Caw Khetos Los Sau Nej zaj Dab Neeg

Kuv yuav nug ib co lus uas ua rau yus ntsuam xyuas txog yus tus kheej.

• Nej yuav sau dab tsi tseg txog nej lub neej?

• Txoj kev uas nej piav txog hauv nej zaj dab neeg puas ncaj?

• Nej zaj dab neeg puas yog los xaus rau ntawm qhov chaw pib, uas yog nej lub tsev saum ntuj ceeb tsheej?

• Nyob hauv nej zaj dab neeg puas muaj ib tug neeg uas coj yam ntxwv zoo heev—thiab tus ntawd puas yog tus Cawm Seej Yexus Khetos?

Kuv ua tim khawv hais tias tus Cawm Seej yog peb lub “hauv paus ntawm kev ntseeg thiab yog tus ua kom peb txoj kev ntseeg tiav.”¹ Nej puas kam caw Nws los ua lub hauv paus thiab cia Nws ua tus ua kom tiav hauv nej zaj dab neeg?

Nws yeej paub txog qhov pib thiab qhov xaus. Nws twb yog tus Tsim ntuj ceeb tsheej thiab lub ntiaj teb. Nws yeej xav kom peb rov qab mus tsev mus cuag Nws thiab cuag peb Leej Txiv Saum Ntuj Ceeb Tsheej. Nws yeej cia siab rau peb thiab xav kom peb ua tau zoo.

Nej xav hais tias yog muaj dab tsi tiv thaiv kom peb thiaj li tsis kam muab peb zaj dab neeg rau Nws?

Tej zaum txoj kev piav no yuav pab nej ntsuam xyuas nej tus kheej.

Ib tug kws lij choj txawj ntse yeej paub zoo hais tias yuav tsum tsis txhob nug tus neeg ua tim khawv ib lo lus uas yus tsis paub lo lus teb. Yog thaum yus nug li ntawd, ces qhov no yuav ua rau tus neeg ua tim khawv hais ub hais no ntxiv ces yuav hais tej uas yus tsis tau paub txog. Ces tsam no ho muaj ib co lus uas yus tsis paub txog li lawm thiab yuav tsis pab yus rooj plaub.

Txawm hais tias ib tug kws lij choj txawj ntse yuav tsis nug tej lus no, los peb yeej nug tau. Peb yeej nug tau peb Leej Txiv Saum Ntuj Ceeb Tsheej uas hlub peb, los ntawm peb tus Cawm Seej uas muaj lub siab zoo, thiab ntawm tus ua tim khawv uas yog tus Vaj Ntsuj Plig Dawb Huv uas yeej yuav teb peb tej lus nug thiab yeej ib txwm ua tim khawv txog qhov tseeb.² Vim hais tias tus Vaj Ntsuj Plig Dawb Huv koom ib lub siab nrog Leej Txiv Saum Ntuj Ceeb Tsheej thiab Yexus Khetos, ces peb yeej paub hais tias tus Vaj Ntsuj Plig Dawb Huv yuav hais qhov tseeb. Tab sis yog vim li cas, qee zaum peb, thiaj li tsis kam thov kev pab saum ntuj ceeb tsheej, uas tus Vaj Ntsuj Plig Dawb Huv yeej yuav qhia qhov tseeb rau peb? Yog vim li cas peb thiaj tsis nug tej lus uas peb tsis paub cov lus teb thaum peb twb paub tias tus tim khawv yeej ib txwm qhia qhov tseeb?

Tej zaum ntshe peb tsis muaj kev ntseeg los txais cov lus teb. Tej zaum ntshe vim peb yog tib neeg ces peb tsis tshua kam tso txhua yam rau tus Tswv thiab tsis tso siab rau Nws tag nrho. Tej zaum yog li ntawd peb thiaj xaiv los sau peb zaj dab neeg rau peb tus kheej, vim yog ib zaj dab neeg raws li peb lub siab nyiam ces peb thiaj tsis cia tus Kws Sau Ntawv Zoo Tshaj los pab. Peb yuav tsis nug tej lus nug tsam lo lus teb tsis yog li peb xav ces yuav tsis phim rau peb zaj dab neeg.

Peb tsawg tsawg leeg xwb, thiaj li yuav kam ntxiv peb tej kev sim siab uas yuav pab peb ua neeg zoo dua rau hauv peb zaj dab neeg xwb. Tiam sis puas yog peb sawv daws yeej nyiam qhov uas thaum tus pha ej hauv ib zaj dab neeg kov yeej nws tej kev sim siab? Tej kev sim siab hauv ib zaj dab neeg yog tej yam uas ua rau zaj dab neeg ntawd ntxim nyiam, txhawb nqa peb, thiab yog ib zaj uas peb nyeem tag los xav nyeem ntxiv. Tej kev sim siab uas muab sau rau hauv peb zaj dab neeg yog tej yam uas yuav pab peb los nyob ze tus Cawm Seej thiab yuav pab peb ua neeg zoo, kom peb thiaj li yuav los coj tau zoo li Nws.

Kom Daviv kov yeej tau Kaulias, tus me nyuam tub Daviv yuav tsum mus tawm tsam ib tug neeg loj heev. Qhov uas yooj yim rau Daviv yog cia rov qab mus yug yaj xwb. Tab sis, nws nco txog thaum nws cawm tus me nyuam yaj ntawm tus tsov ntxhuav thiab tus dais. Thaum nws xav txog tej no, ces ua rau nws muaj siab ntseeg thiab ua siab loj cia Vajtswv sau nws zaj dab neeg, thiab hais tias, “Tus Tswv cawm kuv dim ntawm tus tsov ntxhuav thiab tus dais li cas, Nws yeej yuav cawm kuv dim ntawm tus neeg Filitees li ntawd thiab.”³ Thaum cia Vajswv ua tus yeej, es muaj pob tseg mloog tus Vaj Ntsuj Pliag Dawb Huv, nrog rau lub siab kam cia tus Cawm Seej los ua lub hauv paus thiab ua tus ua kom tiav hauv nws zaj dab neeg, ces Daviv kov yeej Kaulias thiab cawm tau nws haiv neeg.

Lub ntsiab ntawm txoj kev ywj siab, yeej cia peb sau peb zaj dab neeg—Daviv cia li mus tsev thiab rov qab mus yug yaj xwb los yeej tau. Tab sis Yexus Khetos twb npaj los siv peb los ib ua tug xaum nyob hauv Nws txhais tes, yuav los sau zaj dab neeg zoo tshaj plaws li! Nws yeej npaj siab los siv kuv uas yog ib tug xaum xwb, los nyob hauv Nws txhais tes, tsuas yog kuv muaj siab ntseeg cia Nws ua tus kws sau ntawm kuv zaj dab neeg xwb.

Exethaws yog ib zaj piv txwv ntxiv uas cia Vajtswv ua tus yeej. Nws tsis sau nws zaj dab neeg kom pov hwm nws tus kheej xwb, tab sis nws muaj siab ntseeg, nws tso siab plhuav rau tus Tswv. Hamas twb npaj ua kom cov neeg Yudais nyob hauv Pawxias puas tsuaj tag nrho. Thaum Maudekhais, uas yog Exethaws ib tug txheeb ze, tau hnov li no nws hais kom Exethaws cawm nws haiv neeg es cia li mus nrog tus vaj ntxwv sib tham. Exethaws hais rau Maudekhais hais tias yog tus vaj ntxwv tsis tau hu kom leej twg mus ntsib nws es yus cia li mus xwb ces yeej yuav raug tuag xwb. Tab sis nws muaj siab ntseeg loj heev thiab hais kom Maudkehais hais rau cov neeg Yudais kom lawv yoo mov pab nws. Exethaws hais tias, “Kuv thiab kuv cov nkauj qhe los yuav yoo mov ib yam nkaus li nej thiab. Ces tom qab ntawd, kuv yuav mus cuag vaj ntxwv. Yog hais tias, kuv ua txhaum kev cai, kuv tuag los xij peem, kuv yeej yuav zoo siab tuag.”⁴

Exethaws yeej kam cia tus Cawm Seej sau nws zaj dab neeg, txawm hais tias raws li tib neeg txoj kev pom, mas thaum kawg yeej yuav tsis zoo hlo li. Hmoov zoo kawg, ces tus vaj ntxwv kam ntsib Exethaws, thiab nws cawm tau cov neeg Yudais hauv Pawxias.

Yeej paub hais tias, yuav tsis hais kom peb muaj siab loj npaum li Exethaws. Tab sis cia Vajtswv ua tus yeej, cia Nws ua lub hauv paus thiab cia Nws ua tus ua kom tiav hauv peb zaj dab neeg, ces peb yuav tsum ua raws li Nws tej lus txib thiab peb tej kev khi lus. Thaum peb ua raws li tej lus txib thiab peb tej kev khi lus ces thaum ntawd peb thiaj yuav txais tau kev tshwm sim ntawm tus Vaj Ntsuj Plig Dawb Huv. Twb yog los ntawm tus Ntsuj Plig txoj kev qhia es peb thiaj paub tias tus Tswv txhais tes nrog peb sau peb zaj dab neeg.

Thaum lub Plaub Hlis Ntuj 2021, peb tus yaj saub, Thawj Tswj Hwm Russell M. Nelson, tau nug peb kom peb xav saib peb yuav ua tau dab tsi yog tias peb muaj siab ntseeg Yexus Khetos ntau dua. Thaum peb muaj siab ntseeg Yexus Khetos ntau dua, peb yuav kam nug tej lus uas peb tsis paub cov lus teb—peb yuav nug peb Leej Txiv Saum Ntuj Ceeb Tsheej, los ntawm Yexus Khetos lub npe, kom teb peb tej lus nug los ntawm tus Vaj Ntsuj Plig Dawb Huv, uas ua tim khawv txog qhov tseeb. Yog peb muaj siab ntseeg ntau dua, peb yuav nug cov lus thiab yuav kam txais cov lus teb, txawm hais tias tsis raws li peb siab xav. Peb yuav tau koob hmoov thaum peb cia li ua raws li kev ntseeg ntawm Yexus Khetos uas ua rau peb muaj siab ntseeg ntau dua los cia Nws ua lub hauv paus thiab cia Nws ua tus kom tiav. Thawj Tswj Hwm Nelson tau hais tias peb yuav “txais tau kev ntseeg ntxiv thaum [peb] ua [tej yam] uas ua rau [peb] yuav tsum muaj kev ntseeg ntxiv.”⁵

Ces, ib khub niam txiv uas muaj tsis tau me nyuam yuav muaj siab ntseeg thov saib puas tsim nyog nkawd yuav ib tug me nyuam los tu thiab npaj siab txais cov lus teb, txawm hais tias nkawd yeej xav kom nkawd yug tau me nyuam.

Ib khub niam txiv laus yuav thov saib puas tau tsim nyog nkawd mus ua tub txib thiab kam npaj siab mus, txawm hais tias nkawd xav hais tias nkawd tseem xav ua hauj lwm ntxiv. Tiam sis tej zaum cov lus teb yuav hais tias, “txhob rawm mus,” ces ntev mus nkawd mam li paub zoo hais tias yog vim li cas nkawd yuav tsum nyob hauv tsev ntev me ntsis ntxiv.

Ib tug tub hluas los sis ntxhais hluas yuav muaj siab ntseeg thiab nug saib nws yuav ua ib tug kis las, kawm ntawv qib siab los sis kawm nkauj, ntawm tej no qhov twg yuav zoo dua thiab npaj siab los ua raws li tus Vaj Ntsuj Plig Dawb Huv txoj kev qhia.

Yog vim li cas peb thiaj li xav kom tus Cawm Seej ua lub hauv paus thiab cia Nws ua tus ua kom tiav hauv peb zaj dab neeg? Vim hais tias Nws paub peb zoo heev, Nws yuav coj peb mus rau tej qhov chaw uas peb twb tsis tau xav txog. Tej zaum Nws pab kom peb muaj zog li Daviv los sis Exethaws. Nws yuav pab kom peb ncav tau ntau yam thiab kom peb zoo li Nws. Tej yam uas peb ua tau thaum peb muaj siab ntseeg ntau dua yuav pab peb muaj siab ntseeg ntau dua ntawm Yexus Khetos.

Cov nus thiab cov viv ncaus, nyuam qhuav yog ib xyoo dhau los xwb, uas peb tus yaj saub tau nug peb tias: “Nej puas txaus siab cia Vajtswv yeej hauv nej lub neej? … Nej puas txaus siab ua tej yam twg uas Nws xav kom nej ua tso nej mus ua lwm yam ua nej nyiam?”⁶ Kuv xav hais ntxiv rau cov lus zoo heev no hais tias: “Nej puas kam cia Vajtswv ua lub hauv paus thiab cia Nws ua tus ua kom tiav hauv nej zaj dab neeg?

Nyob hauv phau Tshwm Sim peb kawm tau hais tias peb yuav tau los sawv ntawm Vajtswv lub xub ntiag thiab yuav raug txiav txim los ntawm phau ntawv txheeb txoj sia, raws li tej yam uas peb tau ua lawm.⁷

Peb yuav raug txiav txim raws li peb phau ntawv txheeb txoj sia. Peb yeej xaiv tau los sau ib zaj raws li peb siab nyiam rau peb tus kheej. Los sis peb cia tus Tswv ua lub hauv paus thiab cia Nws ua tus ua kom tiav es nrog peb sau peb zaj dab neeg, es cia Nws qhia kom peb ua tej yam uas Nws xav kom peb ua tso peb mam li mus ua lwm yam uas peb nyiam ua.

Cia Khetos ua lub hauv paus thiab cia Nws ua tus ua kom tiav hauv nej zaj dab neeg!

Cia tus Vaj Ntsuj Plig Dawb Huv ua nej tus tim khawv!

Sau ib zaj dab neeg uas kom nej taug txoj kev ncaj, uas txoj kev no yuav coj nej rov qab mus rau nej lub tsev saum ntuj ceeb tsheej mus nyob ntawm Vajtswv lub xub ntiag.

Cia nej tej kev ntxhov siab thiab kev txom nyem hauv nej zaj dab neeg los ua ib qho kev pab nej los nyob ze dua rau ntawm Yexus Khetos thiab los coj zoo li Nws.

Qhia ib zaj dab neeg uas nej paub hais tias ntuj ceeb tsheej lub rooj vaj yeej qhib dav. Nug tej lus uas nej tsis paub cov lus teb, vim nej paub hais tias Vajtswv yeej yuav cia tus Vaj Ntsuj Plig Dawb Huv los qhia rau nej saib Nws xav kom nej ua dab tsi.

Cia nej zaj lus piav ua ib zag ntawm kev ntseeg, ua raws li tus yam ntxwv zoo heev, uas yog tus Cawm Seej Yexus Khetos. Los ntawm Yexus Khetos lub npe, amees.