Lub Tsev uas Nce Theem Zuj Zus
“Kev nce theem zuj zus” yog ib txoj kev yooj yim uas tus Tswv siv kom qhia peb, Nws cov me nyuam, txog tej ntsiab cai tseem ceeb.
Nyob hauv kuv lub neej thiab thaum kuv ua hauj lwm hauv lub Koom Txoos, kuv tau hais lus li no txhiab txhiab zaus—tiam sis tsis tau ua thaum muaj 15 tug txiv neej no nyob ntawm no. Kuv paub nej thov Vajtswv thiab lawv thov pab kuv.
Cov kwv tij thiab cov muam, kuv yog ib tug uas muaj caj ceg los ntawm lub Nceeg Vaj Tonga nyob hauv South Pacific tiam sis kuv loj hlob nyob hauv Amelikas Qaum Teb. Phaum mob twb tav kev rau txhiab txhiab tus tub txib ntxhais txib hluas nyob thoob plaws lub ntiaj teb kom lawv mus tsis taus rau lawv lub teb chaws vim ciaj ciam av raug kaw. Ib txhia txwj laug Tongan tau ua tub txib rau peb xyoos thiab cov muam tau ua ob xyoos tawm! Lawv tos ntsoov muaj kev ntseeg li peb cov neeg ib txwm muaj. Yog li ntawd, txhob ntshai yog tias ib txhia uas ua hauj lwm hauv nej pawg ntseeg thiab ceg txheem ntseeg haj yam muaj yam ntxwv zoo li kuv—laus zuj zus thiab muaj plaub hau dawb. Peb zoo siab rau cov tub txib ntxhais txib nyob txhua qhov chaw vim lawv rau siab ua hauj lwm, tsis hais lawv nyob ntev tshaj lawv xav vim muaj phaum mob.
Muaj ib Hnub Sunday thaum kuv yog ib tug dikas, kuv nyob hauv chaw tos txais neeg nqa cov dej rau lub cim nco txog es ib tug poj niam nkag los hauv lub tsev koom txoos. Kuv mus tod es nqa cov dej rau nws. Nws nyo hau, luag nyav, ces tuav ib khob dej. Nws tuaj lig dhau nws thiaj li tsis tau txais cov mov mog. Tsis ntev tom qab lub sij hawm no, kuv tus neeg qhia tom tsev, Ned Brimley, tau qhia kuv tias muaj ntau yam hauv Yexus Khetos txoj moo zoo uas peb kawm ib theem zuj zus.
Lub lim tiam tom qab ntawd, Ned thiab nws tus khub tau tuaj rau peb lub tsev qhia ib zaj lus zoo heev. Ned tau qhia peb tias Vajtswv tau tsim lub ntiaj teb raws li ib tug txheej txheem. Tus Tswv tau ua tib zoo piav rau Mauxes tias Nws tau tsim lub ntiaj teb zoo li cas. Thaum xub thawj, Nws muab txoj kev kaj cais txoj kev tsaus ntuj, ces muab cov dej cais cov av qhuav. Nws tsim cov nroj tsuag thiab cov tsiaj txhua ua ntej nws tau tsim tib neeg, pib thaum Nws tsim Adas thiab Evas.
“Yog li ntawd Vajtswv thiaj tsim neeg muaj yam ntxwv zoo ib yam li Vajtswv. Vajtswv tsim txiv neej thiab tsim poj niam. …
“Vajtswv saib ib puas tsav yam uas nws tsim ntawd, thiab ua rau nws txaus siab heev” (Chiv Keeb 1:27, 31).
Tus Tswv zoo siab kawg. Ces Vajtswv so thaum hnub xya.
Qhov uas Vajtswv tau ua raws li tus txheej txheem tsim lub ntiaj teb qhia peb tias tej yam twg tseem ceeb tshaj rau Vajtswv thiab qhia vim li cas Nws tau tsim lub ntiaj teb.
Ned Brimley tau hais cov lus no nyob hauv nws zaj lus: “Vai, Vajtswv lub tsev yog ib lub tsev uas muaj txheej txheem. Nws xav tias koj yuav ua neej raws li ib tug txheej txheem. Raws li kev nce theem tsim nyog. Nws xav kom koj ua tub txib ua ntej koj yuav poj niam.” Txog lub sij hawm no, cov thawj coj hauv lub Koom Txoos qhia tias “tus Tswv xav kom txhua tus tub hluas npaj zoo mus ua tub txib. … Cov ntxhais hluas … uas xav mus kuj yuav tsum npaj zoo” (General Handbook: Serving in The Church of Jesus Christ of Latter-day Saints, 24.0, ChurchofJesusChrist.org). Tij Laug Brimley hais ntxiv tias: “Vajtswv xav kom koj yuav poj niam ua ntej muaj me nyuam. Thiab Nws xav kom koj ua kom muaj txuj ci zuj zus ntxiv thaum koj kawm ntawv.” Yog tias nej xaiv kom tsis txhob ua neej raws li kev nce theem zuj zus li no, ces nej lub neej yuav nyuaj heev.
Tij Laug Brimley kuj qhia peb tias, los ntawm Nws txoj kev theej txhoj, tus Cawm Seej pab peb rov qab muaj tus txheej txheem zoo rau peb lub neej uas peb ua tsis raws li kev nce theem zuj zus thaum peb los sis lwm tus xaiv tej yam tsis zoo.
Txij thaum ntawd los, ua rau kuv xav kawm txog txoj “kev nce theem zuj zus.” Kuv ib txwm tau nrhiav tej kev nce theem zuj zus hauv lub neej no thiab nyob hauv txoj moo zoo.
Txwj Laug David A. Bednar qhia lub ntsiab cai no: “Thaum peb kawm thiab ua neej raws li Yexus Khetos txoj moo zoo, tej uas muaj raws caij raws nyoog tau qhia rau peb. Piv txwv hais tias, cia li xav txog tej zaj lus qhia uas peb kawm txog tej yam tseem ceeb ntawm sab ntsuj plig los ntawm tej uas muaj los raws caij raws nyoog thaum uas muab tus Cawm Seej txoj moo zoo txum tim rov qab los hauv hnub nyoog kawg no.”
Txwj Laug Bednar hais txog qhov uas Thawj Zaug Ua Yog Toog thiab Maulaunais txoj kev tshwm sim rau Joseph Smith yog kev qhia tus tub hluas ua ntej txog Vajtswv tej cwj pwm, es tom qab ntawd nws kawm txog Phau Ntawv Maumoos lub luag hauj lwm thiab Eliyas txoj hauj lwm muab Ixayees sau los ua ke nyob ob sab ntawm daim ntaub thaiv.
Txwj Laug Bednar hais tias: “Qhov uas muaj raws caij raws nyoog no uas tshoov peb lub siab qhia txog tej yam ntawm sab ntsuj plig uas Vajtswv pom tias yog tej yam tseem ceeb tshaj plaws” (“The Hearts of the Children Shall Turn,” Liahona, Kaum Ib Hlis Ntuj 2011, 24).
Ib yam uas kuv tau kawm txog “kev nce theem zuj zus” yog ib txoj kev yooj yim uas tus Tswv siv kom qhia peb, Nws cov me nyuam, txog tej ntsiab cai tseem ceeb.
Peb tau los rau hauv lub ntiaj teb kom kawm txog tej yam peb kawm tsis taus yog peb tsis nyob. Peb nyias muaj nyias txoj kev loj hlob uas yog ib qho tseem ceeb rau Leej Txiv Saum Ntuj Ceeb Tsheej txoj hau kev. Peb txoj kev loj hlob ntawm sab cev nqaij daim tawv thiab sab ntsuj plig pib nce theem zuj zus thaum peb kawm thiab ua neej nyob.
Amas tau qhia ib zaj lus txog kev ntseeg—nws hais ib zaj lus piv txwv txog ib lub noob, yog tias yus tu zoo zoo, ces yuav tuaj kaus mus txog thaum lub noob ntawd yog ib tug ntoo siab heev uas txi txiv qab zib heev (saib Amas 32:28–43). Zaj lus ntawd qhia tias kev ntseeg yuav loj zuj zus thaum yus npaj ib qho chaw rau lub noob thiab tu lub noob ntawd—uas yog Vajtswv txoj lus—nyob hauv nej lub siab. Nej txoj kev ntseeg yuav loj tuaj thaum Vajtswv txoj lus pib “loj hlob nyob hauv nej lub hauv siab” (nqe 28). Qhov uas lub noob ntawd “loj hlob, thiab tawg kaus, thiab pib loj” (nqe 30) yeej qhia tau peb zoo. Kuj yog ib txoj kev nce theem zuj zus.
Tus Tswv qhia peb txhua tus raws li peb muaj peev xwm kawm thiab peb kawm ntawv li cas. Peb txoj kev loj hlob tuaj nyob ntawm peb txoj kev txaus siab, kev xav paub, peb muaj kev ntseeg npaum li cas, thiab to taub zoo npaum li cas.
Nifais tau qhia tej yam uas Joseph Smith yuav kawm nyob hauv Kirtland, Ohio, 2,300 xyoo tom qab ntawd: “Vim saib seb, tus Tswv Vajtswv hais li no: Kuv yuav muab rau noob neej ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub; thiab lawv cov uas mloog kuv tej lus ntsiab cai, thiab cuab pob ntseg rau kuv tej lus ntuas, yuav tau koob hmoov, vim lawv yuav kawm laj lim tswv yim” (2 Nifais 28:30).
Peb kawm tias “ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub” yeej yog kev nce theem zuj zus.
Cia li xav txog tej lus no uas peb tau hnov tas peb lub neej: “Ua tej yam tseem ceeb ua ntej” los sis “Noj mis ua ntej noj nqaij.” Thiab cov lus no nev “Peb yuav tsum kawm mus ko taw ua ntej peb txawj khiav”? Cov lus no piav txog tej yam uas yog kev nce theem zuj zus.
Tej txuj ci tseem ceeb kuj ua raws li kev nce ib theem zuj zus. Muaj tej txuj ci tseem ceeb thaum peb muab siab rau ntseeg ua ntej. Kev ntseeg los ua ntej tej txuj ci tseem ceeb.
Peb tsa cov tub hluas rau lub Pov Thawj Hwj Aloos raws li kev nce ib theem zuj zus, raws li ib tug muaj hnub nyoog li cas: dikas, xib hwb, ces tus pov thawj.
Cov kab ke ntawm kev cawm seej thiab kev tsa nto yeej yog kev nce theem zuj zus. Peb ua kev cai raus dej ua ntej peb txais lub txiaj ntsim Vaj Ntsuj Plig Dawb Huv. Cov kab ke hauv lub tuam tsev kuj yog kev nce theem zuj zus. Raws li kuv tus phooj ywg Ned Brimley muaj tswv yim qhia kuv, lub cim nco txog yog kev nce theem zuj zus—yus noj cov mov mog ua ntej, tom qab ntawd yus haus dej.
“Thaum lawv tseem noj mov Yexus txawm muab ib lub ncuav los thiab ua Vajtswv tsaug, nws muab lub ncuav ntawd ntais cev rau cov thwj tim thiab hais tias, Lub ncuav no yog kuv lub cev, nej cia li txais mus noj.
“Tom qab ntawd Yexus muab ib khob cawv txiv hmab los, thiab ua Vajtswv tsaug, nws muab khob cawv txiv hmab ntawd cev rau lawv thiab hais tias, Nej txhua tus cia li txais mus haus,
“Khob cawv txiv hmab no, yog kuv cov ntshav uas ua lub hom thawj nias rau Vajtswv Txoj Lus cog tseg. Kuv cov ntshav no yuav ntws los ntxuav ntau leej tej kev txhaum huv tib si mus” (Mathais 26:26–28).
Nyob hauv Yeluxalees thiab nyob hauv Teb Chaws Amelikas, tus Cawm Seej tau txhim tsa txoj kev txais lub cim nco txog ib yam li ntawd.
“Saib seb, tus Tswv Vajtswv hais tias, kuv lub tsev yog lub tsev muaj chaw txawb chaw rau, thiab tsis yog ib lub tsev ntxhov hnyo” (Lus Qhuab Qhia thiab Kev Khi Lus 132:8).
Kev hloov siab lees txim yog ib txoj kev nce theem zuj zus. Yuav pib muaj kev ntseeg Yexus Khetos, txawm yog ib qho me me xwb. Yuav tsum muaj kev txo hwj chim thiaj li muaj kev ntseeg, uas yog kev “muaj lub siab puas tas thiab lub siab xav ua zoo” (2 Nifais 2:7).
Muaj tseeb tiag, plaub lub ntsiab cai ntawm txoj moo zoo yeej yog kev nce theem zuj zus. “Peb ntseeg tias thawj cov ntsiab cai thiab kab ke ntawm txoj Moo Zoo yog: qhov ib, Kev ntseeg tus Tswv Yexus Khetos; qhov ob, Kev hloov siab lees txim; qhov peb, Kev cai raus dej rau txoj kev zam txim rau tej kev txhaum; qhov plaub, Kev tso tes saum taub hau kom muab lub txiaj ntsim Vaj Ntsuj Plig Dawb Huv” (Tej Nqe Kev Ntseeg 1:4).
Vaj Ntxwv Npeyamis qhia nws cov neeg txog qhov tseeb tseem ceeb no: “Thiab saib xyuas kom ua txhua yam no raws li laj lim tswv yim thiab kev muaj txheej txheem; vim tsis tsim nyog kom ib tug neeg khiav nrawm dua li qhov nws muaj zog. Thiab ntxiv, tsim nyog kom nws rau siab, xwv kom nws thiaj yuav yeej tau nqi zog; yog li ntawd, yuav tsum ua txhua yam raws li kev muaj txheej txheem” (Mauxiyas 4:27).
Thov kom peb yuav ua neej zoo thiab ua raws li txoj kev nce theem zuj zus uas tus Tswv tau npaj rau peb. Peb yuav tau koob hmoov thaum peb saib thiab ua raws li tej txheej txheem thiab kev nce theem uas tus Tswv qhia tias yog tej yam tseem ceeb tshaj plaws. Los ntawm Yexus Khetos lub npe dawb ceev, amees.