Eb’ li sachb’a-ch’oolej re lix evangelio li Jesukristo
Ninnaw naq lix evangelio naru naxk’e qoyb’enihom, qatuqtuukilal, ut xsahil qach’ool, ink’a’ ka’ajwi’ anajwan, taarosob’tesiheb’ b’an toj naab’al tasal chik li kristiaan sa’ li chalel kutan.
Mabuhay! Nink’am chaq eere xrahomeb’ ut xsahil xch’ooleb’ laj santil paab’anel re Filipinas. Sa’ li chihab’ a’in tixket 60 chihab’ xwulajikeb’ xb’eenileb’ li misioneer sa’eb’ li na’ajej wankeb’ sa’ xyi li palaw re Filipinas. Anajwan wankeb’ 23 chi mision ut numenaq 800,000 li komon sa’ li Iglees sa’ 123 chi oqech. Anajwan wan wuqub’ li santil ochoch chi k’anjelak, chi kab’laak, malaj yeeb’il resil. A’an tz’aqal jun li sachb’a-ch’oolej. Laa’o aj k’ehol reetal li tz’aqob’resink yoo chi k’ulmank chirix li profeetil aatin sa’ 2 Nefi 10:21: “Nim ru li k’a’ru yeechi’inb’il xb’aan li Qaawa’ reheb’ li wankeb’ sa’eb’ li ch’och’ sa’ xyi li palaw.”
Li sachb’a-ch’oolej a’in, a’an ajwi’ jun xtz’aqob’resinkil ru li profeetil aatin kixk’e li Elder Gordon B. Hinckley sa’ lix tij aran Manila sa’ 1961. Sa’ li tij a’an, li Elder Hinckley kixye: “Naqatz’aama laa wosob’tesihom sa xb’een li tenamit re li ch’och’ a’in re naq ramiiwaqeb’ rib’, re te’rahoq ut q’unaqeb’ rik’in li te’chalq arin, ut naq naab’alaqeb’, hehe’, at Qaawa’, naqatz’aama naq naab’alaqeb’ mil te’k’uluq re li esil a’in ut te’osob’tesiiq xb’aan a’an. Chawosob’tesiheb’ re naq te’xk’ulub’a li esil rik’ineb’ xk’a’uxl ut xch’ool, ut rik’in paab’aal re k’uluk, ut chi anchal xch’ooleb’ te’xyu’ami li na’leb’ re li evangelio” (tij re osob’tesink sa’ American War Memorial Cemetery, Filipinas, 28 abril, 1961).
Jo’ xk’am chaq reheb’ li k’iila mil chi santil paab’anel, li sachb’a-ch’oolejil evangelio xk’am chaq ajwi’ naab’al li chaab’il jalaak sa’ li tenamit ut rik’ineb’ li kristiaan. Laa’in jun yo’yookil aj k’ehol reetal a’an. Naq wan chaq waqib’ chihab’ we, eb’ lin na’ inyuwa’ ke’ok choq’ komon sa li Iglees sa’ li na’ajej Mindanao. Sa’ li hoonal a’an, jun ajwi’ li mision wan sa’ chixjunil li tenamit ut toj maak’a’eb’ li oqech. Jwal ninb’antioxi reheb’ inna’ inyuwa’ naq ke’xk’e xch’ool ut ke’xyal xq’e chixtaaqenkil li Kolonel. Nink’eheb’ xloq’al a’an ut chixjunileb’ li xb’eenileb’ komon sa’ li Iglees aran Filipinas. Xe’xkawresi li b’e re naq osob’tesinb’ilaqeb’ li toj te’wanq chalel.
Kixye li rey aj Benjamin saʼ lix Hu laj Mormon: “Ut joʼkan wiʼchik, nawaj raj naq chekʼoxla li osobʼtesiik ut li sahoʼk chʼoolej wankebʼ wiʼ li nekeʼpaabʼank rehebʼ lix taqlahom li Dios. Xbʼaan naq kʼehomaq reetal, osobʼtesinbʼilebʼ saʼ chixjunil li kʼaʼaq re ru, re li yuʼam aʼin joʼ ajwiʼ re li musiqʼej” (Mosiah 2:41).
Naq naqayu’ami ut naqapaab’ li naʼlebʼ ut li k’ojob’anb’il k’anjel re li evangelio, osob’tesinb’ilo, jalb’ilo, ut k’ulb’ilo re wulak jo’ li Jesukristo. Kama’in naq li evangelio kixjaleb’ ut kirosob’tesiheb’ laj santil paab’anel aj Filipinas, jo’ ajwi’ lin junkab’al. Li evangelio a’an tz’aqal li b’e re jun sahil yu’amej.
Li xb’een raqal chi naʼlebʼ re li evangelio, aʼan xpaabʼankil li Qaawaʼ Jesukristo. Naab’aleb’ aj Filipinas neke’xpaab’ li Dios chi tz’aqal. Ink’a’ ch’aaj xkanab’ankil qach’ool rik’in li Jesukristo ut xnawb’al naq naru naqak’ul xsumenkileb’ li qatij.
Li junkab’al Obedoza a’an jun li chaab’il eetalil. Li Hermano Obedoza a’an chaq lin awa’b’ej sa’ li uq’ej naq laa’in chaq jun li ch’ajom. Li rajom li Hermano ut li Hermana Obedoza a’an sumlaak sa’ li santil ochoch re Manila. Wankeb’ li rochoch sa’ lix sutam li tenamit General Santos, 1,600 kiloom xnajtil rik’in Manila. Choq’ re li junkab’al b’ar wi’ wankeb’ b’eleeb’ chi kristiian, xik sa’ li santil ochoch, chanchan naq jwal ch’a’aj. A’b’anan jo’ laj yakonel li kixk’ayi chixjunil li k’a’ru wan re, re xloq’b’al jun li q’ol nim xtz’aq (chi’ilmanq Mateo 13:45–46), li jun sumal a’in kixk’ayi li rochoch re xtojb’al lix xikikeb’. Li Hermana Obedoza yoo lix k’a’uxl xb’aan naq maak’a’aq chik li rochocheb’ naq te’sutq’iiq chaq. A’b’an li Hermano Obedoza kixye re naq li Qaawa’ taatenq’anq reheb’.
Ke’tz’ape’ sa’ junajil jo’ jun junkab’al re li yu’am a’in ut chi junelik sa’ li santil ochoch sa’ 1985. Sa’ li santil ochoch ke’xtaw xsahil xch’ooleb’ chi maak’a’ xjuntaq’eetankil—eb’ lix q’ol nim xtz’aq. Ut jo’ kixye li Hermano Obedoza, ke’osob’tesiik xb’aan li Qaawa’. Naq ke’sutq’i chaq Manila, ke’k’ehe’ xna’aj xb’aaneb’ jun siireb’ li chaab’il kristiian neke’nawok ruheb’, ut moqon ke’xtaw li ak’ rochocheb’. Li Qaawa’ narileb’ li ani neke’xk’e lix paab’aal rik’in ’an.
Li xkab’ raqal chi naʼlebʼ re li evangelio a’an li jalb’a-k’a’uxlej. Li jalb’a-k’a’uxlej a’an li elk chiru li maak ut sutq’iik rik’in li Dios re xsik’b’al li kuyuk maak. A’an jun jalaak sa’ li qak’a’uxl ut li qach’ool. Jo’ kixk’ut li Awa’b’ej Russell M. Nelson, a’an “xchaab’ilob’resinkil b’ayaq wulaj wulaj laa b’aanuhom ut laa wanjik” (“Naru taqab’aanu li chaab’il wi’chik ut toowanq chi chaab’il wi’chik,” Jolomil ch’utub’aj-ib’ re abril 2019).
Li jalb’a-k’a’uxlej chanchan chik li xab’on. Naq laa’in chaq jun li saaj aj ingeniero quimico, xink’anjelak sa’ jun li na’ajej b’ar wi’ neke’xyiib’ li xab’on aran Filipinas. Xintzol xyiib’ankil li xab’on ut chan ru xk’anjelankil chixjunil. Naq junajinb’il li aseeyt ut xkomon chik li nak’anjelak re risinkil li mitz’ xul, li xab’on naq ak choyb’il xyiib’ankil naru narisi li mitz’ xul. Jo’ li xab’on, li jalb’a-k’a’uxlej a’an jun aj ch’ajonel. Nokoxtenq’a risinkil li qatz’ajnil ut li rela’ li qajunxil maak, rik’in a’an nokoch’aje’ re wank rik’in li Dios, xb’aan naq “maajun k’a’ru tz’aj naru taa’eechaninq re li awa’b’ejihom re [li Dios]” (Alma 11:37).
Rik’in li jalb’a-k’a’uxlej naqasik’ lix wankil li Jesukristo re ch’ajob’resiik ut santob’resiik. Jo’kan b’i’, li jalb’a-k’a’uxlej a’an li roqechal li jalaak. A’in li ke’xk’ul laj Anti-Nefi-Lehi sa’ lix Hu laj Mormon. A’aneb’ chaq laj Lamanita li ke’jale’ xch’ool toj reetal naq “maajo’q’e ke’xjalb’ehi rib’ ” (chi’ilmanq Alma 23:6–8). Ke’xmuq lix k’anjeleb’aal re pleet ut maajo’q’e chik ke’roksi. Ke’xk’ul b’an xb’een wa li kamk chiru naq ke’xq’et raj li sumwank a’an. Ut ke’xk’utb’esi a’an. Naqanaw naq lix mayejeb’ kixk’am chaq li sachb’a-ch’oolej; naab’al mil reheb’ li ke’yalok rik’ineb’ ke’xmuq lix k’anjeleb’aal re pleet ut ke’jala. Naab’al chihab’ chik chirix a’an, li ralaleb’, li naqanaweb’ ru jo’eb’ li saaj aj pleet, ke’kole’ rix sa’ li yalok chiru naab’al li ch’a’ajkilal.
Lin junkab’al ut naab’aleb’ laj Filipinas ke’nume’ sa’ jun jalaak chanchan a’in. Naq naqak’ulub’a lix evangelio li Jesukristo ut noko’ok jo’ komon sa’ li Iglees, naqajal li qab’e ut li qab’aanuhom re xtuqub’ankil li qawanjik rik’in li evangelio. Kiqakanab’ xb’aanunkil li moko us ta xb’aanunkil. Kiwil a’in rik’in lin yuwa’ naq kirab’i li evangelio ut kixjal xk’a’uxl. Xnimal ru aj mayinel chaq, a’b’an kixkanab’ chirix lix may ut maajun wa chik kixch’e’ junaq. B’antiox re naq kixsik’ ru jalaak, kaahib’ tasal re lix junkab’al ak xe’osobtesiik.
Li jalb’a-k’a’uxlej nokoxk’am chixb’aanunkil ut chixpaab’ankil li sumwank rik’ineb’ li loq’laj k’ojob’anb’il k’anjel. Li xb’een k’ojob’anb’il k’anjel re li kolb’a-ib’ ut li taqenaqil loq’al a’an li kub’iha’ re risinkil li qamaak. Li kub’iha’ naxk’e qak’ulub’ chixk’ulb’al li Santil Musiq’ej ut chi ok sa’ sumwank rik’in li Qaawa’. Naru naqa’ak’ob’resi li sumwank re li kub’iha’ rajlal xamaan naq nokotz’aqon sa’ li loq’laj wa’ak. A’an jun sachb’a-ch’oolej.
Ex was wiitz’in, nekexinb’oq chixk’amb’al li sachb’a-ch’oolej a’in sa’ lee yu’am. Chalqex rik’in li Jesukristo ut sik’omaq ru xk’anjelankil lee paab’aal, xjalb’al eek’a’uxl, xb’aanunkil ut xpaab’ankil li sumwank re li k’ojob’anb’il k’anjel re li kolb’a-ib’ ut taqenaqil loq’al. A’in te’tenq’anq eere chi wank choq’ xtzolom ut xk’ulb’al li wankilal re choxahilal (chi’ilmanq Tzol’leb’ ut Sumwank 84:20).
Ninch’olob’ xyaalal li Jesukristo ut naq a’an yo’yo ut naq nokoxra chiqajunjunqal. Ninnaw naq lix evangelio naru naxk’e qoyb’enihom, qatuqtuukilal, ut xsahil qach’ool, ink’a’ ka’ajwi’ anajwan, taarosob’tesiheb’ b’an toj naab’al tasal chik li kristiaan sa’ li chalel kutan. A’an xyaalalil lix chaq’al ru ut xch’ina-usil se’eb’ laj santil paab’anel aj Filipinas. A’an li sachb’a-ch’oolej re li evangelio ut lix tzol’leb’ li Kristo. Ninch’olob’ xyaalal a’in, sa’ lix loq’laj k’ab’a’ li Jesukristo, amen.