Los Muab Sij Hawm rau tus Tswv

Kuv cov kwv tij thiab cov muam, rau ob hnub no tus Tswv cov tub qhe tau qhia peb zoo vim lawv rau siab xav paub tus Tswv xav kom lawv hais li cas.

Peb paub peb yuav tsum ua dab tsi rau lub hlis tom ntej no. Tiam sis peb yuav hloov li cas vim peb tau hnov tej lus no?

Phaum mob tau qhia peb tias peb lub neej txawj hloov sai npaum li cas, tej lub sij hawm yog los ntawm tej yam peb tsis muaj peev xwm kav. Tiam sis, muaj ntau yam uas peb kav taus. Peb cuab peb lub hom phiaj thiab txiav txim siab tias peb yuav siv peb dag zog, siv sij hawm, thiab siv nyiaj li cas. Peb txiav txim siab peb yuav ua li cas rau lwm tus. Peb xaiv peb yuav mloog leej twg thaum xav tau qhov tseeb thiab tej lus qhia.

Hauv lub ntiaj teb no muaj tej lub suab thiab tej kev yuam ntau heev. Tiam sis ntau lub suab ntxias peb thiab xav rub peb tawm hauv txoj kev ua raws li peb tej kev khi lus. Xwv kom tsis txhob raug kev tu siab, kuv thov kom nej tawm tsam tej kev ntxias ntawm lub ntiaj teb no thaum nej los muab sij hawm rau tus Tswv hauv nej lub neej—txhua hnub.

Yog tias tej yam nej mloog feem ntau yog los ntawm tej kev sib tham koospistawj los yog lwm yam xov xwm, nej txoj kev txawj mloog tus Ntsuj Plig lub suab ntxhi lus yuav ploj mus zuj zus. Yog tias nej tsis nrhiav tus Tswv tej lus los ntawm kev thov Vajtswv thiab kev kawm txoj moo zoo, ces nej yuav raug ntxias kom ntseeg tej lub tswv yim uas ntxim nyiam tiam sis tsis muaj tseeb. Txawm yog cov Neeg Ntseeg uas rau siab ntseeg los lawv tseem raug ntxias los ntawm Npanpiloos tej lus.

Kuv cov kwv tij thiab cov muam, kuv thov kom nej los muab sij hawm rau tus Tswv! Ua kom nej sab ntsuj plig lub hauv paus ruaj nrees thiaj li tiv tau mus rau yav tom ntej thaum nej ua tej yam kom tus Vaj Ntsuj Plig Dawb Huv nrog nraim nej nyob tas mus li.

Tsis txhob saib tsis taus qhov tseeb no hais tias “tus Ntsuj Plig hais … txog tej uas yeej muaj tiag, thiab txog tej uas yeej yuav muaj tiag.”¹ “Nws yuav qhia rau nej txhua yam uas nej yuav tsum ua.”²

Tsis muaj dab tsi uas pab kom nej muaj tus Ntsuj Plig ntau tshaj qhov nej tsom ntsoov rau Yexus Khetos. Cia li hais txog Khetos, xyiv fab rau Khetos, mloog ntsoov Khetos tej lus, thiab txiv mus lawm tom hauv ntej nrog Yexus Khetos.³ Muaj kev zoo siab nyob rau Hnub Caiv thaum nej teev tiam Nws, txais lub cim nco txog, thiab hwm Nws Hnub Caiv kom dawb huv.⁴

Zoo li kuv hais tag kis no, thov kom nej los muab sij hawm rau tus Tswv nyob hauv Nws lub tsev dawb huv. Tsis muaj dab tsi uas yuav ntxiv dag zog rau nej sab ntsuj plig lub hauv paus npaum li kev ua hauj lwm thiab kev teev tiam hauv lub tuam tsev.

Peb hais ua tsaug rau tag nrho cov neeg uas ua peb tej lub tuam tsev tshiab. Ua tej lub tuam tsev tshiab nyob thoob plaws lub ntiaj teb. Hnub no kuv zoo siab tshaj tawm txog kev npaj ua tej lub tuam tsev tshiab nyob hauv tej qhov chaw no: Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; thiab rov qab ua lub Tuam Tsev Provo Utah tom qab muab lub Tuam Tsev Orem fij tseg.

Kuv hlub nej, cov kwv tij thiab cov muam. Tus Tswv paub nej thiab hlub nej. Nws yog nej tus Cawm Seej thiab nej tus Txhiv Dim. Nws yog tus uas coj thiab kav Nws lub Koom Txoos. Nws yuav coj nej lub neej yog nej yuav los muab sij hawm rau Nws—txhua hnub.

Thov kom Vajtswv yuav nrog nraim nej nyob mus txog thaum peb rov qab sib ntsib, kuv thov los ntawm Yexus Khetos lub npe dawb ceev, amees.