Kev Ntseeg Txaus Ua Hauj Lwm thiab Hloov
Los ntawm kev thov Vajtswv thiab kev kawm vaj lug kub, peb txais tau cov koob hmoov saum ntuj ceeb tsheej thiab hloov los ua neeg uas muaj peev xwm coj raws li tus Cawm Seej Yexus Khetos.
Tsis ntev tom qab lawv hu kuv ua ib tug Tuam Thawj Coj Xya Caum, kuv tau muaj cib fim nrog Thawj Tswj Hwm Russell M. Nelson tham tau ob peb feeb. Yeej yog ib lub sij hawm uas tsis tau npaj nyob hauv chav noj mov, es nws yeej ua siab dawb caw Txwj Laug S. Mark Palmer thiab kuv wb nrog nws zaum noj su.
“Yuav nrog tus yaj saub tham txog dab tsi thaum noj su nev?” yeej yog qhov uas kuv xav hauv kuv lub siab. Yog li ntawd kuv txiav txim siab nug Thawj Tswj Hwm Nelson seb nws puas muaj tej lus qhia uas nws xav hais rau kuv vim kuv pib ua kuv txoj hauj lwm. Nws teb ib yam uas yooj yim thiab ncaj qha; nws ntsia kuv thiab hais tias, “Txwj Laug Schmeil, Vajtswv tau hu tus neeg uas koj muaj peev xwm hloov tau los ua.” Tom qab ntawd kuv yeej ib txwm xav seb tus Tswv xav kom kuv hloov los ua ib tug neeg zoo li cas. Thaum kuv xav txog qhov no, kuv paub tias Nws xav kom kuv hloov los ua ib tug txiv tsev zoo dua, ib tug tub zoo dua ntxiv, thiab ib tug tub qhe zoo dua ntxiv. Ces kuv paub tias kuv yeej yuav muaj peev xwm ua tag nrho tej yam no yog kuv ua hauj lwm hloov los ua tus Cawm Seej Yexus Khetos ib tug thwj tim zoo dua ntxiv.
Lub tuam rooj sab laj tas los, Thawj Tswj Hwm Nelson tau hais tias: “Yog tias yus xav ua ib yam dab tsi zoo yus yuav tsum siv zog ua. Kev los ua Yexus Khetos ib tug thwj tim tseeb yeej zoo ib yam.”1 Thawj Tswj Hwm Nelson caw peb khwv ua hauj lwm kom los ua Yexus Khetos ib tug thwj tim zoo dua ntxiv. Nws tau hais tias yog peb xav hloov los ua neeg zoo li tus Cawm Seej, peb yuav tsum txhawb peb txoj kev ntseeg lub zog thaum peb thov, ua zoo, thiab kawm ntawv, nrog rau lwm yam thiab.
1. Thov
Nws hais tias, “Thov nej Leej Txiv Saum Ntuj Ceeb Tsheej, los ntawm Yexus Khetos lub npe, kom pab nej.”2 Kev thov Vajtswv yeej yog ib qho tseem ceeb uas pab kom yus hloov los ua Yexus Khetos ib tug thwj tim zoo dua.
Thaum Yexus Khetos tab tom ua nws txoj hauj lwm qhuab qhia nrog cov Neeg Nifais hauv Amelikas Teb, Nws tau nce mus saum ntuj ceeb tsheej. Tom qab ntawd, Nws cov thwj tim tau koom ua ke “koom sib sib zog thov Vajtswv thiab yoo mov. Thiab Yexus rov ua nws tus kheej rau lawv pom dua, vim lawv thov Leej Txiv los ntawm nws lub npe.”3 Vim li cas Yexus tau tshwm sim rau Nws cov thwj tim ib zaug ntxiv? Vim lawv thov Vajtswv kom muaj li ntawd.
Ces Nws hais ntxiv tias:
“Nim no kuv yuav mus cuag Leej Txiv. Thiab kuv hais tseeb rau nej tias, qhov uas nej yuav thov Leej Txiv los ntawm kuv lub npe ces yuav muab qhov ntawd rau nej.
“Yog li ntawd, cia li thov, thiab nej yuav tau txais; cia li khob, ces yuav qhib rau nej; vim tus uas thov, yuav tau txais; thiab rau tus uas khob, yuav qhib rau tus ntawd.”4
Peb yuav tsum muaj kev ntseeg thov kom paub tus Tswv lub siab nyiam thiab lees hais tias tus Tswv paub tias qhov twg yog qhov zoo rau peb.
2. Ua Hauj Lwm
Kev ua hauj lwm kuj yog ib qho tseem ceeb heev yog yus xav hloov los ua Yexus Khetos ib tug thwj tim zoo dua ntxiv. Thaum peb ua hauj lwm, Nws yuav coj peb txoj hau kev. Kuv yeej xav tias Nifais xav kom tus Tswv qhia nws paub ua li cas kom nqa tau cov phiaj toog los ntawm Lanpas, tiam sis nws thiab nws cov tij laug twb sim ob zaug es lawv ua tsis taus. Tiam sis lawv twb ua hauj lwm, thiab tus Tswv tau coj lawv thaum lawv tab tom mus. Zaum thib peb ces Nifais twb ua taus lawm. Nws hais tias, “Tus Ntsuj Plig tau coj kuv kev, kuv tsis paub ua ntej txog tej uas kuv yuav ua.”5
Tus Tswv yeej ua hauj lwm li no thaum peb rau siab ua hauj lwm, txawm yog peb tsis paub meej tias peb yuav tsum ua dab tsi. Tus Tswv tau qhia Nifais kom ua dab tsi: mus nqa cov phiaj toog. Tiam sis Nws tsis tau qhia kom Nifais paub ua li cas. Nws tau cia Nifais xav mus xav los thiab thov tus Tswv pab nws—es tus Tswv yeej ib txwm pab peb hauv peb lub neej li no. Thaum peb muab siab rau ntseeg, tus Tswv yuav coj peb txoj hau kev.
3. Kawm Vaj Lug Kub
Nyob hauv phau 3 Nifais, cov thwj tim hais rau tus Cawm Seej tias cov neeg sib cav sib ceg txog lub Koom Txoos lub npe. Tus Cawm Seej tau qhia ib lub ntsiab cai tseem ceeb thaum Nws nug hais tias, “Puas yog lawv tsis tau nyeem tej vaj lug kub?”6 Kev kawm vaj lug kub yeej yog ib qho tseem ceeb heev yog yus xav hloov los ua Yexus Khetos ib tug thwj tim zoo dua ntxiv. Kev thov Vajtswv thiab kev kawm vaj lug kub yeej koom ua ke. Ob qho no yeej pab peb. Yog tus txheej txheem uas tus Tswv tau tsa. “Mloog ntsoov Khetos tej lus; vim saib seb, Khetos tej lus yuav qhia nej txhua yam uas nej yuav tsum ua.”7
Tus Cawm Seej kuj qhia tias peb yuav tsum tsis txhob kawm cov vaj lug kub xwb tiam sis peb yuav tsum qhia txog cov vaj lug kub, ib yam li Nws hais rau cov Neeg Nifais: “Thiab nim no tau muaj tias thaum Yexus ua tib zaug piav ntxaws tag nrho cov vaj lug kub, tej uas lawv muab sau cia, nws txib lawv kom lawv yuav tsum qhia tej uas nws tau piav rau lawv lawm.”8
Nov yog vim li cas Nifais yuav tsum rov qab mus nqa cov phiaj toog: nws tsev neeg xav muaj cov vaj lug kub pab lawv mus rau thaj av uas tau cog lus cia thiab pab lawv qhia lawv cov me nyuam. Peb kuj yuav tsum xav kawm los ntawm cov vaj lug kub kom pab peb lub neej, thiab peb yuav tsum qhia txog cov vaj lug kub nyob hauv tsev thiab thaum peb ua hauj lwm hauv lub Koom Txoos.
4. Ua Hauj Lwm Kom Hloov
Feem ntau peb yuav tsis txais Vajtswv tej lus teb tam sim ntawd. Tiam sis peb yuav tsum muaj kev ntseeg kom ua ntxiv, ua raws li kev ncaj ncees, thiab rau siab ib yam li Nifais thaum nws sim muab cov phiaj toog nqa mus. Tus Tswv yuav qhia peb ib me ntsis ntxiv rau ib me ntsis; thaum peb kawm cov vaj lug kub, tus Tswv yuav qhia lus teb rau peb los sis muab dag zog rau peb kom nyiaj mus ib hnub ntxiv, ib lub lim tiam ntxiv, thiab sim ib zaug ntxiv. Txwj Laug Richard G. Scott hais tias: “Ua Vajtswv tsaug uas tej lub sij hawm Nws cia yus nyiaj ntxeem mus ntev me ntsis ua ntej Nws teb yus. Qhov Nws ua li ntawd ua rau yus txoj kev ntseeg loj tuaj thiab yus tus cwj pwm hloov ua zoo.”9
Thaum kuv tau thov Vajtswv thiab kawm vaj lug kub, tus Tswv yeej ib txwm tau muab dag zog rau kuv ua hauj lwm thiab nyiaj mus ib hnub ntxiv, ib lub lim tiam ntxiv, thiab sim ib zaug ntxiv. Feem ntau kuv tsis tau txais Vajtswv tej lus teb tam sim ntawd. Kuv muaj tej lus nug uas Nws tseem tsis tau teb, tiam sis kuv tseem thov thiab kawm ntxiv, thiab kuv zoo siab uas tus Tswv yeej muab dag zog rau kuv ua hauj lwm thaum kuv tos ntsoov Nws tej lus teb.
Txwj Laug Scott kuj hais tias, “Thaum nej mus txog qhov uas nej tsis tshua to taub ntxiv lawm, thiab muab siab rau ntseeg, nej yuav nrhiav tau tej kev kho teeb meem uas nej yeej yuav tsis paub txog yog nej tsis ua li ntawd.”10
Peb yuav tsum hloov los ua ib tug uas coj raws li tus Cawm Seej Yexus Khetos zoo dua ntxiv tas peb lub neej, thiab peb txhua tus nyias nyob nyias chaw hauv txoj kev ntawd, thiab ib txhia mus ceev ib txhia mus qeeb. Peb yuav tsum nco qab tias tsis yog ib txoj kev sib tw, thiab peb yuav tsum ib leeg hlub ib leeg thiab ib leeg pab ib leeg. Peb yuav tsum ua hauj lwm kom cia tus Cawm Seej ua hauj lwm hloov peb lub neej.
Tus Tswv tau hais rau Sidney Rigdon hais tias: “Kuv tau ntsia koj thiab tej yam koj ua. Kuv tau hnov koj tej lus thov Vajtswv, thiab tau npaj koj rau ib txoj hauj lwm tseem ceeb zog.”11 Kuv ua tim khawv tias tus Tswv hnov thiab teb peb tej lus thov; Nws paub peb; thiab Nws muaj ib txoj hauj lwm tseem ceeb rau peb txhua tus ua. Los ntawm kev thov Vajtswv thiab kev kawm vaj lug kub, peb txais tau cov koob hmoov saum ntuj ceeb tsheej thiab hloov los ua neeg uas muaj peev xwm coj raws li tus Cawm Seej Yexus Khetos.
Thawj Tswj Hwm Dallin H. Oaks qhia hais tias: “Txoj Kev Txiav Txim Thaum Kawg tsis yog suav tej yam zoo thiab phem—uas peb twb ua los lawm. Yog suav seb tau muaj li cas los ntawm tej yam peb tau ua thiab peb tej kev xav—tau ua rau peb hloov los ua neeg zoo li cas lawm.”12
Kuv yeej ua Vajtswv tsaug rau cov yaj saub, cov pom tau, thiab cov txais kev tshwm sim; lawv yog cov zov nyas saum tus pej thuam. Lawv pom tej yam uas peb tsis pom. Kuv ua tim khawv tias los ntawm lawv tej lus, peb yuav hloov los ua cov neeg uas txawj coj raws li tus Cawm Seej Yexus Khetos thiab ua txhua yam peb ua tau. Kuv ua tim khawv tias Yexus Khetos muaj txoj sia nyob thiab paub peb txhua leej txhua tus. Nov yog Nws lub Koom Txoos. Los ntawm Yexus Khetos lub npe dawb ceev, amees.