Tej Txuj Ci Tseem Ceeb ntawm Yexus Khetos txoj Moo Zoo
Kuv paub tias Nws txoj moo zoo yuav ua rau peb muaj kev xyiv fab, kev kaj siab lug, thiab kev cia siab, tsis yog tam sim no xwb, tiam sis yuav foom koob hmoov rau cov neeg coob heev nyob rau yav tom ntej.
Mabuhay! Kuv coj tsoom Haiv Neeg Ntseeg nyob hauv Philippines txoj kev hlub thiab txoj kev zoo siab rau nej. Xyoo no yog 60 xyoo tom qab thawj zaug uas cov tub txib tuaj txog cov pov txwv Philippines. Hnub no muaj 23 qhov chaw tshaj tawm txoj moo zoo thiab 80,000 tawm tus mej zeej hauv lub Koom Txoos nyob hauv 123 ceg txheem ntseeg. Muaj xya lub tuam tsev uas muaj tam sim no, tab tom ua, los sis tau tshaj tawm tias yuav ua. Qhov no yeej yog ib qho txuj ci tseem ceeb. Peb pom tias tau muaj raws li kev qhia txog tej uas yuav muaj los yav tom ntej nyob hauv 2 Nifais 10:21: “Tus Tswv tej lus cog tseg uas nws tau cog rau lawv cov uas nyob hauv tej koog pov txwv muaj nuj nqis heev.”
Qhov txuj ci tseem ceeb no kuj muaj raws li tej lus uas Txwj Laug Gordon B. Hinckley nyob hauv Manila tau thov Vajtswv hais nyob rau xyoo 1961. Nyob hauv zaj lus thov Vajtswv ntawd, Txwj Laug Hinckley hais tias: “Peb thov Koj foom koob hmoov rau cov neeg hauv thaj av no, xwv kom lawv yuav ua phooj ywg zoo thiab ua siab dawb siab zoo rau tag nrho cov neeg uas tuaj no, thiab yuav muaj ntau txhiab neeg uas txais zaj xov no thiab tau koob hmoov. Thov Koj foom koob hmoov rau lawv kom lawv muaj siab xav kawm thiab to taub, thiab muaj kev ntseeg tias lawv mam li txais, thiab ua siab loj ua raws li tej ntsiab cai ntawm txoj moo zoo” (zaj lus thov Vajtswv fij tseg nyob ntawm American War Memorial Cemetery, Philippines, Plaub Hlis Ntuj 28, 1961).
Qhov txuj ci tseem ceeb ntawm txoj moo zoo tau hloov ntau yam nyob hauv lub teb chaws no thiab nws cov neeg. Kuv yog ib tug uas ua tim khawv txog qhov no. Kuv tau muaj rau xyoo thaum kuv niam kuv txiv koom lub Koom Txoos hauv lub pov txwv qab teb hu ua Mindanao. Thaum lub sij hawm ntawd, tsuas muaj ib qhov chaw tshaj tawm txoj moo zoo xwb nyob hauv lub teb chaws, thiab tsis muaj ib ceg txheem ntseeg hlo li. Kuv yeej zoo siab kawg vim kuv niam kuv txiv ua siab loj thiab rau siab coj raws li tus Cawm Seej. Kuv hwm lawv thiab tag nrho cov pioneer hauv lub Koom Txoos nyob hauv Philippines. Lawv tau npaj txoj kev rau tej tiam neeg tom qab lawv tau koob hmoov.
Vaj Ntxwv Npeyamis nyob hauv Phau Ntawv Maumoos hais tias: “Thiab tsis tas li ntawd, kuv thov kom nej xav txog qhov uas cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig” (Mauxiyas 2:41).
Thaum peb ua neej raws li tej ntsiab cai thiab cov kab ke ntawm txoj moo zoo, peb tau koob hmoov thiab hloov siab los ntseeg kom thiaj li hloov los ua neeg zoo li Yexus Khetos ntxiv. Txoj moo zoo tau ua rau Haiv Neeg Ntseeg Filipino hloov siab li no, tsis hais kuv tsev neeg los yog. Txoj moo zoo yeej yog txoj kev kom muaj ib lub neej zoo siab thiab vam meej.
Thawj txoj ntsiab cai ntawm txoj moo zoo yog kev ntseeg tus Tswv Yexus Khetos. Cov neeg Filipino coob ib txwm ntseeg Vajtswv. Yeej yooj yim rau peb tso siab rau Yexus Khetos thiab paub tias peb txais tau lus teb rau peb tej lus thov.
Tsev neeg Obedoza tau coj yam ntxwv zoo rau peb. Tij Laug Obedoza yog kuv ceg ntseeg tus thawj tswj hwm thaum kuv yog ib tug tub hluas. Tij Laug thiab Muam Obedoza yeej xav xav kom nkawd tsev neeg ua kev cai sib khi ua ke hauv lub Tuam Tsev Manila. Nkawd tau ua neej nyob hauv lub nroog General Santos City, 1,000 mais (1,600 km) deb ntawm Manila. Nkawd tsev neeg muaj cuaj leeg, ua rau lawv xav tias mus tsis taus rau lub tuam tsev. Tiam sis zoo li tus neeg muag khoom uas tau muag tag nrho kom yuav tau ib lub hlaws ua muaj nqis heev (saib Mathais 13:45–46), khub niam txiv no tau muag nkawd lub tsev kom them nqi rau nkawd txoj kev mus. Muam Obedoza txhawj heev vim tsis muaj tsev rau lawv nyob. Tiam sis Tij laug Obedoza nplij nws lub siab hais tias tus Tswv mam li pub rau lawv.
Lawv tau ua kev cai sib khi ua ib tsev neeg rau lub neej no thiab nyob mus ib txhis nyob hauv lub tuam tsev nyob rau xyoo 1985. Nyob hauv lub tuam tsev lawv muaj txoj kev xyiv fab puv npo—lawv nrhiav tau lawv lub hlaws uas muaj nqis heev. Thiab ib yam li Tij Laug Obedoza hais, tus Tswv tau foom koob hmoov rau lawv. Thaum lawv rov qab tawm hauv Manila, cov neeg siab dawb tau cia lawv pw hauv lawv tej tsev, thiab tom qab ntawd lawv yuav ib lub tsev tshiab. Tus Tswv saib xyuas cov uas muab siab rau ntseeg Nws.
Lub ntsiab cai ntawm txoj moo zoo thib ob yog kev hloov siab lees txim. Kev hloov siab lees txim yog kev tig ntawm kev txhaum mus thiab kev tig mus rau Vajtswv kom txais kev zam txim. Yog kev hloov siab hloov ntsws. Ib yam li Thawj Tswj Hwm Russell M. Nelson qhia, yog kev “ua zoo dua thiab ua neeg zoo dua txhua hnub” (“Peb Muaj Peev Xwm Ua Zoo Dua thiab Ua Neeg Zoo Dua,” Liahona, Tsib Hlis Ntuj 2019, 67).
Kev hloov siab lees txim yeej zoo li xab npus. Thaum kuv yog ib tug kws tsim chemical engineer, kuv ua hauj lwm hauv lub tsev tsim xab npus hauv Philippines. Kuv tau kawm ua xab npaus thiab qhov uas vim li cas xav npas ntxim ua kom tej yam huv. Thaum yus muab roj xyaw ntsev (alkali base) thiab muab tej tshuaj tua kab mob hauv cov xab npus, ces yeej yog ib qho khoom uas tua tau kab mob. Ib yam li cov xab npus, kev hloov siab lees txim muab yus ntxuav kom huv. Kev hloov siab lees txim ua rau peb muaj cib fim tso tej yam qias neeg tseg, peb thiaj li tsim nyog nrog Vajtswv nyob, vim tus uas tsis dawb huv txais tsis tau Vajtswv lub nceeg vaj ua nws tug (Amas 11:37).
Dhau los ntawm kev hloov siab lees txim peb siv Yexus Khetos lub hwj chim uas ntxuav peb kom ua neeg dawb huv. Yog ib feem ntawm tus txheej txheem hloov siab los ntseeg. Tau muaj li no rau cov neeg Eethais-Nifais-Lihais nyob hauv Phau Ntawv Maumoos. Lawv yog cov Neeg Lamas uas hloov siab los ntseeg ruaj nrees lawv thiaj li tsis tau tso tseg hlo li (saib Amas 23:6–8). Lawv tau muab lawv cov cuab yeej ua tsov ua rog faus cia thiab tsis tau nqa ntxiv li lawm. Lawv yeej xum tuag ua ntej lawv yuav rhuav lawv txoj kev khi lus ua lawv khi rau Vajtswv. Thiab lawv ua pov thawj txog qhov no. Peb paub tias lawv txoj kev txi tau tsim tej txuj ci tseem ceeb: txhiab txhiab tus neeg uas tawm tsam lawv tau tso lawv ntaj thiab riam tseg thiab hloov siab los ntseeg. Ntau xyoo tom qab ntawd, lawv cov tub, uas peb hu ua cov tub rog hluas, mas Vajtswv tau pov hwm lawv txawm muaj neeg coob tawm tsam!
Kuv tsev neeg thiab Haiv Neeg Ntseeg Filipino coob heev twb tau hloov siab los ntseeg li no thiab. Thaum peb tau lees yuav Yexus Khetos txoj moo zoo thiab koom lub Koom Txoos, peb tau hloov peb kab lig kev cai kom ua raws li txoj moo zoo. Peb tau muab tej kab lig kev cai uas tsis yog tso tseg. Kuv pom li no thaum kuv txiv kawm txog txoj moo zoo thiab hloov siab lees txim. Nws yog ib tug uas haus luam yeeb ntau, tiam sis nws muab nws cov luam yeeb pov tseg thiab tsis tau kov ib tug ntxiv li lawm. Vim nws txiav txim siab nws yuav hloov siab, plaub tiam neeg tom qab ntawd tau koob hmoov.
Kev hloov siab lees txim ua rau peb xav ua thiab coj raws li tej kev khi lus thaum peb ua cov kab ke dawb huv. Thawj txoj kab ke ntawm kev cawm seej thiab kev tsa nto yog kev cai raus dej kom txais kev zam txim rau tej kev txhaum. Kev cai raus dej ua rau peb txais tau lub txiaj ntsim Vaj Ntsuj Plig Dawb Huv thiab khi lus nrog tus Tswv. Peb rov qab khi lus zoo li thaum peb ua kev cai raus dej txhua lub lim tiam thaum peb txais lub cim nco txog. Qhov no kuj yog ib qho txuj ci tseem ceeb!
Cov kwv tij thiab cov muam, kuv caw nej coj qhov txuj ci tseem ceeb no rau hauv nej lub neej. Los cuag Yexus Khetos thiab xaiv kom muab siab rau ntseeg Nws; hloov siab lees txim thiab ua raws li tej kev khi lus uas muaj los ntawm cov kab ke cawm seej thiab kev tsa nto. Ua li no yuav cia nej nrog nraim Khetos thiab txais lub hwj chim thiab cov koob hmoov ntawm kev ua zoo li Vajtswv (saib Lus Qhuab Qhia thiab Kev Khi Lus 84:20).
Kuv ua tim khawv tias Yexus Khetos muaj txoj sia nyob thiab Nws hlub peb txhua tus. Kuv paub tias Nws txoj moo zoo yuav ua rau peb muaj kev xyiv fab, kev kaj siab lug, thiab kev cia siab, tsis yog tam sim no xwb, tiam sis yuav foom koob hmoov rau cov neeg coob heev nyob rau yav tom ntej. Yog vim li ntawd tsoom Haiv Neeg Ntseeg Filipino yeej ib txwm zoo siab li no. Yog qhov txuj ci tseem ceeb ntawm txoj moo zoo thiab Khetos cov lus qhuab qhia. Kuv ua tim khawv txog qhov no los ntawm Yexus Khetos lub npe dawb ceev, amees.