Li wank jo’ xtzolom li Kristo

Sa’ xtzolb’al li loq’laj hu, natoch’e’ inch’ool xb’aan lix jalajik lix ch’ool laj Sawlo aj Tarso, li moqon kinawe’ ru jo’ laj Pablo, jo’ yeeb’il resil sa’ li Santil Hu.

Laj Pablo kixrahob’tesi rajlal li Iglees ut eb’ laj Kristiano. A’b’anan, xb’aan lix wankilal li choxa ut lix tojb’al rix li maak xb’aan li Jesukristo, kijala chi tz’aqal, ut ki’ok choq’ jun xmoos li Dios q’axal chaab’il. A’an kixsik’ xtaaqenkil li Kolonel Jesukristo.

Sa’ li raatin laj Pablo reheb’ laj Korinto, a’an kixb’oqeb’ chixtaaqenkil a’an, jo’ chanru naq a’an naxtaaqe li Kristo (chi’ilmanq 1 Korintios 11:1). Maak’a’ xb’alaq’ ut jwal chaab’il lix b’oqom laj Pablo toj sa’ li kutan a’in: choowanq jo’ xtzolom li Kristo.

Kin’ok chixtz’ilb’al rix k’a’ru li wank jo’ xtzolom li Kristo. Ut aajel wi’chik ru chiru a’an, kin’ok chixpatz’b’al, “Chan ru naq tintaaqe a’an?”

Re wank jo’ xtzolom li Kristo, naqasik’ xjayalinkil li qab’aanuhom ut li qayu’am rik’in li re li Kolonel. Tento toowulaq jo’ a’an. A’an li wank jo’ tz’aqal xtzolom li Jesukristo.

Sa’ xtz’ilb’al rix xyu’am li Kolonel, xink’e reetal kaahib’eb’ lix chaab’ilal a’an li ninyal xyu’aminkil ut li tinwotz eerik’in.

Li xb’een na’leb’ chirix li Kolonel, a’an li tuulanil ch’oolej. Chalen chaq xtiklajik, tuulan xch’ool li Jesukristo. Sa’ li Ch’utam sa’ Choxa, a’an kixk’e reetal ut kixkanab’ naq taanumtaaq li rajom li Dios sa’ li na’leb’ kixk’uub’ re xkolb’al chixjunil li winqilal. A’an kixye, “At inYuwaʼ, chiʼuxq laa wajom, ut aawehaq taxaq li loqʼalil chi junelik” (Moises 4:2).

Naqanaw naq li Jesus kixjultika li tuulanil ch’oolej, ut kixtuulanob’resi rib’ re xnimankil ru lix Yuwa’.

Choowanq chi tuulan qach’ool, xb’aan naq a’an naxk’e tuqtuukilal (chi’ilmanq Tzol’leb’ ut Sumwank 19:23). Li tuulanil ch’oolej na’ux rub’elaj li nimank-u, ut naxk’e li Dios chiqusila: “Chetiqib’aq eerib’ chejunilex rik’in q’unil ch’oolej cherib’il eerib’, xb’aan naq li Dios xik’ narileb’ li b’ach’b’ach’eb’, a’b’an narusilaheb’ li q’uneb’ xch’ool” (1 Pedro 5:5). Li tuulanil ch’oolej naxk’e li q’unil sumenk. A’an lix yo’leb’aal li tiikil wank.

Li Elder Dale G. Renlund kixye:

“Eb’ li neke’b’eek sa’ tuulanil rik’in li Dios najultiko’ reheb’ k’a’ru xb’aan li qaChoxahil Yuwa’ ut li Jesukristo choq’ reheb’.

“Tiik qach’ool rik’in li Dios naq nokob’eek sa’ tuulanil chiru” (“Xb’aanunkil li tiik ru, xraab’aal li uxtaan, b’eek chi tuulan rik’in li Dios,” Jolomil ch’utub’aj-ib’ re octubre 2020).

Li xkab’ na’leb’ chirix li Kolonel, a’an li kawilal ch’oolej. Naq nink’oxla li Jesukristo aj kab’laju chihab’ xyu’am, chunchu chirix lix santil ochoch li Dios sa’ xyanqeb’ laj tzolonel chixk’utb’al li choxahil na’leb’ chiruheb’, nink’e reetal naq ak kaw xch’ool, us ta saaj, ut a’an jun chaab’il paay chi kawil ch’oolej. A’an raj eb’ laj tzolonel li yookeb’ chixtzolb’al li saaj, a’b’an a’an li saaj li naxtzoleb’ a’an naq “yookeb’ chirab’inkil li Jesus ut chi patz’ok re” (JJS, Lukas 2:46). [in Luke 2:46, footnote c]).

Xook’anjelak sa’ mision sa’ li mision República Democrática del Congo Mbuji-Mayi chalen 2016 toj 2019. Li b’eek chiru li mision a’an nab’aanuman sa’ b’eleb’aal ch’iich’. Sa’ li na’ajej a’an, yookeb’ chi tamk laj elq’ rik’ineb’ lix ch’iich’ li neke’ok sa’ li b’e ut neke’xrameb’ li b’eleb’aal ch’iich’.

Oob’ li misioneer li yookeb’ chi b’eek sa’ lix ak’ na’aj ke’elq’aak li k’a’ru re. Laa’o ak qanumsihom ajwi’ jun li elq’aak, jo’kan naq koo’ok chi xuwak chirix li qayu’am ut xyu’ameb’ a’an, ut ink’a’ chik koob’eek chiruheb’ li b’e re rula’aninkileb’ li misioneer ut re ch’utlaak rik’ineb’. Ink’a’ xqanaw jo’q’e te’oso’q li elq’aak a’in. Kintz’iib’a lin k’a’uxl, ut kintaqla re li Awa’b’ejil re li Area, kinye reheb’ naq ninxuwak chirix li b’eek, naq ka’ajwi’ chiruheb’ li b’e a’an nokoru chirula’ankileb’ li qamisioneer.

Sa’ xsumehom, li Elder Kevin Hamilton, a’an chaq li Awa’b’ej re li Area Africa sudeste, kixtz’iib’a: “Ninye naq taab’aanu li jo’ k’ihal naru chawu. Chiwanq aana’leb’ ut chattijoq. Maak’e aawib’ chi moko eb’ laa misioneer sa’ xb’ehil li xiwxiw, a’b’an chexxik chi uub’ej rik’in paab’aal. “Xb’aan naq moko li xiwak ta xqamaatani chaq rik’in li Dios, a’b’an lix kawub’ qach’ool, li rahok ut kuyuk-ib’ ” (2 Timoteo 1:7).”

Li raatin kixk’e qametz’ew ut kooxtenq’a chi b’eek chi kaw qach’ool toj sa’ xraqik li qamision, xb’aan naq xqab’i lix b’eresihom li qaYuwa’ sa’ Choxa sa’ li loq’laj aatin a’an.

Sa’ li loq’laj hu naqil lix musiq’anb’il aatin li profeet aj Jose Smith chirix li raatin li Qaawa’ choq’ qe: “Ex was wiitz’in, ma ink’a’ tooxik chi uub’ej sa’ xnimal ru li k’anjel a’in? Chi uubʼej chexxik, inkʼaʼ chi ixej. Kawaq eechʼool, ex was wiitzʼin, ut chi uubʼej, chi uubʼej toj saʼ li qʼaxok-u!” (Tzol’leb’ ut Sumwank 128:22).

Kawaq qach’ool re taqab’aanu li us, us ta li ruchich’och’ nokoxse’e—ut re xkolb’al rix li qapaab’aal ut k’anjelak rik’in paab’aal. Kawaq qach’ool re xjalb’al qak’a’uxl wulaj wulaj, re xk’ulub’ankil li rajom li Dios, ut re xpaab’ankil lix taqlahom. Kawaq qach’ool re k’anjelak sa’ tiikilal ut re xb’aanunkil li patz’b’il qe sa’ li qateneb’ankil ut li qak’anjel.

Li rox na’leb’ chirix li Kolonel, a’an li kuyuk maak. Sa’ lix ruchich’och’il k’anjel, li Kolonel kixkol rix jun ixq li kitawe’ chi muxuk sumsu re naq ink’a’ kikamsiik chi kutb’il pek. Kixtaqla re li ixq, “Ayu ut chalen anajwan matmaakob’k chik” (Jwan 8:11). A’in kireek’asi li ixq chixjalb’al xk’a’uxl toja’ naq kikuye’ xmaak, xb’aan naq jo’ tz’iib’anb’il sa’ li loq’laj hu, “chalen chaq li hoonal a’an li ixq kixnima ru li Dios ut kixpaab’ xk’ab’a’ ” (JJS, Jwan 8:11). [in John 8:11, footnote c]).

Sa’ li ch’utam re Ralankil sa’ diciembre, 2018, li qaraarookil Awa’b’ej Russell M. Nelson ki’aatinak chirix kaahib’ li maatan naxk’e li Kolonel qe. Kixye naq jun reheb’ lix maatan li Kolonel, a’an li qawankilal chixkuyb’al li maak:

“Sa’ xk’ab’a’ lix tojb’al rix li maak maak’a’ roso’jik xb’aan, naru taakuy xmaakeb’ li ani xe’rahob’tesink aawe ut maajun sut xe’xk’ulub’a li rahob’tesink xe’xb’aanu aawe.

“Ink’a’ mas ch’a’aj xkuyb’al xmaak li ani naxpatz’ chi maak’a’ xb’alaq’ ut chi tuulan xch’ool naq taakuy lix maak. A’ut li Kolonel tixk’e aawe li wankilal re xkuyb’al xmaak yalaq ani li xrahob’tesink aawe chi yalaq chan ru” (“Kaahib’ li maatan q’axtesinb’ileb’ aawe xb’aan li Jesukristo” [Xch’utam li Xb’eenil Awa’b’ejil re li Ralankil, 2 diciembre, 2018], broadcasts.ChurchofJesusChrist.org).

Qakuyaq qamaak chiqib’il qib’ re naq taakuye’q li qamaak xb’aan li Yuwa’b’ej. Li kuyuk maak nokorach’ab’ ut naxk’e qak’ulub’il chixk’ulb’al li loq’laj wa’ak rajlal domingo. Taqlanb’ilo chi kuyuk maak re tooruuq chi wank jo’ tz’aqal xtzolom li Jesukristo.

Li xkaa na’leb’ chirix li Kolonel, a’an li mayejak. A’an jun raqal re lix evangelio li Jesukristo. Li Jesukristo kixk’e lix yu’am, li mayej q’axal nim, choq’ qe re naq truuq taatoje’q qix. Sa’ xyi li rahilal kixk’ul xb’aan xmayej, kixpatz’ re lix Yuwa’ naq taarisi li sek’, a’b’an kixkuy toj sa’ roso’jik lix junelikil mayej. A’an lix tojb’al rix li maak xb’aan li Jesukristo.

Li Awa’b’ej M. Russell Ballard kixye a’in: “Li mayejak a’an lix tz’aqal k’utb’esinkil li tz’aqal rahok. Naru taab’ise’q li qarahom choq’ re li Qaawa’, li evangelio, ut li qas qiitz’in a’ yaal li wan qach’ool chixmayejankil choq’ reheb’ ” (“Las Bendiciones Que Vienen Del Sacrificio,” Liahona, mayo 1992, 76).

Naru naqamayeja li qahoonal re rilb’aleb’ li qakomon, k’anjelak chiru li qas qiitz’in, xb’aanunkil li us, xb’aanunkil li k’anjel re li junkab’al, ut xb’aanunkil li qab’oqb’al sa’ li Iglees.

Naru naqak’e li qatumin sa’ li lajteqil, li mayej re li kuyuk sa’, ut chi naab’al paay ru re xkab’lankil li rawa’b’ejihom li Dios sa’ ruchich’och’. Naqaj ru mayejak re xpaab’ankileb’ li sumwank okenaqo wi’ rik’in li Kolonel.

Nintz’aama naq sa’ xtaaqenkil li Jesukristo ut roksinkileb’ li rosob’tesihom lix tojb’al rix li maak, tuulanaq chik ut kawaq chik qach’ool, wanq qach’ool chi kuyuk maak ut chi mayejak choq’ re li rawa’b’ejihom.

Ninch’olob’ xyaalal naq yo’yo li qaChoxahil Yuwa’ ut naq naxnaw qu chiqajunjunqal, naq li Jesus a’an li Kristo, naq li Awa’b’ej Russell M. Nelson a’an lix profeet li Dios anajwan. Ninch’olob’ xyaalal naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, a’an li rawa’b’ejihom li Dios sa’ ruchich’och’, ut naq tz’aqal yaal lix Hu laj Mormon. Sa’ xk’ab’a’ li Jesukristo, aj Tojol qix, amen.