʻe fakatou mole meiate ia ʻene tangataʻeikí mo ʻene fakamoʻoní.

Ne fakamatala mai kiate au ʻe hoku uaifi ko Sisitā Nalesoní, ʻi ha pō ʻe taha, ʻa e tūkunga ʻo Silá. Naʻe ongoʻi ʻe Uenitī ʻi he pongipongi hono hokó ke ne fakahā kia Sila ʻa ʻeku tali ki heʻene fefaʻuhi fakalaumālié, ʻa ia ko ha foʻi lea pē ʻe taha! Ko e foʻi leá ko e sio-nounou.

Naʻe toki fakahā ʻe Sila kimui ange kia Uenitī ʻa e mole ʻo ʻene ʻamanakí ʻi heʻeku talí. Naʻá ne pehē, “Naʻá ku ʻamanaki au ʻe talaʻofa mai ʻe he Kui Tangatá ha mana ki heʻeku tangataʻeikí. Naʻá ku kei fifili pē pe ko e hā naʻá ne ongoʻi ai ko e foʻi lea sio-nounoú ke ne lea ʻakí.”

Hili e mālōlō siʻi tangataʻeiki ʻa Silá, naʻe kei haʻu pē foʻi lea sio-nounoú ki heʻene fakakaukaú. Naʻá ne fakaava hono lotó ke mahino lelei ange ko e myopic ʻoku ʻuhinga ia ko e “sio-nounou.” Pea kamata leva ke liliu ʻene fakakaukaú. Naʻe toki pehē leva ʻe Sila, “Naʻe fakatupu ʻe he sio-nounoú ke u kiʻi tuʻu, kiʻi fakakaukau, pea fakaakeake. ʻOku fakafonu au he taimí ni ʻe he foʻi leá ʻaki ha nonga. ʻOkú ne fakamanatu mai ke fakalahi ʻeku fakakaukaú ʻo kumi ki he taʻengatá. ʻOkú ne fakamanatu mai ʻoku ʻi ai ha palani fakalangi pea ʻoku kei moʻui mo ʻofa, pea mo tokanga mai kiate au ʻeku tangataʻeikí. Kuo taki au ʻe he Sio-Nounoú ki he ʻOtuá.”

ʻOku ou mātuʻaki laukau ʻaki homa mokopuna fefine ʻi he fonó. Lolotonga e taimi fakamamahi ko ʻeni ʻi heʻene moʻuí, ne ako ʻa Sila ke ne tali ʻa e finangalo ʻo e ʻOtuá maʻa ʻene tangataʻeikí, ʻaki ha fakakaukau fakalangi ki siʻene moʻuí. ʻI heʻene fili ke tuku ke lāngilangiʻia ʻa e ʻOtuá, ʻokú ne maʻu ai ʻa e nongá.

Kapau te tau tuku ke hoko, ʻoku lahi ʻa e ngaahi founga ʻe lava ai ʻa e ʻuhinga faka-Hepelū ko ʻeni ʻo e ʻIsilelí ʻo tokoniʻi kitautolú. Fakakaukau ki he founga ʻe lava ai heʻetau ngaahi lotua ʻetau kau faifekaú—mo ʻetau feinga ke tānaki ʻa ʻIsilelí—ʻo liliu ʻi he foʻi fakakaukaú ni, ʻi hotau ʻatamaí. ʻOku tau faʻa lotua ke taki kitautolu mo e kau faifekaú kiate kinautolu kuo mateuteu ke tali ʻa e ngaahi moʻoni ʻo e ongoongolelei ʻo Sīsū Kalaisi kuo fakafoki maí. ʻOku ou fifili ai, pe ko hai ʻe taki kitautolu ki ai ʻi he taimi ʻoku tau kole ai ke ʻilo kinautolu ʻoku loto-fiemālie ke tuku ke lāngilangiʻia ʻa e ʻOtuá ʻi heʻenau moʻuí?

ʻE lava ke taki kitautolu ki ha niʻihi kuo teʻeki ke nau teitei tui ki he ʻOtuá pe ko Sīsū Kalaisi ka ʻoku nau fakaʻamu he taimí ni ke ʻilo kiate Kinaua mo ʻEna palani ʻo e fiefiá. Mahalo ko ha niʻihi naʻe “fanauʻi ʻi he fuakavᔹ⁴ kae talu mei ai mo ʻenau hē atu mei he hala ʻo e fuakavá. Mahalo pē kuo nau mateuteu he taimí ni ke fakatomala, foki mai, mo tuku ke lāngilangiʻia ʻa e ʻOtuá. Te tau lava ʻo tokoniʻi kinautolu ʻaki haʻatau talitali lelei kinautolu mo ha loto hangamālie. Pea ko ha niʻihi ʻe lava ke taki kitautolu ki ai, ne nau ongoʻi maʻu pē ʻoku ʻi ai ha meʻa ʻoku mole ʻi heʻenau moʻuí. ʻOku nau fakaʻamu foki mo kinautolu ki he kakato mo e nēkeneka ko ē ʻoku maʻu ʻe kinautolu ʻoku loto-fiemālie ke tuku ke lāngilangiʻia ʻa e ʻOtuá ʻi heʻenau moʻuí.

Ko e kupenga ʻo e ongoongoleleí ke tānaki ʻa ʻIsilelí ʻoku lahi fau. ʻOku ʻi ai ha potu moʻó e taha kotoa te ne tali kakato ʻa e ongoongolelei ʻo Sīsū Kalaisí. ʻOku hoko ʻa e tokotaha ului kotoa ko ha taha ʻo e fānau fuakava ʻa e ʻOtuá,¹⁵ tatau ai pē pe naʻe fanauʻi ai pe ohi. ʻOku hoko ʻa e tokotaha kotoa ko e ʻea-hoko kakato ki he meʻa kotoa kuo talaʻofa ʻe he ʻOtuá ki he fānau faivelenga ʻo ʻIsilelí!¹⁶

ʻOku tau takitaha moʻona ha tuʻunga malava fakalangi he ko e fānau takitaha kitautolu ʻa e ʻOtuá. ʻOku tau tuʻunga tatau kotoa ʻi Hono ʻaó. ʻOku mahuʻinga ʻa e ngaahi fakamatala ʻo e moʻoni ko ʻení. ʻE kāinga, kātaki ʻo fakafanongo lelei ki he meʻa ʻoku ʻai ke u lea ʻakí. ʻOku ʻikai ʻofa ʻa e ʻOtuá ʻi ha matakali ʻe taha ʻo laka ange ʻi ha matakali ʻe taha. ʻOku mahino ʻEne tokāteliné ʻi he meʻa ko ʻení. ʻOkú Ne fakaafeʻi ʻa e taha kotoa ke haʻu kiate Ia, “ʻa e ʻuliʻuli pe hinehina, pe ko ha pōpula pe tauʻatāina, pe ko ha tangata pe fefine.”¹⁷

ʻOku ou fakapapauʻi atu ʻoku ʻikai ke makatuʻunga hoʻo tuʻu ʻi he ʻao ʻo e ʻOtuá ʻi he lanu ho kilí. ʻOku makatuʻunga ʻa e hōifua mo e ʻikai ke hōifua mai ʻa e ʻOtuá mei hoʻo tauhi mateaki ki he ʻOtuá mo ʻEne ngaahi fekaú kae ʻikai ko e lanu ho kilí.

ʻOku ou loto-mamahi ʻi he foua ʻe hotau kāinga lanu ʻUliʻulí ʻi he funga ʻo e māmaní ʻa e mamahi ʻo e laulanú mo e loto-fakamāú. ʻI he ʻahó ni ʻoku ou kole ki hotau kāingalotu ʻi he feituʻu kotoa pē ke nau taaimuʻa ʻi hono siʻaki ʻa e ngaahi ʻulungaanga mo e tōʻonga ʻo e faifakamāú. ʻOku ou kole atu ke tau poupouʻi ʻa e fakaʻapaʻapá ki he kotoa ʻo e fānau ʻa e ʻOtuá.

Ko e fehuʻi kiate kitautolú kotoa, ʻe tatau ai pē pe ko e hā ʻa e matakalí, ʻoku tau kei tatau pē. ʻOkú ke loto-fiemālie ke tuku ke lāngilangiʻia ʻa e ʻOtuá ʻi hoʻo moʻuí? ʻOkú ke loto-fiemālie ke tuku ke hoko ʻa e ʻOtuá ko e ivi tākiekina mahuʻinga taha ʻi hoʻo moʻuí? Te ke tuku nai ʻEne folofolá, ʻEne ngaahi fekaú, mo ʻEne ngaahi fuakavá ke ne tākiekina e meʻa ʻokú ke fai ʻi he ʻaho kotoa pē? Te ke tuku nai Hono leʻó ke muʻomuʻa taha ʻi ha toe meʻa? ʻOkú ke loto-fiemālie nai ke fakamuʻomuʻa ha meʻa pē ʻokú Ne finangalo ke ke fai, ʻi ha toe meʻa kehe ʻokú ke fakaʻamua? ʻOkú ke loto-fiemālie nai ke fakamoʻulaloaʻi ho lotó ki Hono finangaló?¹⁸

Fakakaukau ki hano tāpuekina koe ʻe he faʻahinga loto-fiemālie peheé. Kapau ʻoku teʻeki ke ke mali pea ʻokú ke kumi haʻo hoa taʻengata, ʻe tokoni hoʻo fakaʻamu ke kau “ʻi ʻIsilelí” ke ke fakapapauʻi pe ko hai te ke teiti mo iá mo e foungá.

Kapau kuó ke ʻosi mali ki ha hoa kuó ne maumauʻi ʻene ngaahi fuakavá, ʻe hanga ʻe hoʻo loto-fiemālie ke tuku ke lāngilangiʻia ʻa e ʻOtuá ʻi hoʻo moʻuí ʻo ʻai hoʻo ngaahi fuakava mo e ʻOtuá ke kei tuʻu maʻu. ʻE faitoʻo ʻe he Fakamoʻuí ho loto-mamahí. ʻE fakaava ʻa e ngaahi langí kapau te ke feinga ke ʻilo e founga ke laka ai kimuʻá. ʻOku ʻikai fie maʻu ia ke ke hē fano pe fifili.

Kapau ʻoku ʻi ai haʻo ngaahi fehuʻi moʻoni fekauʻaki mo e ongoongoleleí pe Siasí, ko hoʻo fili ko ia ke tuku ke lāngilangiʻia ʻa e ʻOtuá, ʻe taki ai koe ke ke ʻilo mo mahino ʻa e ngaahi moʻoni kakato, mo taʻengata te ne tataki hoʻo moʻuí mo tokoni ke ke tuʻu maʻu ʻi he hala ʻo e fuakavá.

Ko e taimi te ke fehangahangai ai mo e fakatauelé—tatau ai pē kapau ʻe hoko mai ʻi he taimi ʻokú ke ongosia mo ongoʻi liʻekina aí pe ʻave-halaʻí—fakakaukau ki he loto-toʻa te ke lava ʻo maʻú kapau te ke fili ke tuku ke lāngilangiʻia ʻa e ʻOtuá ʻi hoʻo moʻuí pea mo e taimi te ke kole ai kiate Ia ke ne fakamālohia koé.

Ko e taimi ʻe hoko ai hoʻo fakaʻamu lahi tahá ke tuku ke lāngilangiʻia ʻa e ʻOtuá, ke hoko ko ha konga ʻo ʻIsilelí, ʻe faingofua ange ha konga lahi ʻo hoʻo ngaahi filíi. Ko ha ngaahi palopalema lahi ʻe ʻikai toe hoko ia ko ha palopalema! Ko koe ʻokú ke ʻiloʻi lelei taha ʻa e founga ke ke teuteu aí. ʻOkú ke ʻilo ʻa e meʻa ke ke mamata mo laukonga aí, feituʻu ke fakaʻaongaʻi ai ho taimí, pea mo e kakai ke ke feohi mo iá. ʻOkú ke ʻilo ʻa e meʻa ʻokú ke fie fakahokó. ʻOkú ke ʻilo ʻa e faʻahinga tokotaha ʻokú ke fie hokosi moʻoní.

Ka, ʻe hoku kāinga ʻofeina, ʻoku fakatou fie maʻu ʻa e tuí mo e loto-toʻá ke tuku ke lāngilangiʻia ʻa e ʻOtuá. ʻOku fie maʻu ʻa e vilitakí, ʻa e ngāue fakalaumālie mālohi ke fakatomalá pea mo siʻaki ʻa e tangata fakakakanó ʻo fakafou ʻi he Fakalelei ʻa Sīsū Kalaisí.¹⁹ ʻOku fie maʻu ke feinga fakaʻaho maʻu pē ke fakatupulaki ʻa e natula fakafoʻituitui ʻo e ako ʻa e ongoongoleleí, ke ako lahi ange ki he Tamai Hēvaní mo Sīsū Kalaisi, pea fekumi mo fakahoko ʻa e fakahā fakafoʻituituí.

ʻI he lolotonga ʻo e taimi faingataʻa ko ʻení naʻe kikiteʻi ʻe he ʻAposetolo ko Paulá,²⁰ ʻoku ʻikai teitei toe feinga ʻa Sētane ia ke fakapuliki ʻene fakafepakiʻi ʻa e palani ʻa e ʻOtuá. ʻOku hulufau ʻa e mataʻāʻā ʻa e koví. ʻI heʻene peheé, ko e founga pē taha ke hao fakalaumālie aí, ko e fakapapauʻi ke tuku ke lāngilangiʻia ʻa e ʻOtuá ʻi hoʻo moʻuí, ako ke ke fanongo ki Hono leʻó, pea ngāue ʻaki hotau iví ke tokoni ʻi hono tānaki ʻo ʻIsilelí.

Ko e hā leva ʻa e finangalo ʻo e ʻEikí ki he kakai te nau tuku ke lāngilangiʻia ʻa e ʻOtuá? ʻOku fakamatalaʻi lelei ia ʻe Nīfai: “ʻOku ʻofa [ʻa e ʻEikí] ʻiate kinautolu ʻoku nau fie tali ia ke hoko ko honau ʻOtuá. Vakai, naʻá ne ʻofa ʻi heʻetau ngaahi tamaí, ʻo ne fuakava mo kinautolu, ʻio, ʻa ʻĒpalahame, ʻAisake mo Sēkope; pea [ʻokú] ne manatuʻi ʻa e ngaahi fuakava kuó ne faí.”²¹

Pea ko e hā nai ʻoku finangalo ʻa e ʻEikí ke fai maʻa ʻIsilelí? Kuo ʻosi fakapapau ʻa e ʻEikí te Ne “fai [ʻetau] ngaahi taú, pea mo e ngaahi tau ʻa [ʻetau] fānaú mo e [ngaahi tau ʻa e] fānau ʻa [ʻetau] fānaú, … ʻo aʻu ki he toʻu tangata hono tolú mo hono faá”!²²

ʻI hoʻo ako ko ia e folofolá ʻi he lolotonga ʻo e māhina ʻe ono ka hokó, ʻoku ou tapou atu ke ke ʻai ha lisi ʻo e meʻa kotoa kuo ʻosi talaʻofa ʻe he ʻEikí te Ne fakahoko maʻa ʻIsileli ʻo e fuakavá. ʻOku ou tui te ke ʻohovale! Fakalaulauloto ki he ngaahi talaʻofá ni. Talanoa ki ai mo ho fāmilí mo ho ngaahi kaungāmeʻá. Peá ke moʻui mo fakatokangaʻi hono fakahoko ʻo e ngaahi talaʻofá ni ʻi hoʻo moʻuí.

Siʻi kāinga ʻofeina, ʻi hoʻo fili ko ia ke tuku ke lāngilangiʻia ʻa e ʻOtuá ʻi hoʻo moʻuí, te ke aʻusia ʻiate koe pē ko hotau ʻOtuá ko “ha ʻOtua ʻo e ngaahi mana.”²³ Ko kitautolu kakaí, ko ʻEne fānau fuakava, pea ʻe ui ʻaki kitautolu Hono huafá. ʻOku ou fakamoʻoniʻi ʻeni, ʻi he huafa toputapu ʻo Sīsū Kalaisí, ʻēmeni.