Lub Tuam Rooj Sab Laj
Lub Tuam Tsev thiab lub Hauv Paus rau Nej Sab Ntsuj Plig
Kaum Hli Ntuj xyoo 2021 lub tuam rooj sab laj

Lub Tuam Tsev thiab lub Hauv Paus rau Nej Sab Ntsuj Plig

Los ntawm Thawj Tswj Hwm Russell M. Nelson

Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg

Thaum twg muaj xwm txheej ntxhov hnyo hauv nej lub neej, qhov chaw nyab xeeb tshaj rau nej sab ntsuj plig yog kev ua raws nraim li lub tuam tsev tej kev khi lus!

Kuv cov kwv tij thiab cov muam, kuv zoo siab nrog nej nyob tag kis no kom qhia nej txog tej kev xav uas nyob hauv kuv lub siab.

Peb tab tom kho txhua yam ntawm lub Tuam Tsev Salt Lake. Tes hauj lwm no yog ua kom txheem lub hauv paus uas ib txwm muaj ntev li ib puas xyoo tag los. Tiam sis lub tuam tsev yuav tsum nyob ntev tshaj. Thaum lub Tsib Hlis Ntuj, kuv tau mus ntsuam xyuas qhov tes num loj no. Kuv xav tias nej yuav nyiam pom tej yam uas kuv thiab kuv tus poj niam Wendy tau pom lawm. Nyaj nej yuav paub vim li cas zaj nkauj “Lub Hauv Paus Ruaj Nrees”1 muaj ib lub ntsiab tshiab rau wb.

Daim vidi-aus los ntawm qhov chaw kho lub Tuam Tsev Salt Lake: “Peb saib lub Tuam Tsev Salt Lake lub hauv paus uas ib txwm muaj. Kuv sawv hauv ib qhov chaw hauv qab chav hu ua Chav lub Vaj. Thaum kuv tshuaj ntsuam txoj kev ua lub tuam tsev no, ua rau kuv xav tsis thoob cov pioneer tau ua li no. Kuv xav txog qhov uas lawv tau ua lub tuam tsev zoo kawg nkaus no nrog tej cuab yeej thiab tej txheej txheem uas lawv muaj ib puas xyoo tag los xwb.

“Tiam sis, ntau xyoo tom qab ntawd, yog peb ntsuam xyuas lub hauv paus zoo zoo, peb yuav pom tej xwm txheej xws li pob zeb yaig zuj zus, muaj tej kis zeb, thiab tej kev txua zeb uas tsis khov.

“Thaum kuv pom tias cov kws kho tuam tsev, cov kws kos daim qhia ua tsev, thiab cov kws ua tsev txawj ua kom txheem tau lub hauv paus, kuv xav tsis thoob. Lawv tes hauj lwm yeej zoo kawg nkaus!

“Ib lub tsev twg lub hauv paus, qhov tseem ceeb yog ib lub tuam tsev loj npaum li no, los yuav tsum muaj zog txaus kom tiv tau av qeeg, kev puas zuj zus, cua hlob, thiab kev tog zuj zus uas txhua lub tsev raug. Tam sim no mam li pib ua tes hauj lwm kom txheem lub tuam tsev lub hauv puas kom ruaj nrees thiaj li yuav nyob tau mus txog thaum kawg.”

Peb siv zog ua txhua yam kom pov hwm lub tuam tsev no, uas ntshe twb tsis khov zuj zus tuaj, es peb yuav muab ib lub hauv paus uas tiv tau txhua yam uas tshwm sim mus txog thaum lub Caij Milenias. Ib yam li ntawd, twb txog lub sij hawm rau peb siv zog ua txhua yam—tej zaum ua tej yam uas peb yeej ib txwm tsis tau ua—kom txheem lub hauv paus rau peb sab ntsuj plig. Yuav tsum ua tej yam tsis tau pom dua nyob rau hauv lub caij nyoog uas tsis tau pom dua.

Kuv cov kwv tij thiab cov muam, lub caij nyoog no yog hnub nyoog kawg. Yog peb yuav tiv tau tej teeb meem thiab tej xwm txheej uas yuav los, peb yeej yuav tsum muaj ib lub hauv paus ruaj nrees rau peb sab ntsuj plig uas nyob saum lub pob zeb uas yog peb tus Txhiv Dim, Yexus Khetos.2

Yog li ntawd kuv xav nug nej tias, nej lub hauv paus ruaj nrees npaum li cas? Thiab nej yuav tsum txheem nej zaj lus tim khawv li cas thiab nej xav to taub dab tsi txog txoj moo zoo?

Lub tuam tsev yeej txhawb nqa peb txoj kev ntseeg thiab tiv thaiv peb sab ntsuj plig vim tus Cawm Seej thiab Nws cov lub qhuab qhia yog lub ntsiab ntawm lub tuam tsev. Txhua yam uas peb kawm hauv lub tuam tsev, los ntawm tej lus qhia thiab los ntawm tus Ntsuj Plig, yuav pab peb to taub txog Yexus Khetos ntxiv. Nws cov kab ke khi peb rau Nws los ntawm tej kev khi lus pov thawj hwj uas dawb ceev. Ces thaum peb ua raws li peb tej kev khi lus, Nws pub ntxiaj ntsim rau peb los ntawm Nws lub hwj chim uas txhawb peb dag zog.3 Thiab peb yeej yuav xav tau Nws lub hwj chim nyob rau yav tom ntej.

Tus Tswv tau cog lus tias “yog [peb] npaj txhij [peb] yuav tsis ntshai.”4 Qhov tseeb no yeej tseem ceeb niaj hnub nim no. Tus Tswv tau hais tias txawm muaj teeb meem niaj hnub no uas tsis tau muaj ua ntej, cov uas cia Yexus Khetos ua lawv lub hauv paus, thiab tau kawm siv Nws lub hwj chim, lawv tsis tas raug tej kev ntxhov siab txhawj xeeb ntawm lub caij nyoog no.

Cov kab ke thiab tej kev khi lus ntawm lub tuam tsev tau muaj puag thaum ub. Tus Tswv tau hais kom Adas thiab Evas thov Vajtswv, khi lus, thiab ua kev txi.5 Muaj tseeb tiag, “thaum twg tus Tswv muaj ib co neeg hauv lub ntiaj teb uas yuav mloog Nws tej lus, Nws txib lawv ua cov tuam tsev.”6 Cov vaj lug kub qhia ntau txog lub tuam tsev tej lus qhia, cov ris tsho, cov lus, thiab ntxiv.7 Txhua yam uas peb ntseeg thiab txhua yam uas Vajtswv tau cog lus tseg rau Nws cov neeg khi lus yeej koom ua ke hauv lub tuam tsev. Nyob hauv txhua lub caij nyoog, lub tuam tsev tau qhia qhov tseeb uas muaj nqis hais tias cov uas khi lus nrog Vajtswv thiab ua raws li tej kev khi lus ntawd yeej yog cov me nyuam khi lus.

Yog li ntawd, nyob hauv tus Tswv lub tsev, peb khi lus nrog Vajtswv ib yam li Anplaham, Ixaj, thiab Yakhauj tau khi. Thiab peb txais tau cov koob hmoov zoo ib yam thiab!

Daim Duab
Lub Tuam Tsev Kirtland thiab lub Tuam Tsev Nauvoo

Txij thaum pib lub caij nyoog no los twb tau muaj cov tuam tsev.8 Eliyas tau muab cov yawm sij ntawm txoj cai ua kev cai sib khi rau Joseph Smith nyob hauv lub Tuam Tsev Kirtland. Tau muab lub pov thawj hwj txum tim rov qab los nyob hauv lub Tuam Tsev Nauvoo.9

Mus txog thaum nws raug tua tuag, Joseph Smith tseem tau txais tej kev tshwm sim uas muab kab ke txais qhov vaj txiaj ntsim thiab kev cai sib khi txum tim rov qab los.10 Tiam sis nws paub tias yuav tsum kho ntxiv thaum yav tom ntej. Tom qab nws muab qhov vaj txiaj ntsim rau Brigham Young nyob rau lub Tsib Hlis Ntuj xyoo 1842, Joseph qhia Brigham tias, “Tsis tau kho zoo tag nrho, tiam sis peb tau ua zoo npaum li peb ua tau vim yog tej xwm txheej uas peb raug thiab kuv xav kom koj lav ris qhov no thiab npaj ib tug txheej txheem rau cov kab ke no.”11

Tom qab tus Yaj Saub tau tso lub ntiaj teb no tseg, Thawj Tswj Hwm Young tau saib xyuas kev ua lub Tuam Tsev Nauvoo tiav12 thiab tom qab ntawd tau ua tej tuam tsev nyob hauv Utah. Thaum nws muab tej theem qis zog hauv lub Tuam Tsev St. George fij tseg, Brigham Young rau siab hais txog qhov uas yuav tsum sawv cev ua hauj lwm pab lwm tus hauv lub tuam tsev hais tias, “Thaum kuv xav txog qhov no, kuv xav hais lus nrov npaum li xob quaj kom tib neeg tsim los.”13

Txij thaum ntawd los, twb tau muab lub tuam tsev cov kab ke kho kom zoo zuj zus. Thawj Tswj Hwm Harold B. Lee piav vim li cas tej txheej txheem, tsab cai, thiab kev muab lub tuam tsev cov kab ke yuav hloov nyob hauv tus Cawm Seej lub Koom Txoos. Nws hais tias: “Cov ntsiab cai ntawm Yexus Khetos txoj moo zoo yeej los ntawm Vajtswv los. Tsis muaj leej twg uas muaj cai hloov cov ntsiab cai thiab [cov lus qhuab qhia] ntawm lub Koom Txoos tsuas yog tus Tswv xwb thaum Nws muab kev tshwm sim. Tiam sis tej txheej txheem mam li hloov thaum tus uas tswj hwm txais kev tshoov siab.”14

Cia li xav txog tus txheej txheem muab lub cim nco txog tau hloov li cas. Thaum ub, lawv muab cov dej rau pawg ntseeg nyob hauv ib lub hub loj. Txhua tus tau haus cov dej nyob hauv lub hub ntawd. Tam sim no peb siv cov khob uas siv tag ces muab pov tseg. Tus txheej txheem tau hloov, tiam sis tej kev khi lus yeej zoo ib yam.

Cia li xav txog peb qho tseeb no:

  1. Kev Muab Txoj Moo Zoo Txum Tim Rov Qab Los yog ib tug txheej txheem, tsis yog ib lub sij hawm xwb, thiab yuav muaj li ntawd txog thaum tus Tswv rov qab los.

  2. Lub hom phiaj ntawm kev muab Ixayees sau los ua ke15 yog kom coj cov koob hmoov los ntawm lub tuam tsev rau Vajtswv cov me nyuam uas rau siab ntseeg.

  3. Thaum peb nrhiav kev kom paub ua raws li lub hom phiaj ntawd, tus Tswv muab tswv yim ntxiv tshwm sim rau peb. Kev Muab Txoj Moo Zoo Txum Tim Rov Qab Los uas ib sij mus los yuav tsum muaj kev tshwm sim uas ib sij txais mus los thiab.

Thawj Pawg Thawj Tswj Hwm thiab Pawg Kaum Ob tug Thwj Tim tau thov tus Tswv ntau seb puas muaj tej kev zoo dua kom Nws cov me nyuam uas rau siab ntseeg txais tau cov koob hmoov ntawm lub tuam tsev. Peb thov Vajtswv coj peb paub ua li cas kom tej lus qhia, tej kev khi lus, thiab cov kab ke hauv lub tuam tsev yuav mus ib yam zoo mus thoob plaws lub ntiaj teb, txawm yog muaj tej yam lus thiab tej kab lig kev cai uas sib txawv.

Raws li tus Tswv tau qhia kom teb peb tej lus thov, peb tau hloov tus txheej txheem lawm. Nws yog tus uas xav kom nej to taub meej tias nej khi lus ua dab tsi. Nws yog tus uas xav kom nej ua tag nrho Nws cov kab ke dawb huv. Nws xav kom nej to taub nej tej txiaj ntsim, nej cov lus cog tseg, thiab tej kev lav ris. Nws xav kom nej txais kev tshoov siab uas nej ib txwm tsis tau muaj dua. Nws xav kom muaj li no rau tag nrho cov uas tuaj rau lub tuam tsev, tsis hais lawv nyob qhov twg los yog.

Tej kev hloov lub tuam tsev tej txheej txheem, thiab tej uas yuav muaj yav tom ntej, yog kev ua pov thawj txog qhov uas tus Tswv coj Nws lub Koom Txoos. Nws muab cib fim rau peb txhua tus txheem lub hauv paus rau peb sab ntsuj plig ntxiv thaum peb tsom ntsoov rau Nws thiab rau cov kab ke thiab tej kev khi lus ntawm Nws lub tuam tsev. Thaum nej nqa nej daim ntawv tso cai nkag tuam tsev, thaum nej muaj ib lub siab uas xav ua zoo, thiab lub siab uas xav paub los rau tus Tswv lub tuam tsev tej kev kawm, Nws yuav qhia nej.

Yog tias nej nyob deb, tsis noj qab nyob zoo, los sis muaj lwm yam uas tav nej kev mus rau lub tuam tsev rau ib ntus, kuv caw nej teem sij hawm xav txog nej tej kev khi lus hauv nej lub siab.

Yog tias nej tsis tshua nyiam mus rau lub tuam tsev, yuav tsum mus ntau ntxiv. Cia tus Tswv, los ntawm Nws tus Ntsuj Plig, tshoov nej lub siab nyob ntawd. Kuv cog lus rau nej tias thaum sij hawm dhau mus, lub tuam tsev yuav los ua ib qho chaw nyab xeeb, nplij siab, thiab txais kev tshwm sim.

Yog tias kuv muaj sij hawm hais lus rau txhua tus tub hluas ntxhais hluas, kuv yuav thov kom nej nrhiav ib tug khub uas tsim nyog ua kev cai sib khi hauv lub tuam tsev nrog nej. Tej zaum nej xav paub seb yuav hloov nej lub neej li cas. Kuv cog lus tias yuav hloov nej lub neej tag nrho! Thaum nej sib yuav hauv lub tuam tsev thiab rov qab mus ntau zaus, nej yuav txais dag zog thiab muaj tswv yim thaum nej txiav txim siab ua tej yam.

Yog tias kuv muaj sij hawm hais lus rau txhua nkawm niam txiv uas tseem tsis tau ua kev cai sib khi hauv lub tuam tsev, kuv yuav thov nej ua tej yam kom txais tau txoj kab ke tseem ceeb ntawd.16 Puas yuav hloov nej lub neej? Yuav hloov tsuas yog nej xav vam meej tas mus li thiab nyob ua ke tas mus li. Kev xav nyob ua ke tas mus li xwb yeej yuav tsis hloov nej lub neej. Tsis muaj lwm txoj kab ke los sis kev cog lus yuav ua li ntawd.17

Yog tias kuv muaj sij hawm hais lus rau txhua tus txiv neej los sis poj niam uas xav sib yuav tiam sis tseem tsis tau nrhiav lawv tus khub mus ib txhis li, kuv yuav hais kom nej tsis txhob tos txog thaum nej sib yuav kom txais nej qhov vaj txiaj ntsim hauv tus Tswv lub tsev. Cia li pib tam sim no kom kawm thiab paub tias kev muaj lub hwj chim pov thawj hwj yog dab tsi.

Thiab hais rau nej txhua tus uas tau khi lus hauv lub tuam tsev, kuv thov nej thov Vajtswv tsis tu tsis tseg kom nej yuav to taub tej kev khi lus thiab cov kab ke hauv lub tuam tsev.18 Tej qhov rooj ntawm sab ntsuj plig yuav qhib. Nej yuav kawm paub kom qhib daim ntaub thaiv uas nyob nruab nrab lub ntuj ceeb tsheej thiab lub ntiaj teb, nej yuav kawm paub thov Vajtswv kom cov tim tswv nrog nraim nej nyob, thiab nej yuav paub txais Vajtswv tej lus qhia. Qhov uas nej rau siab ua li ntawd yuav txheem lub hauv paus rau nej sab ntsuj plig kom khov kho.

Kuv cov kwv tij thiab cov muam, thaum twg kho lub Tuam Tsev Salt Lake tiav lawm, yeej yuav tsis muaj ib qhov chaw uas nyab xeeb tshaj thaum av qeeg nyob hauv lub Hav Salt Lake tsuas yog nyob hauv lub tuam tsev ntawd xwb.

Ib yam li ntawd, thaum twg muaj xwm txheej ntxhov hnyo hauv nej lub neej, qhov chaw nyab xeeb tshaj rau nej sab ntsuj plig yog kev ua raws nraim li lub tuam tsev tej kev khi lus!

Thov cia li ntseeg kuv thaum kuv hais tias yog tias nej ua lub hauv paus rau nej sab ntsuj plig rau saum Yexus Khetos, nej tsis tas ntshai dab tsi li. Thaum nej ua raws li nej tej kev khi lus uas nej khi hauv lub tuam tsev, Nws lub hwj chim yuav txhawb nej dag zog. Ces, thaum twg muaj av qeeg ntawm sab ntsuj plig, nej yuav muaj peev xwm sawv khov kho vim lub hauv paus rau nej sab ntsuj plig nyob ruaj nrees thiab txav tsis taus.

Kuv hlub nej, cov kwv tij thiab cov muam. Kuv paub tej yam tseeb no: Vajtswv, peb Leej Txiv Saum Ntuj Ceeb Tsheej xav kom nej xaiv los tsev kom los cuag Nws. Nws txoj hau kev kom nej vam meej mus ib txhis li tsis nyuaj to taub, thiab nyob ntawm nej txoj kev ywj siab xaiv. Nej muaj kev ywj siab xaiv seb nej yuav ua neeg zoo li cas—thiab nej yuav nrog leej twg nyob—hauv lub ntuj rau yav tom ntej!

Vajtswv muaj txoj sia nyob! Yexus yog tus Khetos! Nov yog Nws lub Koom Txoos uas Nws muab txum tim rov qab los kom pab nej hloov ua neeg zoo li Vajtswv. Kuv ua tim khawv li no los ntawm Yexus Khetos lub npe dawb ceev, amees.

Lus Cim

  1. Saib “Lub Hauv Paus Ruaj Nrees,” Cov Nkauj Qhuas Vajtswv, zaj 29.

  2. Xwv kom “thaum tus dab phem … xa nws tej cua muaj zog, … tej ntawd yuav tsis muaj hwj chim kov yeej [peb] … vim yog lub pob zeb uas [peb] tau cog rau saud, uas yog lub hauv paus ruaj nrees, ib lub hauv paus uas yog neeg cog rau saud lawv yuav tsis vau.” (Hilamas 5:12; ntxiv qhov uas ntawv qaij).

  3. Saib Lus Qhuab Qhia thiab Kev Khi Lus 109:15, 22.

  4. Lus Qhuab Qhia thiab Kev Khi Lus 38:30; kuj saib Lus Qhuab Qhia thiab Kev Khi Lus 10:55.

  5. Saib Mauxes 5:5–6.

  6. Bible Dictionary, “Temple.”

  7. Ua piv txwv, saib Khiav Dim 28; 29; Levis Kev Cai 8. Lawv hu Mauxes lub tuam tsev ntaub ua “lub tsev ntaub [ntawm Vajtswv tej lus]” (Teev Npe 9:15) thiab “lub tsev ntaub [uas muaj Vajtswv tej lus]” (Khiav Dim 38:21). Nyob rau xyoo 587 ua ntej Yexus yug los, Xalumoos lub tuam tsev raug puas tsuaj, ob peb xyoos tom qab Lihais tsev neeg tau tawm Yeluxalees mus. Xelunpanpees tau muab lub tuam tsev txum tim rov qab los 70 xyoo tom qab ntawd. Ces nyob rau xyoo 37 ua ntej Yexus yug los lub tuam tsev raug kub hnyiab. Helauj txuas ntxiv rau lub tuam tsev nyob rau xyoo 18 ua ntej Yexus yug los. Ces lub tuam tsev no, uas Yexus tau mus xyuas, raug puas tsuaj nyob rau xyoo 70 tom qab Yexus yug los. Nifais tau mus rau ib qho chaw zoo li lub tuam tsev thaum nws “mus pem roob ntau zaus” kom thov Vajtswv (1 Nifais 18:3) thiab tom qab ntawd, nyob hauv Amelikas, tau ua ib lub tuam tsev “raws li tus yam ntxwv ntawm Xalumoos lub tuam tsev,” tsuas yog tsis muab ntau yam khoom muaj nuj nqis coj los ua xwb (saib 2 Nifais 5:16).

  8. Saib Lus Qhuab Qhia thiab Kev Khi Lus 88:119; 124:31.

  9. Saib Lus Qhuab Qhia thiab Kev Khi Lus 110:13–16; 124:28. Tau tso lub ncej zeb tag rau lub Tuam Tsev Nauvoo thaum lub Plaub Hlis Ntuj 6, 1841, ob peb hlis tom qab Joseph Smith tau txais kev tshwm sim ua lub tuam tsev ntawd. Lub Tuam Tsev Nauvoo muaj tej yam ntau zog. Piv txwv tias, tus Tswv piav tias yuav tsum muaj ib lub dab ua kev cai raus dej rau Haiv Neeg Ntseeg sawv tam cov tuag ua kev cai raus dej (saib Lus Qhuab Qhia thiab Kev Khi Lus 124:29–30).

  10. Saib Lus Qhuab Qhia thiab Kev Khi Lus 131; 132. Lus Qhuab Qhia thiab Kev Khi Lus 128 muaj ib tsab ntawv uas Joseph Smith sau rau Haiv Neeg Ntseeg txog txoj kev cai raus dej rau cov tuag. Nws tau piav tias yuav tsum muaj txoj kev cawm seej rau cov neeg tuag “thiaj li muaj peb txoj kev cawm seej, … [vim] tsis muaj peev xwm ua kom lawv zoo tag nrho yog hais tias tsis muaj peb—thiab tsis muaj peev xwm ua kom peb zoo tag nrho yog hais tias tsis muaj peb cov tuag” (nqe 15).

  11. Joseph Smith, nyob hauv Saints: The Story of the Church of Jesus Christ in the Latter Days, phau 1, The Standard of Truth, 1815–1846 (2018), 454.

  12. “Lub Koom Txoos tus Sau Liv Xwm George A. Smith xav tias muaj 5,634 tus kwv tij thiab tus muam uas txais lawv qhov vaj txiaj ntsim nyob hauv lub Tuam Tsev Nauvoo uas tau ua ib feem xwb thaum lub Kaum Ob Hlis Ntuj 1845 mus txog lub Ib Hlis Ntuj 1846. Tej nkawm niam txiv tau ua kev cai sib khi mus txog thaum lub Ob Hlis Ntuj 7, 1846, es txog lub sij hawm ntawd twb muaj 2,000 nkawm niam txiv uas tau ua kev cai sib khi mus ib txhis li los ntawm lub hwj chim pov thawj hwj” (Saib Bruce A. Van Orden, “Temple Finished before Exodus,” Deseret News, Kaum Ob Hlis Ntuj 9, 1995, deseret.com; kuj saib Richard O. Cowan, “Endowments Bless the Living and Dead,” Church News, Yim Hli Ntuj 27, 1988, thechurchnews.com).

  13. “Nej xav tias cov yawg suab yuav hais li cas yog tias lawv txawj hais lus tom qab lawv tuag lawm? Lawv puas yuav hais li no tias, ‘Peb tau pw no txhiab txhiab xyoo lawm, nyob hauv lub tsev kaw no, tos txog lub caij nyoog no’? … Muaj tseeb tiag, yog tias lawv muaj hwj chim hais lus nrov li xob quaj rau peb qhov ntsej kiag, peb yuav to taub tias txoj hauj lwm uas peb ua no tseem ceeb npaum li cas. Tag nrho cov tim tswv nyob saum ntuj saib pawg neeg me me no, thiab tshoov lawv lub siab kom noob neej tag nrho txais kev cawm seej. … Thaum kuv xav txog qhov no, kuv xav hais lus nrov npaum li xob quaj kom tib neeg tsim los” (Discourses of Brigham Young, tus xaiv yog John A. Widtsoe [1954], 403–4).

  14. Harold B. Lee, “God’s Kingdom—A Kingdom of Order,” Ensign, Ib Hlis Ntuj 1971, 10. Kuj saib ib nqe lus uas Thawj Tswj Hwm Wilford Woodruff hais nyob rau xyoo 1986; nws hais tias, “Kuv xav hais, vim kuv yog tus thawj tswj hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, hais tias peb yuav tsum mua thiab vam meej tam sim no. Peb tsis tau txais tag nrho tej kev tshwm sim. … Thawj Tswj Hwm [Brigham] Young, uas yog tus coj tom qab Thawj Tswj Hwm Joseph Smith, tau coj peb los txog no. Nws tau npaj txhim tsa tej lub tuam tsev no thiab tau ua tej lub hom phiaj ntawm nws txoj kev hu thiab lub luag hauj lwm. … Nws tsis tau txais tag nrho tej kev tshwm sim ntawm txoj hauj lwm no; Thawj Tswj Hwm Taylor kuj tsis tau txais tag nrho, thiab Wilford Woodruff thiab. Yuav tsis tiav li mus txog thaum txoj hauj lwm no zoo tag nrho lawm” (The Discourses of Wilford Woodruff, tus xaiv yog G. Homer Durham [1946], 153–54).

  15. Saib 3 Nifais 29:8–9.

  16. Saib Lus Qhuab Qhia thiab Kev Khi Lus 131:2, 4.

  17. Saib Lus Qhuab Qhia thiab Kev Khi Lus 132:7.

  18. Txwj Laug John A. Widtsoe sau hais tias: “Hais rau tus neeg uas mus hauv lub tuam tsev, uas rua muag, thiab xav txog tej lub cim thiab tej kev khi lus, thiab siv zog xav to taub lub ntsiab tag nrho tsis tu tsis tseg, Vajtswv hais nws txoj lus, thiab tus ntawd yuav txais kev tshwm sim. Qhov vaj txiaj ntsim yeej qhia los ntawm tej lub cim ces ntshe tus ruam xwb yuav sim piav txog; yeej muaj tej kev tshwm sim ntau heev rau cov uas siv dag zog kom nrhiav thiab kawm, tsis muaj lus piav txaus kom qhia meej txog tej uas muaj nyob hauv lub tuam tsev. Vim yus txais yus qhov vaj txiaj ntsim los ntawm kev tshwm sim ces thiaj li yuav to taub los ntawm kev tshwm sim thiab” (nyob hauv Archibald F. Bennett, Saviors on Mount Zion, [phau qhia Hnub Caiv Kev Kawm Vaj Lug Kub, 1950], 168).