Qhov Tseeb, cov Lus Qhuab Qhia, thiab Kev Tshwm Sim Dawb Huv
Thov kom nej siv sij hawm mloog ntsoov tus Tswv tej lus uas los ntawm Nws cov tub qhe nyob hauv lub rooj sab laj no.
Kuv cov kwv tij thiab cov muam, zoo siab tos txais nej rau lub tuam rooj sab laj! Kuv zoo siab heev nrog nej nyob! Rau lub hlis tas los no kuv tau xav txog nej tsis tu tsis tseg. Kuv tau thov Vajtswv txog nej thiab thov kom pab nej. Ob peb lim tiam no kuv tau thov kom lub rooj sab laj no yuav pab cov neeg uas xav txais cov koob hmoov yuav muaj sij hawm xav thiab txais kev tshwm sim.
Peb zoo siab uas peb rov qab hais lus rau nej los ntawm lub Tsev Rau Rooj Sab Laj. Tshuav cov rooj zaum ntau uas tsis muaj neeg zaum, tiam sis qhov uas muaj ib txhia mej zeej ntawm lub Tsev Kheej Pawg Hu Nkauj yeej yog ib qho zoo. Peb tos txais nej sawv daws rau lub rooj sab laj no, txawm nej nyob qhov twg los xij.
Peb tseem raug tus kab mob COVID-19 thiab txhua hom kab mob uas tau hloov. Peb ua nej tsaug vim nej ua raws li cov kws kho mob thiab lub tseem fwv cov thawj coj hauv nej zej zog tej lus ntuas.
Peb koom ua ke txhua zaus muaj lub tuam rooj sab laj raws li tus Tswv tau qhia.1 Peb tau hloov kev teeb txheeb thaum sij hawm dhau mus. Thaum kuv hluas heev, lub rooj sab laj no ntev li peb los sis plaub hnub. Tom qab ntawd, lub rooj sab laj no ntev li ob hnub xwb. Txhua zaj lus—tsis hais thaum ntawd thiab tam sim no los—yeej yog los ntawm kev thov Vajtswv thiab kev npaj ntawm sab ntsuj plig.
Cov Tuam Thawj Coj thiab cov Tuam Thawj Coj Pab ntawm lub Koom Txoos uas hais lus yuav hais txog peb tus Cawm Seej, Yexus Khetos, Nws txoj kev hlub tshua, thiab Nws lub hwj chim uas txhiv peb dim mus ib txhis li. Yeej tsis tau muaj ib lub sij hawm hauv lub ntiaj teb no thaum txhua leej txhua tus yuav tsum paub txog peb tus Cawm Seej. Cia li xav seb tej kev ua tsov ua rog nyob thoob plawb lub ntiaj teb—thiab kev sib cav sib ceg hauv peb lub neej—yuav ploj mus yog tias peb txhua tus yuav xaiv coj raws li Yexus Khetos thiab ua raws li Nws tej lus qhia.
Hais li ntawd, kuv caw nej mloog zoo seb thaum twg hais peb yam hauv lub rooj sab laj:qhov tseeb, cov lus qhuab qhia, thiab kev tshwm sim dawb huv. Ib txhia xav tias qhov no tsis yog, tiam sis yeej muaj qhov yog thiab qhov tsis yog. Yeej muaj qhov tseeb tiag tiag—qhov tseeb uas nyob mus ib txhis. Ib qho uas muaj thoob plaws hauv peb lub caij nyoog yog qhov uas tsawg tus neeg paub nrhiav qhov tseeb nyob qhov twg.2 Muaj tseeb tiag tej lus uas nej yuav mloog hnub no thiab tag kis yog qhov tseeb dawb huv.
Khetos cov lus qhuab qhia dawb huv muaj hwj chim heev. Cov lus no hloov txhua tus lub neej uas to taub thiab nrhiav kev kom ua raws li cov lus no. Khetos cov lus qhuab qhia pab peb ua raws li peb tej kev khi lus. Qhov uas yus taug raws nraim li txoj kev ti thiab nqaim yeej yuav ua rau peb tsim nyog txais tag nrho tej yam uas Vajtswv muaj.3 Tsis muaj dab tsi uas muaj nqis tshaj tag nrho tej uas Leej Txiv muaj!
Qhov kawg, kev tshwm sim txog tej lus nug hauv nej lub siab yuav ua rau nej nco ntsoov thiab txais lub nqi zog los ntawm lub rooj sab laj no. Yog tias nej tsis tau thov kom tus Vaj Ntsuj Plig Dawb Huv txhawb pab nej mloog tej lus uas tus Tswv xav kom nej mloog hauv ob hnub no, kuv caw nej ua tam sim no. Thov kom nej siv sij hawm mloog ntsoov tus Tswv tej lus uas los ntawm Nws cov tub qhe nyob hauv lub rooj sab laj no. Cia li kawm tias nej yuav ua li cas kom ua tej ntawd.
Nov yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb yog Nws cov neeg khi lus. Tus Tswv tau hais tias Nws yuav khiav Nws txoj hauj lwm raws li Nws lub caij,4 thiab Nws ua txoj hauj lwm no nrawm zuj zus. Peb yeej tau koob hmoov vim peb koom ua Nws txoj hauj lwm dawb huv.
Kuv foom koob hmoov rau tag nrho cov uas nrhiav txoj kev kaj, kev txawj ntse, thiab qhov tseeb. Kuv hais txog kuv txoj kev hlub rau nej, los ntawm Yexus Khetos lub npe dawb ceev, amees.