Kev Nrhiav Tau Ib Yam Zoo Vim Yog Kev Ntseeg
Kuv caw peb txhua tus yeej meem ua kom peb txoj kev ntseeg rau ntawm Khetos loj hlob tuaj, tus uas yuav hloov lub neej ntawm tag nrho lawv cov uas nrhiav kom tau Nws.
Pib thaum xyoo 1846, txhiab txhiab tus pioneer, txawm yog txiv neej, poj niam, thiab me nyuam, los mus sab hnub poob mus rau Xi-oos. Lawv txoj kev ntseeg loj ua tau rau lawv muaj siab loj thiab. Rau lawv ib txhia, lawv mus tsis txog vim lawv tas sim neej ntawm kev. Ho lwm cov, txawm tias muaj kev cov nyom ntau heev, rau rau siab mus tom ntej muaj siab ntseeg.
Vim yog cov pioneer no, ntau tiam tom qab lawv nyob, kuv tsev neeg thiaj txais tau tej koob hmoov ntawm Yexus Khetos txoj moo zoo uas muaj tseeb.
Ib yam li lwm tus tub hluas, uas tsis ntev kuv yuav hais txog, kuv muaj 14 xyoos thaum kuv pib kawm txog txoj kev ntseeg teev thiab txiav txim siab saib kuv ntseeg dab tsi. Thaum ntawd kuv koom lwm lub koom txoos uas nyob ze kuv lub tsev, tiam sis kuv tau xav mus xyuas ntau lub koom txoos.
Muaj ib tav su, kuv pom ob tug tub hluas hnav cev xuv thiab tsho dawb nkag kuv tus neeg zej zog lub tsev. Ob tug tub hluas no zoo li nkawd—tshwj xeeb heev.
Hnub tom qab ntawd kuv ntsib kuv tus neeg zej zog, Leonor Lopez, thiab noog nws txog ob tug tub hluas ntawd. Leonor piav hais tias nkawd yog ob tug tub txib ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Nws qhia kuv hais tias nws tsev neeg ua kev cai raus dej hauv lub Koom Txoos lub xyoo ua ntej ntawd. Pom tias kuv txaus siab kawm, Leonor caw kuv los ntsib ob tug tub txib thiab kawm ntxiv txog lub Koom Txoos.
Ob hnub tom qab ntawd, kuv tau nrog tsev neeg Lopez koom ua ke ntsib ob tub tub txib. Nkawd qhia tias nkawd hu ua Txwj Laug John Messerly tuaj Ogden, Utah, tuaj thiab Txwj Laug Christopher Osorio tuaj Walnut Creek, California, tuaj. Kuv yeej yuav nco qab ntsoov nkawd mus li.
Vim kuv muaj 14 xyoos xwb, Txwj Laug Messerly hais kom peb mus rau kuv lub tsev kom kuv niam thiaj kawm tau saib nkawd yuav qhia kuv dab tsi. Thaum mus txog kuv lub tsev, Txwj Laug Messerly piav rau kuv niam hais tias nkawd yuav qhia ib zaj lus txog Yexus Khetos thiab thov saib kuv niam puas kam tso lus rau nkawd qhia kuv. Kuv niam pom zoo rau thiab nws koom peb thaum ob tug tub txib qhia kuv.
Ua ntej ob tug tub txib thov kom Leonor thov Vajtswv. Nws zaj lus thov txog Vajtswv tshoov kuv lub siab heev vim nws tsis lam tau lam thov tej lo lus uas nws cim tseg, tsis li nws nthuav nws lub siab tawm. Kuv tau xav tias nws nrog nws Leej Txiv Saum Ntuj Ceeb Tsheej sib tham tiag tiag.
Ces ob tug tub txib txawm qhia peb txog Yexus Khetos. Nkawd muab ib daim duab txog Nws rau peb saib es daim duab ntawd kuv nyiam heev vim yog daim duab txog Khetos thaum nws sawv rov los lawm.
Nkawd qhia txuas ntxiv, qhia peb hais tias Yexus txhim tsa Nws lub Koom Txoos yav thaum ub es Nws yog tus hau ua ke nrog kaum ob tug Thwj Tim. Nkawd qhia peb txog txoj Kev Tso Qhov Tseeb Tseg—hais tias qhov tseeb thiab Khetos txoj cai raug tshem tawm ntawm lub ntiaj teb tom qab Khetos cov Thwj Tim tuag tas.
Nkawd qhia peb txog ib tug tub hluas 14 xyoos hu ua Joseph Smith uas, thaum tiam 1800 ntxov, mus xyuas ob peb lub koom txoos nrhiav qhov tseeb. Nyob nyob, Joseph ntxhov siab heev tuaj. Tom qab nws nyeem hauv phau Vaj Lug Kub Npaiv Npaum hais tias peb “thov txog Vajtswv”1 kom tau tswv yim, Joseph muaj siab ntseeg thiab mus tom ib koog ntoo nyob ze nws lub tsev kom thov Vajtswv saib nws yuav tsum koom lub koom txoos twg.
Nkawd ib tug tub txib tau nyeem Joseph zaj lus hais txog tej yam uas muaj los thaum nws thov Vajtswv:
“Kuv pom ib tug duab ci nyob kiag ntawm kuv taub hau lawm saud, ci tshaj lub hnub ci, uas maj mam nqis los txog thaum tus duab ci roos kuv.
“… Thaum tus duab ci los txog kuv, kuv pom ob tug Tib Neeg, uas ci ntsa iab thiab muaj yeeb koob uas yeej piav tsis tau, sawv ntawm kuv lawm saum nruab cua. Ib tug hais rau kuv, hais kuv lub npe thiab taw tes rau tus sab tod, thiab hais tias—Tus no yog Kuv Leej Tub uas Kuv Hlub. Cia li mloog Nws hais!”2
Thaum kuv mloog nkawd zaj lus ntawd, tus Vaj Ntsuj Plig Dawb Huv ua tim khawv rau kuv txog ob peb qho tseeb.
Qhov thib ib, Vajtswv mloog tag nrho Nws cov me nyuam tej kev thov Vajtswv thiab lub ntuj ceeb tsheej qhib plho rau txhua leej txhia tus—tsis yog ib co neeg tsawg tsawg xwb.
Qhov thib ob, Vajtswv Leej Txiv, Yexus Khetos, thiab tus Vaj Ntsuj Plig Dawb Huv yog peb tug neeg, koom siab kom “tib neeg txais tau txoj kev tsis txawj tuag thiab txoj sia nyob mus ib txhis”3
Qhov thib peb, peb muaj yam ntxwv zoo li Vajtswv. Peb Leej Txiv Saum Ntuj Ceeb Tsheej thiab Nws Leej Tub, Yexus Khetos, muaj cev nqaij daim tawv muaj pob txha ib yam li peb, tiam sis Nkawd yog zoo tag nrho thiab tau yeeb koob lawm, thiab tus Vaj Ntsuj Plig Dawb Huv yog ib tug ntsuj plig.4
Qhov thib plaub, dhau ntawm Joseph Smith, Yexus Khetos txum tim Nws txoj moo zoo thiab lub Koom Txoos muaj tseeb rov qab los rau hauv lub ntiaj teb. Lub hwj chim pov thawj hwj uas yog muab rau Khetos cov Thwj Tim 2,000 xyoo tas los no yog tib lub pov thawj hwj uas yog Petus, Yakaunpaus, thiab Yauhas muab rau Joseph Smith thiab Oliver Cowdery.5
Thaum kawg, peb tau kawm txog ib zaj lus tim khawv ntxiv txog Yexus Khetos: Phau Ntawv Maumoos. Yog ib co yaj saub yav thaum ub sau, phau no qhia txog ib haiv neeg uas nyob hauv tej teb chaws Amelikas ua ntej Yexus yug los, thaum Yexus nyob hauv lub ntiaj teb, thiab tom qab Nws lub neej. Los ntawm phau ntawd peb kawm saib cov neeg ntawd paub, hlub, thiab pe hawm Khetos, uas tshwm sim rau lawv pom thaum nws sawv rov los.
Tus Ntsuj Plig tshoov kuv lub siab thaum kuv kawm txog tus Cawm Seej cov lus hais rau lawv hais tias:“Saib seb, kuv yog Yexus Khetos, tus uas tej yaj saub tau ua tim khawv tias yuav los rau hauv lub ntiaj teb.”6
Ob tug tub txib muab ib Phau Ntawv Maumoos rau kuv niam wb. Wb nyeem phau ntawv ntawd thiab tau txais lus caw uas nrhiav tau nyob hauv Phau Ntawv Maumoos tom kawg, uas hais tias:
“Thiab thaum nej yuav tau txais tej no, kuv xav ntuas nej kom nej thov Vajtswv, Leej Txiv tus uas Nyob Mus Ib Txhis, los ntawm Khetos lub npe, saib tej no puas muaj tseeb; thiab yog nej thov nrog lub siab dawb paug, nrog kev mob siab ntso, thiab muaj kev ntseeg Khetos, nws yuav qhia rau nej tias tej no muaj tseeb, los ntawm tus Vaj Ntsuj Plig Dawb Huv lub hwj chim.
Thiab los ntawm lub hwj chim ntawm tus Vaj Ntsuj Plig Dawb Huv nej yuav paub qhov tseeb ntawm tag nrho txhua yam.”7
Twb tau muaj kwv yees li 45 xyoos txij thaum kuv niam wb xub kawm txog lub hwj chim thiab kev xyiv fab uas muaj vim yog muaj siab ntseeg rau ntawm Khetos. Twb yog vim rau qhov uas lawv muaj siab ntseeg rau ntawm Khetos uas tsev neeg Lopez qhia txoj moo zoo rau kuv. Twb yog vim nkawd muaj siab ntseeg rau ntawm Khetos ob tug tub txib uas hais no thiaj ncaim nkawd ob lub tsev hauv teb chaws Amelikas thiab tuaj nrhiav tau kuv niam wb. Twb yog txoj kev ntseeg ntawm tag nrho kuv cov phooj ywg no uas cog ib lub noob ntawm kev ntseeg hauv kuv niam wb uas txij thaum ntawd tau loj hlob tuaj ua ntau txoj koob hmoov nyob mus ib txhis li.
Thaum lub sij hawm no, ib xyoos dhau ib xyoos, ib yam li Thawj Tswj Hwm Russell M. Nelson tshaj tawm hais tias: “Txhua yam zoo hauv lub neej no—txhua txoj koob hmoov uas nyob mus ib txhis—yuav pib los ntawm kev ntseeg. Qhov uas peb cia Vajtswv yeej hauv peb lub neej pib los ntawm kev ntseeg tias Nws txaus siab coj peb txoj hau kev. Kev hloov siab lees txim pib los ntawm kev ntseeg tias Yexus Khetos muaj hwj chim ntxuav peb, kho peb zoo, thiab txhawb peb lub dag zog.8
Kuv caw peb txhua tus yeej meem ua kom peb txoj kev ntseeg rau ntawm Khetos loj hlob tuaj, Nws tau hloov kuv niam wb lub neej thiab Nws yuav hloov lub neej ntawm tag nrho lawv cov uas nrhiav kom tau Nws. Kuv paub hais tias Joseph Smith yog tus Yaj Saub ntawm Kev Muab Txoj Moo Zoo Txum Tim Rov Qab Los, tias Thawj Tswj Hwm Nelson yog peb tus yaj saub niaj hnub nim no, tias Yexus yog tus Khetos uas muaj sia nyob thiab peb tus Txhiv Dim, thiab tias Leej Txiv Saum Ntuj Ceeb Tsheej muaj sia nyob thiab teb Nws cov me nyuam cov lus thov txog Nws. Kuv ua tim khawv tias tej no muaj tseeb los ntawm Yexus Khetos lub npe dawb ceev, amees.