Tsa Nej lub Teeb
Kuv caw nej ua li no xwb: cia li qhia txog txoj moo zoo. Ua li nej ua thiab tsa lub teeb mus.
Ob peb xyoos tas los, kuv zaum ua ke nrog ib tug uas tsis ntseeg Vajtswv thaum caij nyab hoom mus rau Peru. Nws nug kuv seb vim li cas kuv ntseeg Vajtswv. Thaum wb sib tham, kuv qhia nws tias kuv ntseeg Vajtswv vim Joseph Smith tau pom Nws—ces kuv hais tias qhov uas kuv paub txog Vajtswv yog los ntawm tej xwm uas tshwm sim rau kuv ntawm sab ntsuj plig. Kuv hais txog kuv txoj kev ntseeg tias “txhua yam qhia tias muaj ib tug Vajtswv”1 thiab nug nws seb nws ntseeg dab tsi txog qhov uas vim li cas ho tsim tau lub ntiaj teb uas muaj ntau txoj sia. Nws teb hais tias tej zaum “qhov raug xwm txheej” tau muaj li txij puag thaum ub los. Thaum kuv piav tias ntshe ib “qho raug xwm txheej” li ntawd nyaj yuav tsis tsim ib lub ntiaj teb li no, nws nyob twj ywm ib me pliag ces nws hais tias, “Kuv tsis muaj lus teb.” Kuv nug nws seb nws puas kam nyeem Phau Ntawv Maumoos. Nws hais tias nws mam nyeem, yog li ntawd kuv xa ib phau rau nws.
Ntau xyoo tom qab ntawd, kuv tau ua phooj ywg tshiab thaum kuv nyob hauv tshav nyab hoom hauv Lagos, Nigeria. Wb tau sib tham thaum nws saib kuv daim ntawv hla ciam teb. Kuv nug nws txog nws txoj kev ntseeg ntuj, thiab nws hais tias nws ntseeg Vajtswv heev. Kuv tau qhia nws txog kev xyiv fab los ntawm Yexus Khetos txoj moo zoo thiab nug nws seb nws puas xav kawm los ntawm cov tub txib. Nws hais tias nws xav ua li ntawd ces nws tau kawm thiab ua kev cai raus dej. Ib los sis ob xyoos tom qab ntawd, thaum kuv taug kev hauv tshav nyab hoom Liberia, kuv hnov ib tug hu kuv lub npe. Kuv tig mus saib tib tug tub hluas uas luag nyav. Wb sib khawm thiab nws qhia kuv tias nws tseem mus rau lub Koom Txoos thiab pab cov tub txib qhia nws tus hluas nkauj.
Nim no, kuv tsis paub yog tias kuv tus phooj ywg uas tsis ntseeg Vajtswv tau nyeem Phau Ntawv Maumoos los sis koom lub Koom Txoos. Kuv tus phooj ywg thib ob tau koom lawm. Rau nkawd ob leeg, kuv txoj kev lav ris2—kuv lub cib fim—zoo ib yam: tsa lub teeb ntawm txoj moo zoo—hlub, qhia, thiab caw nkawd xwb.3
Cov kwv tij thiab cov muam, kuv tau txais cov koob hmoov los ntawm kev qhia txog txoj moo zoo, thiab cov koob hmoov ntawd yeej zoo kawg. Nov yog ob peb txoj koob hmoov:
Kev Qhia txog Txoj Moo Zoo Ua rau Peb Muaj Kev Xyiv Fab thiab Kev Cia Siab
Peb paub tias peb tau nrog peb Leej Txiv Saum Ntuj Ceeb Tsheej nyob ua ntej peb tau los rau hauv lub ntiaj teb no4 thiab tau tsim lub ntiaj teb no kom txhua tus neeg muaj cib fim muaj ib lub cev, kawm, thiab loj hlob kom thiaj li txais tau txoj sia nyob mus ib txhis—uas zoo li Vajtswv txoj sia.5 Leej Txiv Saum Ntuj Ceeb Tsheej paub tias peb yuav raug txom nyem thiab ua txhaum hauv lub ntiaj teb no, Nws thiaj li txib Nws Leej Tub, tus uas ua “neej uas piv tsis tau rau lwm tus li”6 thiab ua kev txi theej peb lub txhoj mus ib txhis li7 ua rau peb muaj cib fim txais kev zam txim, kev kho mob, thiab ua neeg zoo tag nrho.8
Qhov uas yus paub tej yam tseeb no yeej hloov yus lub neej! Thaum ib tug neeg kawm txog lub ntsiab ntawm lub neej no, to taub tias Khetos zam txim thiab pab cov uas coj raws li Nws, thiab xaiv coj raws li Khetos ua kev cai raus dej, ces tus ntawd lub neej hloov ua zoo dua—tsis hais tej xwm txheej ntawm lub neej tsis hloov li.
Ib tug muam zoo siab heev uas kuv ntsib hauv Onitsha, Nigeria, tom qab nws tau kawm txog qhov tseeb thiab ua kev cai raus dej nws hais tias, “txhua yam yeej zoo rau kuv. Kuv zoo siab kawg. Zoo li kuv nyob saum ntuj lawm.”9 Kev qhia txog txoj moo zoo ua rau tus uas hais thiab tus uas txais nkawd ob leeg muaj kev xyiv fab thiab kev cia siab. Muaj tseeb tiag, “[nej] yuav muaj txoj kev xyiv fab loj”10 thaum nej qhia txog txoj moo zoo! Kev qhia txog txoj moo zoo yuav ua rau nej txoj kev xyiv fab thiab kev cia siab loj tuaj tiag.11
Kev Qhia txog Txoj Moo Zoo Ua rau Peb Txais Tau Vajtswv lub Hwj Chim
Thaum peb ua kev cai raus dej, peb txhua tus tau ua kev khi lus12 nrog Vajtswv kom “ua hauj lwm rau Nws thiab coj Nws tej lus txib,”13 los yog hais tias “ua tim khawv txog Nws txhua lub sij hawm, thiab txog txhua yam, thiab nyob hauv txhua qhov chaw.”14 Thaum peb “ua neej nrog” Nws thaum peb ua raws li txoj kev khi lus no, ces peb yuav txais lub hwj chim uas txhawb nqa thiab muab peb hloov los ua neeg dawb huv zoo li Vajtswv los ntawm Yexus Khetos, xws li ib ceg hmab txais dag zog los ntawm txoj hmab.15
Kev Qhia txog Txoj Moo Zoo Pov Hwm Peb Kom Txhob Raug Ntxias
Tus Tswv txib tias:
“Tsa nej lub teeb kom nws yuav ci rau lub ntiaj teb. Saib seb kuv yog lub teeb uas nej yuav tsum tsa—tej uas nej tau pom kuv ua. …
“…Kuv twb … tau hais kom … nej los cuag kuv, xwv kom nej yuav tau xuas thiab pom; nej yuav tau ua ib yam li no rau neeg ntiaj teb; thiab tus uas tsis ua li txoj lus txib no cia nws tus kheej raug coj mus rau kev haub ntxias.”16
Yog yus xaiv kom tsis txhob tsa lub teeb ntawm txoj moo zoo ces ntshe ua rau yus txav mus hauv duab ntxoov ntxoo, es nyob ntawd peb yuav raug ntxias. Qhov tseem ceeb, kev xaiv tsa lub teeb ntawm txoj moo zoo pab peb nyob ze qhov kaj ntawd thiab pov hwm peb kom txhob raug ntxias. Yeej yog ib txoj koob hmoov loj heev nyob hauv lub ntiaj teb no!
Kev Qhia txog Txoj Moo Zoo Ua rau Peb Txais Kev Kho Mob
Muam Tiffany Myloan tau pab cov tub txib ntxhais txib txawm nws muaj teeb meem nyuaj heev hauv nws lub neej, tsis hais tej lus nug txog nws txoj kev ntseeg los yog. Nws tau qhia kuv tias kev pab cov tub txib ntxhais txib ua hauj lwm tau ua rau nws txoj kev ntseeg rov qab muaj zog thiab nws xav zoo txog nws tus kheej. Raws li nws hais tias, “Kev qhia txoj moo zoo yeej yog kev kho mob.”17
Kev xyiv fab. Kev cia siab. Vajtswv lub hwj chim uas txhawb nqa. Kev pov hwm kom txhob raug ntxias. Kev kho mob. Tag nrho tej no—thiab ntxiv (tsis hais kev zam txim rau tej kev txhaum)18—yeej yog cov koob hmoov uas los saum ntuj los thaum peb qhia txog txoj moo zoo.
Tam Sim No Yog Peb lub Cib Fim Loj
Cov kwv tij thiab cov muam, muaj cov neeg coob uas koom nrog “txhua pab, txhua pawg, thiab txhua lub koom txoos, … [lawv] tsis paub qhov tseeb tsuas yog vim lawv tsis paub mus nrhiav qhov tseeb nyob rau qhov twg” xwb.19 Tsis tau muaj ib lub sij hawm tseem ceeb tshaj plaws uas tib neeg yuav tsum tsa peb lub teeb. Thiab qhov tseeb yeej yooj yim txais tau.
Jimmy Ton, yog ib tug ntseeg hauj sam, tau nyiam ib tsev neeg uas tshaj tawm txog lawv lub neej hauv YouTube. Thaum nws kawm tias lawv yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg nws tau kawm txog txoj moo zoo nyob online, nyeem Phau Ntawv Maumoos hauv qhov app, thiab tau ua kev cai raus dej tom qab nws ntsib cov tub txib hauv lub tsev kawm ntawv college.20 Tam sim no Txwj Laug Ton yog ib tug tub txib thiab.
Txwj Laug Ton thiab cov tub txib nyob thoob plaws lub ntiaj teb yog tus Tswv pawg tub rog—raws li peb tus yaj saub hais.21 Cov tub txib no yeej tsis ua li feem coob hauv lub ntiaj teb: tej ntawv tshawb fawb qhia tias Tiam Neeg Z yeej tig ntawm Vajtswv mus,22 tiam sis peb cov tub rog hluas23 cov txwj laug thiab cov muam pab tib neeg tig mus rau Vajtswv. Thiab cov mej zeej ntawm lub Koom Txoos feem coob yeej koom tes nrog cov tub txib qhia txog txoj moo zoo, pab cov phooj ywg coob tuaj los cuag Yexus Khetos thiab Nws lub Koom Txoos.
Haiv Neeg Ntseeg nyob hauv Liberia tau pab 507 tus phooj ywg ua kev cai raus dej nyob hauv 10 lub hlis thaum tsis muaj cov tub txib uas ua hauj lwm hauv lawv lub teb chaws. Thaum peb ib ceg txheem ntseeg tus thawj tswj hwm nyob ntawd hnov tias cov tub txib yuav rov qab los, nws hais tias, “Zoo heev, nim no lawv pab tau peb ua peb tej hauj lwm.”
Kev muab Ixayees sau los ua ke—lub hom phiaj tseem ceeb tshaj plaws hauv lub ntiaj teb no24—yeej yog peb txoj kev lav ris vim peb tau khi lus ua li ntawd. Thiab nov yog peb lub caij nyoog! Kuv caw nej ua li no xwb: cia li qhia txog txoj moo zoo. Ua li nej ua thiab tsa lub teeb mus. Thov kom Vajtswv pab thiab ua raws li tej kev tshoov siab. Cia li hais txog nej lub neej, thiab caw lwm tus neeg los saib, los pab, thiab los sib raug zoo nrog nej.25 Ces cia li xyiv fab thaum nej thiab cov ua nej hlub txais cov koob hmoov uas Vajtswv cog lus tias nej yuav txais.
Kuv paub tias los ntawm Khetos peb qhia txoj moo zoo rau cov neeg siab mos; los ntawm Khetos peb nplij cov uas tu siab; los ntawm Khetos peb tshaj tawm txog kev dim rau cov neeg raug kaw; thiab los ntawm Khetos xwb Nws muab cov uas quaj ntsuag tej uas zoo nkauj pauv lawv tej hmoov tshauv.26 Yog li ntawd thiaj li yuav tsum qhia tej yam no!27
Kuv ua tim khawv tias Yexus Khetos yog peb lub hauv paus kev ntseeg thiab ua kom peb kev ntseeg tiav.28 Nws yuav ua tiav thaum peb muab siab rau ntseeg—tsis hais peb tsis zoo tag nrho npaum li cas—thaum peb tsa lub teeb ntawm txoj moo zoo. Nws yuav ua tej qhov txuj ci tseem ceeb nyob hauv peb lub neej thiab txhua tus uas Nws muab sau ua ke lub neej, vim Nws yog ib tug Vajtswv uas ua tej txuj ci tseem ceeb.29 Los ntawm Yexus Khetos lub npe zoo, amees.