Ntsia Mus Lawm Tom Ntej
Yuav tsum tsom ntsoov rau tej yam uas tseem ceeb tshaj plaws—xws li tej yam rau yav “tom ntej,” tej yam uas nyob mus ib txhis—kom thiaj li paub ua neej.
Thaum kuv muaj 15 xyoos, kuv tau txais ib daim tso cai kawm tsav tsheb, cia kuv tsav tsheb thaum kuv niam los sis kuv txiv nrog kuv nyob. Thaum kuv txiv nug seb kuv puas xav mus tsav tsheb, ua rau kuv zoo siab kawg.
Nws tau tsav ob peb mais mus rau ntug zos es nyob ntawd muaj ib txoj kev ncaj qha uas muaj ob sab thiab tsis tshua muaj neeg siv—nyaj yog tib qho chaw nws xav tias yuav nyab xeeb. Nws tau nres ntawm ntug kev, ces wb sib pauv chaw zaum. Nws cob qhia kuv me ntsis ces hais rau kuv tias, “Maj mam tsav mus raws txoj kev thiab tsav txog thaum kuv hais kom koj nres.”
Kuv ua raws nraim li nws hais xwb. Tiam sis tom qab 1 feeb xwb, nws hais tias, “Tub, nres tam sim no. Ua rau kuv xeev siab. Koj tig rau ub rau no.” Nws nug hais tias, “Koj ntsia dab tsi?”
Kuv chim me ntsis teb tias, “Kuv ntsia txoj kev nev.”
Ces nws hais li no tias: “Kuv saib koj qhov muag, zoo li koj pheej ntsia ntawm lub taub hau tsheb xwb. Yog koj pheej saib me me ntawm lub taub hau tsheb xwb, ces koj yeej yuav tsis txawj tsav tsheb mus kom ncaj.” Ces nws hais tias, “Ntsia txoj kev mus tom ntej. Li ntawd yuav pab koj tsav mus kom ncaj qha.”
Thaum kuv muaj 15 xyoos, kuv xav tias yog ib zaj lus qhia zoo. Txij thaum ntawd los kuv tau kawm tias yog ib zaj lus qhia txog lub neej no thiab. Yuav tsum tsom ntsoov rau tej yam uas tseem ceeb tshaj plaws—xws li tej yam rau yav “tom ntej,” tej yam uas nyob mus ib txhis—kom thiaj li paub ua neej.
Muaj ib lub sij hawm thaum tus Cawm Seej xav nyob Nws ib leeg, Nws thiaj li “nce mus thov Vajtswv pem roob.”1 Nws txib Nws cov thwj tim mus hla dej hiav txwv. Thaum hmo ntuj lawm, lub nkoj uas cov thwj tim nyob haud raug cua daj cua dub. Yexus twb mus pab cawm lawv tiam sis Nws ua ib yam uas txawv heev. Cov vaj lug kub hais tias, “Thaum plaub teev yuav kaj ntug, Yexus los ko taw saum nplaim dej los cuag cov thwj tim.”2 Thaum lawv pom nws, lawv ntshai heev, vim lawv xav tias tus uas tuaj yog ib tug ntsuj plig los yog dab. Yexus paub tias lawv ntshai heev thiab xav kom nplij lawv lub sib, Nws thiaj li hais tias, “Nej tsis txhob poob siab! Yog kuv ntag, tsis txhob ntshai.”3
Qhov no tau txhawb Petus lub siab. Petus yeej ib txwm tsis xyuam xim, nws thiaj li hais rau Yexus tias, “Tus Tswv, yog hais tias yog koj tiag, thov koj hais kom kuv mus tau saum nplaim dej tuaj cuag koj.”4 Yexus teb li Nws ib txwm teb hais tias: “Cia li tuaj.”5
Nyaj Petus zoo siab kawg, Nws thiaj li tawm hauv lub nkoj mus ko taw saum nplaim dej. Thaum nws tsom ntsoov rau tus Cawm Seej, nws txawj ua txhua yam, tsis hais mus ko taw saum nplaim dej. Thaum nyuam qhuav pib, Petus tsis quav ntsej txog cua daj cua dub. Tiam sis cua “ntsawj hlob hlob”6 ua rau nws tig mus rau lwm qhov, ces nws txawm tsis tsom ntsoov ntxiv. Nws rov qab ntshai kawg li. Yog li ntawd, nws txoj kev ntseeg ploj mus, thiab nws pib tog zog rau hauv dej. “Nws hu nrov nrov hais tias, tus Tswv, thov pab kuv.”7 Tus Cawm Seej, tus uas uas yeej txaus siab pab, tau cev loo tes mus tuav nkaus nws.
Muaj ntau yam uas peb kawm tau los ntawm zaj lus zoo kawg no, tiam sis kuv xav hais txog peb qho.
Tsom Ntsoov rau Yexus Khetos
Zaj lus kawm thib ib: tsom ntsoov rau Yexus Khetos. Thaum Petus tsom ntsoov rau Yexus, nws txawj mus ko taw saum nplaim dej. Cua daj cua dub thiab cov dej ntas tej niag twv yeej tsis tab kaum tsuas yog nws tsom ntsoov rau tus Cawm Seej.
Qhov uas peb to taub peb lub hom phiaj pab peb txiav txim siab paub tias peb yuav tsum tsom ntsoov rau yam twg. Ib yam li tsis muaj peev xwm ua kev sib tw yog yus tsis paub lub hom phiaj, peb yeej ua tsis taus neej yog tias peb tsis paub lub ntsiab. Ib txoj koob hmoov ntawm Yexus Khetos txoj moo zoo yog qhov uas peb paub teb lo lus nug hais tias “Lub neej no lub hom phiaj yog dab tsi?” “Peb lub hom phiaj hauv lub neej yog muaj kev xyiv fab thiab npaj mus cuag Vajtswv.”8 Qhov uas peb nco qab tias peb nyob hauv lub ntiaj teb kom npaj mus nrog Vajtswv nyob yuav pab peb tsom ntsoov rau tej uas coj peb mus rau Yexus Khetos.
Yuav tsum rau siab ntso kom tsom ntsoov rau Khetos, qhov tseem ceeb yog tej yam me me thiab yooj yim uas yuav pab peb ua cov thwj tim zoo dua. Yeej ua tsis taus cov thwj tim zoo yog tias yus tsis tswj yus tus kheej.
Peb txoj kev tsom ntsoov rau Khetos yuav meej heev thaum peb ntsia mus lawm tom ntej rau txoj kev uas peb xav ua neeg zoo li cas ces siv sij hawm txhua hnub kom ua tej yam uas yuav pab peb ua li ntawd. Qhov uas peb tsom ntsoov rau Khetos yeej yuav pab peb txiav txim siab kom yooj yimthiab pab peb paub siv sij hawm li cas.
Muaj ntau yam uas tsim nyog peb tsom ntsoov rau, tiam sis peb kawm los ntawm Petus yam ntxwv txog qhov uas peb yeej yuav tsum tsom ntsoov rau Khetos txhua lub sij hawm. Yog los ntawm Yexus Khetos xwb peb thiaj li yuav rov qab mus cuag Vajtswv. Peb tso siab rau Khetos txoj kev tshav ntuj thaum peb siv zog hloov los ua neeg zoo li Nws thiab thov kom Nws zam txim thiab pub Nws lub hwj chim txhawb dag zog thaum peb ua yuam kev.
Ceev Faj txog tej uas Ua Kom Yus Tig Mus rau Lwm Qhov
Zaj lus kawm thib ob: ceev faj txog tej uas ua kom yus tig mus rau lwm qhov Thaum Petus tig mus tsis ntsia Yexus thiab siab cov cua thiab cov dej nphau nphwv, ua rau nws pib tog hauv dej mus.
Muaj ntau yam uas “nyob rau ntawm taub hau tsheb” uas ua rau peb tig mus tsis tsom ntsoov rau Khetos thiab tej yam nyob mus ib txhis uas nyob “tom ntej” Tus dab phem yog tus uas txawj ua kom peb tig mus. Peb kawm los ntawm Lihais zaj npau suav tias cov neeg hais lus los ntawm lub tsev loj thiab dav kom ntxias peb thiaj li lug kev kom tsis txhob npaj rov qab mus nrog Vajtswv nyob.9
Tiam sis muaj tej yam uas tsis yooj yim rau peb pom uas ua rau peb tig mus rau lwm txoj kev thiab. Ib yam li neeg hais tias, “Kev phem yuav kov yeej txhua lub sij hawm thaum neeg zoo tsis ua dab tsi li.” Tus yeeb ncuab mob siab ua kom tib neeg zoo tsis ua dab tsi, los yog nkim lawv lub sij hawm ua tej yam uas ua rau lawv tig mus kom txhob ua raws li lawv tej lub hom phiaj zoo. Piv txwv hais tias, tej yam uas uas pab yus noj qab nyob zoo yog tias ua hauj sim ntshe yuav tsis zoo yog tias yus tsis tswj yus tus kheej. Tus yeeb ncuab to taub tias tsis tas muaj tej yam phem kom ua rau yus tig mus rau lwm qhov.
Nws Cawm Tau Peb
Zaj lus kawm thib peb: Nws cawm tau peb. Thaum Petus pib tog hauv dej mus, nws hu nrov nrov hais tias, “Tus Tswv, thov koj pab kuv. Tam sim ntawd Yexus txawm cev loo nws tes mus tuav nkaus Petus.”10 Thaum peb tog hauv dej mus, thaum peb raug kev tsim txom, los sis thaum peb ua yuam kev, ces Nws cawm tau peb.
Thaum nej raug kev txom nyem los sis kev sim siab, tej zaum nej yuav cia siab zoo li kuv hais tias yuav cawm tau nej tam sim ntawd. Tiam sis nco ntsoov tias tus Cawm Seej tau los pab cov Thwj Tim thaum txog plaub teev yuav kaj ntug—tom qab lawv twb siv sij hawm ntau nyob hauv cua daj cua dub.11 Tej zaum peb yuav thov tias yog tsis txais kev pab tam sim ntawd, tej zaum yuav txais kev pab thaum ob teev los sis peb teev hmo ntuj. Thaum peb yuav tsum tos, peb paub tias tus Cawm Seej yeej saib xyuas, ua kom peb tsis tas nyiaj kom dhau tej uas peb ris taus.12 Hais rau cov uas tos ntsoov txog plaub teev yuav kaj ntug, cov uas tseem raug kev txom nyem, tsis txhob poob siab. Cov uas rau siab ntseeg yeej txais tau kev cawm seej, txawm nyob hauv lub neej no los sis nyob mus ib txhis.
Tej lub sij hawm peb tog hauv dej vim peb ua yuam kev thiab ua txhaum. Yog tias nej tog hauv dej vim li no, cia li xaiv kev xyiv fab thaum nej hloov siab lees txim.13 Kuv ntseeg tias tsis muaj dab tsi uas ua rau tus Cawm Seej muaj kev xyiv fab ntau tshaj cov neeg uas los cuag Nws, los sis rov qab los cuag Nws.14 Cov vaj lug kub muaj ntau zaj txog cov neeg uas twb tau ua txhaum tiam sis lawv hloov siab lees txim thiab muab siab rau ntseeg Yexus Khetos ruaj nrees. Kuv xav tias muaj tej zaj no hauv cov vaj lug kub kom pab peb nco txog tus Cawm Seej txoj kev hlub thiab Nws lub hwj chim uas txhiv peb dim nyob mus ib txhis. Tsis yog tus Cawm Seej muaj kev xyiv fab thaum peb hloov siab lees txim xwb, tiam sis peb kuj muaj kev xyiv fab heev thiab.
Lus Xaus
Kuv caw nej txhob txwm “ntsia mus lawm tom ntej” thiab tsom ntsoov rau tej yam uas muaj nqis tiag. Thov kom peb yuav tsom ntsoov rau Yexus Khetos. Thaum muaj tej yam uas ua rau peb tig mus rau lwm qhov, tej yam uas “nyob rau ntawm taub hau tsheb” thiab tej khaub zig cua nyob ib puag ncig, kuv ua tim khawv tias Yexus yog peb tus Cawm Seej thiab peb tus Txhiv Dim. Los ntawm Yexus Khetos lub npe, amees.