Txoj Kev Coj Raws li Khetos

Thaum kuv tau kawm cov vaj lug kub, ib zaj uas tshoov kuv lub siab yog Xaulus los ntawm lub nroog Talaxus, uas tom qab ntawd nws hu ua Povlauj, raws li qhia hauv phau Npaivnpaum.

Povlauj yog ib tug txiv neej uas tsim txom lub Koom Txoos thiab cov Neeg Ntseeg Khetos. Tiam sis los ntawm lub hwj chim saum ntuj thiab Yexus Khetos txoj Kev Theej Txhoj, nws tau hloov siab tag nrho, thiab los ua Vajtswv ib tug tub qhe zoo. Tus uas coj yam ntxwv rau nws lub neej yog tus Cawm Seej Yexus Khetos.

Nyob hauv ib zaj uas Povlauj qhia rau cov Neeg Kauleethaus, nws caw lawv coj raws li nws vim nws yog ib tug uas coj raws li Khetos (saib 1 Kauleethaus 11:1). Nov yog Povlauj txoj kev caw uas nws ua siab ncaj hais rau peb niaj hnub no thiab: kom coj raws li Khetos.

Kuv tau pib xav txog qhov uas yus coj raws li Khetos txhais li cas. Thiab qhov tseem ceeb, kuv pib nug hais tias, “Kuv yuav tsum ua li cas kom ua raws li Nws tus yam ntxwv?”

Kev coj raws li Khetos yog txoj kev siv zog kom ua, coj, thiab ua neej raws li tus Cawm Seej ua. Yog kev muaj lub siab zoo li Nws. Yog kev ua Yexus Khetos ib tug thwj tim tseeb.

Kuv tau kawm tej yam txog tus Cawm Seej lub neej, thiab nyob hauv kuv zaj lus hnub no, kuv xav qhia rau nej txog plaub tus cwj pwm uas kuv xyaum ua raws li Nws tus yam ntxwv.

Tus Cawm Seej tus cwj pwm thib ib yog kev txo hwj chim. Yexus Khetos yeej txo hwj chim txij thaum ua ntej lub neej no los. Nyob hauv Kev Sib Sab Laj Saum Ntuj, Nws lees txais thiab cia muaj raws li Vajtswv lub siab nyiam ua raws li txoj hau kev cawm seej rau tib neeg. Nws hais tias, “Leej Txiv, cia muaj raws li koj siab nyiam, thiab lub yeeb koob yog koj li mus ib txhis” (Mauxes 4:2).

Peb paub tias Yexus Khetos tau qhia txog kev txo hwj chim thiab txo nws lub hwj chim kom Nws Leej Txiv muaj yeeb koob.

Thov kom peb txo peb lub hwj chim vim yuav ua rau peb nyob kaj siab lug (saib Lus Qhuab Qhia thiab Kev Khi Lus 19:23). Yuav tsum txo hwj chim ua ntej yuav muaj yeeb koob, ua li ntawd ces Vajtswv yuav pom zoo rau peb: “Nej txhua tus yuav tsum txo nej lub hwj chim thiab ib tug pab ib tug; rau qhov Vajtswv txoj lus hais tias, Vajtswv tawm tsam tus uas khav theeb, tiam sis Vajtswv pub koob hmoov rau tus uas txo hwj chim” (1 Petus 5:5). Kev txo hwj chim ua rau peb txais tau lus teb rau peb tej lus thov. Yog lub hauv paus ntawm ib tug uas ncaj ncees.

Txwj Laug Dale G. Renlund qhia tias:

“Cov neeg uas txo hwj chim rau Vajtswv nco ntsoov tias Leej Txiv Saum Ntuj Ceeb Tsheej thiab Yexus Khetos tau ua li cas rau lawv.

“Peb ua ncaj rau Vajtswv thaum peb txo hwj chim rau Nws” (“Ua Ncaj, Hlub Tshua, thiab Txo Hwj Chim rau Vajtswv,” Liahona, Kaum Ib Hlis Ntuj 2020, 111, 109).

Tus Cawm Seej tus cwj pwm thib ob yog kev ua siab loj. Kuv xav txog Yexus Khetos thaum Nws muaj 12 xyoos, es Nws zaum hauv Vajtswv lub tuam tsev nrog cov xib hwb thiab qhia lawv txog tej yam hauv ntuj ceeb tsheej, kuv paub tias, txij thaum Nws hluas los Nws ua siab loj heev. Neeg coob yuav xav tias cov xib hwb yuav tsum qhia tus tub hluas, Nws yog tus uas qhia lawv thaum “lawv mloog nws qhia, thiab nug nws” (Joseph Smith Kev Txhais, Lukas 2:46 [nyob hauv Lukas 2:46, lus cim c]).

Kuv nrog kuv tus poj niam ua tub txib nyob hauv qhov chaw tshaj tawm txoj moo zoo Democratic Republic of the Congo Mbuji-Mayi thaum xyoo 2016 mus txog 2019. Yuav tsum tsav tsheb rau ib txoj kev mus rau ib cheeb tsam rau ib cheeb tsam nyob hauv qhov chaw tshaj tawm txoj moo zoo no. Twb muaj ib qho xwm txheej nyob hauv cheeb tsam ntawd uas cov tub sab nqa ntaj nqa riam tav txoj kev thiab thab cov neeg uas taug kev los tsav tsheb.

Tsib tug tub txib uas taug kev los ntawm ib thaj chaw mus rau lwm thaj chaw thaum muab cov tub txib sib pauv raug xwm txheej vim li no. Vim wb tau raug kev ua phem li no ua ntej, wb pib ntshai rau peb sawv daws txoj kev nyab xeeb, thiab tsis xav mus taug tej kev no kom mus xyuas cov tub txib thiab tsis xav ua thaj chaw rooj sab laj. Peb tsis tau paub tias yuav muaj li no ntev li cas. Kuv tau sau ib daim ntawv ceeb toom, uas kuv tau xa rau Cheeb Tsam Pawg Thawj Tswj Hwm, es kuv qhia tias wb ntshai heev thaum yuav tsum tsav tsheb mus kom txog wb cov tub txib.

Thaum nws teb, Txwj Laug Kevin Hamilton, uas yog peb tus Thawj Tswj Hwm hauv Cheeb Tsam Afikas Qab Teb Sab Hnub Tuaj sau ntawv rau kuv tias: “Kuv ntuas koj kom ua zoo npaum li koj ua tau xwb. Cia li muaj tswv yim thiab thov Vajtswv. Tsis txhob txhob txwm ua kom koj tus kheej los sis koj cov tub txib raug kev txaus ntshai, tiam sis cia li muaj kev ntseeg mus tom ntej. ‘Vim Vajtswv tsis pub lub siab ntshai rau peb tiam sis pub lub siab muaj hwj chim thiab kev hlub thiab kev tswj yus tus kheej rau peb’ (2 Timautes 1:7).

Tej lus txhawb nqa no yeej ntxiv dag zog rau peb thiab cia wb tseem taug kev mus thiab ua siab loj mus txog thaum wb ntiag tug hauj lwm no tiav lawm, vim peb tau hnov peb Leej Txiv Saum Ntuj Ceeb Tsheej tej lus qhia los ntawm nqe vaj lug kub ntawd.

Nyob hauv cov vaj lug kub, peb nyeem txog tus Yaj Saub Joseph Smith tej lus uas qhia tias tus Tswv xav txhawb nqa peb: “Cov kwv tij, peb puas yuav kam ua ib txoj hauj lwm loj thiab tseem ceeb npaum no? Mus lawm tom ntej txhob poob qab. Ua siab loj, cov kwv tij, thiab cia li mus, mus tsis tu ncua kom txog thaum yeej!” (Lus Qhuab Qhia thiab Kev Khi Lus 128:22).

Cia peb ua siab loj ua qhov yog, tsis hais tib neeg tsis nyiam los yog—xav kom peb ua siab loj tiv thaiv peb txoj kev ntseeg thiab ua raws li kev ntseeg. Cia peb ua siab loj hloov siab lees txim txhua hnub, ua siab loj lees txais Vajtswv lub siab nyiam thiab ua raws li Nws cov lus txib. Cia peb ua siab loj ua neej ncaj ncees thiab ua tej yam Vajtswv xav kom peb ua nyob hauv peb lub luag hauj lwm thiab kev lav ris.

Tus Cawm Seej tus cwj pwm thib peb yog kev zam txim. Nyob hauv Nws txoj hauj lwm qhuab qhia hauv lub ntiaj teb no, tus Cawm Seej tau pab ib tug poj niam uas tau deev luag txiv kom txhob raug luag muab pob zeb ntaus nws. Nws txib tus poj niam kom “mus tsev thiab tsis txhob ua txhaum ntxiv” (Yauhas 8:11). Qhov no ua rau tus poj niam hloov siab lees txim thiab txais kev zam txim, vim raws li nqe vaj lug kub qhia, “Tus poj niam tau qhuas Vajtswv txij ntawd mus, thiab tau ntseeg nws lub npe” (Joseph Smith Kev Txhais, Yauhas 8:11 [nyob hauv Yauhas 8:11, lus cim c])

Nyob hauv ib txoj kev hawm Vajtswv thaum lub caij Christmas thaum lub Kaum Ob Hlis Ntuj xyoo 2018, peb tus yaj saub Thawj Tswj Hwm Russell M. Nelson tau hais txog plaub lub txiaj ntsim uas peb tau txais los ntawm tus Cawm Seej. Nws hais tias ib lub txiaj ntsim uas tus Cawm Seej muab rau peb yog kev txawj zam txim rau lwm tus:

“Los ntawm Nws txoj Kev Theej Txhoj uas nyob mus ib txhis, nej yuav zam txim rau cov uas ua rau nej raug mob thiab cov uas yeej yuav tsis lav ris qhov uas lawv tau ua phem rau nej.

“Feem ntau yog ib qho yooj yim kom zam txim rau tus uas txo hwj chim thov kom nej zam txim rau nws. Tiam sis tus Cawm Seej yuav ua rau nej txawj zam txim rau leej twg uas tau ua li cas rau nej los” (“Plaub lub Txiaj Ntsim uas Yexus Khetos Pub rau Nej” [Thawj Pawg Thawj Tswj Hwm Kev Hawm Vajtswv hauv lub Caij Christmas, Ob Hlis Ntuj 2, 2018], broadcasts.ChurchofJesusChrist.org).

Thov kom peb yuav muaj siab xav zam txim rau lwm tus kom thiaj li txais tau Leej Txiv txoj kev zam txim. Kev zam txim tso peb dim thiab ua rau peb tsim nyog txais lub cim nco txog txhua hnub Sunday. Peb yuav tsum zam txim rau lwm tus kom thiaj li ua Yexus Khetos cov thwj tim.

Tus Cawm Seej tus cwj pwm thib plaub yog kev txi. Kev txi yog ib feem ntawm Yexus Khetos txoj moo zoo. Tus Cawm Seej tau muab nws txoj sia txi theej peb peb thiaj li yuav txais tau kev txhiv dim. Thaum Nws hnov mob los ntawm txoj kev txi ntawd, Nws thov Nws Leej Txiv kom tshem lub khob ntawd mus, tiam sis Nws tseem ua mus txog thaum kawg ntawm txoj kev txi nyob mus ib txhis ntawd. Nov yog Yexus Khetos txoj Kev Theej Txhoj.

Thawj Tswj Hwm M. Russell Ballard tua qhia li no tias: “Kev txi yog kev qhia txog yus txoj kev hlub dawb huv. $Peb hlub tus Tswv npaum li cas, txoj moo zoo, thiab peb cov neeg zej zog npaum li cas los ntsuas tau los ntawm peb txaus siab ua kev txi npaum li cas rau lawv” (“The Blessings of Sacrifice,” Ensign, Tsib Hlis Ntuj 1992, 76).

Peb muab peb lub sij hawm txi rau kev txhawb pab, kom pab lwm tus, ua zoo, nrhiav tsev neeg zaj keeb kwm, thiab ua hauj lwm hauv lub Koom Txoos.

Peb muab peb cov nyiaj txi thaum peb them ib feem kaum, nyiaj yoo mov, thiab lwm yam kom txhawb nqa Vajtswv lub nceeg vaj hauv lub ntiaj teb no. Peb yuav tsum ua kev txi kom ua raws li tej kev khi lus uas peb tau khi nrog tus Cawm Seej.

Thaum peb coj raws li Yexus Khetos thiab siv cov koob hmoov uas los ntawm Nws txoj Kev Theej Txhoj, peb yuav txo hwj chim ntxiv, peb yuav ua siab loj, peb zam txim rau lwm tus ntau ntxiv, thiab peb ua kev txi rau Nws lub nceeg vaj ntxiv.

Kuv ua tim khawv tias peb Leej Txiv Saum Ntuj Ceeb Tsheej muaj txoj sia nyob thiab Nws paub peb txhua tus, Yexus yog tus Khetos, Thawj Tswj Hwm Russell M. Nelson yog Vajtswv tus yaj saub hnub no. Kuv ua tim khawv tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Vajtswv lub nceeg vaj hauv lub ntiaj teb thiab Phau Ntawv Maumoos muaj tseeb. Los ntawm Yexus Khetos, peb tus Txhiv Dim lub npe, amees.