Kuv Thov Kom Nws Yuav Siv Peb
Tej hauj lwm me me no yog tej uas pab ntau heev thaum tso ua ke, ua rau ntau yam uas tib neeg ua koom ua ke vim peb yog Yexus Khetos cov thwj tim.
Khoom qab zib no yog ib qho hais ua tsaug uas ua los ntawm hmoov nplej phyllo dough thiab cov txiv ntoo pistachio. Tsev neeg Kadado tau ua khoom qab zib no; tau ntev heev lawv muaj peb lub tsev ci khoom noj nyob hauv Damascus, Syria. Thaum pib ua tsov ua rog, ib txoj kev thaiv kev ua rau lawv txais tsis taus zaub mov thiab khoom siv nyob hauv lawv lub nroog. Tsev neeg Kadado pib tuag tshaib. Thaum muaj xwm txheej ceev no, Tsoom Haiv Neeg Ntseeg hauv Hnub Nyoog Kawg Koom Haum Pab Dawb thiab ib co neeg ua siab loj nyob hauv Rahma Worldwide pib ua tej pluas mov rau lawv, nrog rau mis nyuj rau cov me nyuam haus. Tom qab lub sij hawm nyuaj heev, tsev neeg no tau rov qab pib ua neej—thiab lawv lub tsev ci khoom noj—nyob hauv ib lub teb chaws tshiab.
Tsis ntev tas los lawm, ib pob khoom qab zib tuaj txog lub Koom Txoos tej hoob kas nrog ib tsab ntawv uas hais tias: “Rau ob lub hlis, peb tau txais zaub mov los ntawm Rahma-Tsoom Haiv Neeg Ntseeg hauv Hnub Nyoog Kawg [Koom Haum Pab Dawb]. Yog tsis muaj ces peb yuav tuag tshaib xwb. Thov nej txais yuav … khoom qab zib no los ntawm kuv lub tsev ci khoom noj kom ua nej tsaug. Kuv thov kom Vajtswv tus uas Muaj Hwj Chim Tag Nrho yuav foom koob hmoov rau nej … thaum nej ua txhua yam.”1
Ib khoom qab zib los ntawm kev ris txiaj thiab kev nco txog. Yog ib khoom uas yuav tsum pub rau nej. Rau nej txhua tus uas tau thov Vajtswv thaum nej saib xov xwm, rau nej cov uas ua siab dawb pab thaum nyuaj ua li ntawd los sis pub nyiaj rau pob nyiaj pab neeg txom nyem vim nej cia siab tias yuav pab, ua nej tsaug.
Vajtswv txoj Kev Txib Peb Saib Xyuas cov Neeg Pluag
Vajtswv tau txib Yexus Khetos lub Koom Txoos saib xyuas cov neeg pluag.2 Yog ib tug ncej txheem ntawm txoj hauj lwm cawm seej thiab kev tsa nto.3 Tej uas muaj hauv Amas lub caij nyoog muaj tseeb rau peb thiab: “Thiab zoo li no, nyob hauv lawv tej kev vam meej, lawv tsis ntiab tawm tus uas liab qab, los sis tus uas tshaib plab, los sis tus uas nqhis dej, los sis tus uas muaj mob, los sis tus uas tsis tau kev pab; thiab lawv tsis muab lawv lub siab tso rau tej kev nplua nuj; yog li ntawd lawv ua siab dawb rau txhua tus, tag nrho tus laus thiab tus hluas, tag nrho tus ua qhev thiab tus ywj pheej, tag nrho txiv neej thiab poj niam, txawm hais tias nyob sab nraum lub koom txoos los sis nyob hauv lub koom txoos, thiab lawv tsis xaiv neeg ntsej muag ntawm cov neeg txom nyem.”4
Lub Koom Txoos ua ntau yam ua raws li cov lus txib no, xws li:
-
kev txhawb pab los ntawm lub Koom Haum Niam Tsev, tej pawg pov thawj hwj, thiab tej chav kawm;
-
kev yoo mov thiab kev siv nyiaj yoo mov;
-
tej liab teb pab tib neeg thiab kev ua kas poos;
-
tej qhov chaw txais tos cov neeg khiav lwm lub teb chaws tuaj;
-
kev pab rau cov nyob hauv tej tsev kaw;
-
lub Koom Txoos tej hauj lwm pab neeg txom nyem;
-
thiab qhov app JustServe, uas muab cov neeg siab dawb txuas rau tej cib fim pab lwm tus.
Tag nrho tej no uas tau txhim tsa los ntawm lub pov thawj hwj, yog tej uas pab ntau heev thaum tso ua ke, ua rau ntau yam uas tib neeg ua koom ua ke vim peb yog Yexus Khetos cov thwj tim.
Cov Yaj Saub Muaj Ntiag Tug Hauj Lwm rau Neeg Nyob Thoob Plaws lub Ntiaj Teb
Cov yaj saub muaj kev lav ris neeg nyob thoob plaws lub ntiaj teb, tsis yog cov mej zeej ntawm lub Koom Txoos xwb. Los ntawm tej yam kuv tau pom kuv qhia tau nej txog qhov uas Thawj Pawg Thawj Tswj Hwm yeej rau siab ua raws li Vajtswv txib lawv ua qhov no. Thaum tej kev xav tau loj tuaj, Thawj Pawg Thawj Tswj Hwm tau txib peb kom pab tib neeg ntau ntxiv. Lawv xav paub txog tej kev hloov loj thiab tej yam me me.
Tsis ntev tas los, peb tau nqa ib lub tsho tiv thaiv hauv tsev kho mob uas Beehive Clothing tau xaws rau tej tsev kho mob siv thaum tseem muaj phaum mob. Vim nws yog ib tug kws kho mob, Thawj Tswj Hwm Russell M. Nelson xav paub txog lub tsho no. Nws tsis xav saib xwb. Nws xav hnav—sim seb caj dab tes tsho zoo li cas thiab ntev li cas thiab yuav khi li cas. Tom qab ntawd, nws tau hais rau peb tias, “Thaum nej mus ntsib tib neeg, ua lawv tsaug vim lawv yoo mov, lawv pub nyiaj, thiab lawv txhawb pab los ntawm tus Tswv lub npe.”
Kev Qhia txog Kev Pab Neeg Txom Nyem
Raws li Thawj Tswj Hwm Nelson tau hais, kuv qhia rau nej txog qhov uas Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua dab tsi thaum muaj nag xob nag cua, av qeeg, cov neeg tawg rog—thiab thaum muaj phaum mob—ua tsaug rau Tsoom Haiv Neeg Ntseeg hauv Hnub Nyoog Kawg thiab cov phooj ywg coob txoj kev ua siab dawb. Txawm yog lub Koom Txoos tau tsom ntsoov rau 1,500 lub txheej xwm kom pab tiv thaiv COVID-19 nyob rau 18 lub hlis tas los, lub Koom Txoos kuj tau pab thaum muaj 933 qhov xwm txheej ceev uas raug tej roob hav thiab cov neeg tawg rog hauv 108 lub teb chaws. Tiam sis tej kev txheeb suav tsis qhia txog tag nrho. Cia kuv hais plaub zaj kom ua piv txwv txog tej yam uas peb ua.
Kev Pab COVID Nyob hauv South Africa
Dieke Mphuti nyob hauv Welkom, South Africa uas muaj kaum rau xyoo, nws niam nws txiv tso lub ntiaj teb no tseg dhau los, ua rau nws yuav tsum saib xyuas nws cov nus thiab niam hluas. Yeej nyuaj rau nws nrhiav zaub mov txaus, tiam sis COVID ua kom tsis muaj txaus thiab vim yuav tsum cais tawm ces ua tsis taus dab tsi. Lawv pheej tshaib plab, tsuas muaj me ntsis xwb vim lawv cov neeg zej zog pab lawv.
Muaj ib hnub thaum lub Yim Hli Ntuj xyoo 2020, Dieke xav tsis thoob thaum leej twg khob qhov rooj. Nws qhib thiab pom ob tug uas nws tsis paub—ib tug yog tus sawv cev rau lub Koom Txoos los ntawm cheeb tsam hoob kas nyob hauv Johannesburg thiab lwm tus yog ib tug thawj coj los ntawm South Africa Department of Social Development.
Ob lub koom haum no tau koom ua ke kom nqa zaub mov rau tej tsev neeg uas xav tau heev. Dieke pom cov hmoov pob kws thiab lwm yam khoom noj ua tau siv lub Koom Txoos pob nyiaj pab neeg txom nyem, thiaj li ua rau Dieke txais kev nplij siab. Tej yam no yuav pab txhawb nqa nws tsev neeg rau ob peb lim tiam mus txog thaum lub tseem fwv pob nyiaj pab yuav tuaj txog.
Dieke zaj dab neeg yeej yog ib zaj xwb uas tau muaj nyob thoob plaws lub ntiaj teb thaum muaj phaum mob COVID vim nej tau muab nej cov nyiaj fij tseg.
Ramstein txoj Kev Pab cov Neeg Afghan
Peb sawv daws tau pom xov xwm; txhiab txhiab tus neeg khiav tawm ntawm Afghanistan. Neeg coob tau caij nyab hoom txog tshav nyob hoom thiab lwm qhov chaws nyob hauv Qatar, lub Teb Chaws Amelikas, Yelemes Teb, thiab Spain ua ntej lawv mus txog qhov chaw kawg. Lawv xav tau ntau yam tam sim ntawd, thiab lub Koom Txoos tau pab muab khoom thiab tib neeg uas xav pab. Nyob hauv Ramstein Air Base nyob hauv Yelemes Teb, lub Koom Txoos tau muab ntaub qhwv daim pawj, mis nyuj rau me nyuam mos liab, zaub mov, thiab khau pub dawb rau lawv.
Ib feem ntawm cov viv ncaus hauv lub Koom Haum Niam Tsev tau pom tias cov poj niam Afghan ntau siv lawv tus txiv lub tsho kom npog lawv taub hau vim lawv cov ntaub npog taub hau twb raug muab rub tawm thaum neeg coob nyob hauv tshav nyab hoom Kabul. Yog ib txoj kev ua phooj ywg uas hla txhua ciaj ciam ntawm kev teev ntuj los sis kab lig kev cai, cov viv ncaus hauv Ramstein Pawg Ntseeg thib Ib tau sau los ua ke xaws cov khaub ncaws rau cov poj niam Afghan. Viv Ncaus Bethani Halls hais tias, “Peb hnov tias cov poj niam xav tau cov khaub ncaws rau kev thov Vajtswv, yog li ntawd peb xaws li no kom lawv yuav [txaus siab] thaum lawv thov Vajtswv.”5
Kev Pab Thaum Muaj Av Qeeg hauv Haiti
Zaj no yuav qhia nej tias nej tsis tas muaj nyiaj ntau los sis ua neeg laus kom ua zoo. Tus uas muaj kaum yim xyoo Marie “Djadjou” Jacques los ntawm Ceg Ntseeg Cavaillon nyob hauv Haiti. Thaum av qeeg nyob ze nws lub zos thaum lub Yim Hli Ntuj, nws tsev neeg lub tsev tau raug puas tsuaj tas nrog kaum txhiab lub tsev thiab. Qhov uas yus xiam yus lub tsev ua rau yus poob siab tiag tiag. Tiam sis nws tsis tau khuv xim nws tus kheej, Djadjou muaj siab xav pab lwm tus.
Associated Press
Nws pom ib tug neeg zej zog laus uas nyiaj ntxeem thiab pib saib xyuas nws. Nws tau pab lwm tus tshem tej khoom raug puas tsuaj tas. Txawm yog nws nkees dhau, nws tau koom nrog lwm tus mej zeej hauv lub Koom Txoos muab zaub mov thiab tej pob tu lub cev rau lwm tus. Djadjou zaj dab neeg yog ib zaj txog cov tub hluas ntxhais hluas coob uas tau coj yam ntxwv pab lwm tus thaum lawv sim coj raws li Yexus Khetos tus yam ntxwv.
Kev Pab Neeg Yelemes Thaum Dej Nyab
Ob peb lub lim tiam ua ntej av qeeg, muaj ib pawg cov tub hluas ntxhais hluas ntxiv uas pab lwm tus nyob Dej Hiav Txwv Atlantic sab tim ub. Cov dej nyab hauv Europe sab hnub poob thaum lub Xya Hli Ntuj yeej loj tshaj li muaj tau ntev los lawm.
Thaum cov dej thim rov qab mus, muaj ib tug tswv tsev muag khoom nyob hauv thaj chaw Ahrweiler, Yelemes Teb, uas pom txhua yam raug puas tsuaj thiab nws poob siab nthav. Tus neeg txo hwj chim, ib tug neeg Catholic, tau thov Vajtswv kom xav ib tug los pab nws. Tag kis sawv ntxov, Thawj Tswj Hwm Dan Hammon nyob hauv qhov chaw tshaj tawm txoj moo zoo Germany Frankfurt tau tuaj txog nws txoj kev nrog ib pab tub txib uas hnav tsho dej Helping Hands (Txhais Tes Pab). Cov dej twb mus txog 10 fiv (3 mev) hauv lub tsev muag khoom, thiaj li muaj cov av nkos tob tob heev. Cov neeg pab ntawd tau dig cov av nkos tshem tawm, tshem daim ntaub pua tsev thiab phab ntsa, thiab tso txhua yam hauv ib pawg rau ntawm txoj kev. Tus tswv tsev muag khoom zoo siab kawg ua hauj lwm nrog lawv tau ntev, thiab xav tsis thoob uas tus Tswv tau txib tus Tswv cov tub qhe teb nws tej lus thov—ua ntej dhau 24 teev!6
“Kuv Thov Kom Nws Yuav Siv Peb”
Hais txog lub Koom Txoos tej kev siv zog pab tib neeg txom nyem, Txwj Laug Jeffrey R. Holland tau hais tias: “Vajtswv teb tib neeg tej lus thov … feem ntau … thaum Vajtswv siv lwm tus neeg. Yog li ntawd, kuv thov kom Nws yuav siv peb. Kuv thov Vajtswv tias peb yuav txawj teb lwm tus neeg tej lus thov.”7
Cov kwv tij thiab cov muam, los ntawm nej txoj kev txhawb pab, kev pub nyiaj, siv sij hawm, thiab txoj kev hlub, nej twb tau teb tib neeg tej lus thov ntau heev. Tiam sis tseem muaj ntau yam uas peb yuav tsum ua. Vim peb yog cov mej zeej uas ua kev cai raus dej hauv lub Koom Txoos, peb tau khi lus kom pab saib xyuas cov neeg uas txom nyem. Tej yam uas peb nyias ua nyias mas tsis tas muaj nyiaj ntau los sis yuav tsum pab cov neeg uas nyob deb heev8; tiam sis peb yuav tsum muaj tus Vaj Ntsuj Plig Dawb Huv coj peb txoj hau kev thiab muaj siab xav hais rau tus Tswv hais tias: “Kuv nyob no; [txib] kuv mus.”9
Lub Sij Hawm uas tus Tswv Yuav Los
Lukas 4 qhia tias Yexus tau mus txog hauv lub nroog Naxales uas Nws loj hlob, thiab nws mus rau hauv lub tsev sab laj kom nyeem vaj lug kub. Nov yog thaum Nws pib ua Nws txoj hauj lwm qhuab qhia, thiab Nws tau hais los ntawm phau Yaxayas:
“Tus Tswv tus Ntsuj Plig nrog nraim kuv, rau qhov nws tsa kuv ua tus qhia txoj moo zoo rau cov neeg txom nyem. Vajtswv txib nws mus qhia txoj kev cawm dim rau cov neeg uas raug kaw, thiab kho cov neeg dig muag kom rov pom kev, thiab tso cov uas raug kev tsim txom kom dim.
“Qhia rau sawv daws paub lub sij hawm uas tus Tswv yuav los cawm nws haiv neeg. …
“… Vajtswv Txoj Lus uas hnub no nej hnov twb tiav lawm.”10
Kuv ua tim khawv tias muaj raws li nqe vaj lug kub no nyob hauv peb lub caij nyoog thiab. Kuv ua tim khawv tias Yexus Khetos tau los kom kho cov neeg uas lawv lub siab ntais rhe. Nws txoj moo zoo pab cov dig muag pom kev. Nws lub Koom Txoos yeej qhia txog kev txhiv dim rau cov neeg raug kaw, thiab Nws cov thwj tim nyob thoob plaws lub ntiaj teb yeej siv zog pab cov neeg uas mob.
Cia kuv xaus lus thaum kuv rov qab hais lo lus nug uas Yexus nug Nws tus Thwj Tim Ximoos Petus hais tias: “Koj puas hlub kuv?”11 Lub ntsiab ntawm txoj moo zoo yeej nyob ntawm seb peb teb lo lus nug ntawd rau peb tus kheej thiab “yug [Nws] pab yaj.”12 Nrog txoj kev hlub Yexus Khetos peb tus Xib Hwb, kuv caw peb txhua tus koom tes ua Nws txoj hauj lwm qhuab qhia, thiab kuv thov Vajtswv kom Nws yuav siv peb. Los ntawm Yexus Khetos lub npe dawb ceev, amees.