Vajtswv lub Hwj Chim uas Muaj Yeeb Koob Heev

Kwv yees li peb xyoos tom qab Thawj Zaug Ua Yog Toog, thaum hmo ntuj rau lub Cuaj Hlis Ntuj hnub tim 21, xyoo 1823, Joseph Smith tau thov Vajtswv kom txais kev zam txim rau nws tej kev txhaum thiab paub tias Vajtswv xav li cas txog nws.¹ Ib tug tib neeg tshwm sim rau ntawm nws lub txaj ib sab, hu Joseph raws npe, thiab hais tias “nws yog ib tug tub xa xov uas Vajtswv txib [los], thiab … nws lub npe hu ua Maulaunais.” Nws piav hais tias “Vajtswv muaj ib txoj hauj lwm rau [Joseph] ua”² ces nws qhia Joseph txog qhov uas Phau Ntawv Maumoos yuav los. Qhov tseem ceeb, Phau Ntawv Maumoos yog thawj thawj yam uas Maulaunais hais txog nyob hauv nws zaj lus.

Phau Ntawv Maumoos yog ib zaj lus tim khawv ntxiv txog Yexus Khetos thiab yog ib ib yam uas pab tib neeg hloov siab los ntseeg hauv hnub nyoog kawg. Peb lub hom phiaj thaum peb tshaj tawm txoj moo zoo yog kom caw txhua tus los cuag Yexus Khetos,³ txais cov koob hmoov uas los ntawm txoj moo zoo, thiab nyiaj mus kom txog thaum kawg los ntawm kev ntseeg tus Cawm Seej.⁴ Kev pab tib neeg hloov siab loj heev⁵ thiab muab lawv tus kheej khi rau tus Tswv dhau los ntawm tej kev khi lus dawb ceev thiab cov kab ke yeej yog tej lub hom phiaj ntawm kev qhia txoj moo zoo.

Maulaunais txoj kev qhia txog Phau Ntawv Maumoos rau Joseph Smith tau qhib txoj hauj lwm ntawm txoj kev cawm seej thiab kev tsa nto rau tib neeg nyob daim ntaub thaiv sab no nyob hauv hnub nyoog kawg.

Thaum Maulaunais qhia ntxiv rau Joseph, nws hais lus los ntawm phau Malakis nyob hauv Phau Qub, uas tau muab hloov me ntsis los ntawm cov lus uas siv hauv phau King James:

“Saib seb, kuv yuav muab lub Pov Thawj Hwj ua tshwm sim los rau nej, los ntawm tus yaj saub Eliyas txhais tes, ua ntej tus Tswv hnub tseem ceeb thiab txaus ntshai yuav los.

“… Thiab nws yuav muab tej lus cog tseg uas tau muab cog rau cov txiv yawg lawm coj los cog rau hauv cov me nyuam lub siab, thiab cov me nyuam lub siab yuav tig mus rau lawv cov txiv yawg. Yog hais tias tsis muaj li ntawd, ces tag nrho cov neeg ntiaj teb yuav raug puas tsuaj huv tib si mus thaum nws los.”⁶

Ib lub hom phiaj ntawm kev ua cov tuam tsev yog kom muaj tej qhov chaw dawb huv ua kev khi lus thiab cov kab ke dawb ceev uas yuav tsum ua kom muab txoj kev cawm seej thiab kev tsa nto rau tib neeg, cov neeg ciaj thiab cov tuag. Maulaunais cov lus qhia rau Joseph Smith txog Eliyas lub luag hauj lwm thiab txoj cai pov thawj hwj tau qhib kev rau txoj hauj lwm ntawm kev cawm seej thiab kev tsa nto nyob sab no ntawm daim ntaub thaiv thiab nyob hauv lub caij nyoog no tau qhib kev rau txoj hauj lwm pab cov tuag nyob daim ntaub thaiv sab tod.

Los yog hais tias, Maulaunais tej lus qhia thaum lub Cuaj Hlis Ntuj xyoo 1823 txog Phau Ntawv Maumoos thiab Eliyas ntiag tug hauj lwm tau tsa lub hauv paus rau cov lus qhuab qhia txog txoj hauj lwm cawm seej thiab kev tsa nto nyob daim ntaub thaiv ob sab huv tib si.

Tej lus uas Maulaunais qhia Joseph Smith tau hloov txhua yam nyob hauv Joseph txoj kev qhuab qhia. Piv txwv hais tias, thaum ua kev sib ntsib hauv lub Tuam Tsev Kirtland thaum lub Plaub Hlis Ntuj hnub tim 6, xyoo 1837, tus Yaj Saub hais tias, “Tom qab twb hais txhij txhua lawm, txoj hauj lwm uas zoo tshaj plaws thiab tseem ceeb dua ntais twb yog kev tshaj tawm Txoj Moo Zoo.”⁷

Yuav luag xya xyoo tom qab ntawd, thaum lub Plaub Hlis Ntuj 7, 1844, Joseph Smith tau hais ib zaj lus uas niaj hnub no peb hu ua Zaj Lus King Follett. Nws tau hais nyob hauv zaj lus ntawd tias, “Qhov ntiag tug hauj lwm loj tshaj plaws hauv lub ntiaj teb uas Vajtswv muab rau peb yog kev nrhiav peb cov neeg uas tau tso lub ntiaj teb no tseg.”⁸

Tiam sis vim li cas kev tshaj tawm txoj moo zoo thiab kev nrhiav peb cov neeg tuag ob qho no yog qhov ntiag tug hauj lwm tseem ceeb tshaj uas Vajtswv tau muab rau peb ua? Kuv ntseeg tias tus Yaj Saub Joseph Smith hais txog qhov tseeb uas qhia tias tej kev khi lus, uas ua los ntawm cov kab ke pov thawj hwj, muab peb khi rau tus Tswv Yexus Khetos thiab yog lub ntsiab tseem ceeb ntawm txoj hauj lwm ntawm kev cawm seej thiab kev tsa nto nyob ob sab ntawm daim ntaub thaiv.

Tej hauj lwm qhia txoj moo zoo thiab kev ua hauj lwm hauv lub tuam tsev thiab tsev neeg zaj keeb kwm yeej yog ib txoj hauj lwm uas tsom ntsoov rau tej kev khi lus thiab cov kab ke dawb ceev uas kom peb txais tau lub hwj chim ua li Vajtswv hauv peb lub neej thiab, thaum kawg, rov mus cuag Leej Txiv Saum Ntuj Ceeb Tsheej. Yog li ntawd, tej zaum ua rau yus xav tias ob nqe lus uas tus Yaj Saub hais no yeej tsis zoo ib yam, tiam sis ob nqe lus no yeej tsom ntsoov rau qhov tseem ceeb tshaj ntawm txoj hauj lwm hauv hnub nyoog kawg.

Tus Cawm Seej hais tias:

“Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so.

“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”⁹

Peb kwv tus Cawm Seej tus quab thaum peb ua neeg tsim nyog kawm, txais, thiab ua raws li tej kev khi lus thiab cov kab ke dawb ceev. Vajtswv muab peb khi ruaj nrees rau tus Cawm Seej thaum peb mob siab nco ntsoov thiab ua neej raws li peb tej lus cog tseg lawm. Thiab kev sib khi nrog Nws yeej yog lub hauv paus ntawm kev txhawb peb sab ntsuj plig lub zog nyob hauv peb lub neej txhua lub sij hawm.

Kuv caw nej xav txog cov koob hmoov uas Vajtswv cog lus tias Yexus Khetos cov thwj tim uas ua raws li lawv tej kev khi lus mam li txais. Piv txwv hais tias, Nifais tau “pom Vajtswv tus Me Nyuam Yaj lub koom txoos [hauv hnub nyoog kawg], thiab tsis muaj neeg coob pes tsawg, … Vajtswv haiv neeg ntseeg, kuj nyob thoob plaws hauv lub ntiaj teb; thiab lawv txoj kev kav tej teb chaws hauv ntiaj teb no tsis muaj ntau.”¹⁰

Nws kuj “pom Vajtswv tus Me Nyuam Yaj lub hwj chim, pom tias lub hwj chim ntawd tau nqis los rau cov ntseeg ntawm tus Me Nyuam Yaj lub koom txoos, thiab rau tus Tswv cov neeg khi lus, … thiab lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.”¹¹

Cov lus “muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv” tsis yog ib lub tswv yim zoo los sis ib qho piv txwv txog cov lus zoo nkauj hauv cov vaj lug kub xwb. Tiam sis, peb yeej pom tau cov koob hmoov no nyob hauv tus Tswv cov thwj tim hauv hnub nyoog kawg no coob heev.

Vim kuv yog ib tug ntawm Pawg Kaum Ob tug Thwj Tim kuv mus thoob plaws lub ntiaj teb ua hauj lwm. Thiab kuv tau koob hmoov vim kuv tau ntsib thiab kawm nej feem coob. Kuv ua tim khawv tias tus Tswv cov neeg khi lus hnub no los yeej muaj txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv. Kuv tau pom lawv mob siab ntseeg, ua siab loj, pom yav tom ntej, tiv mus tiag tiag, thiab muaj kev xyiv fab uas kav ntev tshaj ib tug neeg yuav muaj hauv lub ntiaj teb—yeej yog tej uas Vajtswv muab xwb.

Kuv tau pom txoj kev ncaj ncees thiab Vajtswv lub hwj chim uas muaj yeeb koob heev uas muaj los ntawm kev ua raws nraim li tej kev khi lus thiab cov kab ke nyob hauv ib tug mej zeej hluas uas tuag tes tuag taw thaum lub tsheb raug sib tsoo. Tom qab tus no tau ua kev peem tsheej ntau lub hlis thiab tau hloov nws lub neej vim nws txav tsis tau zoo, kuv ntsib nws thiab nrog tus neeg khov kho no tham. Thaum wb sib tham kuv nug hais tias, “Qhov uas koj raug li no tau pab koj kawm dab tsi?” Nws teb kiag hais tias, “Kuv tsis tu siab. Kuv tsis npau taws. Thiab txhua yam yuav zoo.”

Kuv tau pom txoj kev ncaj ncees thiab Vajtswv lub hwj chim uas muaj yeeb koob heev uas muaj los ntawm kev ua raws nraim li tej kev khi lus thiab cov kab ke nyob hauv lub Koom Txoos cov mej zeej uas nyuam qhuav ua kev cai raus dej thiab ua kev pom zoo. Cov neeg hloov siab los ntseeg yeej xav kawm thiab ua hauj lwm, lawv txaus siab ua tiam sis tsis paub lawv yuav tso tej yam qub tseg li cas, thiab lawv muaj kev xyiv fab vim lawv yuav koom nrog “Vajtswv haiv neeg, thiab [lawv] yog Vajtswv tsev neeg lawm.”¹²

Kuv tau pom txoj kev ncaj ncees thiab Vajtswv lub hwj chim uas muaj yeeb koob heev uas muaj los ntawm kev ua raws nraim li tej kev khi lus thiab cov kab ke nyob hauv ib tsev neeg uas mob siab tu ob tug uas raug kab mob tsis muaj qhov kawg. Cov neeg thwj tim zoo no tau piav txog tej lub sij hawm thaum tsis muaj leej twg pab lawv tsev neeg—thiab tej lub sij hawm thaum lawv paub tias tus Tswv txhais tes tau txhawb nqa lawv. Tsev neeg no tau hais tias lawv ris Vajtswv txiaj rau tej yam nyuaj hauv lub ntiaj teb no uas ua rau peb loj hlob tuaj thiab hloov los ua neeg zoo li peb Leej Txiv Saum Ntuj Ceeb Tsheej thiab peb tus Txhiv Dim, Yexus Khetos. Vajtswv tau txhawb pab thiab foom koob hmoov rau tsev neeg thaum Nws tso tus Vaj Ntsuj Plig Dawb Huv rau hauv lawv lub tsev kom hloov los ua ib qhov chaw dawb ceev tiv thaiv ib yam li lub tuam tsev.

Kuv tau pom txoj kev ncaj ncees thiab Vajtswv lub hwj chim uas muaj yeeb koob heev uas muaj los ntawm kev ua raws nraim li tej kev khi lus thiab cov kab ke nyob hauv lub Koom Txoos ib tug mej zeej uas tu siab heev thaum nrog nws tus txiv sib nrauj. Tus muam no txoj kev nyuaj siab txhawj xeeb los haj yam loj heev vim qhov uas nws tus txiv tau ua txhaum rhuav nws tej kev khi lus thiab tso nws tus poj niam tseg yog ib qho tsis ncaj hlo li. Nws xav kom nws tus txiv lav ris tej yam ntawd.

Thaum tus poj niam rau siab ntseeg no nyuaj siab txog tag nrho tej yam uas nws tau raug lawm, nws tau kawm thiab xav txog tus Cawm Seej txoj Kev Theej Txhoj ntxiv tshaj qhov nws tau kawm ua ntej. Nws maj mam to taub ntxiv txog Khetos ntiag tug hauj lwm kom txhiv peb dim—Nws txoj kev raug txom nyem rau peb tej kev txhaum, thiab peb txoj kev raug mob, tej kev qaug zog, kev poob siab, thiab kev ntxhov siab. Thiab nws txais kev tshoov siab nug nws tus kheej li no hais tias: vim Yexus twb them nqi rau tej kev txhaum ntawd, vim li cas yus yuav yuam kom them nqi ntawd ob zaug? Nws paub tias qhov uas nws xav kom muaj li ntawd yeej tsis ncaj thiab tsis yog los ntawm kev hlub tshua.

Tus poj niam kawm tias qhov uas nws muab nws tus kheej khi rau tus Cawm Seej dhau los ntawm tej kev khi lus thiab cov kab ke yeej kho tau txhua yam uas lwm tus neeg xaiv tsis ncaj ncees thiab ua rau nws muaj peev xwm zam txim rau lwm tus thiab txais kev kaj siab lug thiab txoj kev hlub tshua.

Peb tsuas muaj cov lus cog tseg thiab cov koob hmoov los ntawm tej kev khi lus vim muaj peb tus Cawm Seej, Yexus Khetos. Nws caw peb los ntsia ntsoov Nws,¹³ los cuag Nws,¹⁴ kawm txog Nws,¹⁵ thiab khi peb tus kheej rau Nws¹⁶ los ntawm tej kev khi lus thiab cov kab ke ntawm Nws txoj moo zoo. Kuv ua tim khawv thiab cog lus tias qhov uas peb ua raws li peb tej kev khi lus yuav muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv peb. Thiab kuv ua tim khawv tias tus Tswv Yexus Khetos uas muaj sia nyob yog peb tus Cawm Seej. Kuv ua tim khawv txog tej yam tseeb no los ntawm Yexus Khetos lub npe dawb ceev, amees.