Li kawresink-ib’ choq’ re li xkab’ xk’ulunik li Jesukristo

Jo’ natawman reetalil sa’ lix Hu laj Mormon, waqib’ chihab’ ma nayo’la li Jesukristo, laj Samuel, aj Lamanita, kiraatinaheb’ laj Nefita li ke’xq’et lix paab’aal,¹ chirix li taak’ulmanq naq taayo’laaq li qaKolonel. A’b’anan, lix k’ihaleb’ laj Nefita ink’a’ ke’xk’ulub’aheb’ li eetalil a’an xb’aan naq “maak’a’ xyaalal naq taachalq jun winq jo’ li Kristo.”²

Jo’ natawman reetalil sa’ li loq’ laj hu, naab’aleb’ ajwi’ reheb’ laj Judio ink’a’ ke’xk’ulub’a naq li Jesus, re li ch’ina na’ajej Galilea, a’anaq raj li oyb’eninb’il Mesias.³ Li Jesus, li kiwulak chixtz’aqob’resinkil ru li ke’xye li profeet aj Hebreo, kitz’eqtaanaak ut kik’ehe’ chiru krus xb’aan naq, jo’ kixk’ut laj Jakob, jun profeet re lix Hu laj Mormon, eb’ laj Judio yookeb’ “chixq’axb’al li aajel raj ru xsik’b’al.” Laj Jakob kixch’olob’ xyaalal naq “li Dios kixmaq’ lix saqenkil ru chiruheb’ ut kixq’axtesi k’iila na’leb’ reheb’ li ink’a’ neke’ru chixtawb’al ru, xb’aan naq jo’kan ke’rataw. Rikʼin ut naq keʼrataw aʼan, li Dios kixbʼaanu, re naq teʼtichkʼoq.”⁴

Maare ch’a’aj xtawb’al ru, a’b’anan, maajun k’utum, maajun sachb’a-ch’oolej, ut maajun xk’utunik li anjel, jo’ ke’ril laj Laman ut laj Lemuel,⁵ naru chixq’unob’resinkil xch’ooleb’ li kristiaan chixjalb’al xb’eheb’, xna’leb’eb’, malaj xpaab’ahomeb’. A’an li nak’ulman naq eb’ li k’utum malaj eb’ li sachb’a-ch’oolej ink’a’ neke’xtaw rib’ rik’in li naraj malaj li naxk’oxla jun li kristiaan.

Chejuntaq’eeta junpaataq eb’ li raqal a’in reheb’ li loq’laj hu, li xb’een re li apostol aj Pablo, li na’aatinak chirix roso’jikeb’ li kutan ut xb’aanuhomeb’ li winq, ut li xkab’ re li profeet aj Alma, li naxye chan ru naq li Dios naxb’aanu xk’anjel sa’ xyanqeb’ li winq. Xb’een li raatin laj Pablo:

“Chanawaq naq sa’ roso’jikeb’ li kutan wanq hoonal q’axal ch’a’ajkaq xnumsinkil.

“Eb’ li winq junes reheb’ te’raj, te’xrahi ru li tumin, te’xnimob’resihatq xwankileb’, te’xq’etq’eti rib’eb’, aj majewanelaqeb’, aj q’etolaqeb’ raatin xna’ xyuwa’, maak’a’ chik te’xnaw xb’antioxinkil ut te’xtz’eqtaana li paab’ank.

“Ink’a’ chik te’xrahatq rib’, maak’a’aq chik usilal rik’ineb’, aj yoob’anelaqeb’ aatin, ink’a’ te’xkuy rib’, q’axal josq’aqeb’, xik’ te’ril li chaab’ilal,

“Aj b’alaq’aqeb’ ut kawaqeb’ rib’ chixb’aanunkil li ink’a’ us. Taanumtaaq li xq’etq’etileb’, a’ chik lix sahilal li ruchich’och’ te’rataw chiru li xraab’al li Dios; …

“Junelik yookeb’ chi tzolok, a’b’an ink’a’ neke’ruhank xtawb’al ru li yaal.”⁶

Ut anajwan laj Alma, li naxkʼut jun jolomil naʼlebʼ re lix evangelio li Jesukristo: “Anajwan maare taakʼoxla naq maakʼaʼ innaʼlebʼ rikʼin aʼin; aʼbʼan kʼe reetal ninye aawe, naq rikʼin li kʼaʼru kaʼchʼin ut moko nimobʼresinbʼil ta, nakʼeheʼ chi uxmank li xninqal ru naʼlebʼ; ut li chʼina kʼanjelebʼaal kʼiila sut naxsach xnaʼlebʼebʼ li ninqebʼ xnaʼlebʼ.”⁷

Wanko sa’ jun kutankil b’ar wi’ nim xk’ihal li nawom ut naab’al li seeb’al wan. A’b’anan, eb’ li k’a’aq re ru a’an neke’xmuq xmajelaleb’ lix xe’el k’ojk’ookeb’ wi’. Chi jo’kan naq ink’a’ neke’wulak sa’ li yaal, chi moko rik’in li Dios ut chi moko neke’xk’e li wankilal re xk’ulb’al k’utb’esinb’il na’leb’, re xtawb’al li nawom sa’ musiq’ejil, ut re xnimob’resinkil qapaab’aal chirix li Jesukristo li nak’amok toj sa’ li kolb’a-ib’.⁸

Najultiko’ qe li kixye li Qaawa’ re laj Tomas ut reheb’ chik lix tzolom naq yoo chaq chi nach’ok lix mayej aj tojol-ix: “Li Jesus kixye re: Laa’in li b’e, li yaal ut li yu’am. Maa’ani naxik rik’in li Yuwa’b’ej, wi ink’a’ ta sa’ ink’ab’a.”⁹

Choq’ reheb’ li wankeb’ xsa’ ru re ilok, xxik re ab’ink, ut raam re eek’ank, mas wi’chik chiru junxil, napatz’e’ qe naq taqataw ru naq yooko chi nach’ok rik’in li xkab’ xk’ulunik li Jesukristo. Yaal naq toj naab’al li yale’k te’xnumsi li wanqeb’ naq taachalq, a’b’anan, eb’ li tiikeb’ xch’ool moko te’xuwaq ta.

Anajwan tinwotz jun na’leb’ natawman sa’ Temas del Evangelio chirix “li xkab’ xk’ulunik li Jesukristo”:

“Naq li Kolonel taasutq’iiq chaq, taachalq rik’in xwankilal ut xloq’al re tixpatz’ li ruchich’och’ jo’ li rawa’b’ejihom. Li xkab’ xk’ulunik tixtikib’ li jun mil chihab’.

“Li xkab’ xk’ulunik a’anaq jun hoonal re xuwak ut yaab’ak choq’ reheb’ laj maak, ut jun kutan re tuqtuukilal choq’ reheb’ li tiikeb’ xch’ool. Li Qaawaʼ kixye:

“ “Xbʼaan naq ebʼ li wankebʼ xnaʼlebʼ ut keʼkʼuluk re li yaal, ut keʼxkʼul li Loqʼlaj Musiqʼej choqʼ aj kʼamol bʼe chiruhebʼ, ut inkʼaʼ keʼbʼalaqʼiik—ninye chi yaal eere, inkʼaʼ teʼyokʼeʼq chaq ut teʼkuteʼq saʼ li xam, teʼxkuy bʼan xnumsinkil li kutan.

“ “Ut li ruchichʼochʼ taakʼeemanq rehebʼ choqʼ reechanihomebʼ; ut teʼkʼihanq ut teʼkawuq xmetzʼewebʼ, ut ebʼ li ralal xkʼajol teʼninqanq chi maakʼaʼ li maak, choqʼ re li kolbʼa-ibʼ.

“ “Xbʼaan naq li Qaawaʼ taawanq saʼ xyihebʼ, ut lix loqʼal taawanq saʼ xbʼeenebʼ, ut aʼanaq lix rey ut aj kʼehol chaqʼrabʼ chiruhebʼ ” ” (Tzolʼlebʼ ut Sumwank 45:57–59).”¹⁰

Sa’ xkawresinkil qib’ choq’ re li xkab’ xk’ulunik li Jesukristo, ninye jun na’leb’ reheb’ li tiikeb’ xch’ool li kixye li profeet aj Amos sa’ li Najter Chaq’rab’: “Jo’kan ajwi’, li Qaawa’ maak’a’ tixb’aanu wi ink’a’ xye xb’een wa reheb’ laj k’anjel chiru, a’ eb’ li profeet.”¹¹

Rik’in li musiq’ej a’in, lix profeet li Qaawa’ anajwan sa’ ruchich’och’, li Awa’b’ej Russell M. Nelson, xk’e qe li musiq’anb’il b’oqom a’in: “Lix evangelio li Jesukristo a’an jun evangelio re jalb’a-k’a’uxlej. Rik’in lix tojb’al rix li maak xb’aan li Kolonel, lix evangelio nokoxb’oq chi jalaak, chi chaab’ilo’k, ut chi saqob’resiik qu. A’an jun evangelio re yo’onink, k’irtesink, ut chaab’ilo’k. Chi jo’kan, a’an jun evangelio re sahil ch’oolejil! Nasaho’ xch’ool li qamusiq’ rik’in li junjunq yokb’ naqak’e chi uub’ej.”¹²

Ninch’olob’ xyaalal lix wanjik li Dios ut eb’ li sachb’a-ch’oolej sa’ xyu’ameb’ naab’al li kristiaan, sa’eb’ li sahilal ut sa’eb’ ajwi’ li rahilal. Yaal naq maare ink’a’ mas neke’wotzman li loq’laj numsihom, xb’aan lix choxahilaleb’ ut xb’aan naq maare te’eetz’uuq xb’aaneb’ li toj maji’ neke’xtaw ru.

Laj Moroni, li profeet aj ch’otonel sa’ lix Hu laj Mormon, kixye qe:

“Ut joʼkan wiʼchik, nekexwaatina laaʼex li nekextzʼeqtaanank xyaalal lix kʼutbʼesihom li Dios, ut nekeye naq osoʼjenaq chik, naq maakʼaʼ kʼaʼru kʼutbʼesinbʼil, chi moko profeetil aatin, chi moko li maatan, chi moko li kʼirtesink, chi moko li aatinak rikʼin jalan aatinobʼaal, ut xkʼutbʼal xyaalalil li jalanil aatinobʼaal;

“Kʼehomaq reetal ninye eere, ani natzʼeqtaanan xyaalal li kʼaʼaq re ru aʼin moko naxnaw ta lix evangelio li Kristo; relik chi yaal, moko xril ta ruhebʼ li loqʼlaj hu; wi ut xril ru, moko naxtaw ta ru.

“Xbʼaan naq ma inkʼaʼ tabʼiʼ naqil chi tzʼiibʼanbʼil naq li Dios juntaqʼeet ewer, anajwan, ut chi junelik, ut rikʼin aʼan maakʼaʼ li elk saʼ xnaʼaj, chi moko yal ta xmuhil lix jalbʼal ribʼ?”¹³

Ninchoy li waatin rik’in jun profeetil yeechi’ihom kixye li profeet aj Jose Smith, kixwotz sa’ roso’jik lix k’anjel sa’ ruchich’och’ naq yoo chiroyb’eninkil chi anchal xch’ool li xkab’ xk’ulunik li Jesukristo: “Ma ink’a’ tab’i’ too’elq chi uub’ej rik’in li xnimal ru k’anjel a’in? Chi uubʼej chexxik, inkʼaʼ chi ixej. Kawaq eechʼool, ex was wiitzʼin, ut chi uubʼej, chi uubʼej toj saʼ li qʼaxok-u! Chisahoʼq lee chʼool, ut qʼaxal sahaq chiwanq.”¹⁴ A’an ninch’olob’ xyaalal sa’ xk’ab’a’ li Jesukristo, amen.