Chalqex rik’in li Kristo, a’b’an ink’a’ eejunes

Raab’ilex xb’aan lee Choxahil Yuwa’. A’an jwal nokoxra chi tz’aqal, jo’kan naq kixtaqla li Ralal, a’ li Jesukristo, re naq tixtoj qix.¹ Lix rahom li Kolonel cherix laa’ex ink’a’ nasach—us ta nokosach laa’o! Maak’a’ wan li naru taajachoq qe rik’in lix rahom li Dios.² Xjultikankil li rahom a’in naru eetenq’ankil chirisinkil lix sachb’il na’leb’ li ruchich’och’ li naraj xsachb’al eena’leb’ chirix lee choxahilal ut xmutz’obresinkil eeru chirix lee wankilal.

Sa’ jun li ch’utub’aj-ib’ choq’ reheb’ li saaj, kinnaweb’ ru wiib’ chi saaj ixq li ke’wan xch’a’ajkilaleb’. Sa’ wiib’al ke’xye naq xe’xsik’ xna’leb’ sa’ li rosob’tesinkil xb’aan li yuwa’b’ejil aj k’anjel re xk’eeb’al wi’chik reetal lix rahom ut lix b’eresihom li Qaawa’. Tawomaq lee rosob’tesinkil xb’aan li yuwa’b’ejil aj k’anjel, ut ilomaq ru chi kok’ aj xsa’. Wi maji’ wan lee re, sik’omaq xk’ulb’al—anajwan. Mexb’ay chixsik’b’al k’a’ru naraj li Qaawa’ chixyeeb’al eere chirix anihex laa’ex.

Li xkab’ na’leb’ kixye li Awa’b’ej Nelson, a’an naq taqanaw k’a’ru li qajom. A’an a’in li qanimla teneb’ankil.

Junxil, lin yum aj Tanner, aj oob’ chihab’ chaq naq kib’atz’un xb’een sut sa’ li b’olotz oq. Jwal sa lix ch’ool!

Naq koowulak b’ar wi’ taab’atz’unq, kiqil naq lix ch’uut kiroksi jun li porteria wan xnimal jo’ li na’oksiman yalaq b’ar—ink’a’ jun li porteria ka’ch’in, jun b’an li jwal nim choq’ reheb’ li kok’al aj oob’ chihab’.

Kisach inch’ool chirilb’al naq laj Tanner taab’atz’unq jo’ aj ramol b’olotz. Kisach inch’ool. Ma naxtaw ta wi’ tz’aqal ru k’a’ru tixb’aanu sa’ li ramleb’?

Ki’eek’an li xuyb’ak ut ki’ok qach’ool sa’ li b’atz’unk ut kisach sa’ qach’ool laj Tanner. Toj reetal naq jun reheb’ laj b’atz’unel re li ch’uut jun chik kixk’ul li b’olotz ut sa’ junpaat kixkut b’ar wi’ wan laj Tanner. Xin’ilok wan wi’ laj Tanner re rilb’al ma yo’on wan re xramb’al li b’olotz. Li xwil, maawa’ a’an li xink’oxla naq twil.

Jalam-uuch

Jun ch’ina al sa’ li ramleb’

Sa’ jun hoonal re li b’atz’unk, laj Tanner kixjalb’ehi li rilob’aal, ki’ok chixch’ikb’al li xtz’e uq’ chiruheb’ xk’ob’olal li soq’. Ut chirix a’an kixch’ik li xnim uq. Ut lix tz’e oq. Ut chirix a’an lix seeb’al oq. Laj Tanner b’ak’inb’il kikana sa’ li soq’. Kisach sa’ xch’ool li rajom ut li k’anjel xk’eeman re.

Jalam-uuch

B’ak’inb’il li ch’ina al sa’ li soq’

Lix hoonal laj Tanner re xtzolb’al li b’atz’unk ink’a’ kinajto’ chiru, a’b’anan maajun wa taasachq sa’ inch’ool li na’leb’ xk’ut chiwu sa’ li kutan a’an. Chiqajunilo, wan hoonal naq naqajalb’ehi li qajom ut naqajalb’ehi li qametz’ew sa’ jalan chik li k’a’aq re ru. Laj Satanas naxsik’ qajalb’ehinkil rik’in li na’leb’ li maare us, a’b’an li maare tixmutz’ob’resi li qu ut tooxram chixb’aanunkil li k’anjel jwal chaab’il—li tz’aqal koochal wi’ arin sa’ ruchich’och’.³

Li qajunelikil ajom, a’an chalk rik’in li Kristo ut chi k’anjelak rik’in a’an sa’ lix nimla k’anjel. Moko ch’a’aj ta jo’ kixye li Awa’b’ej Nelson, “Yalaq jo’q’e naq naqab’aanu k’a’ruhaq li natenq’ank re yalaq ani … chi ok sa’ sumwank rik’in li Dios ut chixpaab’ankil li sumwank, yooko chi tenq’ank chixch’utub’ankil Israel.”⁴ Ut naq took’anjelaq qochb’een a’an, naniman li qanawom ut li qarahom choq’ re.

Naqasik’ nach’ok rik’in li Kolonel rik’in li qapaab’aal, li chaab’il jalb’a-k’a’uxlej, ut xpaab’ankileb’ li taqlahom. Naq naqab’ak’ qib’ rik’in a’an rik’ineb’ li sumwank ut li k’ojob’anb’il k’anjel, taanimanq lix kawilal qach’ool,⁵ lix kolb’al qix,⁶ ut lix sahil qach’ool li nakana.⁷

Naq nokochal rik’in a’an, naqileb’ li qas qiitz’in jo’ ilb’ileb’ xb’aan a’an.⁸ Chalqex rik’in li Kristo. Chalqex rik’in, a’b’an ink’a’ eejunes!⁹

Lix evangelio li Jesukristo ink’a’ ka’ajwi’ ch’ina-us, aajel b’an ru choq’ re chixjunil. “Maak’a’ chik junaq b’e chi moko chan chik ru naru nakole’ wi’ li winq, ka’ajwi’ rik’in ut sa’ xk’ab’a’ li Kristo.”¹⁰ Naqaj ru li Kristo! Li ruchich’och naraj ru li Kristo.¹¹

Chijultiko’q eere, re xchaab’ilob’resinkil li ruchich’och’, tento taqakawresi choq’ re li Kristo rik’in xb’oqb’al chixjunileb’ chixtaqeenkil a’an.

Sa’ lix Hu Laj Mormon wan jun seraq’ li naxk’ut rik’in wankilal naq chirix lix waklijik chi yo’yo, li Kristo kixnumsi hoonal rik’ineb’ laj Nefita. Ma nekek’oxla chan raj ru a’an?

Naq li Kristo kixye naq tento taasutq’iiq rik’in li Yuwa’b’ej, “kixb’eresi wi’chik li rilob’aal sa’ xsutam.”¹² Naq kiril xya’aleb’ ru, kixnaw naq sa’ lix ch’ooleb’, neke’xtz’aama naq taakanaaq chik junpaataq rik’ineb’.

Jalam-uuch

Li Kolonel naxb’oqeb’ laj Nefita chi k’irtesiik

Kixpatz’ reheb’: “Ma wan ani yaj saʼ eeyanq? Kʼamomaqebʼ chaq. Ma wan ani yeeq roq, malaj mutz’, … tz’ap xik, malaj ani tawasinb’il chi yalaq chan ru? K’amomaqeb’ chaq ut te’b’ink’irtesi.”¹³

Rik’in xnimal lix toq’ob’ahom, maajun kixtz’eqtaana, kixb’oq b’an chixjunileb’ “li tawasinb’ileb’ chi yalaq chan ru.” Nawulak chiwu xnawb’al naq maak’a’ jwal nim chi moko ka’ch’in li naru tixk’irtesi li Jesukristo.

A’an naxnaw li qarahilal, ut nokoxb’oq chixk’amb’aleb’ chaq li ani wankeb’ chiru xiwxiw, li raheb’ xch’ool, li lub’luukeb’, li q’etq’eteb’, li ink’a’ neke’k’ulub’aak, ut li xjuneseb’ malaj “li ani tawasinb’il chi yalaq chan ru.”

Jalam-uuch

Li Kolonel nak’irtesin

Ut chixjunileb’ “xkoheb’ … ; ut a’an kixk’irtesi chixjunjunqaleb’. …

“… Li ani k’irtesinb’ileb’ ut li ani kaweb’ rib’, ke’xkub’si rib’ chiroq, ut ke’xloq’oni.”¹⁴

Rajlal naq nawil a’in ninpatz’ wib’: Ani tink’am rik’in li Kristo? Ani teek’am chaq laa’ex?

Ma naru too’iloq chiqasutam jun sutaq wi’chik, jo’ kixb’aanu li Jesus, re taqak’e reetal naq maajun taasachq ut naq b’oqeb’ileb’ chixjunil chi chalk ut chixnawb’al ru.

Nawaj xwotzb’al jun li eetalil jo’ chanru naq ink’a’ ch’a’aj a’an. Li wamiiw xPeyton, aj 15 chihab’, wan sa’ xch’ool naq rajlal taaril ru oob’ raqal re li loq’laj hu eq’la sa’ xhoonalil li wa’ak, a’b’an ink’a’ kixb’aanu xjunes. Ki’ilok li xPeyton sa’ xsutam ut kixb’oqeb’ li xna’ xyuwa’ ut li ras riitz’in, jo’kan ajwi’ li riitz’in aj oob’ chihab’. Li ch’ina b’aanuhom a’in, a’an li kiraj li Kristo naq kib’oqok, “K’amomaqeb’ chaq.”

Lix b’oqom li Qaawa’ toj nak’eeman anajwan. Ex saaj ixq ut saaj teelom, tikib’omaq anajwan sa’ lee junkab’al. Ma textijoq ut teepatz’ re li qaChoxahil Yuwa’ chan ru laa’ex naru teetenq’aheb’ lee na’ eeyuwa’ naq toj yookeb’ chi chalk rik’in li Kristo? Neke’raj eeru jo’ nekerajeb’ ru laa’ex.

Ut chirix a’an, ilomaqeb’ wi’chik lee ras ut lee riitz’in, lee ramiiw, ut lee rech kab’al. Ani taak’am chaq rik’in li Kristo?

Li qaKolonel kixye, “K’ehomaq reetal, laa’in li saqen; laa’in xinb’aanu cheru li tento taa’uxq.”¹⁵ Taqeek’a lix rahom ut lix tuqtuukilal li Kolonel naq naqatenq’a a’an chixkolb’al lix junkab’al li Dios, xb’aan naq a’an naxyeechi’i, “Li tataaqenq we, ink’a’ taab’eeq sa’ li aak’ab’, wanq b’an lix saqenk li yu’am rik’in.”¹⁶

Xchaq’al ru li hoonal a’in re naq toowanq chi teneb’anb’il sa’ lix k’anjel li Kristo!

Hehe’, wankex arin re xb’aanunkil li k’a’jo’ xnimal ru. Wankin sa’ aatin rik’in li kixye li Awa’b’ej Nelson: “Li Qaawa’ naraj ru naq taajal li ruchich’och. Naq taak’ulub’a ut tataaqe li rajom choq’ aawe, taak’e reetal naq naru taab’aanu li k’a’ru jwal ch’a’aj!”¹⁷

Ninch’olob’ xyaalal naq li Qaawa’ naxnaw anihex laa’ex ut naq nekexxra! Sa’ junajil, taqak’am chi uub’ej li rajom toj reetal naq taawulaq li nimla xkutankil naq li Kristo taasutq’iiq chaq sa’ li ruchich’och’ a’in ut tooxb’oq, chiqajunjunqal, re naq tooxik rik’in a’an. Taqach’utub’ qib’ rik’in sahil ch’oolejil, xb’aan naq laa’o xoochal rik’in li Kristo, ut ink’a’ xoochal qajunes. Sa’ xk’ab’a’ li Jesukristo, amen.