Lub Tuam Rooj Sab Laj
Kev Kaj Siab Lug hauv lub Caij Nyoog Nyuaj Heev
Kaum Hli Ntuj xyoo 2021 lub tuam rooj sab laj

Kev Kaj Siab Lug hauv lub Caij Nyoog Nyuaj Heev

Los ntawm Txwj Laug Quentin L. Cook

Ntawm Pawg Kaum Ob tug Thwj Tim

Yeej tseem ceeb kawg nkaus kom peb nrhiav kev kaj siab lug rau peb tus kheej.

Tsis ntev tas los kuv tau mus muab ib feem ntawm lub nroog Nauvoo fij tseg. Thaum ntawd kuv tau muaj cib fim mus xyuas lub Tsev Kaw Liberty nyob hauv Missouri. Nyob hauv lub tsev kaw, kuv tau xav txog tej xwm txheej uas yog ib feem tseem ceeb ntawm lub Koom Txoos zaj keeb kwm. Haiv Neeg Ntseeg lub neej raug hem thaum tus tswv xeev Missouri tsa kev txib kom muab lawv tua tuag. Tsis tas li ntawd xwb, tus Yaj Saub Joseph thiab ob peb tug kwv luag tau raug kaw tsis raws li kev ncaj hauv lub Tsev Kaw Liberty. Ib qho uas ua rau cov neeg tsim txom peb cov mej zeej yog qhov uas cov mej zeej feem coob tau tawm tsam kev ua qhev.1 Kev tsim txom Joseph Smith thiab cov mej zeej sab heev li ntawd yeej yog ib tug yam ntxwv txog tib neeg txoj kev ywj siab xaiv tej yam tsis ncaj ncees kom ua phem rau cov neeg ncaj ncees. Lub sij hawm uas Joseph nyob hauv lub Tsev Kaw Liberty qhia tias qhov uas yus raug tsim txom tsis yog kev ua pov thawj tias tus Tswv tsis pom zoo rau nej los sis Nws tau thim Nws cov koob hmoov.

Kuv txais kev tshoov siab thaum kuv nyeem qhov uas tus Yaj Saub Joseph Smith hais thaum nws raug kaw hauv lub Tsev Kaw Liberty: “Auj Vajtswv, koj nyob qhov twg? Thiab lub tsev ntaub uas npog koj qhov chaw nkaum nyob qhov twg?”2 Joseph thov xav paub seb tus Tswv cov neeg yuav “raug tej kev ua tsis yog thiab tej kev quab yuam tsis raug cai no ntev npaum li cas.”3

Daim Duab
Txwj Laug Cook tuaj xyuas lub Tsev Kaw Liberty

Thaum kuv sawv hauv lub Tsev Kaw Liberty, tus Tswv tej lus teb tau tshoov kuv lub siab hais tias: “Kuv tus tub, koj cia li nyob kaj siab lug; koj tej kev nyuaj siab thiab koj tej kev txom nyem yuav muaj nyob ib nyuag ntus xwb; Thiab tom qab ntawd, yog koj ua tib zoo nyiaj mus, Vajtswv yuav tsa koj mus nto ntuj.4” Cov lus no qhia meej tias kev tsim txom pab tau peb npaj zoo rau ib txoj hmoov xilethi-aus uas nyob mus ib txhis.5

Tus Cawm Seej tej lus uas muaj nqis hais tias, “Kuv tus tub, koj cia li nyob kaj siab lug”6 yeej nplij kuv lub siab thiab yog tej lus tseem ceeb rau peb lub caij nyoog. Cov lus no ua rau kuv nco txog Nws tej lus qhia Nws cov thwj thaum Nws tau ua hauj lwm qhuab qhia.

Ua ntej Khetos raug txom nyem hauv lub Vaj Khexemanes thiab saum ntoo khaub lig, Nws tau txib Nws cov thwj tim kom lawv “ib leeg yuav tsum hlub ib leeg; ib yam li kuv hlub nej”7 thiab tom qab ntawd nplij lawv lub siab thaum Nws hais li no tias: “Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj, tsis txhob nyuaj siab thiab tsis txhob ntshai.”8

Ib lub npe ntawm tus Tswv thiab tus Cawm Seej, Yexus Khetos, yog “tus Tub Vaj Ntxwv ntawm Kev Thaj Yeeb.”9 Thaum kawg Nws lub nceeg vaj yuav muaj kev kaj siab lug thiab kev hlub.10 Peb cia siab tos ntsoov thaum tus Mexiyas yuav kav hauv lub caij milenias.

Txawm peb tos ntsoov lub caij milenias no, peb paub tias lub ntiaj teb yuav tsis muaj kev thaj yeeb thiab kev sib haum xeeb hauv peb hnub nyoog.11 Nyob hauv kuv lub neej, kuv ib txwm tsis tau pom tib neeg sib cav npaum li no. Peb raug luag cov lus hais uas npau taws, nyiam tsim kev sib cav sib ceg, thiab tej yam uas ua rau kev kaj siab lug puas tsuaj.

Tus Tswv tsis tau cog lus tias yuav muaj txoj kev thaj yeeb hauv lub ntiaj teb mus txog thaum Yexus Khetos txoj Kev Los Zaum Ob. Tus Cawm Seej tau qhia Nws cov Thwj Tim tias Nws ntiag tug hauj lwm hauv lub ntiaj teb yeej yuav tsis tsim kev thaj yeeb nyob txhua qhov chaw. Nws qhia tias, “Nej tsis txhob xav hais tias, yog kuv coj kev thaj yeeb los rau ntiaj teb.”12 Kev thaj yeeb nyob thoob plaws lub ntiaj teb tsis yog ib feem ntawm tus Cawm Seej txoj hauj lwm thaum xub thawj. Niaj hnub nim no tsis muaj kev thaj yeeb nyob thoob plaws.

Tiam sis peb muaj tau kev kaj siab lug rau peb tus kheej txawm yog muaj kev chim siab, kev sib cav sib ceg, thiab kev sib cais uas tawm tsam peb lub ntiaj teb hnub no. Yeej tseem ceeb kawg nkaus kom peb nrhiav kev kaj siab lug rau peb tus kheej. Ib zaj nkauj qhuas Vajtswv zoo nkauj heev uas Tij Laug Nik Day tau sau rau cov tub hluas ntxhais hluas niaj hnub no hu ua “Kev Kaj Siab Lug los ntawm Khetos” hais tias, “Thaum koj tsis kaj siab lug, muaj tus Tswv Yexus.”13 Peb tau koob hmoov vim peb muaj zaj nkauj qhuas Vajtswv no ua ntej phaum mob thoob ntiaj teb COVID-19.

Zaj nkauj no yeej qhia txog qhov uas peb nrhiav kev thaj yeeb nyab xeeb thiab qhia tias kev kaj siab lug yeej nyob ntawm qhov uas yus tsom ntsoov rau Yexus Khetos lub neej thiab Nws ntiag tug hauj lwm. Thawj Tswj Hwm Joseph F. Smith qhia hais tias, “Yeej yuav tsis muaj kev sib hlub thiab kev thaj yeeb nyob rau hauv lub ntiaj teb … ua ntej tib neeg txaus siab txais Vajtswv qhov tseeb thiab Vajtswv zaj lus …, thiab lees yuav nws lub hwj chim thiab txoj cai.”14

Txawm peb yeej yuav ua hauj lwm kom muaj kev thaj yeeb thoob plaws lub ntiaj teb tsis tu tsis tseg, peb tau kawm tias peb yuav nyob kaj siab lug, raws li Yexus Khetos qhia. Phau Lus Qhuab Qhia thiab Kev Khi Lus qhia txog txoj ntsiab cai no hais tias: “Tiam sis kawm hais tias tus uas ua tej hauj lwm ncaj ncees yuav txais nws lub nqi zog, uas yog kev kaj siab lug hauv lub ntiaj teb no thiab txoj sia nyob mus ib txhis hauv lub neej tom ntej.”15

“Tej hauj lwm ncaj ncees” twg yuav pab peb nyiaj dhau tej kev sib cav thiab ua kom tsis txhob sib ceg thiab nrhiav tau kev kaj siab lug hauv lub ntiaj teb no? Tag nrho Khetos tej lus qhia mus rau txoj kev no. Kuv yuav hais txog ob peb qho uas kuv xav tias tseem ceeb heev.

Qhov thib Ib: Hlub Vajtswv, Ua Raws Li Nws cov Lus Txib, thiab Zam Txim Pub rau Sawv Daws

Thawj Tswj Hwm George Albert Smith tau los ua tus Thawj Tswj Hwm ntawm lub Koom Txoos nyob rau xyoo 1945. Thaum nws yog ib tug Thwj Tim tib neeg paub tias nws yog ib tug thawj coj uas nyiam kev thaj yeeb. 15 xyoos ua ntej nws tau los ua tus Thawj Tswj Hwm, yeej tsis muaj kev thaj yeeb li vim txoj kev poob nyiaj txiag thoob plaws lub ntiaj teb tau sim txhua tus lub siab, tom qab ntawd muaj kev puas tsuaj thiab kev tuag ntau nyob hauv txoj Kev Tsov Rog Thoob Ntiaj Teb thib Ob.

Tom qab txoj Kev Tsov Rog Thoob Ntiaj Teb thib Ob tas lawm, thawj zaug nws hais lus hauv lub tuam rooj sab laj tom qab nws yog tus thawj tswj hwm nyob rau lub Kaum Hli Ntuj xyoo 1945, Thawj Tswj Hwm Smith ua rau Haiv Neeg Ntseeg nco txog tus Cawm Seej tej lus caw kom hlub lawv cov kwv tij zej zog thiab zam txim pub rau lawv cov yeeb ncuab, ces nws qhia tias, “Tag nrho Tsoom Haiv Neeg Ntseeg hauv Hnub Nyoog Kawg yuav tsum xav muaj ib lub siab li no yog tias lawv xav sawv rau ntawm Nws lub xub ntiag thiab ua kom Nws tos txais lawv rov qab los tsev.”16

Qhov thib Ob: Nrhiav tej Txiaj Ntsim ntawm tus Ntsuj Plig

Nyob hauv nws tsab ntawv rau cov neeg Kalatias, tus Thwj Tim Povlauj tau piav txog qhov uas muaj tej hauj lwm ncaj ncees uas ua rau peb tsim nyog txais tau Vajtswv lub nceeg vaj ua peb tug thiab tej hauj lwm uas ua rau peb tsis tsim nyog yog peb tsis hloov siab lees txim. Tej hauj lwm uas pab peb ua neeg tsim nyog yog los ntawm tus ntsuj plig xws li “kev muaj lub siab hlub, kev xyiv fab, kev kaj siab lug, ua siab ntev, muaj siab dawb siab zoo, kev ntseeg, lub siab mos muag thiab lub siab ncaj.”17 Povlauj kuj hais txog qhov uas peb yuav pab ris lwm tus lub nra thiab tsis txhob nkees ua zoo.18 Tej hauj lwm uas tsis ncaj ncees los muaj kev ntxub, kev chim siab, thiab kev sib cav sib ceg.19

Ib zaj lus qhia hauv Phau Qub zoo hais txog Leej Txiv Anplaham. Anplaham thiab Lauj, nws tij tub, nkawd nplua nuj heev tiam sis nkawd nyob tsis taus ua ke. Xwv kom tsis txhob muaj kev sib cav, Anplaham tau cia Lauj xaiv thaj av uas Lauj xav tau. Lauj tau xaiv lub hav Yauladees, vim muaj dej txhawv txhua qhov thiab zoo nkauj heev. Anplaham tau xaiv thaj chaw Males uas tsis tshua zoo noob. Cov vaj lug kub qhia tias Anplaham tau tsa tsev ntaub thiab ua “ib lub thaj ua chaw fij khoom rau tus Tswv.”20 Tiam sis Lauj tau “tsa tsev ntaub nyob ze lub nroog Xaudoos.”21 Zaj no qhia meej tias peb yuav tsum muaj siab xav hais kom sib haum thiab rhuav txoj kev sib cav sib ceg thaum hais txog tej yam uas tsis nyob ntawm kev ncaj ncees thiaj li yuav muaj kev thaj yeeb. ib yam li Vaj Ntxwv Npeyamis qhia tias, “Nej yuav tsis muaj ib lub siab xav ua kom lwm tus raug mob, tiam sis yuav xav nyob kaj siab lug.”22 Tiam sis hais txog kev ncaj ncees thiab cov lus txib ua raws li peb cov lus qhuab qhia, peb yuav tsum nyob ruaj nrees thiab khov kho.

Yog peb xav muaj kev kaj siab lug uas yog lub nqi zog ntawm tej hauj lwm ncaj ncees, peb yuav tsis txhob tsa peb tej tsev ntaub ze lub ntiaj teb. Peb yuav tsa peb tej tsev ntaub nyob ze lub tuam tsev.

Qhov thib Peb: Siv Kev Ywj Siab Xaiv Kev Ncaj Ncees

Txoj kev kaj saib lug thiab kev ywj siab xaiv yeej sib ntswg ua ke nyob hauv txoj hau kev cawm seej. Raws li qhia hauv Zaj Lus Piav txog Txoj Moo Zoo hu ua “Kev Ywj Siab Xaiv thiab Kev Lav Ris,” “Kev ywj siab xaiv yog kev muaj peev xwm thiab lub cib fim uas Vajtswv muab rau tib neeg xaiv thiab ua li lawv lub siab nyiam.”23 Yog li ntawd, kev ywj siab yog lub ntsiab ntawm kev loj hlob tuaj thiab tej yam peb kawm thaum peb coj raws li tus Cawm Seej.24

Kev ywj siab xaiv yog lub ntsiab cai tseem ceeb nyob hauv Kev Sab Laj Saum Ntuj ua ntej lub neej no thiab yog qhov uas ua rau cov uas coj raws li Khetos thiab cov uas coj raws li Dab Ntxwg Nyoog tsis sib haum.25 Yog peb muab kev muab hlob thiab kev xav yuam lwm tus tso tseg thiab yog peb xaiv tus Cawm Seej ces peb yuav muaj Nws txoj kev kaj thiab Nws txoj kev kaj siab lug. Tiam sis yuav nyuaj rau tib neeg nyob kaj siab lug thaum lawv siv lawv txoj kev ywj siab xaiv ua phem rau lwm tus.

Kuv paub zoo tias txoj kev kaj siab lug uas peb hnov hauv peb lub siab thaum ntawd vim peb paub tias tus Cawm Seej ntawm lub ntiaj teb yuav ua li cas kom pab peb. Tau hais txog qhov no nyob hauv phau Qhia Kuv Txoj Moo Zoo: “Thaum peb tso siab rau Yexus Khetos txoj Kev Theej Txhoj, Nws yuav pab peb nyiaj dhau peb tej kev sim siab thiab kev mob kev nkees. Peb yuav muaj kev xyiv fab, kev kaj siab lug, thiab kev nplij siab puv npo. Thiab tag nrho tej yam tsis ncaj hauv lub neej no yuav zoo dhau los ntawm Yexus Khetos txoj Kev Theej Txhoj.”26

Qhov thib Plaub: Txhim Tsa Xi-oos hauv Peb lub Siab thiab Peb lub Tsev

Peb yog Vajtswv cov me nyuam peb thiaj li yog Nws tsev neeg. Peb kuj yog ib feem ntawm ib tsev neeg nyob hauv lub ntiaj teb no. Peb tsev neeg yog lub hauv paus ntawm kev zoo siab thiab kev kaj siab lug. Thawj Tswj Hwm Russell M. Nelson tau qhia peb—thiab nyob hauv phaum mob no peb tau kawm tias—kev teev tiam Vajtswv hauv tsev uas lub Koom Txoos txhawb nqa “ua rau txhua yim neeg haj yam muaj hwj chim … [kom] pauv lawv lub tsev los ua ib qho chaw cawm sia vim muaj kev ntseeg.”27 Yog peb teev tiam Vajtswv li no hauv peb lub tsev, ces peb kuj yuav muaj tus Cawm Seej txoj kev kaj siab lug.28 Peb paub tias muaj neeg coob uas tsis muaj tej tsev ncaj ncees thiab muaj kev tsis sib haum nrog cov uas xaiv tej yam tsis ncaj ncees. Tus Cawm Seej muaj peev xwm pov hwm nej thiab muab kev kaj siab lug kom coj nej mus rau kev nyab xeeb thiab tiv thaiv nej kom txhob raug tej cua daj cua dub ntawm lub neej no.

Kuv hais tseeb rau nej tias kev xyiv fab, kev hlub, thiab kev txaus siab uas muaj hauv tej tsev neeg uas ncaj ncees yeej tsim kev kaj siab lug thiab kev zoo siab. Kev hlub thiab kev ua siab dawb yeej yog lub ntsiab ntawm kev muaj Xi-oos hauv peb lub siab thiab lub tsev.29

Qhov thb Tsib: Ua Raws Li tus Yaj Saub Qhia Niaj Hnub No

Peb txoj kev kaj siab yuav loj tuaj thaum peb ua raws li tus Tswv tus yaj saub hais, Thawj Tswj Hwm Russell M. Nelson. Tsis ntev ces peb yuav muaj cib fim mloog nws hais. Vajtswv tau npaj nws ua ntej ntuj tsim teb raug kom ua txoj hauj lwm no. Tej yam hauv nws lub neej uas tau pab nws npaj siab yeej ua rau peb xav tsis thoob.30

Nws tau qhia peb tias peb yuav “muaj kev kaj siab lug thiab kev xyiv fab, tsis hais thaum peb raug kev ntxhov siab” thaum peb siv zog ua neeg zoo li peb tus Cawm Seej, Yexus Khetos.31 Nws tau hais kom peb hloov siab lees txim txhua hnub, thiaj li txais tau tus Tswv lub hwj chim uas ntxuav peb huv, kho peb zoo, thiab txhawb peb lub dag zog.32 Kuv ua tim khawv tias peb tus yaj saub uas peb hlub twb tau txais kev tshwm sim thiab nws tseem txais kev tshwm sim uas los saum ntuj los.

Txawm peb hwm thiab txhawb nqa nws ua peb tus yaj saub, peb teev tiam peb Leej Txiv Saum Ntuj Ceeb Tsheej thiab peb tus Cawm Seej, Yexus Khetos. Tus Vaj Ntsuj Plig Dawb Huv txhawb pab peb.

Kuv ua tim khawv thiab ua pov thawj li ib tug thwj tim tias Yexus Khetos, tus Cawm Seej thiab tus Txhiv Dim lub ntiaj teb, Nws coj Nws lub Koom Txoos. Nws lub neej thiab ntiag tug hauj lwm theej peb lub txhoj yeej yog lub hauv paus ntawm kev kaj siab lug. Nws yog tus Tub Vaj Ntxwv ntawm Kev Thaj Yeeb. Kuv hais kuv zaj lus tim khawv tseeb tias Nws muaj txoj sia nyob. Los ntawm Yexus Khetos lub npe, amees.

Lus Cim

  1. “Cov neeg nyob hauv Independence tsis tau nyiam qhov uas Tsoom Haiv Neeg Ntseeg tau qhia txoj moo zoo rau cov Neeg Qhab thiab tsis pom zoo rau kev ua qhev” (Saints: The Story of the Church of Jesus Christ nyob hauv the Latter Days, phau 1, The Standard of Truth, 1815–1846 [2018], 172).

  2. Lus Qhuab Qhia thiab Kev Khi Lus 121:1.

  3. Lus Qhuab Qhia thiab Kev Khi Lus 121:3.

  4. Lus Qhuab Qhia thiab Kev Khi Lus 121:7–8.

  5. Saib 2 Nifais 2:11–15.

  6. Lus Qhuab Qhia thiab Kev Khi Lus 121:7.

  7. Yauhas 13:34.

  8. Yauhas 14:27.

  9. Yaxayas 9:6; 2 Nifais 19:6. Tus Cawm Seej kuj qhia hais tias, “Tus uas ua rau neeg nyob sib haum, tus ntawd tau koob hmoov, Vajtswv yuav hu hais tias, nws yog Vajtswv me nyuam” (Mathais 5:9).

  10. “Muaj kev txiav txim thiab kev txim lij” tas mus li (saib Yaxayas 9:6–7; 2 Nifais 19:6–7; kuj saib Kalatias 5:22).

  11. Saib Lus Qhuab Qhia thiab Kev Khi Lus 1:35. Thawj Tswj Hwm Wilford Woodruff tau hais li no nyob rau xyoo 1894 thiab rov qab hais nyob rau xyoo 1896 (saib The Discourses of Wilford Woodruff, tus xaiv yog G. Homer Durham [1946], 251–52; kuj saib Marion G. Romney, nyob hauv Conference Report, Plaub Hlis Ntuj 1967, 79–82; Ezra Taft Benson, “The Power of the Word,” Ensign, Tsib Hlis Ntuj 1986, 79–80; Dallin H. Oaks, “Preparation for the Second Coming,” Liahona, Tsib Hlis Ntuj 2004, 9).

  12. Mathais 10:34.

  13. Nik Day, “Peace in Christ,” 2018 zaj nkauj qhia ntsiab lus rau cov tub hluas ntxhais hluas, Liahona, Ib Hlis Ntuj 2018, 54–55; New Era, Ib Hlis Ntuj 2018, 24–25. Zaj nkauj “Peace in Christ” qhia tias:

    Yog peb ua raws li Yexus,

    Peb nyob kaj siab lug.

    Muaj kev cia siab

    Thaum poob siab lawm.

    Nws muab dag zog

    Kom peb mus txog kawg.

    Nws pov hwm peb

    Hauv cua daj cua dub.

    Yog xav nyob kaj siab lug,

    Muaj tus Tswv Yexus

  14. Teachings of Presidents of the Church: Joseph F. Smith (1998), 400.

  15. Lus Qhuab Qhia thiab Kev Khi Lus 59:23.

  16. Saib George Albert Smith, nyob hauv Conference Report, Kaum Hli Ntuj 1945, 169–70.

  17. Kalatias 5:22–23.

  18. Saib Kalatias 6:2, 9.

  19. Saib Kalatias 5:20.

  20. Chiv Keeb 13:18.

  21. Chiv Keeb 13:12.

  22. Mauxiyas 4:13.

  23. Gospel Topics, “Agency and Accountability,” topics.ChurchofJesusChrist.org.

  24. Peb “muaj kev ywj siab xaiv txoj kev nyob ywj siab thiab txoj sia nyob mus ib txhis, los dhau ntawm tus Neeg Nruab Nrab … [rau] txhua leej txhua tus” (2 Nifais 2:27). Kev ywj siab xaiv kuj cia lwm tus xaiv ua phem heev kom lwm tus raug mob thiab raug txom nyem thiab tej lub sij hawm muab lawv tua tuag. Cov vaj lug kub piav meej tias tus Tswv Vajtswv tau muab kev ywj siab rau tib neeg kom lawv yuav xaiv qhov zoo los sis xaiv qhov phem (saib 2 Nifais 2:16).

  25. Saib Gospel Topics, “Agency and Accountability,” topics.ChurchofJesusChrist.org.

  26. Qhia Kuv txoj Moo Zoo: Phau Ntawv Qhia cov Tub Txib (2019), 52, ChurchofJesusChrist.org.

  27. Russell M. Nelson, “Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liahona, Kaum Ib Hlis Ntuj 2018, 113.

  28. Saib Lus Qhuab Qhia thiab Kev Khi Lus 19:23.

  29. Kuv tau koob hmoov vim kuv loj hlob hauv ib lub tsev uas nyob kaj siab lug. Feem ntau yog los ntawm peb niam, uas yog ib tug mej zeej rau siab ntseeg hauv lub Koom Txoos. Kuv txiv yeej zoo thiab tiam sis nws tsis tshua muaj siab ntseeg. Peb niam tau hwm peb txiv thiab tsis tau sib cav. Nws tau qhia peb cov me nyuam kom thov Vajtswv thiab mus rau lub koom txoos. Nws kuj qhia peb kom ib leeg hlub thiab pab ib leeg (saib Mauxiyas 4:14–15). Kev loj hlob hauv ibl ub tsev zoo li no ua rau peb nyob kaj siab lug thiab yog ib txoj koob hmoov loj heev hauv kuv lub neej.

  30. Russell M. Nelson tau kawm Utah Medical School tiav thaum nws muaj 22 xyoos. Nws yeej xav ua ib tug kws phais mob thiab tau txais kev cob qhia zoo tshaj plaws hauv tej tuam tsev kawm kev kho mob. Nws tau ua tub rog nyob Kaublim Teb thiab Nyijpooj Teb. Ntau xyoo nws tau tsim tej kev phais lub plawv thiab nws muaj npe thoob plaws lub ntiaj teb. Txawm yog txoj kev npaj muaj txuj ci kho mob no tau foom koob hmoov rau tib neeg nyob thoob plaws hauv lub ntiaj teb no los, Thawj Tswj Hwm Nelson txoj kev npaj sab ntsuj plig yeej tseem ceeb tshaj. Nws yog leej txiv rau ib tsev neeg loj uas muaj me nyuam thiab xeeb ntxwv coob. Nws tau rau siab ntseeg pab nws tsev neeg thiab lub Koom Txoos tas nws lub neej.

  31. Saib Russell M. Nelson, “Zaj Lus Qhib,” Liahona, Tsib Hlis Ntuj 2020, 6; kuj saib Russell M. Nelson, “Kev Xyiv Fab thiab Kev Nyiaj Kom Dhau ntawm Sab Ntsuj Plig,” Liahona, Kaum Ib Hlis Ntuj 2016, 81–84.

  32. Russell M. Nelson, “Zaj Lus Qhib,” 6.