Tiv Tau Nag Xob Nag Cua ntawm Sab Ntsuj Plig Thaum Peb Ntseeg Khetos
Peb tiv tau peb tej nag xob nag cua ntawm sab ntsuj plig zoo tshaj plaws thaum peb ntseeg Khetos thiab coj raws li cov lus txib.
Rau xyoo tas los no, kuv tus hlub, Ann, thiab kuv wb nyob hauv Texas nyob ze Gulf Coast, es nyob ntawd twb muaj tej nag xob nag cua loj tshaj plaws uas raug lub Teb Chaws Amelikas, ua rau ntau yam puas tsuaj thiab ua rau ib txhia neeg tuag thiab. Tu siab heev, ob peb hlis tas los twb raug tej xwm txheej puas tsuaj ib yam li no thiab. Wb hlub cov uas tau raug tej xwm txheej li no thiab thov Vajtswv pab lawv. Nyob rau xyoo 2017, wb twb raug Nag Xob Nag Cua Harvey, uas los nag tob npaum li 60 inch (150 cm).
Tej kev cai ntawm lub ntiaj teb no yeej kav txoj kev tsim nag xob nag cua. Dej hiav txwv yuav tsum sov npaum li 80 degree Fahrenheit (27 degree C), mus txog 165 fiv (50 m) hauv qab nplaim dej hiav txwv. Thaum cov cua xyaw nrog cov dej hiav txwv sov, ua rau cov dej yaj mus thiab nce saum ntuj, es nyob ntawd, rov qab hloov ua dej. Ua rau cov huab loj tuaj, ces cov cua hlob heev thiaj li muaj khaub lig cua nyob saum nplaim dej hiav txwv.
Tej nag xob nag cua loj loj heev, cuag li 50,000 fiv (15,240 m) tawm nyob saum ntuj thiab ntev tshaj 125 mais (200 km). Qhov tseem ceeb, thaum nag xob nag cua tuaj txog thaj av, cov cua pib tsis muaj zog ntxiv vim tias tsis nyob saum cov dej sov uas yuav tsum muaj kom muaj zog ntxiv.1
Thov kom nej yeej yuav tsis txhob raug nag xob nag cua loj li no. Tiam sis, peb txhua tus twb tiv tau, thiab yeej yuav tiv tau, tej nag xob nag cua ntawm sab ntsuj plig uas yuav ua rau peb txoj kev kaj siab lug ploj mus thiab sim peb txoj kev ntseeg. Nyob hauv lub ntiaj teb no, zoo li haj yam muaj tej ntawd uas loj zog. Ua Vajtswv tsaug uas tus Tswv tau muab ib txoj kev rau peb muaj kev xyiv fab thaum peb kov yeej tej ntawd. Thaum peb ua raws li Yexus Khetos txoj moo zoo, ces peb paub tias “Thaum huab dub ntawm kev ntxhov siab los txog peb thiab yuav rhuav peb txoj kev thaj yeeb, muaj txoj kev cia siab los ua tshav ntuj nrig.”2
Thawj Tswj Hwm Russell M. Nelson piav hais tias:
“Cov neeg ntseeg zoo siab txawm lawv raug dab tsi los xij. Peb muaj tau kev xyiv fab txawm peb raug tsis zoo tas ib hnub, ib lub lim tiam, los yog ib xyoo!
“… Peb txoj kev xyiv fab yeej tsis nyob ntawm seb peb raug dab tsi hauv peb lub neej tiam sis kev xyiv fab nyob ntawm seb peb tsom ntsoov rau dab tsi hauv peb lub neej.
“Thaum peb tsom ntsoov rau Yexus Khetos thiab Nws txoj moo zoo, peb yuav muaj kev xyiv fab txawm peb raug dab tsi los xij nyob hauv peb lub neej.”3
Ib yam li tej kev cai ntawm lub ntiaj teb tswj kav tej nag xob nag cua, Vajtswv tej kev cai tswj kav peb txoj kev muaj kev xyiv fab thaum peb raug nag xob nag cua ntawm sab ntsuj plig. Kev xyiv fab los sis kev nyuaj siab uas peb hnov thaum peb tiv tau tej nag xob nag cua ntawm lub neej no yeej nyob ntawm qhov uas peb ua raws li Vajtswv tej kev cai los sis tsis ua. Thawj Tswj Hwm Nelson tau hais tias, “Tej kev cai no hu ua cov lus txib, tiam sis tej kev cai no yeej muaj tseeb ib yam li kev cai lift, txoj kev cai gravity, [thiab] txoj kev cai uas tswj kav yus lub plawv txoj kev dhia.”
Thawj Tswj Hwm Nelson hais ntxiv tias, “Yeej yog ib qho yooj yim to taub: Yog nej xav muaj kev zoo siab, cia li coj raws li cov lus txib.”4
Kev ua xyem xyav yog tus yeeb ncuab ntawm kev ntseeg thiab kev xyiv fab. Ib yam li cov dej hiav txwv sov yeej yog lub hauv paus ntawm kev tsim nag xob nag cua, kev ua xyem xyav yog lub hauv paus ntawm tej nag xob nag cua ntawm sab ntsuj plig. Ib yam li kev ntseeg yog ib yam uas peb xaiv tau, kev ua xyem xyav kuj yog ib yam peb xaiv tau thiab. Thaum peb xaiv ua xyem xyav, peb xaiv cia lwm yam raug peb, muab lub hwj chim ywj rau tus yeeb ncuab, ua rau peb thiaj li qaug zog thiab tsis khov.5
Dab Ntxwg Nyoog xav coj peb mus rau lub hauv paus uas tsim kev ua xyem xyav. Nws xav kom peb ua siab tawv peb thiaj li yuav tsis ntseeg.6 Lub hauv paus uas tsim kev ua xyem xyav los ntshe yuav ntxias peb vim tias nyob ntawd zoo li muaj cov dej sov uas kaj siab heev es peb tsis tas ua raws li “txhua lo lus uas tawm ntawm Vajtswv lub qhov ncauj los.”7 Nyob hauv cov dej no Dab Ntxwg Nyoog ntxias peb kom peb thiaj li tsis saib xyuas peb sab ntsuj plig. Qhov uas peb tsis saib xyuas zoo yuav ua rau peb tsis xav rau siab, peb thiaj li “tsis kub thiab tsis txias.”8 Yog peb tsis cog peb tus kheej rau ntawm Khetos, kev ua xyem xyav thiab kev ntxias yuav coj peb mus kom peb tsis quav ntsej dab tsi thiaj tsis muaj tej txuj ci tseem ceeb, tsis muaj kev zoo siab uas kav ib txhis, thiab tsis muaj kev so.9
Ib yam li tej nag xob nag cua tsis muaj zog saum thaj av, kev ua xyem xyav pauv los ua kev ntseeg thaum peb ua peb lub hauv paus cog rau saum Khetos. Ua rau peb thiaj li pom tau tej nag xob nag cua ntawm sab ntsuj plig raws li qhov yog, thiab peb haj yam muaj peev xwm kov yeej. Ces “thaum tus dab phem yuav xa nws tej cua muaj zog, muaj tseeb tiag, nws tej xub nyob hauv tej khaub zig cua, … tej ntawd yuav tsis muaj hwj chim kov yeej [peb] kom cab tau [peb] mus rau hauv tus kwj tob tob ntawm kev nyuaj siab thiab kev txom nyem uas tsis muaj qhov kawg, vim yog lub pob zeb uas neb tau cog rau saud, uas yog lub hauv paus ruaj nrees.”10
Thawj Tswj Hwm Nelson tau qhia hais tias:
“Kev ntseeg Yexus Khetos yeej yog qhov uas ua rau peb txais tau Vajtswv lub hwj chim. …
Tus Tswv tsis xav tias peb yuav muaj kev ntseeg zoo tag nrho ua ntej peb txais tau Nws lub hwj chim uas zoo tag nrho. Tiam sis Nws hais kom peb ntseeg ua ntej.”11
Txij thaum lub tuam rooj sab laj tas los, kuv tsev neeg thiab kuv tau nrhiav kev txhawb peb txoj kev ntseeg Yexus Khetos thiab Nws txoj Kev Theej Txhoj kom pab peb “muab [peb] tej teeb meem hloov los ua tej cib fim uas loj tshaj qhov [peb] to taub.”12
Wb tus xeeb ntxwv, Ruby, twb tau koob hmoov vim nws txoj kev xav hauv siab yeej muaj zog. Thaum nws yug los, nws hlab pas tsis tau txuas rau nws lub plab. Txawm yog nws yog ib tug me nyuam mos liab, Ruby, nrog nws niam nws txiv txoj kev pab, tau nyiaj dhau kev sim siab no. Tam sim no Ruby muaj tsib xyoos lawm. Txawm nws tseem hluas heev los, nws coj ib tug yam ntxwv zoo heev vim nws tsis pub tej yam uas nws raug kov yeej nws txoj kev zoo siab. Nws yeej zoo siab txhua lub sij hawm.
Lub Tsib Hlis Ntuj dhau los, Ruby muaj ib yam ntxiv hauv nws lub neej uas sim nws txoj kev ntseeg. Thaum nws yug los nws kuj muaj ib txhais tes uas tsis zoo thiaj li yuav phais nws txhais tes kom kho zoo. Ua ntej yuav phais nws txhais tes, wb mus xyuas nws thiab muab ib daim duab rau nws txog ib tug me nyuam uas tuav rawv tus Cawm Seej tes. Thaum wb nug nws seb nws puas txhawj xeeb, nws teb hais tias, “Tsis yog, kuv zoo siab kawg!”
Ces wb nug nws tias, “Ruby, vim li cas?”
Ruby mob siab teb hais tias, “Vim kuv paub tias Yexus yuav tuav kuv tes.”
Ruby txoj kev rov qab nyob zoo yeej yog ib qho txuj ci tseem ceeb, thiab nws tseem zoo siab kawg. Ib tug me nyuam txoj kev ntseeg dawb huv yeej txawv ntawm kev ua xyem xyav uas ntxias tau peb thaum peb loj hlob tuaj!13 Tiam sis peb txhua tus muaj peev xwm hloov los ua zoo li me nyuam yaus thiab tso peb txoj kev tsis ntseeg tseg. Yog ib txoj kev xaiv yooj yim heev.
Ib leej txiv tau rau siab thov tus Cawm Seej, hais tias, “Yog koj pab tau dab tsi, thov … pab peb.”14
Ces Yexus hais rau nws hais tias:
“Yog leej twg ntseeg, kuv yeej ua tau txhua yam huv tib si.
“Tam sim ntawd tus me tub leej txiv hais tias, Kuv ntseeg tiam sis tsis txaus, thov koj pab kom kuv muaj kev ntseeg ntxiv.”15
Leej txiv uas txo hwj chim no tau xaiv kom cia siab rau nws txoj kev ntseeg Khetos thiab tsis txhob cia siab rau kev ua xyem xyav. Thawj Tswj Hwm Nelson hais tias, “Tsuas yog nej txoj kev tsis ntseeg yuav ua rau nej txais tsis taus Vajtswv tej txuj ci tseem ceeb kom muab cov roob txav mus nyob hauv nej lub neej.”16
Peb tus Vajtswv yeej muaj siab hlub tshua peb heev nws thiaj li hais kom peb ntseeg xwb thiab tsis xav tias peb yuav tsum paub!
Amas qhia tias:
“Tus uas ntseeg Vajtswv txoj lus tau koob hmoov.”17
“[Vim] Vajtswv muaj kev hlub tshua rau txhua tus uas ntseeg nws lub npe; yog li ntawd, ua ntej tshaj plaws, nws xav kom nej cia li ntseeg, muaj tseeb tiag, ntseeg nws txoj lus.”18
Ua ntej tshaj plaws, Vajtswv xav kom peb ntseeg Nws.
Peb tiv tau peb tej nag xob nag cua ntawm sab ntsuj plig zoo tshaj plaws thaum peb ntseeg Khetos thiab coj raws li cov lus txib. Peb txoj kev ntseeg thiab kev mloog lus ua rau peb txais tau lub hwj chim loj tshaj peb lub hwj chim kom kov yeej “dab tsi los xij nyob hauv peb lub neej.”19 Vajtswv yeej “yuav foom koob hmoov kiag [rau peb]” thaum peb ntseeg thiab mloog lus.20 Muaj tseeb tiag, thaum sij hawm dhau mus peb hloov los ua neeg zoo siab, “peb thiaj muaj sia los ntawm Khetos” thaum peb muab siab rau ntseeg Nws thiab coj raws li Nws cov lus txib.21
Cov kwv tij thiab cov muam, hnub no thov kom peb yuav “tsis txhob ua xyem xyav, tiam sis cia li ntseeg tiag.”22 “Txoj kev yog yeej yog ntseeg Khetos.”23 Yexus Khetos tau “muab [peb] txaus rau saum [Nws] tej xib teg.”24 Nws yog peb tus Cawm Seej thiab tus Txhiv Dim uas sawv sab qhov rooj nraud thiab khob.25 Los ntawm Yexus Khetos lub npe, amees.