Xk’ulb’aleb’ li qamusiq’ejil kaq-sut-iq’ rik’in paab’aal chirix li Kristo
Naqak’uleb’ chi chaab’il li qamusiq’ejil kaq-sut-iq’ naq naqapaab’ li Kristo ut noko’ab’in chiru lix taqlahom.
Chiru waqib’ chihab’, li wixaqil, xAnn, ut laa’in wanko chire li palaw sa’ Texas, b’ar wi’ xe’nume’ naab’aleb’ li ninqi kaq-sut-iq’, li xe’xsachle li k’a’aq re ru ut xe’xkamsi ajwi’ li kristiaan. Toj yookeb’ chi wulak li ninqi rahilal chiruheb’ li po xe’nume’. Naqaq’axtesi li qarahom ut li qatij choq’ reheb’ li xe’toch’e’ xyu’am. Sa’ 2017, laa’o xqak’ul li kaq-sut-iq’ aj Harvey, b’ar wi’ kit’ane’ 60 pulgadas chi hab’.
Ak re naq xb’aan lix chaq’rab’il li ruchich’och’ neke’k’ulman li kaq-sut-iq’. Tento naq lix tiqwal li palaw taawanq sa’ 27 centigrados, toj 50 metro taq’a rub’el li ha’. Naq li iq’ naxk’ul lix tiqwal ha’il li palaw, najala li ha’ choq’ b’ook ut nataqe’ toj sa’ choxa, b’ar wi najal wi’chik choq’ ha’. Toja’ naq na’ok choq’ choql, ut li iq’ naxsurisiheb’ li choql wankeb’ chixb’een li palaw.
K’a’jo’ xnimaleb’ li kaq-sut-iq’, lix teram nawulak tana 15,000 metro taqe’q, ut 200 kiloom lix najtil. A’b’an, naq li kaq-sut-iq’ nawulak sa’ li ch’och’, nakotz xmetz’ew xb’aan naq maak’a’ chik li tiqwal ha’ li naxk’e xmetz’ew.1
Maare maajun sut texrahob’tesiiq xb’aan jun li kaq-sut-iq’ sa’ lee yu’am. A’b’an, chiqajunilo ak xqak’ul, ut toj taqak’ul li musiq’ejil kaq-sut-iq’ li neke’xsik’ xsachb’al li qatuqtuukilal ut xyalb’al rix li qapaab’aal. Sa’ li qakutankil, chanchan naq yookeb’ chi tamk li kaq-sut-iq’ a’in. A’ut, li Qaawa’ kixkawresi jun b’e tooruuq wi’ chi numtaak sa’ xb’eeneb’ chi sa qach’ool. Naq naqayu’ami lix evangelio li Jesukristo, yeechi’inb’il qe naq sa’ li hoonal naq “nachal li q’ojyin sa’ qab’een ut nasach raj qatuqtuukilal, yo’onink toj k’utk’u sa’ qach’ool.”2
Li Awa’b’ej Russell M. Nelson kixye:
“Eb’ laj Santil Paab’anel naru te’wanq chi sa sa’ xch’ooleb’ a’ yaal chanru lix wanjikeb’. Naru naqeek’a li sahil ch’oolejil us ta wanq junaq li qakutan ink’a’ us, junaq li qaxamaan ink’a’ us, malaj junaq li qachihab’ ink’a’ us!
“… Li sahil ch’oolejil naqeek’a mas b’ab’ay rilom rik’in li naqanumsi sa’ li qayu’am, ut wan naab’al rilom rik’in chan ru naqil li qayu’am.
“Naq naqajayali li qayu’am rik’in li Jesukristo ut lix evangelio, naru naqeek’a xsahil qach’ool a’ yaal k’a’ru li nak’ulman—malaj li ink’a’ nak’ulman—sa’ li qayu’am.”3
Jo’ naq lix chaq’rab’il li ruchich’och’ nataqlan sa’ xb’eeneb’ li kaq-sut-iq’, li choxahil chaq’rab’ naxk’ut chan ru taasaho’q qach’ool sa’ xq’ehil li qamusiq’ejil kaq-sut-iq’. Li sahilal malaj rahilal naqeek’a naq naqak’uleb’ li kaq-sut-iq’ re li yu’am b’ak’b’o rib’ rik’ineb’ li chaq’rab’ kixk’e li Dios. Li Awa’b’ej Nelson kixye, “Taqlahom naqaye reheb’, a’ut tz’aqal yaaleb’ jo’ li chaq’rab’ re li taqsink, li gravedad, ut li chaq’rab’ najolomin re xyu’am li aamej.”
Li Awa’b’ej Nelson kixye ajwi’, “Moko ch’a’aj ta: Wi taawaj naq sahaq aach’ool, paab’eb’ li taqlahom.”4
Li wiib’ank ch’oolej naxka’pak’ali li paab’aal ut li sahil ch’oolejil. Jo’ naq li tiqwal ha’ naxyoob’ li kaq-sut-iq’, li wiib’ank ch’oolej naxyoob’ li musiq’ejil kaq-sut-iq’. Naru naqasik’ ru paab’ank, malaj wiib’ank sa’ qach’ool. Naq naqasik’ ru wiib’ank sa’ qach’ool, naqasik’ ru wank chi k’anjelanb’ilaqo, xk’eeb’al wankilal re laj tza, ut nokokana chi maak’a’ qametz’ew ut xkolb’al qix.5
Laj Satanas naxsik’ qajalb’ehinkil toj sa’ xjulel li wiib’ank ch’oolej. Naxsik’ xkawob’resinkil li qaam re naq ink’a’ toopaab’anq.6 Lix julel li wiib’ank ch’oolej maare nokoxb’oq xb’aan naq chanchan naq lix tuqtuukil ut tiqwal ha’ ink’a’ nokoxteneb’ “chixyu’aminkil li junjunq chi aatin li na’el chaq sa’ xtz’uumal re li Dios.”7 Sa’ li ha’ a’an laj Satanas nokoraale re naq ink’a’ taqil qib’ sa’ musiq’ej. Xmaak a’an naq nalaj li qamusiq’ejil kawilal, ut “moko keho ta chi moko tiqo.”8 Wi ink’a’ chapchooko rik’in li Kristo, lix sahilal li wiib’ank ch’oolej tooxjalb’ehi toj sa’ jun na’ajej b’ar wi’ maak’a’eb’ li sachb’a-ch’oolej, li sahil ch’oolejil maak’a’ roso’jik, chi moko “xhilaal li qaam.”9
Jo’ naq nalaj xmetz’ew li kaq-sut-iq’ sa’ xb’een li ch’och’, li paab’aal naxk’ul xna’aj li wiib’ank ch’oolej naq naqaxaqab’ li qak’ojleb’aal sa’ xb’een li Kristo. Toja’ naq taqileb’ li musiq’ejil kaq-sut-iq’ jo’ tz’aqal wankeb’, ut taanimanq li qawankilal chi numtaak sa’ xb’eeneb’. Ut, “naq joʼqʼe tixtaqla laj tza lix kawil iqʼ, relik chi yaal, lix tzimaj saʼ li sut iqʼ, … maakʼaʼaq xwankil chiqakelonkil taqʼa saʼ li jul re rahilal ut rahil chʼoolejil li maakʼaʼ rosoʼjik, saʼ xkʼabʼaʼ li saqoonaq li kabʼlanbʼilo wiʼ, aʼan jun kʼojlebʼaal chʼolchʼo ru.”10
Li Awa’b’ej Nelson kixye:
“Li paab’aal chirix li Jesukristo, a’an xk’ojleb’aal chixjunil li paab’ank ut xnumleb’ li choxahil wankilal. …
“Li Qaawa’ ink’a’ naxteneb’ naq tz’aqal li qapaab’aal re truuq taqoksi lix wankilal a’an li tz’aqal. A’ut, naxpatz’ naq toopaab’anq.”11
Chalen chaq li jolomil ch’utub’aj-ib’ re abril, lin junkab’al ut laa’in yooko chixsik’b’al xkawob’resinkil li qapaab’aal chirix li Jesukristo ut lix tojb’al rix li maak re naq tootenq’aaq “chi k’iik ut chi chaab’ilo’k chiruheb’ li qach’a’ajkilal.”12
Li xRuby, li qimam, ki’osob’tesiik rik’in xkawilal xch’ool. Naq kiyo’la, lix numleb’ xwa sa’ xja’aj moko chapcho ta rik’in li xsa’. Jo’ k’uula’al, rik’in xtenq’ xna’ xyuwa’, li xRuby kixk’ul li ch’a’ajkilal a’in chi kaw xch’ool. Oob’ chihab’ wan re xRuby anajwan. Us ta toj saaj chi us, a’an naxk’ut rik’in kawilal naq lix sahil xch’ool moko jalb’il ta xb’aan lix ch’a’ajkilal. Junelik sa xch’ool.
Sa’ li mayo xnume’, li xRuby kixk’ul rik’in paab’aal jun chik lix musiq’ejil kaq-sut-iq’. Naq kiyo’la, kiwan ajwi’ xmajelal li ruq’ ut anajwan kiraj ru cho’e’k. Naq maji’ kicho’e’, xqula’ani chaq ut kiqak’e re jun ch’ina-usil jalam-uuch, nak’utman wi’ li ruq’ jun ch’ina al chi laq’lo rik’in li ruq’ li Kolonel. Naq xqapatz’ re ma yoo xk’a’uxl, “Ink’a’, sa b’an inch’ool!” chan qe.
Toja’ naq xqapatz’ re, “Ruby, k’a’ut b’i’?”
Xchaq’ok li xRuby, xye “Xb’aan naq ninnaw naq li Jesus tixchap li wuq’.”
A’an jun sachb’a-ch’oolej naq xk’ira xRuby, ut toj sa sa xch’ool. K’a’jo’ naq lix saqal ru lix paab’aal jun li ch’ina al naxka’pak’ali lix jipilal li wiib’ank ch’oolej li rajlal nokoraale naq ak nimo chik!13 A’ut, chiqajunilo naru too’ok chanchan jun ch’ina al ut taqasik’ ru xsachb’al xmaak’a’il li qapaab’aal. Moko ch’a’aj ta xsik’b’al ru.
Jun yuwa’b’ej kixtz’aama chiru li Kolonel, kixye, “Wi wank k’a’ru tatruhanq xb’aanunkil, … tenq’aho.”14
Toja’ naq li Jesus kixye re:
“Wi tatruhanq [chi paab’ank], chixjunil taaruuq choq’ re li wank xpaab’aal.
“Ak tixjap re lix yuwa’ li al: [At Qaawa’], ninpaab’. Tenq’ahin sa’ lix majelal inpaab’aal.”15
Li tuulanil yuwa’b’ej a’in kixsik’ ru xpaab’ankil li Kristo chiru xmajelal lix paab’aal. Li Awa’b’ej Nelson kixy, “Ka’ajwi’ naq maak’a’ lee paab’aal ink’a’ truuq li Dios cherosob’tesinkil rik’ineb’ li sachb’a-ch’oolej re xjalb’al xna’ajeb’ li tzuul sa’ lee yu’am.16
K’a’jo’ xnimal li ruxtaan li qaDios naq ka’ajwi’ naxpatz’ naq toopaab’anq, ink’a’ naq taqataw ru chixjunil.
Laj Alma kixye:
“Osob’tesinb’il li ani napaab’ank re li raatin li Dios.”17
“[Xb’aan naq] li Dios naruxtaanaheb’ ru chixjunil li neke’paab’ank re li xk’ab’a’; jo’kan naq naraj xb’een wa naq texpaab’anq.”18
Yaal, li Dios naraj naq xb’een wa taqapaab’ a’an.
Naqak’uleb’ chi chaab’il li qamusiq’ejil kaq-sut-iq’ naq naqapaab’ li Kristo ut noko’ab’in chiru lix taqlahom. Li qapaab’aal ut qatiikilal naxk’e nimla wankilal li moko qe ta re truuq toonumtaaq sa’ xb’een “[yalaq] k’a’ru li nak’ulman—malaj li ink’a’ nak’ulman—sa’ li qayu’am.”19 Yaal, li Dios “tikto nokorosob’tesi” naq nokopaab’an ut noko’ab’in.20 Relik chi yaal, timil timil nanumta xsahil qach’ool, ut “nokokanaak chi yo’yo rik’in li Kristo” naq naqak’anjela li qapaab’aal chirix a’an ut noko’ab’in chiru lix taqlahom.21
Ex was wiitz’in, “miwiib’an qach’ool, aj paab’anelaqo b’an.”22 “Li tiikil b’e, a’an xpaab’ankil li Kristo.”23 Laa’o “tz’iib’anb’ilo chiru lix sa’ li ruq’.”24 A’an aj Kolol qe ut aj Tojol qix, xaqxo chirix li okeb’aal ut yoo chixtoch’b’al.25 Sa’ xk’ab’a’ li Jesukristo, amen.