“Koj Hlub Kuv Tshaj Lawv cov No Los?”

Nyob rau lub Kaum Ib Hlis Ntuj xyoo 2019, kuv tus phooj ywg thiab kuv wb mus xyuas Thaj Av Dawb Huv. Thaum wb nyob ntawd, wb tau kawm cov vaj lug kub txog Yexus Khetos lub neej. Muaj ib tag kis wb tau sawv rau ntawm ntug Dej Hiav Txwv Kalilais rau ib qho chaw uas tej zaum Yexus tau ntsib Nws cov thwj tim tom qab Nws sawv rov los.

Tom qab Yexus tau sawv rov los, raws li peb nyeem hauv phau Yauhas tshooj 21, Petus thiab cov thwj tim tau ntaus ntse tas ib hmo es tsis tau ib tug hlo li.¹ Thaum sawv ntxov, lawv pom ib tug txiv neej sawv tim ntug dej uas qhia kom lawv ntaus lawv lub vas rau ntawm lub nkoj sab xis rau hauv. Lawv xav tsis thoob, lub vas mag tau ntses ntau heev.²

Lawv paub kiag tias tus txiv neej ntawd yog tus Tswv, thiab lawv mus ntsib Nws sai sai.

Thaum lawv rub lub vas uas mag ntses puv nkaus los rau ntawm ntug dej, ces Yexus hais tias, “Nej cia li los noj tshais.”³ Yauhas hais tias “thaum lawv noj tshais tas lawm, Yexus hais rau Ximoos Petus hais tias, Ximoos Yauhas tus tub, koj hlub kuv tshaj lawv cov no los?”4

Thaum kuv sawv rau ntawm ntug dej ntawd, kuv paub tias tus Cawm Seej nug ib lo lus uas tseem ceeb tshaj plaws es tej zaum Nws yuav nug kuv ib yam li ntawd. Zoo li kuv hnov tau Nws lub suab nug kuv tias, “Russell, koj hlub kuv tshaj lawv cov no los?”

Nej puas xav paub Yexus hais txog dab tsi thaum Nws nug Petus tias, “Koj hlub kuv tshaj lawv cov no los?”

Hais txog lo lus nug no hauv peb lub caij nyoog, tej zaum tus Tswv yuav nug peb seb peb ua hauj lwm npaum li cas thiab nug txog tej yam zoo thiab tej yam tsis zoo uas peb siv sij hawm ua. Tej zaum Nws yuav nug peb seb peb puas hlub Nws tshaj peb nyiam tej yam ntawm lub ntiaj teb no. Tej zaum nov yog ib lo lus nug txog qhov uas peb saib tej yam twg muaj nqis hauv peb lub neej, peb coj raws li leej twg, thiab peb saib peb tsev neeg thiab cov neeg zej zog li cas. Los sis tej zaum Nws nug seb tej yam twg ua rau peb muaj kev xyiv fab thiab kev zoo siab tiag tiag.

Tej yam ntawm lub ntiaj teb no puas ua rau peb muaj kev xyiv fab, kev zoo siab, thiab kev kaj siab lug uas tus Cawm Seej muab rau Nws cov thwj tim thiab Nws muab rau peb? Tsuas Nws ib leeg xwb thiaj li yuav ua rau peb muaj kev xyiv fab, kev zoo siab, thiab kev kaj siab lug los ntawm peb txoj kev hlub Nws thiab kev ua raws li nws tej lus qhia.

Peb yuav teb lo lus nug no li cas “Koj hlub kuv tshaj lawv cov no los?”

Thaum peb kawm lub ntsiab ntawm lo lus nug no, peb yuav hloov los ua neeg zoo dua hauv peb tsev neeg, cov neeg zej zog, cov pej xeem, cov mej zeej hauv lub Koom Txoos, thiab Vajtswv cov tub thiab cov ntxhais.

Vim kuv laus lawm, kuv tau mus xyuas tej lub ntees tuag ntau. Kuv yeej paub tias nej feem coob tau pom yam uas kuv tau pom. Thaum nco txog ib tug neeg uas tso lub ntiaj teb no tseg lawm, tib neeg yeej tsis hais ntau txog qhov uas tus neeg tuag tau muaj ib lub tsev loj npaum li cas, muaj pes tsawg lub tsheb, los sis muaj nyiaj npaum li cas. Lawv tsis tshua hais txog tej yam uas tau tso hauv social media. Thaum kuv mus saib lub ntees tuag, feem ntau lawv tsom ntsoov rau tus uas lawv hlub tej kev sib raug zoo, tej yam nws ua kom pab lwm tus, tej yam lawv kawm hauv lub neej no, thiab lawv txoj kev hlub Yexus Khetos.

Tsis txhob to taub yuam kev. Kuv tsis hais tias qhov uas yus muaj ib lub tsev zoo los sis ib lub tsheb zoo yog qhov txhaum los sis kev siv social media yeej phem. Tiam sis kuv hais tias thaum kawg, tej yam ntawd tsis muaj nqis pes tsawg thaum muab tej ntawd piv rau tus Cawm Seej.

Thaum peb hlub thiab coj raws li Nws, peb ntseeg Nws. Peb hloov siab lees txim. Peb ua raws li Nws tus yam ntxwv thiab ua kev cai raus dej thiab txais tus Vaj Ntsuj Plig Dawb Huv. Peb nyiaj kom mus txog thaum kawg thiab taug txoj kev ua raws nraim li peb tej kev khi lus. Peb zam txim pub rau peb tsev neeg thiab cov neeg zej zog thiab tso tej kev ntxub tseg. Peb siv zog ua raws li Vajtswv cov lus txib. Peb siv zog mloog lus. Peb khi lus thiab ua raws li tej kev khi lus ntawd. Peb hwm peb niam peb txiv. Peb muab tej lub hwj huam tsis zoo hauv lub ntiaj teb tso tseg. Peb npaj peb tus kheej rau Nws txoj Kev Los Zaum Ob.

Nyob hauv “Tus Khetos uas Muaj txoj Sia Nyob: Cov Thwj Tim tej Lus Tim Khawv,” peb nyeem hais tias: “Muaj ib hnub twg [Yexus] yuav rov qab los nyob hauv ntiaj teb. … Nws yog tus vaj ntxwv uas kav tag nrho tej vaj ntxwv thiab tus Tswv uas kav tag nrho tej tswv, thiab txhua lub hauv caug yuav tsum tau txhos thiab txhua tus nplaig yuav tau pe hawm tab meeg Nws. Peb txhua tus yuav sawv ntawm Nws lub xub ntiag los raug txiav txim raws li peb tej hauj lwm thiab raws li peb lub siab tej kev xav.”⁵

Vim kuv yog ib tug Thwj Tim uas tau sau npe rau daim ntaub ntawv “Tus Khetos uas Muaj Txoj Sia Nyob,” kuv hais tias qhov uas kuv paub tias Yexus yog “yog qhov kaj, yog txoj sia, thiab kev cia siab rau lub ntiaj teb”⁶ ua rau kuv xav hlub Nws ntxiv txhua hnub.

Kuv ua tim khawv tias Leej Txiv Saum Ntuj Ceeb Tsheej thiab Yexus Khetos muaj txoj sia nyob. Kuv ua tim khawv tias Nkawd hlub peb. Cov vaj lug kub qhia hais tias, “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”⁷ Cov vaj lug kub kuj qhia tias Yexus “hlub neeg ntiaj teb heev nws thiaj tau muab nws txoj sia theej lawv, kom tag nrho cov uas yuav ntseeg yuav los ua Vajtswv cov tub.”⁸

Leej Txiv Saum Ntuj Ceeb Tsheej tau hlub peb heev Nws thiaj li tau npaj Nws txoj hau kev cawm seej kom muaj ib tug Cawm Seej. Ces Yexus hlub peb heev nyob hauv Kev Sab Laj Saum Ntuj Ceeb Tsheej, thaum Leej Txiv Saum Ntuj Ceeb Tsheej nug hais tias, “Kuv yuav txib leej twg?” Yexus, tus uas yog Thawj tus Tub ntawm tag nrho Leej Txiv cov me nyuam ntsuj plig, teb hais tias, “Kuv nyob no, txib kuv mus.”⁹ Nws tau hais rau Leej Txiv, “Leej Txiv, cia muaj raws li koj lub siab nyiam, thiab lub yeeb koob yog koj li mus ib txhis.”¹⁰ Yexus tau ua siab dawb ua peb tus Cawm Seej thiab tus Txhiv Dim peb thiaj li yuav hloov tau los ua neeg zoo li Nkawd thiab rov qab mus cuag Nkawd.

Ob nqe vaj lug kub kuj qhia tias yog peb xav rov qab mus nyob hauv Nkawd lub xub ntiag peb yuav tsum ntseeg. Peb yuav tsum ntseeg Yexus thiab ntseeg Vajtswv txoj hau kev zoo siab. Kev ntseeg yog kev hlub thiab kev coj raws li peb tus Cawm Seej thiab kev ua raws li cov lus txib, tsis hais thaum peb raug kev sim siab thiab kev nyuaj siab los yog.

Niaj hnub no lub ntiaj teb ntxhov hnyo. Muaj kev poob siab, kev sib cav sib ceg, kev ntxhov siab, thiab tej yam uas tsis tseem ceeb.

Thawj Tswj Hwm Dallin H. Oaks, nyob rau xyoo 2017, hais li no tias: “Lub caij nyoog no yeej nyuaj heev, muaj kev txhawj xeeb loj heev: kev tsov rog thiab kev hnov lus paj lus cua txog kev ua tsov rog, tej phaum mob uas txawj kis, ntuj qhuav teb nkig, dej nyab, thiab lub ntiaj teb sov zuj zus tuaj.”¹¹

Peb yuav tsum tsis txhob cia peb txoj kev hlub thiab kev cia siab rau Yexus ploj mus, txawm yog peb raug tej teeb meem loj li no los yog. Leej Txiv Saum Ntuj Ceeb Tsheej thiab Yexus yeej nco ntsoov peb. Nkawd hlub peb.

Lub Kaum Hli Ntuj tas los, Thawj Tswj Hwm Russell M. Nelson tau qhia peb txog qhov uas peb yuav tsum xav txog Leej Txiv Saum Ntuj Ceeb Tsheej thiab Yexus Khetos ua ntej txhua yam hauv peb lub neej. Thawj Tswj Hwm Nelson qhia peb tias ib txoj kev txhais lo lus Ixayees yog kev “cia Vajtswv yeej.”¹²

Nws tau nug peb txhua tus tej lus nug no: “Nej puas txaus siab cia Vajtswv yeej hauv nej lub neej?” Nej puas txaus siab cia Vajtswv ua tus tseem ceeb tshaj plaws hauv nej lub neej?” Nej puas yuav cia Nws cov lus, Nws cov lus txib, thiab Nws tej kev khi lus hloov tej yam nej ua txhua hnub? Nej puas yuav cia Nws lub suab nrov dua li lwm lub suab? Nej puas txaus siab ua tej yam twg uas Nws xav kom ne ua ua ntej nej ua lwm yam? Nej puas txaus siab cia nej lub siab nyiam ywj rau Nws li?”¹³

Peb yuav tsum nco ntsoov tias kev zoo siab tiag tiag nyob ntawm seb peb puas sib raug zoo nrog Vajtswv, nrog Yexus Khetos, thiab ib leeg rau ib leeg.

Ib txoj kev qhia txog peb txoj kev hlub yog kev koom tsev neeg, phooj ywg, thiab neeg zej zog ua tej yam me me kom ib leeg pab ib leeg. Ua tej yam uas yuav ua rau lub ntiaj teb no zoo dua.

Nej yuav ua tej yam twg hauv nej lub neej kom qhia tias nej hlub tus Tswv tshaj?

Thaum peb tsom ntsoov rau kev hlub peb cov neeg zej zog ib yam li Nws hlub lawv, peb pib hlub cov uas nyob ib puag ncig peb.¹⁴

Kuv rov qab nug ntxiv, nej yuav teb tus Cawm Seej lo lus nug li cas “Koj hlub kuv tshaj lawv cov no los?”

Thaum nej xav txog lo lus nug, kuv thov kom nej yuav teb zoo li Petus tau teb puag thaum ub, “Tus Tswv; koj yeej paub tias kuv hlub koj”¹⁵ ces xav kom nej mus qhia li ntawd los ntawm nej txoj kev ua hauj lwm rau Vajtswv thiab txoj kev pab cov neeg ib puag ncig nej.

Kuv ua tim khawv tias peb tau koob hmoov vim peb muaj Yexus Khetos txoj moo zoo kom qhia peb tias peb yuav tsum ua zoo li cas ib leeg rau ib leeg. Los ntawm Yexus Khetos, peb kawm tias Nws pom tias Vajtswv txhua tus ntxhais thiab txhua tus tub muaj nqis heev.

Kuv hais lus tim khawv tias Yexus Khetos yog peb tus Cawm Seej. Nws yog Vajtswv Tib Leeg Tub. Kuv ua tim khawv txog tej yam tseeb no los ntawm Yexus Khetos lub npe, amees.