Npaj rau Khetos txoj Kev Rov Los Zaum Ob

Raws li sau tseg hauv Phau Ntawv Maumoos, rau xyoo ua ntej Yexus Khetos yug los, Xamuyees, ib tug neeg Lamas uas ncaj ncees, tau qhia tej uas yuav muaj los yav tom ntej rau haiv neeg Nifais uas feem coob tau tso qhov tseeb tseg,¹ tau qhia lawv txog tej cim uas yuav muaj thaum peb tus Cawm Seej yug los. Ntxim tu siab, uas cov neeg Nifais feem coob tsis ntseeg tej cim ntawd vim “tsis ntxim xav tias ib tug neeg zoo li Khetos [yuav] los.”²

Ib yam li ntawd, ntxim tu siab, raws li cov vaj lug kub hais, cov neeg Yudais feem coob tsis kam ntseeg tias ib tug neeg npe hu ua Yexus, tuaj Kalilais tuaj, yog tus Mexiyas uas lawv tos ntsoov.³ Yexus tau nqis los raws li cov yaj saub Henplais feem coob hais, tiam sis cov neeg phem tsis kam ntseeg nws thiab muab nws ntsia saum ntoo khaub lig, vim raws li tus yaj saub Yakhauj hais, cov neeg Yudais “nrhiav tej uas dhau kev cai.” Yog li ntawd, Yakhauj qhia tej uas yuav muaj los yav tom ntej hais tias “Vajtswv tau muab nws txoj kev tseeb meej rho tawm ntawm lawv mus lawm, thiab tau coj ntau yam uas tsis yooj yim to taub los rau lawv, vim yog lawv xav tau tej ntawd. Thiab vim yog lawv xav tau tej ntawd Vajtswv thiaj tau ua tej ntawd, xwv kom lawv yuav dawm ko taw.”⁴

Txawm tias yeej txawv heev, tsis muaj tej lus qhia twg, tej txuj ci tseem ceeb twg, los yog pes tsawg tus tim tswv nqis los saum ntuj los, ib yam li Lamas thiab Lemuyees tau pom, ⁵ uas yuav muaj hwj chim ua rau tej tug neeg hloov siab lees txim los ntseeg ib yam uas muaj tseeb. Qhov no yeej muaj thaum tej lus qhia los sis tej txuj ci tseem ceeb tsis phim tus neeg ntawd tej kev xav, tej kev xav tau, los yog tej tswv yim uas nws twb txiav txim siab txog lawm.

Cia li xav txog ob nqes vaj lug kub no thiab muab sib piv, thawj nqe los ntawm tus Thwj Tim Povlauj thaum nws hais txog lub caij nyoog kawg, piav txog tib neeg tej kev coj ua, thiab nqe thib ob los ntawm Amas tus yaj saub uas qhia tias Vajtswv ua li cas kom ua Nws txoj hauj lwm rau tib neeg. Qhov thib ib los ntawm Povlauj:

“Koj yuav tsum nco ntsoov hais tias thaum lub sij hawm uas ntiaj teb yuav kawg yuav muaj kev ntxhov siab heev.

“Rau qhov tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khav theeb, yuav muab hlob, yuav tsis mloog niam txiv lus, yuav tsis ris luag txiaj ntsig, thiab yuav saib tsis taus Vajtswv txoj kev cai;

“Lawv yuav tsis sib hlub, tsis zam txim rau lwm tus, nyiam taug xaiv, tsis tswj lawv lub siab, ua neeg tsiv tsaim thiab tsis nyiam ua zoo,

“Lawv yuav ua neeg ntxeev siab, ua neeg siab heev, thiab lawv saib lawv tsim txiaj dua lwm tus; lawv nyiam kev lom zem heev dua nyiam Vajtswv; …

“Niaj hnub kawm, tiam sis lawv tsis paub hais tias lub ntsiab lus yog li cas tiag.”⁶

Thiab tej lus no los ntawm Amas uas qhia txog ib lub ntsiab cai tseem ceeb ntawm Yexus Khetos txoj moo zoo: “Nim no tej zaum koj yuav xav tias qhov no yog kev ruam nyob ntawm kuv; tiam sis saib seb kuv hais rau koj tias, los ntawm tej yam me me thiab yooj yim thiaj muaj tej yam tseem ceeb los; thiab muaj ntau zaus uas kev ua tej yam me ua rau cov neeg txawj ntse poob ntsej muag.”⁷

Peb nyob hauv ib lub ntiaj teb uas muaj kev txawj ntse ntau thiab uas muaj laj lim tswv yim ntau. Txawm yog li ntawd los, feem ntau tej yam no npog lub hauv paus tsis khov uas tej ntawd nyob saud. Yog li ntawd, tej yam no tsis coj peb los mus rau qhov tseeb tiag thiab ncav txog Vajtswv thiab lub hwj chim txais kev tshwm sim, kev txais qhov kev txawj ntse ntawm sab ntsuj plig, thiab rais los mus muaj siab ntseeg rau ntawm Yexus Khetos txaus yuav cawm dim.⁸

Nco qab ntsoov txog peb tus Tswv cov lus rau Thaumas thiab lwm cov Thwj Tim thaum hmo ua ntej Nws theej txhoj rau peb: “Yexus teb Thaumas hais tias, Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”⁹

Rau lawv cov uas muaj qhov muag pom, pob ntseg hnov, thiab siab ntsws hnov, peb yuav tsum to taub zoo hais tias lub sij hawm uas Yexus Khetos Rov Los Zaum Ob los ze zuj zus tiag. Muaj tseeb tiag, cov neeg uas nyob hauv lub ntiaj teb thaum Nws rov los yuav muaj kev cov nyom ntau, tiam sis txawm yog li ntawd, cov ntseeg tsis tas ntshai.

Nim no kuv yuav nyeem los ntawm lub Koom Txoos tej Ntsiab Lus ntawm Txoj Moo Moo hauv qab lub ntsiab lus “Yexus Khetos Kev Rov Los Zaum Ob”:

“Thaum tus Cawm Seej los dua ib zaug ntxiv, Nws yuav los muaj hwj chim thiab yeeb koob kom txais lub ntiaj teb ua Nws lub nceeg vaj. Nws qhov Kev Rov Los Zaum Ob yuav yog qhov chiv keeb ntawm lub Caij Milenias.

“Qhov Kev Rov Los Zaum Ob yuav yog ib lub sij hawm ntxim ntshai ntxim quaj nyiav rau cov neeg phem, tiam sis yuav yog ib hnub nyob kaj siab lug rau cov neeg ncaj ncees. Tus Tswv hais tias:

“‘Vim lawv cov uas muaj tswv yim thiab tau txais qhov tseeb, thiab tau cia tus Vaj Ntsuj Plig Dawb Huv ua lawv tus coj kev, thiab tsis tau raug dag ntxias—kuv hais tseeb rau nej tias, lawv yuav tsis raug muab ntov kom vau thiab muab pov rau hauv hluav taws, tiam sis yuav tiv taus hnub ntawd.

“‘Thiab yuav muab lub ntiaj teb rau lawv ua qub txeeg qub teg; thiab lawv yuav huaj vam thiab muaj zog zuj zus tuaj, thiab lawv cov me nyuam yuav loj hlob tsis muaj kev txhaum los mus rau kev cawm seej.

“‘Vim tus Tswv yuav nyob nrog nraim lawv; thiab nws lub yeeb koob yuav nyob rau saum lawv, thiab nws yuav ua lawv tus vaj ntxwv thiab tus uas muab kev cai rau lawv.’ (Lus Qhuab Qhia thiab Kev Khi Lus 45:57–59).”¹⁰

Thaum peb npaj rau Yexus Khetos Kev Rov Los Zaum Ob, kuv xav nplij cov muaj siab ntseeg lub siab nrog cov lus los ntawm Phau Qub tus yaj saub Amaus hais tias: “Tus Tswv yuav ua ib yam dab tsi, nws yeej xub qhia rau nws [cov yaj saub] ua ntej nws mam ua.”¹¹

Niaj hnub nim no, tus Tswv tus yaj saub rau lub ntiaj teb, Thawj Tswj Hwm Russell M. Nelson, tau qhia tswv yim rau peb tsis ntev tas los no hais tias: “Yexus Khetos txoj moo zoo yog txoj moo zoo ntawm kev hloov siab lees txim. Vim yog tus Cawm Seej txoj Kev Theej Txhoj, Nws txoj moo zoo caw peb kom yeej meem hloov, loj hlob tuaj, thiab rais los mus ua neeg dawb huv dua. Yog ib txoj moo zoo ntawm kev cia siab, kev kho mob, thiab kev ua zoo zuj zus mus. Yog li ntawd, txoj moo zoo yog ib zaj lus txog kev xyiv fab! Peb sab ntsuj plig zoo siab thaum peb tshais ib ruam mus tom ntej rau qhov zoo.”¹²

Kuv ua tim khawv tiag tias muaj Vajtswv tiag tiag thiab tej txuj ci tseem ceeb los rau coob leej ntau tus neeg txhua txhia hnub txawm lawv muaj los pluag los xij peem. Muaj tseeb tiag, tej yam muaj los dawb ceev feem ntau tsis tshua hais txog, twb yog vim tej ntawd los saum ntuj los thiab vim yog tej zaum lwm tus neeg tsis paub tab luag thuam.

Hais txog qhov no, tus kawg ntawm cov yaj saub hauv Phau Ntawv Maumoos, Maulaunais, tau pab peb nco qab ntsoov hais tias:

“Thiab kuv rov hais rau cov uas xyeej Vajtswv tej kev tshwm sim, thiab hais tias tej ntawd tsis muaj ntxiv lawm, hais tias tsis muaj tej kev tshwm sim, thiab tsis muaj tej kev qhia tej yuav muaj los yav tom ntej, thiab tsis muaj tej txiaj ntsim, thiab tsis muaj txoj kev kho mob zoo, thiab tsis muaj txoj kev txawj hais lwm yam lus, thiab tsis muaj txoj kev txhais lwm yam lus;

“Saib seb kuv hais rau nej tias, tus uas xyeej tej no ces twb tsis paub Khetos txoj moo zoo; muaj tseeb tiag, nws twb tsis tau nyeem cov vaj lug kub; yog tias nws nyeem, ces nws tsis to taub.

“Vim puas yog peb twb tau nyeem tias Vajtswv yeej zoo ib yam nag hmo, hnub no, thiab mus ib txhis, thiab nws twb tsis muaj ib yam uas nws ua txawv thiab tsis muaj ib nyuag qhov uas txawj hloov li?”¹³

Kuv xaus kuv cov lus hais cov lus qhia tej yam uas yuav los yav tom ntej los ntawm tus Yaj Saub Joseph Smith thaum nws tos ntsoov Yexus Khetos txoj Kev Los Zaum Ob: “Peb puas yuav kam ua ib txoj hauj lwm loj thiab tseem ceeb npaum no? Mus lawm tom ntej txhob poob qab. Ua siab loj, kuv cov kwv tij [thiab kuv cov muam]; mus lawm tom ntej kom kov yeej tau! Nej lub siab cia li xyiv fab, thiab cia li zoo siab heev.”¹⁴ Kuv kuj ua tim khawv li no los ntawm Yexus Khetos lub npe, amees.