Paab’aal re k’anjelak ut wulak xb’aanunkil

A’an kixye, “Patz’omaq chiru lee Choxahil Yuwa’, sa’ xk’ab’a’ li Jesukristo, naq texxtenq’a.”² Li patz’ok sa’ tij aajel ru re xnawb’al chan ru tooruuq chi wulak jo’ jun xchaab’il tzolom li Jesukristo.

Sa’ roso’jik lix k’anjel sa’ xyanqeb’ laj Nefita sa’ li ch’och’ America, li Jesukristo kitaqe’ sa’ choxa. Moqon, eb’ lix tzolom ke’xch’utub’ rib’ “sa’ junajil chi tijok ut chi kuyuk sa’ rik’in nimla metz’ew. Ut li Jesus kixkʼut wiʼchik ribʼ chiruhebʼ, xbʼaan naq yookebʼ chi tijok chiru li Yuwaʼbʼej saʼ lix kʼabʼaʼ.”³ K’a’ut naq li Jesus kixk’ut wi’chik rib’ chiruheb’ lix tzolom? Xb’aan naq yookeb’ chi tijok; yookeb’ chi tz’aamank.

Chirix a’an kixye:

“Ut anajwan xik we rikʼin li Yuwaʼbʼej. Ut chi yaal ninye eere, yalaq kʼaʼru teepatzʼ chiru li Yuwaʼbʼej saʼ lin kʼabʼaʼ taakʼeemanq eere.

“Joʼkan ut, chextzʼaamanq, ut texkʼuluq; chextochʼoq, ut taateheʼq cheru; xbʼaan naq ani natzʼaaman, nakʼuluk, ut chiru ani natochʼok, taateheʼq.”⁴

Aajel ru naq toopatz’oq rik’in paab’aal re xnawb’al li rajom li Qaawa’ ut xk’ulub’ankil naq a’an naxnaw li us choq’ qe laa’o.

Li tzolok a’an jun na’leb’ aajel ru re wulak jo’ jun xchaab’il tzolom li Jesukristo. Wi nokok’anjelak, a’an tooxb’eresi ut tixk’am qab’e chiru chixjunil li b’e. Ninnaw chi yaal naq laj Nefi yoo chaq chixsik’b’al xtenq’ li Qaawa’ re xnawb’al chan ru taaruuq chixtawb’al li perpookil ch’iich’ bronce li wan rik’in laj Laban, us ta ak ke’xyal wiib’ sut ut ink’a’ ke’el chi uub’ej. A’b’anan yookeb’ chi k’anjelak ut li Qaawa’ yoo chaq chixb’eresinkileb’ chiru chixjunil li b’e. Toj sa’ rox sutil naq laj Nefi ki’el chi uub’ej. A’an kinaq sa’ xch’ool, “Ut kʼambʼil chaq inbʼe xbʼaan li Musiqʼej, chi moko ninnaw ta chirubʼeetal kʼaʼru li tento tinbʼaanu.”⁵

Chi jo’kan nak’anjelak li Qaawa’ naq laa’o naqayal qaq’e ut nokok’anjelak wi ta ink’a’ naqataw ru chi tz’aqal re ru li taqab’aanu. Li Qaawa’ kixye re laj Nefi k’a’ru tixb’aanu: taaxik ut tixtaw chaq eb’ li perel ch’ich’. A’b’an ink’a’ kixye re laj Nefi chan ru xb’aanunkil. Kixkanab’ naq laj Nefi tixb’aanu, ut naq tixsik’ lix tenq’ li Qaawa’—ut chi jo’kan nak’anjelak li Qaawa’ sa’ li qayu’am. Naq nokok’anjelak rik’in qapaab’aal, li Qaawa’ naxk’am li qab’e ut nokoxb’eresi.

Sa’ 3 Nefi, eb’ lix tzolom ke’xye re li Kolonel naq wan li wech’ink-ib’ sa’ xyanq li tenamit chirix lix k’ab’a’ li iglees. Sa’ xsumenkil, li Qaawa’ kixk’ut jun na’leb’ aajel ru naq kixpatz’, “Ma ink’a’ xe’rileb’ ru li loq’laj hu?”⁶ Li tzolok a’an jun na’leb’ aajel ru re wulak jo’ jun xchaab’il tzolom li Jesukristo. Li tijok ut rilb’aleb’ ru li loq’laj hu neke’xtenq’a rib’. Neke’k’anjelak choq’ re qatenq’ankil. Chi jo’kan kixtaqla li Qaawa’. “Chetzeka xsahil li raatin li Kristo, xbʼaan naq kʼehomaq reetal, li raatin li Kristo tixye eere chixjunil li kʼaʼaq re ru tento teebʼaanu.”⁷

Li Kolonel kixk’ut ajwi’ naq ink’a’ ka’ajwi’ taqil ru li loq’laj hu, tento b’an took’utuq rik’in a’an, jo’ kixk’ut chiruheb’ laj Nefita: “Anajwan ut kik’ulman naq chirix naq li Jesus kixch’olob’ chaq chixjunileb’ li loq’laj hu sa’ junajil, li ke’xtz’iib’a chaq, kixtaqlaheb’ naq te’xk’ut li k’a’aq re ru kixch’olob’ chaq a’an chiruheb’.”⁸

A’in jun rajb’al naq laj Nefi taasutq’iiq ut tixtaw chaq eb’ li perel ch’iich’ bronce: lix junkab’al naraj ru li loq’laj hu ink’a’ ka’ajwi’ re xtenq’ankileb’ chi wulak sa’ li yamyookil ch’och’, re b’an xtenq’ankileb’ chixk’utb’al li loq’laj hu chiruheb’ li ralal xk’ajol. Laa’o ajwi’ tento taqasik’ lix tenq’ li loq’laj hu choq’ re li qab’eenik, ut tento taqatzoleb’ sa’ li qajunkab’al ut naq took’anjelaq sa’ li qab’oqb’al sa’ li Iglees.

Wan naq lix sumenkil li qatij ink’a’ nak’ulman sa’ junpaat. A’b’an wanq li qapaab’aal re xb’aanunkil, k’anjelak sa’ tiikilal, ut xyalb’al qaq’e jo’ laj Nefi naq yoo chaq chixsik’b’al li perel ch’iich’ bronce. Li Qaawa’ tixk’ut chiqu chi ka’ch’inq ka’ch’inq; wi naqileb’ ru li loq’laj hu, a’an tixk’e li qasumenkil malaj li qakawilal re xnumsinkil jun chik li kutan, jun chik li xamaan, ut xyalb’al jun sutaq chik. Li Elder Richard G. Scott kixye: “B’antioxi naq wan sut li Dios nakatxkanab’ chixyalb’al aaq’e chiru naab’al hoonal re naq taak’ul aasumenkil. A’an naxkawob’resi laa paab’aal ut naxkawob’resi laa ch’ool.”⁹

Rik’in tijok ut xtzolb’aleb’ li loq’laj hu li Qaawa’ rajlal naxk’e lin kawilal re k’anjelak ut re xyalb’al inq’e jun chik kutan, jun chik xamaan, ut xyalb’al jun sutaq chik. K’iila sut naq ink’a’ xink’ul lin sumenkil sa’ junpaat. Wankeb’ inpatz’om li maji’ nink’ul xsumenkileb’, a’b’an toj yookin chi patz’ok ut yookin chi tzolok ut sa lin ch’ool xb’aan naq li Qaawa’ yoo chixk’eeb’al lin kawilal re k’anjelak naq toj yooqin chiroyb’eninkileb’ lin sumenkil.

Li Elder Scott kixye ajwi’, “Naq tatb’eeq sa’ xmaril laa nawom toj reetal naq nakatwulak chiru li aak’ab’ rik’in xk’anjelankil laa paab’aal, tatb’eresiiq chixtawb’al aasumenkil.”¹⁰

Li wulak jo’ jun chaab’il aj taaqenel re li Kolonel Jesukristo a’an jun b’e re chixjunil li yu’am, ut jalan jalanq xjunpaatil li qab’eenik chiqajunilo. Tento taqanaw naq a’in maawa’ jun yalok u, ut wanko arin re xraab’al qib’ ut xtenq’ankil qib’ chiqib’il qib’. Tento took’anjelaq re naq li Kolonel taaruuq chi k’anjelak sa’ li qayu’am.

Naq kiraatina laj Sidney Rigdon, li Qaawa’ kixye: “Wilomat laa’at ut laa k’anjel. Wabʼihomebʼ laa tij, ut katinkawresi choqʼ re jun kʼanjel qʼaxal nim wiʼchik.”¹¹ Ninch’olob’ xyaalal naq li Qaawa’ nokorab’i ut naxsumeheb’ li qatij; naxnaw qu; ut wan jun xnimla k’anjel choq’ qe chiqajunjunqal. Rik’in tijok, lix tzolb’aleb’ li loq’laj hu, ut li k’anjelak, naru naqataweb’ li osob’tesink re li choxa ut toowulaq jo’ jun chaab’il aj taaqenel re li Kolonel Jesukristo.

Li Awa’b’ej Dallin H. Oaks kixye: “Sa’ li raqb’a-aatin sa’ roso’jik, ink’a’ ka’ajwi’ taatz’ilmanq rix chixjunil li us ut ink’a’ us b’aanunb’il—li qab’aanuhom. Taak’eemanq ajwi’ reetal li k’a’ru xk’ulman xb’aan li qab’aanuhom ut li qak’oxlahom—k’a’ru li xoo’ok wi’.”¹²

Ninb’antioxi naq wankeb’ li profeet, aj k’utb’esinel, ut aj ilol na’leb’; a’aneb’ laj k’aak’alenel sa’ xb’een li najt xteramil kab’l. Eb’ a’an neke’ril li k’a’aq re ru li ink’a’ naqil laa’o. Ninch’olob’ xyaalal naq rik’ineb’ li raatin naru toowulaq jo’ chaab’il aj taaqenel re li Kolonel Jesukristo ut naru naqataw li qaloq’al. Ninch’olob’ xyaalal naq li Kristo yo’yo ut naq naxnaw qu chiqajunjunqal. A’an a’in lix Iglees. Sa’ lix loq’laj k’ab’a’ li Jesukristo, amen.