Tus Cawm Seej txoj Kev Khuv Leej uas Nyob Tas Mus Ib Txhis

Ib lub ntsiab cai tseem ceeb tshaj uas tus Cawm Seej tau qhia thaum Nws nyob hauv lub ntiaj teb no yog qhov uas yuav tsum muaj kev khuv leej rau lwm tus. Cia peb xav txog lub ntsiab cai no thiab qhov uas peb yuav tsum ua li cas thaum peb xav txog zaj uas hais txog Yexus txoj kev mus xyuas Ximoos tus Falixais tsev.

Phau Lukas qhia tias muaj ib tug poj niam uas yog neeg txhaum, es nws nkag hauv Ximoos tsev thaum Yexus nyob ntawd. Nws txo hwj chim heev, es tus poj niam mus rau Yexus, los kua muag ntxuav Nws ko taw, muab nws cov plaub hau los so, ces nwj thiab hliv roj tsw qab ywg Yexus ko taw.¹ Tus Falixais, uas xav tias nws yog ib tug neeg zoo dua li tus poj niam, muaj siab hlob xav hais tias, “Yog tus no yog ib tug [yaj saub] tiag, nws yeej yuav paub hais tias tus poj niam uas kov nws ntawd, yog ib tug neeg txhaum.”²

Qhov uas tus Falixais xav tias nws yog ib tug neeg dawb huv tshaj ua rau nws txiav txim tsis ncaj rau Yexus thiab tus poj niam huv tib si. Tiam sis vim Nws paub txhua yam, tus Cawm Seej paub Ximoos xav li cas, thiab Yexus muaj tswv yim hais lus txog Ximoos txoj kev saib tsis taus tus poj niam, thiab qhuab ntuas Ximoos vim nws tsis txais tus neeg qhua tshwj xeeb zoo li tus Cawm Seej nyob hauv nws lub tsev. Muaj tseeb tiag, qhov uas Yexus tau cem tus Falixais tau ua tim khawv tias Yexus txawj pom yav tom ntej thiab tus poj niam no, uas muaj lub siab mos siab muag, yeej tau hloov siab lees txim thiab Yexus tau zam txim rau nws.³

Zoo li lwm lub sij hawm hauv Yexus txoj kev qhuab qhia hauv lub ntiaj teb no, zaj no qhia tias tus Cawm Seej muaj kev khuv leej rau tag nrho cov uas yuav los cuag Nws—Nws tsis xaiv leej twg ntsej muag hlo li—thiab qhov tseem ceeb rau cov uas xav tau Nws txoj kev pab ntau tshaj plaws. Txoj kev tu siab thiab txoj kev hlub uas tus poj niam qhia rau Yexus yeej ua pov thawj txog nws txoj kev hloov siab lees txim tiag tiag thiab txog qhov uas nws xav txais kev zam txim rau nws tej kev txhaum. Tiam sis, Ximoos txoj kev xav tias nws zoo dua, nrog rau nws lub siab tawv,⁴ ua rau nws tsis txawj xav txog tus neeg uas hloov siab lees txim, thiab nws kuj hais txog tus Cawm Seej ntawm lub ntiaj teb no zoo li nws ntxub thiab saib tsis taus tus Cawm Seej. Nws tus cwj pwm qhia tias nws lub neej tsuas yog kev lam ua raws li tej kev cai kom txhua tus pom sab nraud hais tias nws xav zoo txog nws tus kheej thiab nws coj kev dawb huv cuav.⁵

Qhov uas Yexus muaj kev khuv leej txhawb pab tus poj niam nyob hauv zaj no qhia ib tug yam ntxwv zoo tag nrho rau peb kom peb paub peb yuav tsum ua li cas rau peb cov neeg zej zog. Cov vaj lug kub muaj ntau zaj txog qhov uas tus Cawm Seej tau ua li cas vim Nws muaj kev khuv leej heev, Nws thiaj li tau sib tham nrog tib neeg thiab pab cov uas raug txom nyem thiab cov uas “ntxhov siab thiab tsis muaj leej twg pab lawv, lawv zoo ib yam li pab yaj uas tsis muaj tus tswv yug.”⁶ Nws muaj kev hlub tshua ncav tes pab cov uas xav kom lwm tus ris lawv tej nra, ntawm sab cev nqaij daim tawv thiab ntawm sab ntsuj plig.⁷

Lub hauv paus ntawm Yexus txoj kev khuv leej yog kev siab hlub,⁸ los yog hais tias, Nws txoj kev hlub dawb huv, uas yog lub ntsiab ntawm Nws txoj kev txi theej txhoj. Kev khuv leej yog ib tug cwj pwm ntawm cov uas xav ua neeg dawb huv thiab tus cwj pwm no yeej koom ua ke nrog lwm tus cwj pwm li ib tug neeg Ntseeg Khetos xws li kev nyuaj siab nrog cov uas nyuaj siab thiab kev muaj hlub tshua thiab kev ua siab dawb siab zoo.⁹ Muaj kev khuv leej rau lwm tus, yeej yog lub ntsiab ntawm Yexus Khetos txoj moo zoo thiab yog kev ua pov thawj txog peb txoj kev nyob ze tus Cawm Seej hauv peb lub siab. Tsis tas li ntawd xwb, kev khuv leej qhia tias Nws muaj hwj huam npaum li cas hauv peb lub neej thiab peb sab ntsuj plig muaj zog npaum li cas.

Yeej muaj nqi rau peb thaum peb pom tias Yexus txoj kev khuv leej tsis yog tej yam nws ua tej lub sij hawm kom ua tiav xwb tiam sis yeej yog tej kev qhia tias Nws hlub Vajtswv tiag tiag thiab hlub Nws cov me nyuam thiab Nws xav pab lawv heev.

Yexus yeej paub tej yam twg tib neeg xav tau txawm Nws tsis nyob ze los yog. Piv txwv hais tias, tom qab uas nws kho ib tug thawj tub rog tus tub qhe zoo lawm,¹⁰ Yexus tau tawm hauv lub nroog Kapane-us mus rau lub nroog Na-is. Nyob no Yexus tau ua ib qho txuj ci tseem ceeb loj tshaj plaws hauv lub ntiaj teb no thaum Nws txib kom ib tug tub hluas uas tuag lawm, tib tug tub ntawm ib tug poj ntsuam, sawv thiab muaj txoj sia nyob. Yexus twb paub tias tus niam tsev no raug txom nyem heev tiam sis Nws kuj paub txog tus poj niam tej xwm txheej nyuaj heev, thiab Nws muaj kev khuv leej txog tus poj niam ntawd.¹¹

Ib yam li tus poj niam uas ua txhaum thiab tus poj ntsuam hauv Na-is, cov neeg coob uas peb paub xav tau kev nplij siab, kev tsom ntsoov, kev koom ua ke, thiab tej kev pab uas peb muab tau. Peb txhua tus ua tau tej cuab yeej hauv tus Tswv txhais tes thiab ua siab dawb rau cov uas xav tau, ib yam li Yexus tau ua.

Kuv paub ib tug ntxhais hluas uas khis di ncauj thaum nws yug los. Ob hnub tom qab nws yug los xwb cov kws kho mob tau phais nws lub qhov ncauj kom pib kho. Vim tus ntxhais no muaj kev khuv leej rau cov uas muaj teeb meem zoo ib yam li nws, tus ntxhais hluas thiab nws niam nws txiv xav muab kev txhawb nqa, to taub, thiab kev txhawb lwm tus lub siab ntsws, cov uas raug qhov teeb meem nyuaj no. Lawv sau ntawv tuaj rau kuv thiab hais tias: “Los ntawm wb tus ntxhais qhov teeb meem no, wb tau muaj cib fim ntsib cov neeg zoo kawg uas xav tau kev nplij siab, kev txhawb pab, thiab kev txhawb nqa. Muaj ib lub sij hawm thaum wb tus ntxhais uas muaj 11 xyoos tam sim no, nws tau nrog ib khub niam txiv uas nkawd tus me nyuam mos liab muaj teeb meem zoo li no. Thaum lawv sib tham, wb tus ntxhais tau hle daim npog qhov ncauj qhov ntswg vim muaj phaum mob kom tus niam tsev txiv tsev no yuav pom tias muaj kev cia siab, txawm yog tus me nyuam tshuav ntev ua ntej yuav kho tag nrho kom zoo. Wb zoo siab heev uas wb muaj cib fim nplij cov uas raug txom nyem lub siab, ib yam li tus Cawm Seej ua rau peb. Wb xav tias wb txoj kev mob ploj zuj zus txhua zaus wb pab lwm tus.”

Kuv cov phooj ywg zoo, thaum peb txhob txwm siv zog muaj kev khuv leej hauv peb lub neej, raws li tus Cawm Seej tus yam ntxwv, ces peb yuav txawj paub txog tib neeg tej kev xav tau. Nrog kev txawj paub qhov ntawd, thaum peb ua txhua yam peb yuav xav paub txog lwm tus thiab hlub lawv tiag tiag. Tus Tswv yuav pom peb tej hauj lwm, thiab peb yuav tau koob hmoov muaj cib fim ua tej cuab yeej hauv Nws txhais tes kom ua rau tib neeg lub siab mos muag thiab nplij cov neeg uas lawv “txhais tes tsis muaj zog lawm.”¹²

Yexus txoj kev qhuab ntuas Ximoos tus Falixais tau qhia meej tias peb yuav tsum tsis txhob txiav txim hnyav rau peb cov neeg zej zog, vim peb txhua tus xav kom peb Leej Txiv Saum Ntuj Ceeb Tsheej to taub thiab hlub peb txawm peb ua tej yam tsis zoo los yog. Qhov no puas yog raws li tus Cawm Seej qhia thaum Nws hais tias, “Vim li cas nej ho pom qhov hmoov ntoo uas nyob hauv nej tus kwv tij lub qhov muag, tiam sis ho tsis xav txog yav tog ntoo uas nyob hauv nej tus kheej lub qhov muag?”¹³

Peb yuav tsum xav tias tsis yooj yim to taub txhua qhov xwm txheej uas ua rau tib neeg coj cwj pwm los yog ua tej yam txawv. Tej lub sij hawm peb pom sab nraud xwb thiab feem ntau qhov no tsis yog ib txoj kev zoo kom txiav txim rau tej yam uas ib tug neeg ua. Tsis zoo li nej thiab kuv, Khetos txawj pom txhua yam ntawm ib qhov xwm txheej.¹⁴ Txawm yog Nws paub tag nrho peb tej kev qaug zog los, tus Cawm Seej tsis rau txim hnyav rau peb tiam sis nws tseem muaj kev khuv leej ua hauj lwm pab peb tshem yav tog ntoo uas nyob hauv peb qhov muag. Yexus yeej saib hauv peb lub siab thiab tsis saib lub cev ntaj ntsug.¹⁵ He Himself declared, “Judge not according to the appearance.”¹⁶

Cia li xav txog tus Cawm Seej tej lus tswv yim rau kaum ob tug thwj tim uas yog cov Neeg Nifais txog cov lus nug no:

“Thiab xav kom nej paub tias nej yuav txiav txim rau cov neeg no, raws li txoj kev txiav txim uas kuv muab rau nej, uas yuav ncaj ncees. Yog li ntawd, nej yuav tsum ua neeg zoo li cas? Kuv hais tseeb rau nej tias, zoo tib yam li kuv.”¹⁷

“Yog li ntawd kuv xav kom nej ua neeg zoo tag nrho ib yam li kuv, los sis nej Leej Txiv tus uas nyob saum ntuj ceeb tsheej uas zoo tag nrho.”¹⁸

Qhov no hais tias, tus Tswv yuav txiav txim rau cov uas txiav txim tsis ncaj ncees rau lwm tus. Yog tias peb yuav tsim nyog txiav txim raws li kev ncaj ncees, peb yuav tsum siv zog hloov los ua neeg zoo li tus Cawm Seej thiab muaj kev khuv leej saib tej yam uas lwm tus uas yuam kev, saib lawv zoo li Nws saib lawv. Vim peb tshuav ntev ua ntej peb yog neeg zoo tag nrho, tej zaum yuav zoo dua yog peb zaum ntawm Yexus ko taw thiab thov kom Nws zm txim pub rau peb tej kev txhaum, xws li tus poj niam uas hloov siab lees txim nyob hauv tus Falixais tsev, thiab tsis txhob tsiv sij hawm ntsia ntsoov rau tej yam uas lwm tus ua tsis zoo.

Kuv cov phooj ywg zoo, kuv ua tim khawv tias thaum peb siv zog ua raws li tus Cawm Seej txoj kev khuv leej hauv peb lub neej, peb txoj kev xav qhuas peb cov neeg zej zog yuav loj tuaj thiab peb yuav tsis xav txiav txim rau tej yam lawv ua yuam kev. Peb yuav koom siab koom ntsws nrog Vajtswv ntxiv, thiab peb lub neej yuav zoo dua, peb yuav muaj siab xav zoo ntxiv, thiab peb yuav muaj ib lub hauv paus rau kev zoo siab uas kav ib txhis. Luag yuav hu peb ua cov uas tsim kev thaj yeeb,¹⁹ uas hais lus mos muag xws li cov lwg hauv lub caij nplooj ntoo hlav.

Kuv thov kom peb yuav ua siab ntev thiab to taub peb cov neeg zej zog thiab tus Tswv txoj kev hlub tshua yuav nplij peb lub siab thaum peb siab luv txog tej yam uas lwm tus ua yuam kev. Tus Cawm Seej caw peb ua li no. Kuv ua tim khawv hais tias Nws muaj txoj sia nyob. Nws yog tus yam ntxwv zoo tag nrho txog kev ua thwj tim uas muaj siab hlub tshua thiab ua siab ntev. Kuv ua tim khawv txog tej yam tseeb no los ntawm tus Cawm Seej Yexus Khetos lub npe dawb huv, amees.