Tsis Muaj Tshuaj Nyob hauv Nkile-as Li Los?

Tsis ntev tom qab kuv ua tub txib, thaum kuv tseem yog ib tug tub kawm ntawv nyob hauv Brigham Young University, kuv txiv hu xov tooj rau kuv. Nws qhia kuv tias nws muaj mob cancer hauv tus txiav thiab cov kws kho mob ntshai tias nws yuav nyob tsis ntev, tiam sis nws txiav txim siab tias nws yuav rov qab zoo thiab ua nws lub neej li qub. Kev tham xov tooj ntawd yeej ua rau kuv xav ntau yam. Kuv txiv twb yog kuv tus npisov, kuv tus phooj ywg, thiab tus pab tawm tswv yim. Thaum kuv niam, kuv cov kwv tij thiab cov muam, thiab kuv xav txog yav tom ntej, zoo li tsis muaj kev cia siab. Kuv tus kwv, Dave, yog ib tug tub txib nyob hauv New York thiab tau sib tham nrog peb tsev neeg ntau.

Cov kws kho mob twb tau hais kom nws phais mob kom sim tav kev rau qhov mob cancer kom txhob kis mus. Peb tsev neeg tau rau siab yoo mov thiab thov Vajtswv kom muaj ib qho txuj ci tseem ceeb. Kuv xav tias peb muaj kev ntseeg txaus kom kuv txiv yuav rov zoo. Ua ntej yuav phais mob, kuv tus tij laug, Norm, thiab kuv wb tau foom koob hmoov rau kuv txiv. Nrog tag nrho wb txoj kev ntseeg, wb tau hais kom nws tus mob yuav zoo.

Lub sij hawm phais mob yuav ntev heev, tiam sis tom qab ib chim xwb, tus kws kho mob los txog chav tos ntsib peb tsev neeg. Nws qhia peb tias thaum lawv phais mob, lawv pom tau tias qhov cancer twb kis mus thoob plaws kuv txiv lub cev. Raws li lawv pom, kuv txiv tshuav ob peb lub hlis xwb. Peb poob siab nthav.

Thaum kuv txiv tsim los tom qab kev phais mob, nws xav xav paub seb kev phais mob puas tau pab nws. Peb tau qhia nws txog tej uas tus kws kho mob hais.

Peb tseem tau yoo mov thiab thov Vajtswv kom muab ib qho txuj ci tseem ceeb rau peb. Thaum kuv txiv pib mob zuj zus ntxiv, peb tau pib thov Vajtswv kom nws tsis txhob hnov mob. Thaum kawg, thaum nws mob mob heev, peb tau thov tus Tswv kom nws yuav tas sim neej no sai heev. Ob peb lub hlis tom qab tau phais mob lawm, raws li tus kws kho mob hais, kuv txiv twb tau tso lub ntiaj teb no tseg.

Pawg ntseeg cov mej zeej thiab cov phooj ywg tau hlub thiab saib xyuas peb tsev neeg. Peb tau ua lub ntees tuag uas hwm kuv txiv lub neej. Tiam sis thaum sij hawm dhau mus, kuv tsev neeg thiab kuv pib tu siab vim kuv txiv tsis nyob lawm, thiab kuv xav paub seb vim li cas kuv txiv tsis tau txais kev kho mob. Kuv xav paub seb puas yog kuv txoj kev ntseeg tsis muaj zog txaus. Vim li cas muaj tej tsev neeg uas txais ib qho txuj ci tseem ceeb, tiam sis peb tsev neeg tsis tau txais? Kuv tau kawm thaum kuv ua tub txib tias yuav tsum nyeem vaj lug kub kom txais lus teb, yog li ntawd kuv tau pib kawm vaj lug kub.

Phau Qub qhia txog ib cov tshuaj tsw qab uas siv rau kev kho tej qhov txhab es cov tshuaj los ntawm ib tsob ntoo uas muaj nyob hauv Nkile-as. Nyob hauv lub caij nyoog ntawm Phau Qub lawv hu cov tshuaj pleev no hu ua “Nkile-as cov tshuaj.”¹ Tus yaj saub Yelemis quaj ntsuag txog tej kev puas tsuaj uas nws pom nws cov neeg raug thiab cia siab tias yuav muaj kev nplij siab. Yelemis nug hais tias, “Tsis muaj tshuaj nyob hauv cheeb tsam Nkile-as li los? Tsis muaj kws kho mob nyob qhov ntawd li los?”² Nyob hauv tej phau ntawv, cov nkauj, thiab cov duab, tib neeg hu tus Cawm Seej Yexus Khetos ua Nkile-as cov Tshuaj vim tias Nws muaj hwj chim kho mob. Ib yam li Yelemis, kuv xav paub seb, “Tsis muaj tshuaj nyob hauv cheeb tsam Nkile-as rau tsev neeg Nielson li los?”

Nyob hauv Malakaus tshooj 2 nyob hauv Phau Tshiab, tus Cawm Seej nyob hauv Kapena-us. Neeg coob nyob thoob plaws thaj av tau hnov txog tus Cawm Seej lub hwj chim kho mob, thiab neeg coob tau mus rau Kapane-us kom tus Cawm Seej kho lawv zoo. Muaj neeg coob coob nyob puv tsev thiab nyob ib puag ncig lub tsev uas tus Cawm Seej nyob thiaj li tsis muaj chaw rau Nws txais txhua tus. Muaj plaub tug txiv neej uas kwv ib tug neeg tuag tes tuag taw kom tus Cawm Seej kho nws. Lawv tsis tau kev mus cuag tus Tswv, yog li ntawd lawv rhuav ib qho ncaj ntawm tus Cawm Seej rau saum ruv tsev es lawv txawm muab hlua khi daim pam uas pua nws tso nws dauv mus rau hauv.

Thaum kuv nyeem zaj no, kuv xav tsis thoob txog tej lus uas tus Cawm Seej hais thaum nws ntsib tus txiv neej no: “Me tub, kuv twb zam koj lub txim lawm.”³ Kuv xav tias yog kuv yog ib tug uas tau kwv tus neeg no tuaj cuag tus Cawm Seej, tej zaum kuv yuav hais rau Nws tias, “Peb tau kwv nws tuaj cuag koj kom koj kho nws zoo.” Kuv xav tias tus Cawm Seej yuav teb li no, “Kuv twb kho nws zoo lawm.” Puas yog kuv tsis tau to taub tias tus Cawm Seej lub hwj chim kho mob tsis yog Nws txoj kev kho peb lub cev xwb, tiam sis tej zaum qhov tseem ceeb tshaj, yog Nws txoj kev muaj peev xwm kho peb lub siab thiab kuv tsev neeg lub siab uas mob mob heev?

Tus Cawm Seej tau qhia ib zaj lus tseem ceeb los ntawm zaj lus no thaum Nws kho tus txiv neej lub cev zoo lawm thiab. Ua rau kuv paub meej tias Nws zaj lus yeej yog qhov uas Nws muaj peev xwm chwv qhov muag ntawm cov dig muag ua rau lawv pom kev. Nws muaj peev xwm chwv qhov ntsej ntawm cov uas lag ntseg ua rau lawv hnov lus. Nws muaj peev xwm chwv txhais ceg ntawm cov uas tuag taw ua rau lawv mus tau kev. Nws yeej muaj peev xwm kho peb qhov muag thiab qhov ntsej thiab txhais ceg, tiam sis qhov tseem ceeb tshaj, Nws muaj peev xwm kho peb lub siab thaum Nws ntxuav peb huv kom tsis muaj kev txhaum thiab txhawb nqa peb mus dhau tej kev sim siab nyuaj heev.

Thaum tus Cawm Seej tshwm sim rau cov neeg pom nyob hauv Phau Ntawv Maumoos tom qab Nws Sawv Rov Los, Nws twb tau rov qab hais txog Nws lub hwj chim kho mob. Cov Neeg Nifais tau hnov ib lub suab saum ntuj hais tias, “Nim no nej puas … kam tig rov los cuag kuv, thiab hloov siab lees txim rau nej tej kev txhaum, thiab hloov siab los ntseeg, xwv kom kuv yuav kho tau nej?”⁴ Tom qab ntawd, tus Cawm Seej qhia tias, “Vim nej twb tsis paub tiam sis muaj ib hnub lawv yuav rov los thiab hloov siab lees txim, thiab los cuag kuv kawg siab kawg ntsws, thiab kuv yuav kho kom lawv zoo.”⁵ Tus Cawm Seej tsis hais txog kev kho mob ntawm lub cev tiam sis yog kev kho mob ntawm lawv sab ntsuj plig.

Maulaunais tau pab peb to taub ntxiv thaum nws hais nws leej txiv, Maumoos, tej lus. Tom qab nws hais txog tej txuj ci tseem ceeb, Maumoos piav tias, “Thiab Khetos tau hais tias: Yog nej yuav muaj kev ntseeg kuv nej yuav muaj hwj chim ua tau txhua yam uas kuv xav tias tsim nyog ua.”⁶ Kuv tau kawm tias kuv yuav tsum ntseeg Yexus Khetos thiab kuv yuav tsum lees yuav tej yam uas Nws xav tias tsim nyog ua thaum kuv muab siab rau ntseeg Nws. Kuv to taub tias qhov uas kuv leej txiv tau tas sim neej no yog qhov tsim nyog rau Vajtswv txoj hau kev. Nim no, thaum kuv tso tes saum lwm tus neeg lub taub hau kom foom koob hmoov rau nws, kuv ntseeg Yexus Khetos, kuv to taub tias ib tug neeg yuav rov zoo lawm, yog Khetos xav tias tsim nyog ua.

Tus Cawm Seej txoj Kev Theej Txhoj, uas ua rau peb txais tau Nws lub hwj chim txhiv dim, yog txoj koob hmoov zoo tshaj uas Yexus Khetos muab rau peb. Thaum peb hloov siab lees txim kawg siab kawg ntsws, tus Cawm Seej muab peb tej kev txhaum ntxuav mus. Thaum peb muab peb lub siab rau Leej Txiv lub siab nyiam, tsis hais thaum peb raug xwm txheej nyuaj kawg nkaus los, tus Cawm Seej yuav ris peb tej nra kom sib.⁷

Tiam sis nov yog ib zaj lus tseem ceeb tshaj uas kuv tau kawm. Kuv tau ua yuam kev ntseeg tias tus Cawm Seej lub hwj chim kho mob tsis tau pab kuv tsev neeg. Tiam sis thaum kuv saib yav tas los lawm, kuv pom tias tus Cawm Seej lub hwj chim kho mob yeej muaj hauv kuv tsev neeg txhua tus lub neej. Kuv twb tsom ntsoov rau txoj kev kho mob ntawm lub cev nqaij daim tawv kuv thiaj li tsis tau pom tej txuj ci tseem ceeb uas tshwm sim. Tus Tswv tau txhawb nqa kuv niam kom nws txawj tiv tau kev sim siab nyuaj no, thiab nws tau ua neej nyob ntev zog thiab tau ua ntau yam. Nws tau muaj hwj huam zoo kawg rau nws cov me nyuam thiab cov xeeb ntxwv. Tus Tswv tau foom koob hmoov rau kuv thiab kuv cov kwv tij thiab cov muam kom peb muaj kev hlub, kev koom siab koom ntsws, kev ntseeg, thiab kev muaj peev xwm uas yeej yog ib feem tseem ceeb ntawm peb lub neej.

Tiam sis kuv txiv nev? Ib yam li txhua tus uas kam hloov siab lees txim, nws tau txais kev kho mob ntawm sab ntsuj plig thaum nws nrhiav thiab txais tag nrho cov koob hmoov uas los ntawm tus Cawm Seej txoj Kev Theej Txhoj. Yexus tau zam txim rau nws tej kev txhaum thiab tam sim no nws tos kom Sawv Rov Los. Tus Thwj Tim Povlauj qhia hais tias, “Txhua tus puav leej raug kev ploj kev tuag, rau qhov sawv daws yog Adas roj ntsha ib yam nkaus li ntawd, txhua tus yuav sawv rov los, rau qhov sawv daws nrog Yexus Khetos koom ib txoj sia.”⁸ Kuv tau hais rau tus Cawm Seej, “Peb coj kuv txiv rau koj kom kho nws tus mob,” thiab tus Cawm Seej tau qhia meej tias Nws twb tau kho kuv txiv zoo lawm. Cov tshuaj nyob hauv Nkile-as twb ntxim rau tsev neeg Nielson—tsis yog raws li kuv tau xav, tiam sis txoj kev no yeej tseem ceeb tshaj txoj kev uas tus Cawm Seej tau foom koob hmoov rau peb tsev neeg lub neej.

Nyob hauv phau Yauhas tshooj 6 nyob hauv Phau Tshiab, tus Cawm Seej tau ua ib qho txuj ci tseem ceeb loj heev. Tsuas muaj ob peb tus ntses thiab ob peb lub ncuav xwb, tus Cawm Seej tau pub mov rau 5,000 tus neeg noj. Kuv tau nyeem zaj no ntau zuas, tiam sis muaj ib feem uas kuv tsis tau paub zoo thiab tam sim no muaj nqis rau kuv. Tom qab tus Cawm Seej tau pub mov rau 5,000 tus neeg, Nws tau hais kom Nws cov thwj tim sau tej yam uas noj tsis tas lawm ua rau 12 tawb puv nkaus. Kuv tau xav paub seb vim li cas tus Cawm Seej yuav siv sij hawm ua li ntawd. Ib zaj uas peb kawm tau los ntawm zaj no yog li no: Yexus muaj peev xwm pub mov rau 5,000 thiab tseem tshuav mov uas noj tsis tau tas. “Kuv lub hwj chim yeej txaus rau tib neeg txhua tus.”⁹ Tus Cawm Seej lub hwj chim uas txhiv dim thiab kho mob yeej zam tau txhua qhov txhaum, kho tau txhua qhov txhab—tsis hais loj npaum li cas los sis nyuaj npaum li cas—thiab tseem tshuav ntxiv. Nws txoj kev tshav ntuj yeej txaus.

Vim peb paub li ntawd, peb thiaj li yuav mus tom ntej nrog kev ntseeg, vim peb paub tias thaum peb raug tej yam nyuaj los sis thaum twg peb ua txhaum hauv peb lub neej, tus Cawm Seej sawv los nrog “hwj chim kho tau mob nyob hauv nws ob txhais tis,”¹⁰ caw peb los cuag Nws.

Kuv ua tim khawv rau nej txog cov Tshuaj hauv Nkile-as, tus Cawm Seej Yexus Khetos, peb tus Txhiv Dim, thiab txog Nws lub hwj chim kho mob. Kuv ua tim khawv tias Nws xav kho nej zoo. Los ntawm Yexus Khetos lub npe, amees.