B’oq li Kristo chixtz’iib’ankil laa seraq’

Tintikib’ li waatin rik’in wiib’ oxib’ li patz’om, re teek’oxla:

• K’a’ru li seraq’ yookat chixtz’iib’ankil choq’ re aayu’am?

• Ma tiik li b’e nakach’olob’ sa’ laa seraq’?

• Ma naraqe’ laa seraq’ b’ar wi’ xtikla, sa’ laa choxahil ochoch?

• Ma wan aj k’amol b’e sa’ laa seraq’—ut ma a’an li Kolonel Jesukristo?

Ninch’olob’ xyaalal naq li Kolonel a’an “aj yoob’anel ut aj choyonel re li qapaab’aal.”¹ Ma taab’oq a’an chixyoob’ankil ut chixchoyb’al laa seraq’?

A’an naxnaw li xtiklajik ut li roso’jik. A’an aj Yo’ob’tesihom re li choxa ut li ch’och’. A’an naraj naq toosutq’iiq rik’in a’an ut li qaChoxahil Yuwa’. Chixjunil li naxb’aanu, naxb’aanu choq’ qe, ut naraj naq chaab’il too’elq.

K’a’ru nokoxram chixq’axtesinkil li qaseraq’ sa’ ruq’ li Kolonel?

Maare li na’leb’ a’in tatxtenq’a chixtz’ilb’al rix a’an sa’ laa yu’am.

Jun chaab’il aj nawol chaq’rab’ naxnaw naq sa’ li tz’ilok-ix, us naq ink’a’ taaye ree laj k’ehol eetal jun patz’om li ink’a’ nakanaw xsumenkil aajunes. Wi taapatz’ a’an, yookat chixk’eeb’al xhoonal laj k’ehol eetal chixyeeb’al aawe—ut reheb’ laj raqol aatin—jun na’leb’ maji’ nakanaw. Lix sumenkil maare tixsach aach’ool ut maawa’ li na’leb’ yookat chixkawresinkil sa’ laa k’anjel.

Maare jun aj nawol chaq’rab’ ink’a’ raj taaroksi jun patz’om li ink’a’ naxnaw xsumenkil, a’b’an moko yaal ta a’in choq’ qe. Laa’o naru nokopatz’ok chiru li qaChoxahil Yuwa’ li nokoxra, sa’ xk’ab’a’ li qaKolonel aj uxtaan, ut laj k’ehol eetal li naxsume li qapatz’om, a’an li Santil Musiq’ej, li junelik naxch’olob’ li yaal.² Li Santil Musiq’ej nak’anjelak sa’ tz’aqal junajil rik’in li qaChoxahil Yuwa’ ut li Jesukristo, jo’kan naq naqanaw naq tz’aqal yaal lix k’utb’esihom li Santil Musiq’ej. Wi yaal a’an, k’a’ut naq wan naq ink’a’ naqaj xpatz’b’al li qachoxahil tenq’, li yaal k’utb’esinb’il chiqu xb’aan li Santil Musiq’ej? K’a’ut naq nokob’ay chi patz’ok chirix li ink’a’ naqanaw xsumenkil, us ta chaab’il laj k’ehol eetal ut junelik naxye li yaal?

Maare maji’ wan qapaab’aal re xk’ulub’ankil li sumehom taqak’ul. Maare li qaruchich’och’il winq malaj ixq ink’a’ naraj xk’eeb’al chixjunil sa’ ruq’ li Qaawa’ ut ink’a’ naraj xkanab’ankil rib’ chiru li Qaawa’ chi tz’aqal. Maare xb’aan a’an naq naqak’ulub’a li seraq’ xqatz’iib’a qajunes qib’ choq’ qe, jun seraq’ maji’ ilb’il ut jalb’il xb’aan li xnimal ru aj Tz’iib’anel. Ink’a’ naqaj patz’ok ut chi jo’kan xk’ulb’al lix sumenkil li maak’a’ xna’aj sa’ li seraq’ yooko chixtz’iib’ankil choq’ qe.

Relik chi yaal, moko k’iheb’ ta li te’roksi sa’ xseraq’eb’ li yalb’a-ix yalb’ileb’ wi’ rix. A’b’anan, ma ink’a’ neke’wulak chiqu li seraq’ b’ar wi’ li kristiaan neke’xq’ax ru li yale’k-ix? Aajel ru li yale’k-ix sa’eb’ li seraq’ re naq te’wulaq chiqu, te’wanq xyaalal, te’xnimob’resi qapaab’aal, ut te’wanq xk’ulub’il chi seraq’imank. Eb’ li ch’ina-usil yalb’a-ix li tz’iib’anb’ileb’ sa’ li qaseraq’ laa’o nokohe’xnach’ob’resi rik’in li Kolonel ut nokohe’xsantob’resi, re naq toowulaq jo’ chanru a’an.

Re naq kiru laj David chi numtaak sa’ xb’een laj Goliat, xb’een wa ki’ajman naq taawulaq chixpleetinkil. Li seraq’ moko ch’a’aj ta choq’ re laj David, a’an naq taakanaaq raj chirilb’aleb’ li karneer. Ruuchil a’an, kixk’oxla li kixk’ul naq kixkoleb’ li karneer chiru li kaqkojl ut li oso. B’antiox re li ak xb’aanuhom, kikawu xpaab’aal ut xkawilal xch’ool toj reetal naq kixkanab’ li Dios chixtz’iib’ankil lix seraq’. A’an kixye, “Li Qaawa’ li kikolok we sa’ ruq’eb’ li kaqkojl ut li tz’uqtz’un, tinxkol ajwi’ sa’ ruq’ laj Filistea a’an.”³ Kiraj naq taanumtaaq li Dios, kixk’e xxik chirab’inkil li Santil Musiq’ej, ut kixkanab’ naq li Kolonel taawanq choq’ aj yoob’anel ut aj choyonel re lix seraq’, ut chi jo’kan naq laj David kinumta sa’ xb’een laj Goliat ut kixkol lix tenamit.

Yaal naq li xtaql li qach’ool naxk’e qawankil chixtz’iib’ankil li qaseraq’ qajunes qib’—laj David kiru raj kisutq’i sa’ rochoch re rilb’aleb’ lix karneer. A’b’an yo’on wan li Jesukristo re qoksinkil jo’ xk’anjeleb’aal, jo’ xtz’iib’leb’ re xtz’iib’ankil jun seraq’ q’axal chaab’il. Rik’in ruxtaan a’an tinroksi, jun ch’ina tz’iib’leb’, jo’ k’anjeleb’aal sa’ ruq’, wi wanq inpaab’aal chixk’eeb’al xliceens, wi tinkanab’ naq a’an tixtz’iib’a lin seraq’.

Li xEster kixkanab’ ajwi’ naq taanumtaaq li Dios. Ruuchil xkolb’al rib’, a’an kixk’anjela xpaab’aal, ut kixq’axtesi rib’ sa’ ruq’ li Qaawa’. Laj Aman kiraj xkamsinkil chixjunileb’ laj Judio sa’ Persia. Laj Mardokeo, rech alal li xEster, kixtaw k’a’ru yoo chixk’uub’ankil ut kixtaqla jun hu re li xEster, ut kirelaji chi aatinak rik’in li rey sa’ xk’ab’a’ lix tenamit. Li xEster kixye re naq li ani nachal chiru li rey chi ink’a’ b’oqb’il truuq taakamsiiq. A’ut rik’in nimla paab’aal, li xEster kixpatz’ re laj Mardokeo naq tixch’utub’eb’ laj Judio ut naq te’xkuy xsa’ chirix. “Jo’kan ajwi’ tinb’aanu laa’in wochb’eeneb’ li ixq aj k’anjeleb’ chiwu,” chan, ut “laa’in tinwulaq rik’in li awa’b’ej. Ut wi tine’xkamsi, kamqin.”⁴

Li xEster kixkanab’ naq li Kolonel tixtz’iib’a lix seraq’ us ta, jo’ naxk’oxla li winq, maare taaraqe’q xseraq’ sa’ rahilal. A’ut, li rey kixk’ul li xEster, ut ke’kole’ laj Judio sa’ Persia.

Maare ink’a’ napatz’man qe naq taqab’aanu li kixb’aanu li xEster. A’b’an re xkanab’ankil naq taanumtaaq li Dios, re xkanab’ankil naq a’anaq aj yoob’anel ut aj choyonel re li qaseraq’, tento te’qapaab’ lix taqlahom ut eb’ li sumwank okenaqo wi’. Wi te’qapaab’ li taqlahom ut li sumwank, teetooq li b’e naqak’ul wi’ li k’utb’esinb’il na’leb’ rik’in li Santil Musiq’ej. Ut rik’in lix k’utb’esihom li Santil Musiq’ej taqeek’a li ruq’ li Qaawa’, li yoo chixtz’iib’ankil li qaseraq’ jo’ qochb’een.

Sa’ abril 2021, li qaprofeet, li Awa’b’ej Russell M. Nelson, kixpatz’ qe naq taqak’oxla k’a’ raj ru taqab’aanu wi ta nim wi’chik li qapaab’aal chirix li Jesukristo. Rik’in xkomon chik li paab’aal chirix li Jesukristo, tooruuq raj chixpatz’b’al li maji’ naqanaw xsumenkil—chixpatz’b’al chiru li qaYuwa’ sa’ Choxa, sa’ xk’ab’a’ li Jesukristo, naq tixtaqla xsumenkil rik’in li Santil Musiq’ej, li naxch’olob’ li yaal. Rik’in xkomon chik li paab’aal, toopatz’oq toja’ naq taqak’ulub’a lix sumenkil naqak’ul, us ta chanchan naq maak’a’ xna’aj sa’ li qaseraq’. Ut li yeechi’inb’il osob’tesink taqak’ul naq taqak’anjela li qapaab’aal chirix li Jesukristo, a’an xk’iijik li qapaab’aal chirix a’an jo’ aj yoob’anel ut aj choyonel re li qaseraq’. Li Awa’b’ej Nelson kixye naq “naqak’ul xkomon chik li paab’aal rik’in xb’aanunkil yalaq k’a’ru naxpatz’ xkomon chik li paab’aal.”⁵

Chi jo’kan, jun sumal li maak’a’eb’ xkok’al maare te’xpatz’ rik’in paab’aal ma te’xk’ul jalan chik li kok’al choq’ ralaleb’ ut te’xk’ulub’a xsumenkil, us ta sa’ xseraq’eb’ ke’raj naq taayo’laaq li ch’ina al tz’aqal rik’ineb’ a’an.

Jun sumal li tiixeb’ maare te’xpatz’ ma xwulak hoonal naq te’xik sa’ mision ut te’wanq xch’ool chi xik, us ta sa’ xseraq’eb’ toj ke’raj kanaak sa’ xtrab’aajeb’. Malaj ut taasumemanq reheb’ naq “maji’ te’xik,” ut moqon sa’ xseraq’eb’ te’xk’e reetal k’a’ut naq ki’ajman naq te’kanaaq sa’ rochocheb’ junpaat chik.

Jun li saaj winq malaj ixq maare tixpatz’ rik’in paab’aal ma us li b’atz’unk, li tzolok, malaj li wajb’ak, ut te’wanq xch’ool xtaaqenkil li naxye li Santil Musiq’ej.

K’a’ut taqaj raj naq li Kolonel taawanq jo’ aj yoob’anel ut aj choyonel re li qaseraq’? Xb’aan naq a’an naxnaw qu chi tz’aqal re ru, a’an tooxk’am sa’eb’ li na’ajej maajun wa xqak’oxla wi’ qib’. Maare tooxk’e jo’ junaq David malaj Ester. A’an tixyal qix ut tooxsantob’resi re toowulaq jo’ chanru a’an. Li taqab’aanu naq nokok’anjelak rik’in paab’aal tixnima li qapaab’aal chirix li Jesukristo.

Ex was wiitz’in, yal jun chihab’ chaq li qaraarookil profeet kixpatz’: “Ma taawaj laa’at naq li Dios taanumtaaq sa’ laa yu’am? … Ma taawaj xk’eeb’al xwankil li k’a’ru taaraj a’an, chi mas wi’chik chiru k’a’ruhaq chik aawajom?”⁶ Chi tuulan inch’ool nintiq li waatin sa’ li profeetil yeehom a’an: “Ma taawaj naq li Dios taawanq jo’ aj yoob’anel ut aj choyonel re laa seraq’?

Sa’ li hu Apokalipsis, naqatzol naq tooxaqliiq chiru li Dios ut taaraqe’q aatin chiqix a’ yaal xhuhil li yu’am, a’ yaal li qab’aanuhom.⁷

Taaraqe’q aatin chiqix a’ yaal xhuhil li qayu’am. Naru taqasik’ ru xtz’iib’ankil jun seraq’ b’ar wi’ maak’a’ lix yalb’al qaq’e. Malaj ut naru taqakanab’ naq li xnimal ru aj yoob’anel ut aj choyonel tixtz’iib’a li qaseraq’ qochb’een, ut naq li naraj a’an naq taqab’aanu taawanq jo’ xb’eenil sa’ li qayu’am.

Chakanab’ naq li Kristo taawanq jo’ aj yoob’anel ut aj choyonel re laa seraq’!

Chakanab’ naq li Santil Musiq’ej taawanq jo’ aj k’ehol eetal sa’ laa yu’am!

Chatz’iib’a jun seraq’ b’ar wi’ tiikaq laa b’e, jun b’e li tatxk’am sa’ laa choxahil ochoch b’ar wi’ tatwanq rik’in li Dios.

Chakanab’ naq te’chalq li yale’k-ix ut li ch’a’ajkilal li wan sa’ chixjunil li chaab’il seraq’, ut naq tate’xtenq’a chixjilosinkil aawib’ rik’in li Kristo, ut chi wulak jo’ chanru a’an.

Chatz’iib’a jun seraq’ b’ar wi’ nakak’e reetal naq teeto li choxa. Chapatz’ li maji’ nakanaw xsumenkil, chi wan aanawom naq li Dios naraj xk’utb’al li rajom choq’ aawe rik’in li Santil Musiq’ej.

Chaatz’iib’a jun seraq’ re paab’aal, ut chataaqe li Kolonel Jesukristo. Sa’ xk’ab’a’ li Jesukristo, amen.