Xchamob’resinkil lix jalajik qach’ool chiru li Jesukristo
Eb’ li loq’laj hu ut li qanawom chirix li Dios a’aneb’ maatan—maatan li naqak’oxla naq yal ak k’eeb’ileb’ qe. Qak’ehaqeb’ xloq’al li osob’tesiik a’in.
B’antiox aawe, Elder Nielson. Ch’ina-us laa waatin. Xqaj ru a’an.
Ex was wiitz’in, li Awa’b’ej Russell M. Nelson kixk’ut chiqu toje’: “Re xb’aanunkil yalaq k’a’ru chi us, aajel ru li yalok q’e. Yaal ajwi’ a’an re ok jo’ tz’aqal xtzolom li Jesukristo. Re xnimankil lee paab’aal chirix a’an, aajel ru li yalok q’e.” Sa’ xyanq li na’leb’ kixk’e qe re naq taanimanq li qapaab’aal chirix li Jesukristo, kixpatz’ qe naq taqayal qaq’e chi tzolok, naq taqatz’ileb’ rix li loq’laj hu re xtawb’al ru lix k’anjel li Kristo. (Chi’ilmanq “Xwakli li Kristo; Li paab’aal chirix a’an tixjal xna’ajeb’ li tzuul,” Jolomil ch’utub’aj-ib’ re abril 2021.)
Sa’ lix Hu laj Mormon naqatzol naq eb’ li loq’laj hu aajeleb’ chaq ru sa’ lix junkab’al laj Lehi—chi jo’kan naq laj Nefi ut li ras riitz’in ke’sutq’i chaq Jerusalen re xk’ulb’aleb’ li perel ch’iich’ bronce (chi’ilmanq 1 Nefi 3–4).
Li loq’laj hu naxk’utb’esi li rajom li Dios choq’ qe, jo’ kixb’aanu li Liahona rik’in laj Nefi ut lix yuwa’. Chirix naq kitoqe’ lix tzimaj, laj Nefi tento naq tixnaw b’ar tixsik’ chaq li tzakemq. Laj Lehi, lix yuwa’, kiril li Liahona ut kirileb’ li na’leb’ tz’iib’anb’ileb’. Laj Nefi kixk’e reetal naq lix kuuxil li Liahona nak’anjelak a’ yaal li paab’aal, li yalok q’e, ut li ab’ink. Kiril ajwi’ jun siir tz’iib’ahom li moko ch’a’aj ta rilb’al ut neke’xk’ut ajwi’ xna’leb’ chirix lix b’e li Qaawa’. Kixk’e reetal naq li Qaawa’ naxk’e chi uxmank xninqal na’leb’ rik’in li kok’ na’leb’. Ki’ab’in chiru li naxk’utb’esi li Liahona. Kitaqe’ sa’ li tzuul ut kixtaw chaq li tzakemq choq’ re lix junkab’al, li ke’xnumsi rahilal xb’aan naq maak’a’eb’ xtzakemq. (Chi’ilmanq 1 Nefi 16:23–31.)
Nink’oxla naq laj Nefi a’an chaq jun chaab’il aj tzolonel reheb’ li loq’laj hu. Naqil naq laj Nefi naxtzeka chaq xsahileb’ li loq’laj hu, naxtz’il chaq rixeb’ sa’ xch’ool, ut naxtz’iib’aheb’ chaq re li tzolok ut re rosob’tesinkileb’ li ralal xk’ajol (chi’ilmanq 2 Nefi 4:15–16).
Li Awa’b’ej Russell M. Nelson kixye:
“Wi “taqatiikisi qib’ chi uub’ej rik’in xtzekankil xsahil li raatin li Kristo, ut tookuyuq toj sa’ roso’jik, … taawanq qayu’am chi junelik” [2 Nefi 31:20].
“Xtzekankil xsahil ink’a’ naraj naxye xyalb’al yal b’ayaq. Naraj b’an naxye xtzekankil chi tz’aqal lix sahil. Naqatzeka xsahileb’ li loq’laj hu naq naqatzoleb’ rik’in jun musiq’ej re sahil ch’oolejil sa’ xtawb’al qana’leb’ ut rik’in tiikilal chi paab’ank. Naq naqatzeka xsahil li raatin li Kristo, nach’ikman sa’ “tib’elej, sa’ li qach’ool” [2 Korintios 3:3]. Neke’ok choq’ tz’aqal xcha’alil li qawanjik” (“El vivir mediante la guía de las Escrituras,” Liahona, enero 2001, 21).
K’a’ raj ru taqab’aanu wi ta li qaam tixyal xsahileb’ li loq’laj hu?
Li qajom chi tz’aqonk sa’ xch’utub’ankil Israel sa’ xka’pak’alil li tz’apleb’ t’ikr taanimanq. Moko ch’a’ajaq ta chik chiqu xb’oqb’al li qajunkab’al ut eb’ li qamiiw chirab’inkileb’ li misioneer. K’ulub’ejaqo ut taawanq jun qarecomendacion re ok sa’ li santil ochoch chi kok’ aj xsa’. Took’anjelaq re xsik’b’aleb’, xkawresinkileb’, ut xtaqlankileb’ xk’ab’a’eb’ li qaxe’ qatoon sa’ li santil ochoch. Tiikaqo chiroxloq’inkil li hilob’aal kutan, toowulaq sa’ li Iglees rajlal domingo re rak’ob’resinkil li sumwank okenaqo wi’ rik’in li Qaawa’ naq nokotz’aqon sa’ li loq’laj wa’ak. Taqak’e qib’ chi kanaak sa’ lix b’ehileb’ li sumwank, taawanq qayu’am rik’in li junjunq chi aatin li na’el chaq sa’ xtz’uumal re li Dios (chi’ilmanq Tzol’leb’ ut Sumwank 84:44).
K’a’ru naraj naxye choq’ eere xtzekankil xsahil li k’a’aq re ru re li Dios?
Moko ka’ajwi’ ta naraj naxye naq tootzokaaq malaj taachaqiq qe chixsik’b’al qanawom. Laj Nefi kireek’a xnimal xsahil xch’ool chiru lix yu’am. A’b’anan, kiwan ajwi’ xch’a’ajkilal ut xrahil xch’ool (chi’ilmanq 2 Nefi 4:12–13). “A’b’anan,” chan, “ninnaw ani xinkanab’ wi’ wib’ ” (2 Nefi 4:19). Naq naqatzoleb’ li loq’laj hu, naqataw ru chi us lix k’uub’anb’il na’leb’ ut lix taqenaqil loq’al li Dios, ut taqakanab’ qib’ sa’ ruq’ lix yeechi’ihom sa’eb’ li loq’laj hu, jo’eb’ ajwi’ lix yeechi’ihomeb’ ut rosob’tesihomeb’ li yo’yookil profeet.
Jun ewu, li wixaqil ut laa’in koob’oqe’ sa’ rochoch jun li qamiiw. Laj David, li xyumeb’ aj 7 chihab’, maajun wa rab’ihom li seraq’ chirix laj David ut laj Goliat sa’ li Santil Hu, ut kiraj rab’inkil. Naq kintikib’ xwotzb’al li seraq’, kitoch’e’ xch’ool chirix laj David, naq rik’in xpaab’aal ut sa’ xk’ab’a’ lix Dios aj Israel, kixrahob’tesi ut kixkamsi laj Filistea rik’in jun li jok’ ut jun li pek, chi maak’a’ junaq ch’iich’ sa’ ruq’ (chi’ilmanq 1 Samuel 17).
Kinixka’ya rik’in lix ninqi q’eqi sa’ u, kixpatz’ we chi tiik xch’ool, “Ani li Dios?” Kinch’olob’ chiru naq li Dios a’an li qaChoxahil Yuwa’ ut naq nokotzolok chirix a’an sa’eb’ li loq’laj hu.
Jo’kan ut naq kixpatz’ we, “B’ar wankeb’ li loq’laj hu?” Kinye re naq eb’ li loq’laj hu a’aneb’ li raatin li Dios ut naq chi sa’ neke’qataw xchaq’al ru seraq’ li te’tenq’anq re chixnawb’al ru li Dios. Kinpatz’ re lix na’ naq taaroksi li Santil Hu li wan sa’ rochocheb’ ut naq ink’a’ tixkanab’ chi wark laj David toj reetal naq tixyaab’asi re chixjunil li seraq’. K’a’jo’ xsahil xch’ool chirab’inkil. Eb’ li loq’laj hu ut li qanawom chirix li Dios a’aneb’ maatan—maatan li naqak’oxla naq yal ak k’eeb’ileb’ qe. Qak’ehaqeb’ xloq’al li osob’tesiik a’in.
Naq wankin chaq sa’ inmision naq ch’ajomin, kink’e reetal naq roksinkileb’ li loq’laj hu naxjal xyu’ameb’ li kristiaan. Kink’e reetal naq wan wankilal chi sa’ ut naq naru naxjal li qayu’am. Li junjunq chi kristiaan kiqak’ut wi’ li k’ojob’anb’il evangelio jalan jalanqeb’ rajom ru. Ke’k’ame’ sa’ xpaab’aaleb’ chirix li Qaawa’ ut sa’ li jalb’a-k’a’uxlej, ut ke’jala li raam xb’aaneb’ li loq’laj hu—hehe’, eb’ li profeetil aatin tz’iib’anb’il xb’aaneb’ li santil profeet.
Ke’nujob’resiik chi sahil ch’oolejil xb’aaneb’ li loq’laj hu naq ke’xk’ul xmusiq’ankileb’, xb’eresinkileb’, xk’ojob’ankileb’, xkawilaleb’, ut xsumenkil li rajomeb’ ru. Naab’aleb’ re a’an ke’xjal xyu’am ut ke’xtikib’ xpaab’ankileb’ lix taqlahom li Dios.
Laj Nefi naxwaklesi qach’ool chixtzekankil xsahil li raatin li Kristo, xb’aan naq li raatin li Kristo tixye qe chixjunil li k’a’aq re ru tento taqab’aanu (chi’ilmanq 2 Nefi 32:3).
Nekexinb’oq naq teek’uub’ chan ru teetzoleb’ li loq’laj hu chi kok’ aj xsa’. Kim, Taaqehin a’an jun xnimal ru k’anjeleb’aal wan choq’ qe re xk’utb’al ut xtzolb’al li evangelio, re xchamob’resinkil lix jalajik qach’ool chiru li Jesukristo, ut re qatenq’ankil chi wulak jo’ a’an. Naq naqatzol li evangelio, ink’a’ yal naqasik’ junaq ak’ na’leb’, naqasik’ b’an wulak jo’ “jun ak’ yo’ob’tesinb’il chik” (2 Korintios 5:17).
Li Santil Musiq’ej nokoxb’eresi toj sa’ li yaal ut naxch’olob’ xyaalal li yaal chiqu (chi’ilmanq Jwan 16:13). A’an naxkutanob’resi li qak’a’uxl ut narak’ob’resi li qana’leb’, ut naxtoch’ li qach’ool rik’in lix k’utb’esihom li Dios, a’an laj k’ehol re chixjunil li yaal. Li Santil Musiq’ej naxsaqob’resi ru li qach’ool. A’an nokoxmusiq’a re naq taqaj xyu’aminkil li yaal, ut naxhasb’a qe chan ru naq taqab’aanu a’an. “Li Santil Musiq’ej … tooxtzol chirix chixjunil“ (Jwan 14:26).
Chirix li aatin kixk’utb’esi chiru li profeet aj Jose Smith, li qaKolonel kixye:
“Li aatin aʼin moko rehebʼ ta li winq chi moko re winq, we bʼan laaʼin; …
“Xb’aan naq a’an xyaab’ inkux li nayehok re cheru; xb’aan naq k’eeb’il xb’aan inMusiq’ choq’ eere … ;
“Joʼkan ut, naru nekechʼolobʼ xyaalal naq eerabʼihom lix yaabʼ inkux, ut nekenaw li waatin” (Tzol’leb’ ut Sumwank 18:34–36).
Tento taqasik’ ochb’eeniik xb’aan li Santil Musiq’ej. Li ajom a’in tento naq tixb’eresi li k’a’ru naqasik’ ru, ut tixb’eresi li k’a’ru naqak’oxla ut naqab’aanu. Tento taqasik’ chixjunil li nak’amok chaq re li Musiq’ej ut xtz’eqtaanankil li k’a’aq re ru nanajtob’resink re.
Ninch’olob’ xyaalal naq li Jesukristo a’an lix raarookil Alal li qaChoxahil Yuwa’. Ninra lin Kolonel. Ninb’antioxiheb’ lix loq’laj hu ut eb’ lix yo’yookil profeet. Li Awa’b’ej Nelson a’an lix profeet. Sa’ xk’ab’a’ li Jesukristo, amen.